DILONGI 41
Yinki Biblia metuba na yina metadila kusangisa nzutu?
Bantu mingi kemonaka nsoni ya kutubila mambu metadila kusangisa nzutu. Nzokande, Biblia ketubilaka diambu ya kusangisa nzutu na mutindu ya puelele, kasi na luzitu nionso. Yina Biblia metuba samu na diambu yango kenatina beto mambote. Yakele kedika samu Biblia mekatuka na Yehova, Mvangi na beto. Na yau, yandi mezaba yina kele mbote samu na beto. Yandi kezabisaka beto mambu yina beto fueti sala samu na kusepedisa yandi mpe yina lenda sadisa beto samu beto zinga mvula na mvula na kiese.
1. Yinki mutindu Yehova ketadilaka kusangisa nzutu?
Kusangisa nzutu kele dikabu yina mekatuka na Yehova. Yandi zola ti bankuelani basepela na dikabu yango. Dikabu yango kesadisaka kaka ve bankuelani samu babuta bana, kasi mpe samu bamonasana nzola yina mekatuka na ntima na mutindu mosi ya mbote. Na yau Mpova ya Nzambi metuba: ‘Kuwa kiese na nketo na nge ya kintuenia.’ (Bingana 5:18, 19) Yehova kezolaka ti Baklisto yina mekuelana bavuanda ya kukuikama na bankuelani na bau, samu bakubua ve na ekobo.—Tanga Baebreo 13:4.
2. Yinki kele pite?
Biblia metuba ti ‘bantu yina kesalaka pite . . . bakebaka ve Kimfumu ya Nzambi.’ (1 Bakorinto 6:9, 10) Bansoniki ya Biblia yina sonikaka na ndinga ya Greki, basadilaka mpova porneia samu na kutubila pite. Mpova yango mesangisa mambu lokola (1) kusangisa nzutu a kati na bantu yina kele ve ya kukuelana, (2) kusangisa nzutu bakala na bakala to nketo na nketo, mpe (3) kusangisa nzutu na kibulu. Beto kesepedisa Yehova mpe beto kebaka mambote kana beto kena “sala ve pite.”—1 Batesalonika 4:3.
KOTA NA MPINDA
Tadila mutindu nge lenda manga pite mpe mutindu nge kebaka mambote na kubikanaka ya kuvedila na bikadulu.
3. Beno tina pite
Bakala mosi ya kukuikama na nkumbu ya Yozefi salaka ngolo samu na kubikana ya kuvedila na bikadulu na yandi. Tanga Kuyantika 39:1-12, mpe na manima tadila biuvu yayi:
-
Yinki pesaka Yozefi ngolo ya kutina?—Tala verse 9.
-
Nge mekanisa ti Yozefi bakaka nzengolo ya mbote? Samu na yinki?
Yinki mutindu bubu yayi bantuenia lenda landa kifuani ya Yozefi mpe kutina pite? Tula VIDEO.
Yehova zola beto nionso beto manga pite. Tanga 1 Bakorinto 6:18, mpe na manima tadila biuvu yayi:
-
Yinki mambu kenataka bantu na kubua na pite?
-
Yinki mutindu nge lenda tina pite?
4. Nge lenda tina ntambu ya pite
Yinki lenda sala ti yavuanda mpasi samu na kutina ntambu ya pite? Tula VIDEO, mpe na manima tubila kiuvu yayi melanda.
-
Ntangu mpangi ya bakala yina bamemonisa na video yayi bakusaka ti mabanza mpe bisalu na yandi lendaka tinda yandi yandi sala mambu ya kukondua kukuikama na nketo na yandi, yinki yandi salaka?
Ata Baklisto ya kukuikama kenuanaka bantangu yankaka samu na kutanina mabanza na bau ya kuvedila. Yinki mutindu nge lenda lemba kukanisa mambu ya yimbi? Tanga Bafilipi 4:8, mpe na manima tadila biuvu yayi:
-
Mambu ya yinki mutindu beto fueti kanisaka?
