SOMO 41
Biblia ká po ngbá lo ngono djo?
Bí kʉ ná ndrŭ djo do adi pá ngono djo ndima loti nari dho. Ro Biblia di loti ngono djo ró, ri adi loti pʉlʉpʉlʉ ndirigoti bbo heshima na. Ri ti ná lo adi faida bbʉ ko dho. Fø lo nǎ mana kʉ bbo dhonalo Biblia si ko No ná ke Yova dhó ro. Ke chu bblo kʉ ko dho ná lo ngbà. Ke d’ra ringani ko njí ná lo ndiro ko bbʉ hwè ndi thí dho ndirigoti ko tsotso ka ndi kó ná lo ndiro ko e hwè na kodhó maisha nǎ theinga dho d’e.
1. Yova ká kʉ ngbá nganjadha na ngono djo?
Ngono kʉ Yova bbʉ ndoa chi ná ndrŭ dho ná kado. Ke jiri ngono bbʉ hwè ndoa chi ná kpetsi ke ma, isɨle ma na dho. Fø kado nzɨ adi rili ndoa chi ná ndrŭ ba nzø dhé ri, ro ri adi rili kpa dhǒ jidha ndima kana ngbà thonga ná chu nǎ. Føri dzá lodho Mungu dzá lo rija ɨ: “Anji hwè jadda nga nǎ ro e ni bbá ná isɨle na.” (Mezali 5:18, 19) Yova jiri ndoa chi ná Wakristo tøni chi ndima lai dho, kpadho nzá ringani ndima nji uzinifu ro ri.—Azø Waebrania 13:4.
2. Uasherati ká kʉ addu?
Biblia pori ko dho “uasherati nji ná ndrŭ . . . nzɨ si tsu Mungu dhó Pidhinga na ri.” (1 Wakorinto 6:9, 10) Kigiriki nǎ ndingʉe Biblia ná kpa nzingʉe uasherati nja nga nǎ por·neiʹa. Føri tsu ndi na nari kʉ (1) nzá chi ndoa ná ndrŭ a ngono nji nari (2) kpetsi kpa ddó kpetsi kpa na inga isɨ ndrŭ ddó isɨ ndrŭ na nari ndirigoti (3) zǎ na ndrŭ ngono nji nari. Ko adi hwè bbʉ Yova thí dho ndirigoti ko adi faida ba ko di ko “ronga b’o uasherati ro ró.”—1 Watesalonike 4:3.
ANE LONANGA BBO
Anja ngbaribbai ma ni ka ni nyí uasherati ndirigoti ngbaribbai ma ni ka ni ba faida tse nidhó nyi tse nari nǎ ro nari.
3. Anyi uasherati nyi
Ddikpa isɨle jingʉeri Yosefu njí ngono ndi na, ro Yosefu gʉngʉe ri gʉ. Azø Mwanzo 39:1-12, ndirigoti anitilo i ngadhudha djo:
-
Addui ká chongʉe Yosefu ronga nja ndi nyi nga d’e?—Anja verse 9.
-
Ni ká ddiri Yosefu vʉngʉe lonanga bblo ngbà? Ká addudho?
Jadda kpa ká ka ndima dyø Yosefu dhó loroji ndirigoti ndima nyi uasherati njʉ ngbaribbai? Aninja VIDEO.
Yova jiri ko nyí uasherati nyí. Azø 1 Wakorinto 6:18, ndirigoti anitilo i ngadhudha djo:
-
Addui ká ka ndi liri ddikpa le tsu uasherati na?
-
Uasherati ká ni ka ni nyí ngbaribbai?
4. Ri ka ndi kaka ni tøni mbudha tso ró
Addui ká ka ndi liri rie kpakpa le tøni uasherati na ka ndi tsu le ná mbudha tso ró? Aninja VIDEO, ndirigoti anitilo i ngadhudha djo.
-
Video nǎ ni njari nari bbai, le-djo ká njie ngbá lo b’lo ndi famuri nari kʉ, ndidhó ngaddidha ma, ndidhó nyi ma na nzá ka ndi lieri ndi tøni chi ndi bbá isɨle dho ri ná saa na?
Nja saa na, chi tøni ná Wakristo dho maddi rie kpakpa ndima b’o ndima dhó ngaddidha ronga tse ndi tse ro. Ni ká ka ni pʉ che kʉ ná ngaddidha ni ró ro ngbaribbai? Azø Wafilipi 4:8, ndirigoti anitilo i ngadhudha djo:
-
Ri ká ngani ko di ngaddi ngbá lo djo?
-
Biblia ko zø nari ma, Yova dzá njí kana ko njínji bbo nari ma na ká ka ndi kó ko tsotso ngbaribbai, ndiro ko tøni chi chenga nǎ ko tsu ná lo tso ró d’e?
