LUFUNJISHO 41
Baibolo Waambapo’mba ka pa Kwilaala?
Bantu bavula kechi bakasuluka kwamba pa kwilaala ne. Nangwa byonkabyo, Baibolo kechi wapita mu mbaji kwamba pa kwilaala ne. Bintu byaamba Baibolo pa kwilaala bitukwasha bingi. Kino kyayilamo bingi mambo Baibolo wafuma kwi Yehoba Mulenga wetu. Aye witubuula bintu byawama bitukwasha mu bwikalo bwetu. Witubuula bintu byo twafwainwa kuba pa kumutokesha ku muchima ne bintu byafwainwa kwitukwasha kuba’mba tukekale bwikalo bwawama myaka ne myaka.
1. Yehoba umona byepi kwilaala?
Kwilaala ke bupe bwawama bwafuma kwi Yehoba. Yehoba wakambizha’mba bafwainwatu kwilaala ke bamulume ne mukazhi besongola. Kino kya bupe kechi kilengelatu besongola kusema baana ne, pakuba bemwesha byo betemwa ne byo beta muchima. Kyo kyalengela Mambo a Lesa kwamba’mba: “Usangalele mu mukazhobe wa mu bwanyike bobe.” (Byambo bya Maana 5:18, 19) Yehoba ukeba bantu besongola kwikala bakishinka mu masongola abo pa kuba’mba babule kuba bukende.—Tangai Bahebelu 13:4.
2. Kyambo kya bulalelale kilumbulula ka?
Baibolo witubuula’mba “ba bulalelale . . . kechi bakaswana Bufumu bwa Lesa ne.” (1 Kolinda 6:9, 10) Banembele Baibolo mu Kingiliki baingijishe kyambo kya por·neiʹa kulumbulula kyambo kya bulalelale. Akino kyambo kyavwangamo (1) kwilaala kwa bantu babula kwisongola, a (2) kwilaala kwa banabalume bonka bonka nangwa banababakazhi bonka bonka, ne (3) kwilaala na banyama. Tutokesha Yehoba ku muchima ne kumwenamo bintu byawama atweba bene inge “twaikala bazhila ne kuchina bulalelale.”—1 Tesalonika 4:3.
FUNJILAIPO BIKWABO
Kebai bishinka byafwainwa kwimukwasha kuchinuzhuka kuba bulalelale ne byo mwafwainwa kuba pa kuba’mba mubule kwivwanga mu kino kyubilo.
3. Chinai bulalelale
Yosefwa muntu wakishinka wakaine kuba bulalelale na mwanamukazhi wamukebelenga. Tangai Ntendekelo 39:1-12, ne kwisamba ano mepuzho:
-
Ñanyi kintu kyakwashishe Yosefwa kuchina kuba bulalelale?—Monai kyepelo 9.
-
Nanchi mwalanguluka’mba kyaubile Yosefwa kyawamine nyi? Mambo ka o mwakumbwila byobyo?
Nga mu ano moba, banyike bafwainwa kwikala byepi byajinga Yosefwa ne kuchina kuba bulalelale? Tambai VIDYO.
Yehoba witukambizha atweba bonse amba kange tubenga bulalelale ne. Tangai 1 Kolinda 6:18, ne kwisamba ano mepuzho:
-
Ñanyi bintu byakonsha kulengela muntu kuba bulalelale?
-
Mwakonsha kuchinuzhuka byepi kuba bulalelale?
4. Mwakonsha kushinda meseko
Ñanyi bintu byakonsha kukatazha muntu kuleka kuba bulalelale? Tambai VIDYO, ne kwisamba buno bwipuzho.
-
Ñanyi kintu kyaubile mulongo ye mwatamba mu vidyo byo amwene’mba bintu byo alangulukilenga kuba byafwainwe kumulengela kubula kwikala wakishinka ku mukazhanji?
Nangwatu bena Kilishitu bakishinka kibakatazha bingi kuleka kulanguluka pa bintu byatama. Mwafwainwa kuba byepi pa kuba’mba muleke kulangulukanga pa bintu byatama? Tangai Filipai 4:8, ne kwisamba ano mepuzho:
-
Ñanyi bintu byo twafwainwa kulangulukangapo?
-
Nanchi kutanga Baibolo ne kupayankana mu mwingilo wa Yehoba kwitukwasha byepi kubula kuba bintu byatama?
