ERISOMO 41
E Biblia Yikabugha Yithiki oko Myatsi y’Engyingo?
Abandu bangyi si baliyowa buholho erikania okw’eby’emyatsi y’engyingo. Aliwe, e Biblia yikabya yikakania oko myatsi y’engyingo, siyiribisirira, aliwe yikabikanayako omwa nzira y’erisikya. Ebya yikabugha bikathughasira. Kandi ekyo kitholere. Kundi nibya Yehova ya Muhangiki wethu. Neryo anasi ebithutholere. Akathubwira ebya thutholere ithwakolha nuku thumutsemesaye n’ebikendi thuwathikya eritsemera engebe kera na kera.
1. Yehova akalhangira athi emyatsi y’engyingo?
Emyatsi y’engyingo ni kihembo erilhua oku Yehova. Anzire omulhume n’omukali abathahenie ibatsemerayo. Ekihembo eki sikirisubulira okw’ileka abathahenie babuthe abaana lisa aliwe kandi kikaleka ibakanganania olhwanzo lhw’abathahenie omwa nzira eyikatsemesaya. Ky’ekikaleka Ekinywe kya Nyamuhanga ikyabugha kithi: ‘Wutsemere omukali w’obusuko bwawu.’ (Emisyo 5:18, 19) Yehova anzire Abakristayo abathahenie ibabya bathaleghulha oko banze babu omwa butheke, neryo sibatholere bakasingira.—Soma Abaebrania 13:4.
2. Obusingiri niki?
E Biblia yikathubwira yithi ‘abaraghane sibendi syasangira oko Bwami bwa Nyamuhanga.’ (1 Abanya Korinto 6:9, 10) Abahandiki be Biblia abahandika omwa Kigiriki mubakolesya ekinywe por·neiʹa erikania okwa by’obusingiri. Ekinywe ekyo mwamuli (1) abathathahenie erikolha emyatsi y’engyingo, a (2) ab’olhubutho lhughuma erikolhanako emyatsi y’engyingo, na (3) erikolha emyatsi y’engyingo n’ebisoro. Thukatsemesaya Yehova kandi thukayighasira ‘thukayihighulha okwa lhuthetho.’—1 Abanya Tesalonika 4:3.
THASYIGHA BINGYI
Minya ngoku wanga yihighulha okwa busingiri kandi ngoku wanga ghasirwa omw’isighalha iwunahenirye omwa by’esyongeso.
3. Sagha obusingiri
Omulhume muthaleghulha oyukahulhawamo Yozefu mwalengaho kutsibu eribya inianahenirye omwa by’esyongeso. Soma Enzuko 39:1-12, mwanakania okwa bibulyo bino:
-
Ni kyahi ekyaleka Yozefu iniathibitha?—Lebaya omulhondo 9.
-
Wukalengekanaya Yozefu mwanathwamu ndeke? Busana naki?
Munabwire, abalere banga gherererya bathi Yozefu n’erisagha obusingiri? Mubughaye EVIDIYO.
Yehova anzire ithwe bosi ithwaghana eby’obusingiri. Soma 1 Abanya Korinto 6:18, mwanakania okwa bibulyo bino:
-
Ni mibere yahi eyangakolya omundu okw’isingira?
-
Wangasagha wuthi obusingiri?
4. Wangana ghana erilengwako
Ni kyahi ekyangaleka ikyakalha erighana erilengwako ery’erikolha eby’obusingiri? Mubughaye EVIDIYO, mwanakania okwa kibulyo ekikakwamako.
-
Mughalha wethu oyuli omo vidiyo abere abiriminya ngoku amalengekania wiwe n’eby’akakolha byangana leka inialeghulha oko mukali wiwe, mwakolhaki?
Nibya n’Abakristayo abathaleghulha hakanayira ikyabakalira eribya n’amalengekania awahenirye. Wanga yihighulha wuthi okw’ibera erilengekania oko myatsi y’eby’obusingiri? Soma Abanya Filipi 4:8, mwanakania okwa bibulyo bino:
-
Thutholere ithwalengekania okwa bindu ebiri bithi?
-
Erisoma e Biblia n’eriyihwerya omwa mubiiri wa Yehova byanga thuwathikya bithi erighana erilengwako ly’erikolha ekibi?