5. Yova dhó sheria adi faida bbʉ ko dho
Yova chu bblo pli kʉ ko dho ná lo ngbà. Ke ngbaribbai ma ko ka ko di tse ko tse ro ndirigoti ri nǎ ro ko ka ko ba ná faida d’ra. Azø Mezali 7:7-27 inga aninja VIDEO, ndirigoti anitilo i ngadhudha djo.
-
Fø jadda ke ká tsungʉe ndi mbudha na ngbaribbai?—Anja Mezali 7:8, 9.
-
Mezali 7:23, 26 ripo nari bbai, uasherati nǎ ro che pli kʉ ná lo ka ndi si. Njati rie ngbà ko tsetse kodhó nyi nǎ ri ró, føri na ká ko ka ko nyí ngbá lo tso?
-
Tse ko tse kodhó nyi nǎ ná føri ká ka ndi kó ko tsotso ngbaribbai nja ko njí maisha hwè theinga dho d’e?
Biblia gʉri gʉ kpetsi kpa ddó kpetsi kpa na inga isɨ ndrŭ ddó isɨ ndrŭ na. Nja ndrŭ adi riddi føri nga kʉ che ri. Ro Yova jidha dhi Mungu jiri krʉ ndrŭ njí maisha hwè theinga dho. Ndiro ko si fø maisha hwè nji theinga dho d’e, ringani ko di ngarr kedhó sheria dho. Azø 1 Wakorinto 6:9-11, ndirigoti anitilo i ngadhudha djo:
-
Kpetsi kpa ddó kpetsi kpa na inga isɨ ndrŭ ddó isɨ ndrŭ na ná føri dhé ká Mungu adi nja che kʉ ná lo?
Njati ko jiri kodhó lo tho Mungu nyǒ ró, ringani ko lé kodhó nyi thika le. Føri ká kʉ bblo addudho? Azø Zaburi 19:8, 11, ndirigoti anitilo i ngadhudha djo:
-
Ni ká ddiri Yova dhó sheria thonga ngbà? Ká addudho, inga nzá addudho?
Yova korie bí kʉ ná ndrŭ tsotso b’lo ndiro ndima rrnga ndidhó yadha dho d’e. Ke ka ndi kó ni tsotso maddi
NJA NDRŬ ADI RIPO: “Ngono tso uni u aro kʉ ná ndrŭ dho, rie ngbà kpa jini ji ndima kana ri ró.”
-
Ni ká ka ni poeri ngbǎ?
LO DZÁ DɄNGA
Ngono kʉ Yova dhó ro si ná kado. Ke jiri ndoa chi ná kpetsi ke ma ba hwè ri nǎ ro ndi bbá isɨle ma na.
Lo djolu le ngʉ nari
-
Uasherati ká tsu ngbá lo ndi nǎ?
-
Addui ká ka ndi kó ko tsotso nja ko nyí uasherati nyí d’e?
-
Yova dhó yadha dho ko ngarr nari ká ka ndi bbʉ faida ko dho ngbaribbai?
NI KA NI CHU NÁ NJA LO
Anja addudho ma Yova jiri ddinga ji ndima di ná kpetsi ke ma, isɨle ma na dho ringani ndima chi ndoa nari.
“Biblia Inasema Nini Juu ya Kuishi Pamoja Mbele ya Kufunga Ndoa?” (Jw.org djó kʉ ná lo)
Anja addudho ma Biblia gʉ kpetsi kpa ddó kpetsi kpa na inga isɨ ndrŭ ddó isɨ ndrŭ na ná føri na mana nga kʉ le ndro fø ndrŭ ndro ri nari.
“Ni Mubaya kwa Mwanaume Kufanya Ngono na Mwanaume na Mwanamuke Kufanya Ngono na Mwanamuke?” (Jw.org djó kʉ ná lo)
Aneri ni chu ngbaribbai ma ngono dhi lo djo Mungu bbʉ ná yadha ko ronga b’o nari.
“Ngono ya Kinywa, Nayo Ni Ngono?” (Jw.org djó kʉ ná lo)
Anja ndi lai kpetsi kpa na ngʉ ddó ná ke ronga chongʉe ná lo ndiro ndi lé ndidhó maisha thika nja ndi bbʉ hwè Mungu dho d’e nari, ɨ djǒ ripo ná lo nǎ, “Walinitendea kwa Heshima.”
“Biblia Inabadilisha Maisha ya Watu” (Munara wa Mulinzi, 1 Mwezi wa 4, 2011)
a Nzá thonga ná fø nyi tsu njonjo kʉ ná lo ndi nǎ; uasherati le nji nari ma, le tso na le ngono nji nari ma ndirigoti nga kʉ le bbá ke inga le bbá le ná le ró kpetsi-nga inga isɨ-nga ronga le lø ndiri cho le ngono dyu dho d’e nari ma na.
