LYNNONG 41
Ka Baibl ka Ong Aïu Shaphang ka Jingïashong Lok ne ka Sex?
Bun ki briew ki sngewlehraiñ ban ïakren shaphang ka jingïashong lok. Hynrei, haba ka Baibl ka kren shaphang ka jingïashong lok, ka kren shai, tangba ha ka rukom kaba don burom. Kaei ba ka ong ka pynmyntoi ïa ngi, namar U Jehobah u dei u Nongthaw jong ngi. U tip ïa kaei kaba bha tam na ka bynta jong ngi. U batai ruh ba kumno ngi lah ban pynsngewbha ïa u bad kaei kaba lah ban ïarap ïa ngi ban ïoh ïa ka jingim kaba kmen shi junom.
1. U Jehobah u sngew kumno shaphang ka jingïashong lok?
Ka jingïashong lok ka dei ka jingai sngewbha na U Jehobah. U kwah ba kan wanrah jingkmen ïa u briew bad ka briew kiba la ïathoh shongkurim. Kane ka jingai sngewbha ka ailad ïa ki shikurim ban ïoh khun bad kumjuh ruh ban pyni jingieid markylliang ha ka rukom ba la buh ryntih da U Blei. Na kata ka daw ka Ktien U Blei ka ong: “To leh kmen ha ka tnga ka jinglong samla jong me.” (Proberb 5:18, 19) U Jehobah u khmih lynti ïa ki Khristan kiba la ïathoh ba kin ïaineh bad la ki jong ki kurim bad ban ym klim.—Pule Hebru 13:4.
2. Ka jingïashong lok kaba kumno U Jehobah u isih?
Ka Baibl ka ïathuh ïa ngi ba kito ‘kiba awria . . . kin ym ïohkynti ïa ka Hima U Blei.’ (1 Korinth 6:9, 10, CL Baibl) Ki nongthoh Baibl kiba la thoh ha ka ktien Grik ki la pyndonkam ïa ka kyntien por·neiʹa ban batai shaphang ka jingawria. Kata ka kyntien ka kynthup ïa (1) ka jingïashong lok khlem da ïathoh, a (2) ka jingïashong lok para-kynthei para-shynrang, bad (3) ka jingïashong lok bad ki mrad. Ngi pynsngewbha ïa U Jehobah bad ngi pynmyntoi ïalade haba ngi kiar “phar na ka jingjakhlia ka jingawria.”—1 Thessaloni 4:3, CL Baibl.
WAD SHUH SHUH
Peit kumno phi lah ban kiar na ki jingleh awria bad kumno phin myntoi na ka jinglong khuid ha ka met bad ha ka rukom im.
3. Phet ïap na ki kam awria
U Joseph, u shakri ba hok jong U Blei, u la ïaleh katba lah ban phet na kawei ka briew kaba kwah ban thiah lang bad u. Pule Jenesis 39:1-12, bad nangta sa ïa peit lang ïa kine ki jingkylli harum:
-
Balei u Joseph u la phet? —Peit ka dkhot 9.
-
Hato phi tharai u Joseph u la leh ïa kaba dei? Balei?
Kumno ki khynnah samla ki lah ban pyrthuhbud ïa u Joseph bad phet ïap na ki kam awria? Peit ïa ka VIDEO.
U Jehobah u kwah ïa ngi baroh ban kyntait ïa ki kam awria. Pule 1 Korinth 6:18, bad nangta sa ïa peit lang ïa kine ki jingkylli harum:
-
Kiei ki khep kiba lah ban pynlong ïa u briew ban leh ïa ki kam awria?
-
Kumno phi lah ban phet ïap na ki kam awria?
4. Phi lah ban ïaleh ïa ki jingpynshoi
Kiei ki daw kiba lah ban pynlong ïa u briew ban ngop ha ki jingpynshoi jong ki kam awria? Peit ïa ka VIDEO, bad nangta sa ïa peit lang ïa kane ka jingkylli harum:
-
Haba ine i parabangeit ha ka video i la sdang ban sngewthuh ba ki jingpyrkhat bad ki kam jong i ki lah ban poi sha ka jingshetkylla ïa la ka jong ka lok, kaei kaba i la leh?