5. Ebihano bya Yehova bikathughasira
Yehova anasi ebithutholere. Akathubwira ngoku thwanga sighalha ithunahenirye omwa by’esyongeso kandi ngoku thwanga ghasirwa omw’ikolha ekyo. Soma Emisyo 7:7-27 kutse mubughaye EVIDIYO, mwanakania okwa bibulyo ebikakwamako.
-
Omulhwana mwayingirya athi omwa mibere y’erilengwako?—Lebaya Emisyo 7:8, 9.
-
Ngoku kiri omwa Emisyo 7:23, 26, obusingiri bwangana lhwiririramo ebitsibu ebikalire. Thwamasighalha ithunahenirye omwa by’esyongeso, ikikendi thutheya oko bitsibu byahi?
-
Erihenia omwa by’esyongeso kyanga thuwathikya kithi eritsemera engebe kera na kera?
Abandi bakalengekanaya bathi ebya Biblia yikabugha okwa b’olhubutho lhughuma erikolhanako emyatsi y’engyingo sibirikanganaya olhwanzo. Aliwe Yehova, Nyamuhanga w’olhwanzo, anzire obuli mundu iniatsemera engebe kera na kera. Eritholera erisyabanayo, thutholere ithwaghendera okwa bihano biwe. Soma 1 Abanya Korinto 6:9-11, mwanakania okwa kibulyo kino:
-
Oku Nyamuhanga, mbwino esyongumbu sy’emyatsi y’engyingo n’ab’olhubutho lhughuma syana nyibi nyisa?
Erithoka eritsemesya Nyamuhanga, ithwe bosi thukayithagha erikolha esyombinduka. Erikolha ekyo ikyanathughasira? Soma Esyonyimbo 19:8, 11, mwanakania okwa bibulyo bino:
-
Wukalengekanaya ebihano bya Yehova eby’esyongeso binatholere? Busana naki?
Yehova abiriwathikya abangyi erighendera okwa bihano biwe eby’esyongeso. Nawu angana kuwathikya
ABANDI BAKABUGHA BATHI: “Abandu babiri abosi-bosi erikolha emyatsi y’engyingo siki, ekikulhu bamabya ibananzene.”
-
Iwe wangabugha wuthiki?
OMWA BIKUHI
Emyatsi y’engyingo ni kihembo erilhua oku Yehova eky’abiriha omulhume na mukali wiwe eritsemera.
Eriyibukya
-
Eby’obusingiri mwamuliki?
-
Ni byahi ebikendi thuwathikya eriyihighulha okwa by’obusingiri?
-
Thukaghasirawa thuthi thukaghendera okwa bihano bya Yehova eby’esyongeso?
MINYA BINGYI
Minya ekikaleka Nyamuhanga inianza omulhume n’omukali abanzire eribya haghuma ibathahania.
Lebaya ekikaleka ebihano bye Biblia ebihambire oko myatsi y’engyingo n’ab’olhubutho lhughuma ibyabya isibirikulha-kulhanaya eriponangana.
“Ab’Olhubutho Lhughuma Erikolhanako Emyatsi y’Engyingo Nina Kibi?” (Omwatsi okwa muthahulha)
Minya ngoku ebihano bya Nyamuhanga ebihambire oko by’emyatsi yosi ey’engyingo bikathutheghaya.
“Emyatsi y’Engyingo ey’Erikolesya Obuno Kwenene Nina Myatsi y’Engyingo?” (Omwatsi okwa muthahulha)
Omwa kyalholirweko ekya “Mubakolongana Naghe omw’Isikya,” lhangira ekyawathikaya oyuwabya akakolha emyatsi y’engyingo n’ab’olhubutho lhwiwe erihindulha engebe yiwe nuku atsemesaye Nyamuhanga.
“E Biblia Yikahindulha Esyongebe” (The Watchtower, Okwakani 1, 2011)
a Emyatsi eyithuwene eyi mwamuli ng’erikolha emyatsi y’engyingo, erikolesya obuno, erikolesya olhuhende, kutse erihamba-hamba okwa bitsuko by’olhubutho eby’owundi omwa mibere y’olhuthetho-thetho.
