SUƐI LEBOLII 41
Yɛɛ Baabuiyo Dimi yɛ a Chiɛɛniŋndo Okɔɔ?
Mi siɔmbulaŋ la wa wanaa bɔɔbɔɔ le suɛi a chiɛɛniŋndo okɔɔ. Kɛ te Baabuiyo wa pɛ suɛi a chiɛɛniŋndo okɔɔ, mbo tɛɛsiaa ndi o nɛi lebɛɛ niŋ, kɛ o viŋ naa tonyaa le. Miŋ sɔla tɔnɔɔ tau o nyɛ o dimi wo niŋ. Hei bii naa kɔndɔfili le kanifuule, Chɛhowa toosiaa naa ni. Nduyɛ o sina nyɛ bɛnda le naa wo. O chɔm naa nyɛ naŋ tosa miŋ nɛŋi ndu kɔllo, a nyɛ mala naa miŋ tuei yoomoo yeela lefafɛɛŋ ndo.
1. Vɛɛ Chɛhowa yiyaŋ yɛ a chiɛɛniŋndo okɔɔ?
Ke fula Chɛhowa o ba wo chiɛɛniŋndo cho ni. Kɛ pɔnɔɔ a lanɔɔ kinɛi o yeema ni ma tuei ndu yeela. Kioo hoo tosa ma velu chuauwa, nduyɛ ma peelu yeemaŋ ndaŋ o nɛi teŋgeŋndo niŋ. Lelaŋ pɛŋ Diom Mɛlɛkaa dimi ni aa: “Naŋ kɔl a laa num nya chal boondii ŋ wa wɔ chua piaandu ve.” (Pulɔwaa 5:18, 19) Chɛhowa yeema mi Kilisiɔŋnda lo o lediom a wana nda chal o nɔɔ niŋndo. Koŋ cho ni maa, fɛɛŋ bɛɛ a nɔ ma suunda le.—Nuawɔ Hibuluiya 13:4.
2. Yɛɛ cho yɛ kaa ihini nɔɔlɛiyo?
Baabuiyo dimul naa maa, “wanaa kaa ihini nɔɔlɛiya . . . luei niŋ o Masale Mɛlɛkaleŋ niŋ te.” (1 Kɔliŋtiaŋ 6:9, 10) O Baabuiyo niŋ, diom wanaa poonyiaa yaula maKilikiilaŋ nda soliŋ kpeku le tɛɛsiaa kaa ihini nɔɔlɛiyo wo cho pɔniaa ni. Nyɛ diomndo hoo sim ndo cho ni, (1) tiɔmɔɔ ɔɔ hinilaŋ a nya wana nya cho o nɔ niŋ te wo, (2) wana pɔnɔɔ nda wana pɔnɔɔ ɔɔ wana lanɔɔ nda wana lanɔɔ hiniei tosaa, a (3) hinilaŋ a chɔloo. Te ŋ “wou laba o kaa ihini nɔɔlɛiyo niŋ te,” miŋ nɛŋi Chɛhowa kɔl nduyɛ mbo wa tɔnɔɔ le naa.—1 Tɛsaloniaŋ 4:3.
CHƆƆLU YAASIAA
Pɛɛku ma sina mɛɛ ŋ fafaŋ kaa ihini nɔɔlɛiyo yɛ, a tɔnɔ ŋ cho sɔla wo te a wa pɛ o diandaa o kaa niŋ.
3. Nyaanuŋ kaa ihini nɔɔlɛiyo
Mi Choosɛ nyaanuŋ chua ndoo yeema le ma wa nda ndu wo. Nuawɔ Chɛnɛsee 39:1-12, okoŋ mi la suukaŋ o nyunalaŋ ndaŋ choo:
-
Yɛɛ tosa yɛ mi Choosɛ nyaanuŋ?—Tofa sɔɔŋ 9.
-
A yiyaŋ pa maa kɛɛsiaa kɛndɔɔ Choosɛ tosa ni? Le yɛɛ ŋ dimi yɛ lende?