Don ki por ha kaba wat ki Khristan kiba khlaiñ ha ka jingngeit ruh ki shem jingeh ban don ki jingpyrkhat kiba khuid. Kumno phi lah ban kiar na ki jingpyrkhat kibym khuid? Pule Philippi 4:8, bad nangta sa ïa peit lang ïa kine ki jingkylli harum:
-
Kum shaphang kiei ngi dei ban pyrkhat?
-
Kumno ka jingpule Baibl bad ka jingpynbunkam ïalade ha ki kam U Jehobah ka lah ban ïarap ïa ngi ban ïaleh ïa ki jingpynshoi?
5. Ki aiñ U Jehobah ki pynmyntoi ïa ngi
U Jehobah u tip ïa kaei kaba bha tam na ka bynta jong ngi. U ïathuh ïa ngi kumno ban ïai im khuid ha ka met bad ïa ki jingmyntoi kiba ngin ïoh lada leh kumta. Pule Proberb 7:7-27 ne peit ïa ka VIDEO, bad nangta sa ïa peit lang ïa kine ki jingkylli harum:
-
Kumno uta u samla u ïaid ha ka lynti ka jingpynshoi?—Peit Proberb 7:8, 9.
-
Katkum na Proberb 7:23, 26, ka kam awria ka lah ban wanrah shibun ki jingeh. Ki jingeh aïu kiba ngi lah ban kiar lada ngi im khuid ha ka met?
-
Kumno ka jingim khuid ha ka met ka lah ban ïarap ïa ngi ban don ka jingim kaba kmen shi junom?
Don kiba sngew ba U Blei um ieid ïa kito kiba ïashong lok para-shynrang ne para-kynthei. Hynrei U Jehobah, U Blei ka jingieid, u kwah ba baroh kin ïoh ïa ka jingim kaba kmen shi junom. Te, ngi dei ban kohnguh ïa ki aiñ jong u. Pule 1 Korinth 6:9-11, bad peit lang ïa kane ka jingkylli harum:
-
Ha khmat U Blei, hato dei tang ka jingïashong lok para-shynrang ne para-kynthei kaba long kaba bakla?
Ban pynsngewbha ïa U Blei, ngi dei ban pynkylla ïa la ka jingim. Hato ka myntoi? Pule Salm 19:8, 11, bad peit ïa kine ki jingkylli harum:
-
Hato phi sngew ba ka aiñ U Jehobah shaphang ka jingïashong lok ka pynmyntoi ïa ngi? Balei?
U Jehobah u la ïarap ïa bun ngut ban kylla ïa la ka jingim katkum ki jinghikai jong u. U lah ban ïarap ïa phi ruh.
DON KIBA ONG: “Kam lei lei ban ïashong lok hapdeng ar ngut ki briew kiba ïa ieid.”
-
Kumno phin ong?
KI MAT BAKONGSAN
Ka jingïashong lok ka dei ka jingai sngewbha jong U Jehobah ïa ki shikurim ban ïa leh kmen.
Peit Biang
-
Ka kam awria ka kynthup ïa kiei?
-
Kaei kaba lah ban ïarap ïa ngi ban kiar na ki kam awria?
-
Kumno ngi myntoi haba ngi bud ïa ki aiñ U Jehobah?
PULE SHUH SHUH
Peit balei ka ktah ïa U Blei la u shynrang bad ka kynthei ki ïathoh shongkurim ne em.
Peit balei ka jinghikai jong ka Baibl ha kaba ïadei bad ka jingïashong lok para-kynthei ne para-shynrang kam pynshlur ïa ngi ban isih ïa ki.
“Hato ka Jingïashong Lok para-Kynthei ne para-Shynrang ka Dei kaba Bakla?” (Na jw.org, Phareng)
Peit kumno ki aiñ jong U Blei shaphang baroh ki kam awria ki ïada ïa ngi.
Ha ka jingïathuhkhana “Ki la Burom ïa Nga,” peit kaei kaba la pynlong ïa uwei u briew uba la ïashong lok para-shynrang ban kylla ïa la ka jingim khnang ban pynsngewbha ïa U Blei.
“Ka Baibl ka Pynkylla ïa ka Jingim” (Ka Kutphira, Ïaïong 1, 2011, Phareng)
a Kane ka kynthup ïa ki kam jakhlia kum ka oral sex kaba pyndonkam da ka shyntur, ka anal sex kaba pyndonkam da ka thliew jingshong, bad ka jingktah kai ïa ka jinglong kynthei ne shynrang jong kiwei.
