TZOLOM 41
Kʼaru naxye li Santil Hu chirix li wank saʼ wiibʼal?
Naabʼalebʼ li kristiʼaan nekeʼxutaanak chi aatinak chirix chanru jun li winq ut jun li ixq nekeʼwank saʼ wiibʼal. Abʼanan naq li Santil Hu naʼaatinak chirix aʼin maakʼaʼ naxmuq, naxbʼaanu bʼan saʼ xyaalal. Li naxye nakʼanjelak chiqu, xbʼaan naq li Jehobʼa xooxyobʼtesi ut naxnaw kʼaru us choʼq qe. Aʼan naxye qe chanru toonaʼlebʼaq re xsahobʼresinkil xchʼool ut re naq tqataw li junelik yuʼam.
1. Kʼaru naxye li Jehobʼa chirix li wank saʼ wiibʼal?
Aʼin jun li maatan li naxkʼe li Jehobʼa. Aʼan naraj naq jun li winq ut jun li ixq li sumsukebʼ teʼxyal xsahil. Li maatan aʼin moko kaʼaj tawiʼ re naq ebʼ li sumsukebʼ teʼwanq ralal xkʼajol, re naq teʼxkʼutbʼesi ajwiʼ naq nekeʼxra ribʼ ut sahaqebʼ saʼ xchʼool naq teʼwanq saʼ wiibʼal. Joʼkan naq li Raatin li Yos naxye: «Sahaq aachʼool rikʼin laawixaqil li xatsumlaak wiʼ saʼ laasaajilal» (Proverbios 5:18, 19). Li Jehobʼa naraj naq ebʼ laj paabʼanel li sumsukebʼ inkʼaʼ teʼxkʼat roq li xsumʼaatin (yaabʼasi Hebreos 13:4).
2. Kʼaru li muxuk ibʼ?
Li Santil Hu naxye qe «naq ebʼ laj koʼbʼeet aj yumbʼeet inkʼaʼ terechaani li xnimajwal awabʼejihom li Yos» (1 Corintios 6:9, 10). Li xeʼtzʼiibʼank re li Santil Hu saʼ griego xeʼroksi li aatin pornéia naq keʼaatinak chirix li muxuk ibʼ. Saʼ li aatin aʼin naʼokenk 1) li nekeʼxmux ribʼ chi inkʼaʼ sumsukebʼ, a 2) ebʼ li ixqiwinq ut 3) li nekeʼxmux ribʼ rikʼinebʼ li xul. Naqasahobʼresi xchʼool li Jehobʼa ut naqataw rusilal li qayuʼam naq inkʼaʼ naqamux qibʼ (1 Tesalonicenses 4:3).
QASIKʼAQ XCHAMAL LI NAʼLEBʼ
Qatzolaq kʼaru tqabʼaanu re naq inkʼaʼ tootʼaneʼq saʼ li muxuk ibʼ ut kʼaru rusilal tqataw wi saq ru li qakʼaʼuxl.
3. Mattʼaneʼk saʼ li muxuk ibʼ
Laj José jun li chaabʼil winq kixyal xqʼe re naq inkʼaʼ ttʼaneʼq saʼ li muxuk ibʼ. Cheeyaabʼasi Génesis 39:1-12 ut chexʼaatinaq chirix ebʼ li patzʼom aʼin:
-
Kʼaʼut naq kiʼelelik laj José? (Teeril li raqal 9).
-
Ma us tawiʼ kinaʼlebʼak laj José? Kʼaʼut?
Chanru teʼxkʼam re ebʼ li saaj rikʼin laj José re naq inkʼaʼ teʼtʼaneʼq saʼ li muxuk ibʼ? Cheerilaq li BʼIDEO.
Li Jehobʼa naraj naq chiqajunilo tqatzʼeqtaana li muxuk ibʼ. Cheeyaabʼasi 1 Corintios 6:18 ut chexʼaatinaq chirix ebʼ li patzʼom aʼin:
-
Kʼaʼut naru natʼaneʼk junaq li kristiʼaan saʼ li muxuk ibʼ?
-
Chanru taakol aawibʼ chiru li muxuk ibʼ?
4. Tatruuq elk chiʼubʼej chiru li muxuk ibʼ
Kʼaru naru nokooxchʼaʼajki naq yooko xyalbʼal qaqʼe chiru li muxuk ibʼ? Cheerilaq li BʼIDEO ut chexʼaatinaq chirix li patzʼom aʼin:
-
Kʼaru kixbʼaanu li hermaan naq kixkʼe reetal naq li yook xkʼoxlankil ut xbʼaanunkil tkʼamoq re chi xkʼatbʼal roq li rixaqil?
Ebʼ li kawebʼ xpaabʼal nekeʼxyal ajwiʼ xqʼe re naq inkʼaʼ teʼxkʼoxla li tzʼaj aj naʼlebʼ. Kʼaru taabʼaanu re naq inkʼaʼ txik aachʼool chirix xkʼoxlankil li tzʼaj aj naʼlebʼ? Cheeyaabʼasi Filipenses 4:8 ut chexʼaatinaq chirix ebʼ li patzʼom aʼin:
-
Kʼaru ebʼ li naʼlebʼ tento tqakʼoxla?