Vɛɛ feleŋguaa tuallɛ tamasi Choosɛ wo kɔɔli le ma nyaanuŋ kaa ihini nɔɔlɛiyo? Handu VIDUEIYO.
Chɛhowa yeema naa kpou miŋ nyaanuŋ kaa ihini nɔɔlɛiyo. Nuawɔ 1 Kɔliŋtiaŋ 6:18, okoŋ mi la suukaŋ o nyunalaŋ ndaŋ choo:
-
Sɔɔŋ kuɛɛ tosa yɛ mi waŋndo luei balaŋ o kaa ihini nɔɔlɛiyo niŋ?
-
Vɛɛ ŋ nyaanuŋ yɛ kaa ihini nɔɔlɛiyo?
4. A nɔla ma fafaŋ tɔɔndaŋndo
Yɛɛ tosa yɛ ndi ikala le fafaŋndo kaa ihini nɔɔlɛiyo? Handu VIDUEIYO, okoŋ mi la suukaŋ o nyunaa hoo choo:
-
Mɛɛ puaapilɛnɔɔ o vidueiyo hoo niŋ sina maa, yiyaŋnda ndɔlaŋ a kaala ndɔlaŋ la nɔla mi la tosa mbo mɛi laa ndɔ mbo suunda, yɛɛ o tosa yɛ?
Kilisiɔŋaa cho Mɛlɛka piɛiyo o laalaŋndo choo wa bɛɛ, lepum ma che ndi ikala le yiyaŋnda ndalaŋ kɛsioo la diandaa. Yɛɛ mala yɛ num ma fafaŋ yiyaŋndo o sɔɔŋ nɔɔlɛiyoŋ choo? Nuawɔ Filipiaŋnda 4:8, okoŋ mi la suukaŋ o nyunalaŋ ndaŋ choo:
-
O sɔɔŋ kuɛɛ choo naŋ nɔ yɛ miŋ wa yiyaŋndo?
-
Vɛɛ diomndaŋ veeloo o Baabuiyo niŋ a walta Chɛhowalaŋ tosaa, la mala yɛ naa miŋ fafaŋ sɔɔŋ luei naa o hakioo niŋndoŋ?
5. Mi sawala Chɛhowalaŋ la chuu naa tɔnɔɔ
Chɛhowa sina nyɛ bɛnda le naa wo. O chɔm naa nyɛ naŋ nɔ miŋ tosa le miŋ wa a diandaa o kaa niŋndo, a tɔnɔla naŋ sɔla o hei niŋndo. Nuawɔ Pulɔwaa 7:7-27 ɔɔ handu VIDUEIYO, okoŋ mi la suukaŋ o nyunalaŋ ndaŋ choo:
-
Vɛɛ po feleŋgɔnɔɔ hoo luei yɛ ndupila o tɔɔndaŋndo niŋ?—Tofa Pulɔwaa 7:8, 9.
-
A mɛɛ Pulɔwaa 7:23, 26 dimi yɛ, mi kaa ihini nɔɔlɛiyo luei naa o bahawɛilaŋ niŋ tau. Te ŋ kindiŋ pɛ le waa a diandaa, bahawɛila kuɛɛ naŋ fafaŋ yɛ?
-
Vɛɛ kaa diandaa mala yɛ naa miŋ tuei yoomoo yeela lefafɛɛŋ?
Baabuiyo dimi maa wana pɔnɔɔ nɔ mbo hini a chaaŋ ndɔ wana pɔnɔɔ le. Kɛ waŋnda apum yiyaŋ maa, nyɛ Baabuiyo dimi hoo wo bɛnda le. Mɛlɛka nɔ kaalaa wo Chɛhowa cho ni. Nduyɛ o yeema mi wana o wana tuei yoomoo yeela lefafɛɛŋ. Le mi hei yɔŋnuŋ, mɛɛ miŋ bii sawala ndɔlaŋ. Nuawɔ 1 Kɔliŋtiaŋ 6:9-11, okoŋ mi la suukaŋ o nyunaa hoo choo:
-
O yiyaŋ Mɛlɛkaa niŋ, baa waŋ piaanduaa hini a waŋ piaanduaa wa koni cho o kaa ihini nɔɔlɛiyo choo ni?