5. Mizhilo ya Yehoba itukwasha bingi
Yehoba ye wayuka bintu byafwainwa kwitukwasha. Witubuula byo twafwainwa kuba pa kuba’mba tubulenga kwikala na milanguluko yatama. Kabiji witubuula ne bintu byo twafwainwa kumwenamo inge ke tulondele byo etubuula. Tangai Byambo bya Maana 7:7-27 nangwa tambai VIDYO, ne kwisamba ano mepuzho.
-
Ñanyi kintu kyalengejile nsongwalume kuba bulalelale?—Monai Byambo bya Maana 7:7-9.
-
Kwesakana na byaamba Byambo bya Maana 7:23, 26, kuba bulalelale mufuma bintu byatama bingi. Ñanyi makatazho o tukachinuzhuka inge twaikala na byubilo byawama?
-
Ñanyi bintu byawama byo tukekala nabyo kulutwe inge twatwajijila kwikala na byubilo byawama?
Bantu bamo balanguluka’mba byaamba Baibolo pa mwanamulume kubula kwilaala na mwanamulume mukwabo nangwa mwanamukazhi kwilaala na mwanamukazhi mukwabo kechi kwawama ne. Bino Yehoba ke Lesa wa butemwe, ukeba bantu bonse kwikala na bumi bwa myaka ne myaka. Pa kuba’mba tufikilemo kukekala na bumi bwa myaka ne myaka, twafwainwa kulondelanga mikambizho yanji. Tangai 1 Kolinda 6:9-11, ne kwisamba buno bwipuzho:
-
Kwesakana na byaamba Lesa, nanchi kwilaala kwa banabalume mulwabo nangwa banabakazhi mulwabo kyo kyubilotu kyatama nyi?
Pa kuba’mba tutokeshe Lesa ku muchima, atweba bonse twafwainwa kupimpula byubilo byetu. Nanchi kuba bino mufuma bintu byawama nyi? Tangai Salamo 19:8, 11, ne kwisamba ano mepuzho:
-
Nanchi mwalanguluka’mba mikambizho ya Yehoba yakatazha kwiilondela nyi? Mambo ka o mwakumbwila byobyo?
Yehoba wakwasha bantu bavula bingi kwikala bwikalo bwawama na mambo a kukookela mikambizho yanji. Ne anwebatu wafwainwa kwimukwasha
BANTU BAMO BAMBA’MBA: “Kijitu bulongo muntu kwilaala na muntu yense ye akeba kikulutu bene betemwa.”
-
Nga anweba mwalangulukapo’mba ka?
ÑANYI BISHINKA BYO MWAFUNDA?
Kwilaala ke bupe Yehoba bo apa bamulume ne mukazhi besongola.
Mepuzho a kupitulukamo
-
Ñanyi bintu bikwabo byavwangwa mu bulalelale?
-
Nanyi bintu byafwainwa kwitukwasha kuchinuzhuka kuba bulalelale?
-
Ñanyi bintu byawama byo tumwenamo inge ke tulondela mikambizho ya Yehoba?
KEBAI BISHINKA BIKWABO
Yukai ene mambo Lesa o akambizha mwanamulume ne mwanamukazhi bakeba kwikala pamo kuba’mba bafwainwa kwisongola.
“Baibolo Waambapo’mba ka pa Bantu Bekala Pamo kwa Kubula Kwisongola?” (Kibaaba kiji pa jw.org)
Baibolo waamba’mba kwilaala kwa banabalume mulwabo ne banabakazhi nabo mulwabo kwatama. Akino kechi kibena kulumbulula’mba twafwainwa kushikwa bantu ne, bino twafwainwa kushikwako kyubilo.
Yukai mizhilo ya Lesa yaamba pa kwilaala konse byo yafwainwa kwituzhikijila.
“Nanchi Kwilaajila ku Kanwa Kine Bulalelale Nyi?” (Kibaaba kiji pa jw.org)
Mu jishimikila ja byamwekele jaamba’mba “Bampeele Bingi Mushingi,” monai kyakwashishe walaalanga kala bakwabo banabalume byo apimpwile byubilo byanji ne kutendeka kuba bintu bitokesha Lesa ku muchima.
“Baibolo Upimpula Bwikalo bwa Bantu” (Kyamba kya Usopa, April 1, 2011)
a Kino kyambo kyavwangamo bintu byavula bingi nabiji kwilaala, kwilaajila ku kanwa, kwilaajila ku matako ne kukwataula ku bya bulume ne ku bya bwanabukazhi mu jishinda jilengela muntu kwikala na kilaka kya kwilaala.
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
