OSHILESHWA 41
Ombiibeli oya popya shike shi na sha nomilele?
Ovanhu vahapu ihava kala va manguluka okupopya kombinga yomilele. Ndele eshi Ombiibeli ya popya kombinga yomilele, oya popya nopehe na ouxwenge, ashike omonghedi yefimaneko. Osho ya popya otashi dulu oku tu etela ouwa. Osho osho shi na okukala ngaho, molwaashi Jehova oye Omushiti wetu noku shii osho sha denga mbada kufye. Ohe tu lombwele osho twa pumbwa okuninga, opo tu mu hafife nosho yo osho tashi dulu oku tu kwafela tu hafele onghalamwenyo fiyo alushe.
1. Jehova okwa tala ko ngahelipi omilele?
Omilele odi li oshali oyo ya dja kuJehova. Okwa pitika ashike ovashamane novakulukadi, ovo va hombolafana, ovo ve di hafele. Oshali ya tya ngaho ihai shi ningi ashike tashi shiiva, opo ovalihomboli va dale ounona, ndele ohai va kwafele yo va ulikilafane ohole nokuliudifa nawa. Nomolwaasho Eendjovo daKalunga da popya da ti: “Nyakukilwa omukainhu, omufuko woye.” (Omayeletumbulo 5:18, 19) Jehova okwa teelela ovalihomboli Ovakriste va kale ovadiinini kookaume kavo kopahombo, onghee kave na nandenande okuya moluhaelo.— Lesha Ovaheberi 13:4.
2. Oluhaelo oshike?
Ombiibeli oya popya kutya “ovahaeli. . . itava ka fyuulula Ouhamba waKalunga.” (1 Ovakorinto 6:9, 10) Ovashangi vOmbiibeli, ovo va shanga Omishangwa dOshigreka, ova longifa oshitya porneia, osho tashi ulike koluhaelo. Oshitya osho osha kwatela mo (1) omilele a pokati kovanhu ovo inava hombola, (2) oushenge nosho yo (3) okunangala noimuna. Ohatu ka hafifa Jehova nokumona ouwa pauhandimwe, ngeenge otwe “likaleke kokule noluhaelo.”— 1 Ovatessalonika 4:3.
KONAKONA MOULE
Konakona nghee to dulu okuhenuka okuya moluhaelo nosho yo nghee to dulu okumona ouwa mokukala wa koshoka paenghedi.
3. Inda onhapo oluhaelo
Omulumenhu omudiinini wedina Josef okwa li a ninga eenghendabala ngaashi ta dulu, opo a kale a koshoka paenghedi. Lesha Genesis 39:1-12, ndele tamu kundafana omapulo taa shikula:
-
Oshike sha li sha kwafela Josef a ye onhapo omukulukadi waPotifar?— Tala ovelishe 9.
-
Mbela oto diladila kutya Josef okwa li a ninga etokolo li li mondjila? Ngeenge osho, omolwashike?
Ongahelipi ovanyasha tava dulu okuhopaenena Josef, nokuya onhapo oluhaelo kunena? Dana OKAVIDIO.
Jehova okwa hala atusheni tu henuke okuya moluhaelo. Lesha 1 Ovakorinto 6:18, ndele tamu kundafana omapulo taa shikula:
-
Eenghalo dilipi tadi dulu okuningifa omunhu a ye moluhaelo?
-
Ongahelipi to dulu okuya onhapo oluhaelo?
4. Oto dulu okuhenuka eyeleko lokuya moluhaelo
Oshike tashi dulu oku shi ningifa shidjuu okuhenuka eyeleko lokuya moluhaelo? Dana OKAVIDIO, ndele tamu kundafana epulo tali shikula.
-
Eshi omumwatate, oo a ulikwa mokavidio, a didilika kutya oinima imwe oyo a li ha diladila noha ningi oya li tai dulu oku mu ningifa aha kale omudiinini komukulukadi waye, okwa li a ninga po shike?
Nokuli nOvakriste ovo ovadiinini navo omafimbo amwe ohava mono shidjuu okukaleka omadiladilo avo a koshoka. Ongahelipi to dulu okuhenuka okudiladila oinima inai koshoka? Lesha Ovafilippi 4:8, ndele tamu kundafana omapulo taa shikula:
-
Oinima ilipi twa pumbwa okukala hatu diladila kombinga yayo?