-
Ma nakaakʼoxla naq rilbʼal xsaʼ li Santil Hu ut naq laatzʼaq qu saʼ li xkʼanjel li Jehobʼa tooxtenqʼa re naq inkʼaʼ tootʼaneʼq saʼ li maak? Kʼaʼut?
5. Wank rusilal xyuʼaminkil li naxye qe li Jehobʼa
Li Jehobʼa naxnaw kʼaru us choʼq qe. Joʼkan naq naxye qe kʼaru tooruuq xbʼaanunkil re naq saqaq ru li qakʼaʼuxl ut kʼaru rusilal tqataw. Cheeyaabʼasi Proverbios 7:7-27 ut cheerilaq li BʼIDEO. Moqon chexʼaatinaq chirix ebʼ li patzʼom aʼin:
-
Chanru kixchʼik ribʼ saʼ chʼaʼajkilal li saaj? (Teeril Proverbios 7:8, 9).
-
Joʼ naxye Proverbios 7:23, 26 ra naqatoj wi naqamux qibʼ. Chirix kʼaru naqakol qibʼ wi naqatzʼeqtaana li muxuk ibʼ?
-
Chanru tooxtenqʼa chi xtawbʼal li junelik yuʼam wi saq ru li qachʼool ut li qakʼaʼuxl?
Wankebʼ nekeʼxkʼoxla naq li naxye li Yos saʼ li Santil Hu chirixebʼ li ixqiwinq naxkʼutbʼesi naq moko naxrahebʼ ta. Abʼan li Jehobʼa aʼan li Xyosil li rahok ut naraj naq chixjunilebʼ li kristiʼaan teʼxtaw li junelik yuʼam. Abʼan re naq tqataw li maatan aʼin tento tqayuʼami li naxye qe. Cheeyaabʼasi 1 Corintios 6:9-11 ut chexʼaatinaq chirix li patzʼom aʼin:
-
Ma kaʼajwiʼ li xnaʼlebʼebʼ li ixqiwinq naxye li Jehobʼa naq yibʼru?
Tento naq chiqajunilo tqajal qanaʼlebʼ wi naqaj naq sahaq saʼ xchʼool li Jehobʼa qikʼin. Ma wank rusilal xbʼaanunkil aʼin? Cheeyaabʼasi Salmo 19:9, 12 ut chexʼaatinaq chirix ebʼ li patzʼom aʼin:
-
Ma nakaaye naq kaw xyuʼaminkil li xchaqʼrabʼ li Jehobʼa? Kʼaʼut nakaaye chi joʼkan?
Li Jehobʼa ak kixtenqʼa naabʼalebʼ chi xyuʼaminkil li xchaqʼrabʼ, naru ajwiʼ tatxtenqʼa.
WIIBʼ OXIBʼ NEKEʼXYE: «Maakʼaʼ reekʼ naq wiibʼ li kristiʼaan li nekeʼxra ribʼ teʼwanq saʼ wiibʼal».
-
Kʼaru nakaakʼoxla laaʼat?
LI AK XQATZOL
Li wank saʼ wiibʼal aʼan jun li maatan li naxkʼe li Jehobʼa choʼq re li winq ut li ixq li ak sumsukebʼ.
Qajultikaq
-
Kʼaru ebʼ li naʼlebʼ naʼok saʼ li muxuk ibʼ?
-
Kʼaru tooxtenqʼa re naq inkʼaʼ tootʼaneʼq saʼ li muxuk ibʼ?
-
Kʼaru rusilal naqataw naq naqayuʼami li xchaabʼil naʼlebʼ li Jehobʼa?
SIKʼ XKOMON LI NAʼLEBʼ
Tzʼil kʼaʼut naq li Yos naraj naq li teʼraj wank saʼ wiibʼal tento teʼsumlaaq.
«Kʼaru naxye li Santil Hu chirix li kaʼajwiʼ nekeʼxlaqʼabʼ ribʼ?» (Li naʼlebʼ re jw.org)
Li naxye li Yos saʼ li Santil Hu chirixebʼ li ixqiwinq moko naxkʼut ta naq tqatzʼeqtaanahebʼ chi moko naq xikʼ tqilebʼ.
Tzol chanru nokooxkol li xchaqʼrabʼ li Yos chirix li muxuk ibʼ.
Kʼaru kitenqʼank re jun li ixqiwinq chi xjalbʼal li xyuʼam ut xsahobʼresinkil xchʼool li Jehobʼa? Cheeyaabʼasi saʼ li resil xyuʼam «Inkʼaʼ xineʼxtzʼeqtaana».
«Li Santil Hu kixjalebʼ xyuʼam» (Laj Kʼaakʼalehom, 1 re abril 2011)
a Saʼ xyanq li tzʼiʼbʼeetalil naʼlebʼ aʼin naʼokenk xchʼikbʼal xtzʼejwal saʼ re junaq chik li kristiʼaan, saʼ rit ut xbʼatzʼunlenkil xtzʼejwal junaq chik.
Maare twulaq ajwiʼ chaawu
LI NAPATZʼMANK CHI RAJLAL
Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Rikʼin li tzolok li nekeʼxkʼe ebʼ laj Testiiw naru nakaawoksi yalaq kʼaru chi Santil Hu. Naru nakateʼrochbʼeni ebʼ laawamiiw malaj ebʼ laakomon.
