LƐSIN 41
Wetin di Baybul Se bɔt Mami ɛn Dadi Biznɛs?
Bɔku pipul dɛn nɔ kin fil fayn fɔ tɔk bɔt mami ɛn dadi biznɛs. Bɔt di Baybul nɔ shem fɔ tɔk bɔt mami ɛn dadi biznɛs, ɛn i tɔk bɔt am wit rɛspɛkt. Di tin dɛn we di Baybul tɔk bɔt mami ɛn dadi biznɛs de bɛnifit wi. I mek sɛns bikɔs di Baybul kɔmɔt frɔm Jiova, di Wan we mek wi. So i no wetin gud fɔ wi. I de tɛl wi wetin wi fɔ du fɔ mek i gladi ɛn wetin go ɛp wi fɔ ɛnjɔy layf sote go.
1. Aw Jiova de si mami ɛn dadi biznɛs?
Mami ɛn dadi biznɛs na gift frɔm Jiova. I want mek maredman ɛn in wɛf ɛnjɔy fɔ du mami ɛn dadi biznɛs. Dis gift nɔ jɔs de gi maredman ɛn in wɛf chans fɔ gɛt pikin dɛn bɔt i de mek dɛn gɛt chans fɔ sho se dɛn rili lɛk dɛnsɛf. Na dat mek Gɔd in Wɔd se: “Ɛnjɔy di uman we yu mared [we] una yɔŋ.” (Prɔvabs 5:18, 19) Jiova ɛkspɛkt maredman ɛn mareduman we na Kristian fɔ kɔntinyu fɔ fetful to dɛn man ɔ wɛf, so dɛn nɔ go ɛva du mami ɛn dadi biznɛs wit pɔsin we dɛn nɔ mared to.—Rid Ibruz 13:4.
2. Wetin na mami ɛn dadi biznɛs di we aw Gɔd nɔ want?
Di Baybul tɛl wi se “di wan dɛn we de du mami ɛn dadi biznɛs di we aw Gɔd nɔ want . . . nɔ go gɛt Gɔd in Kiŋdɔm.” (1 Kɔrintians 6:9, 10) Di wan dɛn we rayt di Baybul bin yuz di Grik wɔd por·neiʹa fɔ tɔk bɔt wetin na mami ɛn dadi biznɛs di we aw Gɔd nɔ want. Da wɔd de min (1) mami ɛn dadi biznɛs a bitwin pipul dɛn we nɔ mared, (2) mami ɛn dadi biznɛs bitwin man ɛn man ɔ uman ɛn uman, ɛn (3) we pɔsin de du mami ɛn dadi biznɛs wit animal. Wi de mek Jiova gladi ɛn wi de bɛnifit wisɛf we wi “avɔyd mami ɛn dadi biznɛs di we aw Gɔd nɔ want.”—1 Tɛsalonians 4:3.
LAN MƆ
Lan aw yu go avɔyd mami ɛn dadi biznɛs di we aw Gɔd nɔ want ɛn aw yu go bɛnifit we yu liv klin layf.
3. Rɔnawe pan mami ɛn dadi biznɛs di we aw Gɔd nɔ want
Wan fetful man we nem Josɛf nɔ bin gri fɔ du mami ɛn dadi biznɛs wit wan uman we bin want fɔ ledɔm wit am. Rid Jɛnɛsis 39:1-12, dɔn una tɔk bɔt dɛn kwɛstyɔn dɛn ya:
-
Wetin bin mek Josɛf rɔnawe?—Rid vas 9.
-
Yu tink se Josɛf bin disayd fɔ du di rayt tin? Wetin mek?
Aw yɔŋ pipul dɛn tide go falamakata Josɛf ɛn rɔnawe pan mami ɛn dadi biznɛs di we aw Gɔd nɔ want? Ple di VIDIO.
Jiova want wi ɔl fɔ avɔyd mami ɛn dadi biznɛs di we aw i nɔ want. Rid 1 Kɔrintians 6:18, dɔn una tɔk bɔt dɛn kwɛstyɔn dɛn ya:
-
Wetin-ɛn-wetin kin mek pɔsin du mami ɛn dadi biznɛs di we aw Gɔd nɔ want?
-
Aw yu go rɔnawe pan mami ɛn dadi biznɛs di we aw Gɔd nɔ want?
4. Yu go ebul fɛt agens tɛmteshɔn
Wetin kin mek i nɔ izi fɔ fɛt agens tɛmteshɔn fɔ du mami ɛn dadi biznɛs di we aw Gɔd nɔ want? Ple di VIDIO, dɔn una tɔk bɔt di kwɛstyɔn we de dɔŋ.
-
We di brɔda na di vidio notis se di tin dɛn we i de tink bɔt ɛn di tin dɛn we i de du go mek i nɔ fetful to in wɛf, wetin i bin du?
Sɔntɛnde, ivin fetful Kristian dɛn sɛf kin fɛt fɔ mek dɛn go de tink bɔt tin dɛn we klin. Aw yu go avɔyd fɔ de tink bɔt tin dɛn we nɔ klin? Rid Filipians 4:8, dɔn una tɔk bɔt dɛn kwɛstyɔn dɛn ya:
-
Uskayn tin dɛn wi fɔ tink bɔt?