Le miŋ nɛŋi Mɛlɛka kɔl, naa kpou nɔ miŋ tosa siŋgaŋndaŋ. Baa tɔnɔɔ cho pa o hei niŋ? Nuawɔ Sam 19:8, 11, okoŋ mi la suukaŋ o nyunalaŋ ndaŋ choo:
-
A yiyaŋ pa maa sawala Chɛhowalaŋ la naŋ? Le yɛɛ ŋ dimi yɛ lende?
Chɛhowa mala niŋ wanaa bɔɔbɔɔ le ma diikuŋ sawala ndɔlaŋ. Num bɛɛ o cho num mala
TE WAŊNDO DIMI PƐ AA: “Mɛlɛka mal naa a yeemɛi le hiniei tosaa ni, lelaŋ te la chɛlaŋ pɛ nya waŋndo, o cho suɛi wɔɔŋ te.”
-
Yɛɛ ŋ cho yɛ dimi?
SƆƆŊ KULLOŊ
Ke fula Chɛhowa o ba le pɔnɔɔ a lanɔɔ wo chiɛɛniŋndo cho ni.
Nyunala miiŋgaa choo laŋ
-
Sɔɔŋ kuɛɛ cho yɛ o kaa ihini nɔɔlɛiyo niŋ?
-
Yɛɛ cho yɛ naa mala le miŋ fafaŋ kaa ihini nɔɔlɛiyo?
-
Te ŋ tol pɛ sawala Chɛhowalaŋ kɔɔli, tɔnɔ yɛɛ naŋ sɔla yɛ?
CHƆƆLU SƆƆŊ PUM TOFA
Yaasiaa wɔ ma sina te i cho pɛ ikɛndɛ Mɛlɛka o hɔl, le mi wana pɔnɔɔ a wana lanɔɔ chal ma soli bɛɛ yau nɔ le.
Baabuiyo dimi maa o bɛnda mi wana pɔnɔɔ tosa hiniei a chaaŋ ndɔ wana pɔnɔɔ le. Kɛ baa koŋ chɔm ni maa ŋ nɔ miŋ tul wanaa waa lende leyɛ? Pɛɛku wɔ ma sina.
“Baa Wana Pɔnɔɔ Nɔ Pa Mbo Wa a Chaaŋ Ndɔ Wana Pɔnɔɔ?” (Kɔ o tɛɛŋgei choo)
Pɛɛku wɔ ma sina mɛɛ sawala Mɛlɛka dɔu a chiɛɛniŋndo okɔɔ laŋ la manda naa yɛ.
“Yeemɛi Ihiniei Kpeeŋiaa a Sondo, Hiniei Kpeekpei I Cho Ni?” (Kɔ o tɛɛŋgei choo)
Tofawɔ suɛi yɔŋnaŋnde hei, “Ma Ke Ya Bɛɛleŋ.” Okoŋ, ma che nyɛ tosa mi po ndoo hini a chaaŋ ndɔ wana pɔnɔɔ wo siŋga yiyaŋ ndɔɔ le mbo nɛŋi Mɛlɛka kɔllo wo.
“Baabuiyo Siŋga Yoomulaŋ” (Bandu Mɛŋgɛlaa, Nyaakuɛiyo 1, 2011)
a Sɔɔŋ bɔɔbɔɔ cho o kaala nɔɔlɛila Mɛlɛka kɛɛ laŋ ndaŋ niŋ. Ŋpum cho vɛlɛ muŋ ni: Hiniei tosaa a waŋndo, yeemɛi ihiniei kpeeŋiaa a sondo, hinilaŋ a waŋndo o nɛi cheleŋ choo, a labɛŋguniŋ waŋndo piiliaŋndo le yeemaŋ kpeeŋiaŋndo.
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