-
Yinki mutindu kutanga Biblia mpe kusala mingi na kisalu ya Yehova lenda sadisa beto beto tina ntotolo ya kusala disumu?
5. Bansikudukusu ya Yehova kenatinaka beto mambote
Yehova mezaba yina kele mbote samu na beto. Yandi kezabisaka beto mutindu ya kubikana ya kuvedila na bikadulu na beto mpe mambote yina beto kebaka kana beto mesala yau. Tanga Bingana 7:7-27 to tula VIDEO, mpe na manima tadila biuvu yayi melanda.
-
Yinki mutindu ntuenia yayi kukikotisaka na ntambu?—Tala Bingana 7:8, 9.
-
Na kutadila Bingana 7:23, 26, pite lenda nata bampasi. Kana beto mebikana ya kuvedila na bikadulu na beto, na yinki mambu beto lenda kukitanina?
-
Yinki mutindu bikadulu ya kuvedila lenda sadisa beto beto zinga mvula na mvula na kiese?
Bantu mingi kekanisaka ti mambu yina Biblia ketubaka na yina metadila kusangisa nzutu babakala na babakala to banketo na banketo kele mambu ya kukondua nzola. Kasi Yehova, Nzambi ya nzola, zola bantu nionso zinga mvula na mvula na kiese. Tanga 1 Bakorinto 6:9-11, mpe na manima tadila kiuvu yayi:
-
Na kutadila dibanza ya Nzambi, kaka bansatu ya kusangisa nzutu babakala na babakala to banketo na banketo nde kele yimbi?
Samu na kusepedisa Nzambi, beto nionso beto fueti sala bansobolo. Yakele mpenza mfunu kusala yau? Tanga Nkunga 19:8, 11, mpe na manima tadila biuvu yayi:
-
Nge mekanisa ti bansikudukusu ya Yehova kele mbote? Samu na yinki, to samu na yinki ve?
Yehova sadisaka bantu mingi bazitisa bansikudukusu na yandi. Yandi lenda sadisa diaka nge
BANTU YANKAKA METUBA: “Kusangisa nzutu kati na bantu zole kele yimbi ve, kana bakezolanaka.”
-
Yinki nge lenda tuba?
BUNKUFI
Kusangisa nzutu kele dikabu yina mekatuka na Yehova samu nketo na bakala sepela na dikabu yango na kati ya dikuela.
Mvutukulu
-
Pite mesangisa yinki mambu?
-
Yinki lenda sadisa beto beto tina pite?
-
Yinki mutindu beto lenda baka mambote na kulandaka bansikudukusu ya Yehova?
SOSA
Sosa kuzaba samu na yinki Nzambi zola ti bakala mpe nketo yina zola zinga kisika mosi fueti kuelana.
Tadila samu na yinki bansikudukusu ya Biblia na yina metadila kusangisa nzutu babakala na babakala to banketo na banketo kele ve samu na kusiamisa kuyinana.
“Kosangisa nzoto mibali na mibali to basi na basi ezali mabe?” (Disolo na Internet)
Longuka mutindu bansiku ya Nzambi yina metadila mambu ya kusangisa nzutu ketaninaka beto.
“Kofiba enama ya nzoto ya mwasi to ya mobali ezali mpenza kosangisa nzoto?” (Disolo na Internet)
Na disolo “Bapesaki ngai limemya,” tala yina tindaka bakala mosi yina vuandaka sangisa nzutu na babakala na kusoba luzingu na yandi samu na kusepedisa Nzambi.
“Biblia ebongolaka bato” (Linɔ́ngi ya Mosɛnzɛli ya 1 Avril 2011)
a Mambu yango yayi ya yimbi mesangisa diaka bisalu mingi na kifuani kusangisa nzutu na muntu na kingolo, kufiba kinama ya kubutila, kusangisa nzutu na kinama ya kunenina, mpe kusimba simba kinama ya kubutila ya muntu yankaka na mabanza ya kusangisa nzutu.