-
We wi de rid di Baybul ɛn we wi bizi de du Jiova in wok, aw dat go ɛp wi fɔ fɛt agens tɛmteshɔn fɔ sin?
5. Di tin dɛn we Jiova de tɛl wi fɔ du de bɛnifit wi
Jiova no wetin gud fɔ wi. I de tɛl wi di tin dɛn we wi go du fɔ liv klin layf ɛn di bɛnifit dɛn we wi go gɛt we wi du dat. Rid Prɔvabs 7:7-27 ɔ ple di VIDIO, dɔn una tɔk bɔt di kwɛstyɔn dɛn we de dɔŋ.
-
Aw di yɔŋman ɛnd-ɔp na say we dɛn tɛmt am?—Rid Prɔvabs 7:8, 9.
-
Akɔdin to Prɔvabs 7:23, 26, mami ɛn dadi biznɛs di we aw Gɔd nɔ want kin mek bad bad tin dɛn apin to wi. If wi kɔntinyu fɔ liv klin layf, us prɔblɛm dɛn wi go avɔyd?
-
We wi liv klin layf, aw dat go ɛp wi fɔ ɛnjɔy layf we go de sote go?
Sɔm pipul dɛn kin tink se wetin di Baybul tɔk bɔt man ɛn man ɔ uman ɛn uman we de du mami ɛn dadi biznɛs de sho se Gɔd nɔ lɛk dɛn kayn pipul dɛn de. Bɔt Jiova na Gɔd we lɛk wi, ɛn i want ɔlman fɔ ɛnjɔy layf we go de sote go. Fɔ mek pɔsin kwalifay fɔ gɛt da layf de, i fɔ du di tin dɛn we Jiova se. Rid 1 Kɔrintians 6:9-11, dɔn una tɔk bɔt dis kwɛstyɔn:
-
Frɔm wetin wi rid na di Baybul, fɔ se na mami ɛn dadi biznɛs bitwin man ɛn man ɔ uman ɛn uman nɔmɔ Gɔd nɔ lɛk?
Fɔ mek wi du wetin go mek Gɔd gladi, wi ɔl nid fɔ mek chenj dɛn na wi layf. Yu tink se wi go bɛnifit we wi du dat? Rid Sam 19:8, 11, dɔn una tɔk bɔt dɛn kwɛstyɔn dɛn ya:
-
Yu tink se di tin dɛn we Jiova tɛl wi fɔ du mek sɛns? Wetin mek yu tink so? Wetin mek yu nɔ tink so?
Jiova dɔn ɛp bɔku pipul dɛn fɔ du wetin i se bɔt aw fɔ liv klin layf. I go ɛp yusɛf
SƆM PIPUL DƐN KIN SE: “I nɔ bad fɔ mek tu pipul dɛn du mami ɛn dadi biznɛs wans dɛn lɛk dɛnsɛf.”
-
Wetin yu go se?
WETIN YU DƆN LAN?
Mami ɛn dadi biznɛs na gift we Jiova gi maredman ɛn in wɛf fɔ mek dɛn ɛnjɔy.
Rivyu
-
Wetin na mami ɛn dadi biznɛs di we aw Gɔd nɔ want?
-
Wetin go ɛp wi fɔ avɔyd mami ɛn dadi biznɛs di we aw Gɔd nɔ want?
-
Aw wi go bɛnifit we wi fala wetin Jiova se bɔt aw fɔ liv klin layf?
DU MƆ RISACH
Lan wetin mek Gɔd want man ɛn uman we want fɔ liv togɛda fɔ mared fɔs.
“Wetin di Baybul Se bɔt We Man ɛn Uman De Liv Togɛda We Dɛn Nɔ Mared?” (Atikul na di wɛbsayt)
Lan wetin mek di tin we di Baybul tich bɔt mami ɛn dadi biznɛs bitwin man ɛn man ɔ uman ɛn uman nɔ min se wi fɔ et omo dɛn.
“I Bad fɔ Mek Man ɛn Man ɔ Uman ɛn Uman Du Mami ɛn Dadi Biznɛs?” (Atikul na di wɛbsayt)
Lan aw Gɔd in lɔ bɔt ɔltin we gɛt fɔ du wit mami ɛn dadi biznɛs de protɛkt wi.
Insay di ɛkspiriɛns we gɛt di taytul, “Dɛn Trit Mi wit Rɛspɛkt,” lan wetin bin mek wan man we na omo chenj di we aw i de liv in layf fɔ mek Gɔd gladi.
a Apat frɔm mami ɛn dadi biznɛs, di wɔd por·neiʹa kin min bak, we pɔsin de yuz in mɔt fɔ ple wit ɔda pɔsin in prayvet pat, we pɔsin de du mami ɛn dadi biznɛs na ɔda pɔsin in wes, ɛn we tu pipul dɛn we nɔ mared de ple wit dɛn prayvet pat.
You May Also Like
KWƐSTYƆN DƐN WE PIPUL DƐN KIN AKS ƆLTƐM
Wetin na Baybul Stɔdi?
Lan di ansa dɛn to kwɛstyɔn dɛn we gɛt fɔ du wit wi Baybul stɔdi program.