-
Ongahelipi okulesha Ombiibeli nokukala twe lipyakidila moilonga yaJehova taku dulu oku tu kwafela tu henuke omayeleko, oo taa dulu oku tu twala momanyono?
5. Omifikamhango daJehova ohadi tu etele ouwa
Jehova oku shii osho sha denga mbada kufye. Okwe tu lombwela nghee hatu dulu okukala twa koshoka paenghedi nosho yo ouwa oo hatu mono mokuninga ngaho. Lesha Omayeletumbulo 7:7-27, ile u dane OKAVIDIO, ndele tamu kundafana omapulo taa shikula.
-
Ongahelipi omulumenhu omunyasha a li a wila meyeleko?— Tala Omayeletumbulo 7:8, 9.
-
Ngaashi sha popiwa mOmayeletumbulo 7:23, 26, okuya moluhaelo ohashi etifa oilanduliko ya kwata moiti. Omaupyakadi elipi hatu ka henuka, ngeenge otwa kala twa koshoka paenghedi?
-
Ongahelipi oukoshoki wopaenghedi tau tu kwafele tu dule okuhafela onghalamwenyo fiyo alushe?
Ovanhu vamwe ohava diladila kutya osho Ombiibeli ya popya kombinga youshenge kashi li pahole. Ashike Jehova oKalunga omunahole nokwa hala ovanhu aveshe va hafele onghalamwenyo fiyo alushe. Opo tu dule okumona ouwa oo, otwa pumbwa okukala metwokumwe nomifikamhango daye. Lesha 1 Ovakorinto 6:9-11, ndele tamu kundafana epulo tali shikula:
-
Pataleko laKalunga, mbela okukala nomahalo oushenge osho ashike sha puka?
Otwa pumbwa okuninga omalunduluko, opo tu hafife Kalunga. Mbela osha fimana ngoo okuninga ngaho? Lesha Epsalme 19:8, 11, ndele tamu kundafana omapulo taa shikula:
-
Eshi to diladila, mbela omifikamhango daJehova dopaenghedi odi li ngoo pandjele? Omolwashike to tile ngaho?
Jehova okwa kwafela ovanhu vahapu, opo va dule okutula moilonga omifikamhango daye dopaenghedi. Naave ota dulu yo oku ku kwafela
VAMWE OHAVA TI: “Omunhu keshe ota dulu okuya momilele nakeshe oo a hala, shimha ashike ve holafane.”
-
Ove oto ti ngahelipi?
ENGONGO
Omilele odi li oshali ya dja kuJehova nodi na ashike okuhafelwa komushamane nomukulukadi, ovo va hombolafana.
Eendululo
-
Oluhaelo ola kwatela mo shike?
-
Oshike tashi dulu oku tu kwafela tu henuke okuya moluhaelo?
-
Ouwa ulipi hatu ka mona, ngeenge otwa tula moilonga omifikamhango daJehova dopaenghedi?
TALA OUYELELE WA WEDWA PO
Lihonga kutya omolwashike Kalunga a hala omulumenhu nomukainhu va hombole tete, opo va dule okukala pamwe.
“Ombiibeli otai ti ngahelipi kombinga yokukala pamwe inamu hombola?” (Oshitukulwa shi li ko jw.org)
Konakona kutya omolwashike ehongo lopaMbiibeli, olo kutya oushenge owa puka, inali hala okutya otu na okukala tu tonde ovanhu ovo va ninga omashenge.
“Mbela oushenge oshinima sha puka?” (Oshitukulwa shi li ko jw.org)
Lihonga nghee eemhango daKalunga di na sha nomilele hadi tu amene.
“Mbela okulifipa koilyo yoludalo onghedi ngoo shili yokuya momilele?” (Oshitukulwa shi li ko jw.org)
Moshimoniwa “Ova ungaunga naame nefimaneko,” tala kutya oshike sha kwafela umwe, oo a li eshenge, a lundulule onghalamwenyo yaye noku hafife Kalunga.
“Ombiibeli ohai lundulula onghalamwenyo yovanhu” (Oshungonangelo, 1 Aprili 2011)
a Omakwatafano inaa koshoka a tya ngaho okwa kwatela mo oinima ihapu, ngaashi okulilafa nokulifipa koilyo yoludalo, ile okweendafana konima nosho yo okukwataakwata koilyo yoludalo yaumwe nelalakano lokuliudifa nawa onga ovanhu tava i momilele.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
