SIRONGWA 41
Yisinke za uyunga Bibeli kuhamena eligwanekero panyama?
Sinzi sovantu kapi va hara kuuyunga kuhamena eligwanekero panyama. Nye Bibeli kwa uyunga kuvyukilira kuhamena eligwanekero panyama monkedi zefumadeko. Ose kugwanena mo uwa, morwa Bibeli kwa tunda kwaJehova, Musiti gwetu. Age ga diva asi yipi yoyiwa po kwetu. Age kututantera eyi natu rugana yipo tu mu hafese ntani neyi nayi tu vatera tu hafere eparu narunye.
1. Ngapi omu Jehova a tara eligwanekero panyama?
Eligwanekero panyama kuna kara uhwi wokutunda kwaJehova. Age kuna hara mugara nomukadi ava va likwara va u hafere. Uhwi ou kuvatera valikwali va rete vana nokulilikida eharo monkedi zokuwapera. Eyi yiyo Nonkango daKarunga adi uyungire asi: “Gwana ruhafo momukadona ogu wa kwara.” (Yisewe 5:18, 19) Jehova kwa hara valikwali woVakriste va lihuguvare, yipo nye, awo kapi tava vhuru kuhondera.—Resa Vahebeli 13:4.
2. Yisinke ruhonda?
Bibeli kututantera asi: “Vanaruhonda . . . kapi ngava pinga Untungi waKarunga.” (1 Vakolinte 6:9, 10) Ava va tjenge Bibeli moRugereka kwa ruganesere nkango por·neiʹa mokutamba koruhonda. Nkango ozo zoRugereka kwa kwatera mo (1) eligwanekero panyama a pokatji kovantu ava va dira kulikwara, (2) eligwanekero panyama pokatji komugara nomugara ndi mukadi nomukadi ntani (3) kuligwanekera panyama noyikorama. Ose kuhafesa Jehova ntani kugwanena mo uwa nsene tu ‘likerera koruhonda.’—1 Vatesaronika 4:3.
LIRONGA KO YOYINZI
Lironga omu no nyokera po ruhonda ntani nomu no gwanena mo mauwa nsene o kuhuka monkareso zoge.
3. Nyokera po ruhonda
Josefa kwa nyokere kuligwanekera panyama nomukadi ogu ga mu sininikire. Resa Genesis 39:1-12, makura zogereni mapuro aga:
-
Yisinke ya ninkisire Josefa a duke? —Tara velise 9.
-
Ngapi ono kugazara, Josefa kwa tulire po etokoro lyewa ndi? Morwasinke ono kuuyungira ngoso?
Ngapi omu vadinkantu nava honena Josefa nokunyokera po ruhonda? Likida VIDIYO.
Jehova kuna hara natuvenye tu nyokere po ruhonda. Resa 1 Vakolinte 6:18, makura zogereni mapuro aga:
-
Yisinke nayi ninkisa muntu a hondere?
-
Ngapi omu no nyokera po ruhonda?
4. Kuvhura o nyokere po maheteko
Yisinke nayi kuninkisa yi kudigopere kunyokera po ruhonda? Likida VIDIYO, makura zogereni epuro eli nali kwama ko.
-
Kuliza novidiyo, yisinke ga rugene munazinyetu apa ga dimbwilire asi magazaro noyirugana yendi kuvhura yi mu ninkise a hondere?
Nampili Vakriste wovalimburukwi poyiruwo yimwe kukondja nomagazaro gomadona. Ngapi no nyokera po kugazara yininke yoyidona? Resa Vafilipi 4:8, makura zogereni mapuro aga:
-
Yininke musinke natu gazadara?
-
Ngapi omu kuresa Bibeli nokulitura mo mosirugana saJehova nayi tu vatera tu nyokere po maheteko?
5. Ose kugwanena mo uwa monoveta daJehova
Jehova ga diva asi yipi yoyiwa po kwetu. Age kututantera omu natu kuhuka monkareso zetu nomu natu gwanena mo uwa nsene tu yi rugana. Resa Yisewe 7:7-27 ndi likida VIDIYO, makura zogereni mapuro aga naga kwama ko.
-
Ngapi omu mudinkatu gomumati ga litulire mwene mosiponga?—Tara Yisewe 7:8, 9.
-
Yisewe 7:23, 26, kulikida asi ruhonda kuvhura kuturetera yitundwamo yoyidona. Maudigu musinke ngatu nyokera po nsene tu kara tuna kuhuka monkareso zetu?
-
Ngapi omu nayi tu vatera tu hafere eparu narunye, nsene tu kara nonkareso zokukuhuka?
Vantu vamwe kugazara asi Bibeli kapi za likida eharo pokusilika eligwanekero panyama pokatji komugara nomugara ndi mukadi nomukadi. Nye Jehova Karunga geharo, kwa hara vantu navenye va hafere eparu narunye. Mokuninka asi tu ka paruke narunye, twa hepa kusikisa mo noveta dendi. Resa 1 Vakolinte 6:9-11, makura zogereni epuro eli:
-
Kuliza nomutaro gwaKarunga, eligwanekero panyama pokatji komugara nomugara ndi mukadi nomukadi, yilyo lyelike ga silika ndi?
Mokuninka asi tu hafese Karunga, twa hepa kutura po marunduruko. Ayo mulyo ndi? Resa Episarome 19:8, 11, makura zogereni mapuro aga:
-
Ngapi ono kugazara, nompango daJehova da hungama ndi? Morwasinke ono kuuyungira ngoso?
Jehova kwa vatera vantu wovanzi va limburukwe konoveta dendi. Nove kuvhura a ku vatere
VAMWE KUTANTA ASI: “Kapi ya kara epuko kuligwanekera panyama nsene vantu va lihara.”
-
Yisinke no uyunga ko?
YINKE ONO LIRONGO?
Eligwanekero panyama kuna kara uhwi wokutunda kwaJehova ou na hafera mugara nomukadi ava va likwara.
Erugururomo
-
Yisinke ya kwatera mo moruhonda?
-
Yisinke nayi tu vatera tu nyokere po ruhonda?
-
Uwa musinke natu gwanena mo nsene tu sikisa mo noveta daJehova?
MAUZERA GAMWE
Lironga eyi Karunga ga harera mukadi nomugara va likware paveta komeho va tunge kumwe.
“Yisinke za uyunga Bibeli kuhamena kutunga kumwe nomuntu ogu wa dira kulikwara nage paveta?” (Sirongwa sokoIntaneta)
Lironga eyi natu dilira kunyenga ava ava ligwanekere panyama novagara vakwawo ndi vakadi vakwawo nampili ngomu Bibeli za silika eyi ava rugana.
“Kuligwanekera panyama mugara nomugara ndi mukadi nomukadi epuko ndi?” (Sirongwa sokoIntaneta)
Lironga omu noveta daKarunga dokuhamena eligwanekero panyama adi tu popere.
“Kuligwanekera panyama kupitira kokana, nalyo eligwanekero panyama ndi?” (Sirongwa sokoIntaneta)
Tara eyi ya vaterere mugara a hageke nkareso zokuligwanekera panyama novagara vakwawo mesimwititi “Awo kwa likidire nge efumadeko.”
“Bibeli kurundurura eparu lyovantu” (Ruhungu, 1 Kudumogona 2011)
a Ayo kwa kwatera mo eligwanekero panyama kupitira kokana, konyima ntani kudanesa yilyo yonomuga yamukweni.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
