TUTO 41
Bibele Ibulelañi ka za Somano?
Batu babañata habalukuluhangi kuambola ka za somano. Nihakulicwalo, Bibele haibulela ka za somano, ibulelanga ka kunonga kono ili ka likute. Zeibulela zalutusa. Mi luli kwaswanela kakuli Bibele izwa ku Jehova, yena Mubupi waluna. Kacwalo, waziba hande zekona kulutusa. Mulimu ulutaluseza zeluswanela kueza kuli lumutabise ni zekona kulutusa kuikola bupilo kuya kuile.
1. Mubonelo wa Jehova ka za somano ki ufi?
Somano ki mpo yezwa ku Jehova. Ubata kuli muuna ni musali babanyalani baikole somano. Mpo ya somano itusa muuna ni musali babanyalani kuba ni bana, kubonisana lilato, ni kutabelana ka nzila yende. Kona libaka Linzwi la Mulimu halili: “Unyakalale ni musali wa mwa bunca bwahao.” (Liproverbia 5:18, 19) Jehova ubata kuli muuna ni musali babanyalani ili babali Bakreste basepahale mwa linyalo labona, ilikuli basike baeza bubuki.—Mubale Maheberu 13:4.
2. Muzamao wa buhule ki nto mañi?
Bibele ilubulelela kuli “batu babapila ka muzamao wa buhule . . . habana kuyola saanda sa Mubuso wa Mulimu.” (1 Makorinte 6:9, 10) Bañoli ba Bibele bane baiñola mwa Sigerike, nebaitusisize linzwi la por·neiʹa ili kutalusa muzamao wa buhule. Linzwi leo likopanyeleza (1) somano a yeeziwa ki batu babasika nyalana, (2) kalombe, ni (3) kusomana ni folofolo. Haiba ‘luambuka muzamao wa buhule,’ lutabisa Jehova mi lwatuseha.—1 Matesalonika 4:3.
MUBATISISE
Munyakisise zekona kumitusa kuambuka muzamao wa buhule ni momukona kutusezwa haiba muzwelapili kuba ni muzamao omunde.
3. Musabe kwa muzamao wa buhule
Muuna yasepahala yabizwa Josefa naalikile ka taata kuhana kulobala ni musali yanaa mutundamezi kuli alobale ni yena. Mubale Genese 39:1-12, mi kihona mukanyakisisa lipuzo zelatelela:
-
Ki lika mañi zenetusize Josefa kutula muliko wo?—Mubone timana 9.
-
Mubona cwañi, kana Josefa naaezize katulo yeswanela? Ki kabakalai hamualaba cwalo?
Babanca kacenu bakona kulikanyisa cwañi mutala wa Josefa ni kuambuka muzamao wa buhule? Mubuhe VIDIO.
Jehova ubata kuli kaufelaa luna lusabe kwa muzamao wa buhule. Mubale 1 Makorinte 6:18, mi kihona mukanyakisisa lipuzo zelatelela:
-
Ki miinelo mañi yekona kutahisa kuli mutu aeze buhule?
-
Mukona kusaba cwañi kwa buhule?
4. Mwakona kutula miliko
Ki lika mañi zekona kutahisa kuli kumibele taata kutula muliko wa kueza buhule? Mubuhe VIDIO, mi kihona mukanyakisisa lipuzo zelatelela.
-
Ka kuya ka vidio, ki lika mañi zanaaezize muzwale hanaalemuhile kuli lika zanaanahana ni likezo zahae nelika tahisa kuli asike asepahala ku musalaa hae?
Nihaiba Bakreste babasepahala fokuñwi kubabelanga taata kuzwelapili kunahana lika zende. Mukona kuambuka cwañi kuzwelapili kunahana za buhule? Mubale Mafilipi 4:8, mi kihona mukanyakisisa lipuzo zelatelela:
-
Ki lika mañi zende zeluswanela kunahananga?
-
Kubalanga Bibele ni kuzwelapili kupateha kusebeleza Jehova kukona kulutusa cwañi kutula muliko wa kueza sibi?
5. Likuka za Jehova zalutusa
Jehova waziba zekona kulutusa. Ulutaluseza zekona kulutusa kuzwelapili kuba ni muzamao omunde ni molukona kutusezwa haiba lueza cwalo. Mubale Liproverbia 7:7-27 kamba mubuhe VIDIO, mi kihona mukanyakisisa lipuzo zelatelela.
-
Mushimani yelubuhile mwa vidio naaipumani cwañi mwa muliko?—Mubone Liproverbia 7:8, 9.
-
Ka kuya ka Liproverbia 7:23, 26, kuba ni muzamao wa buhule kukona kulutahiseza butata. Ki matata mañi elukona kuambuka haiba luzwelapili kuba ni muzamao omunde?
-
Kuba ni muzamao omunde kukona kulutusa kuikola bupilo kuya kuile?
Batu babañwi banahananga kuli zeibulela Bibele ka za kalombe haki zende. Kono Jehova Mulimu yalilato, ubata kuli batu kaufela baikole bupilo kuya kuile. Kuli lueze cwalo, lutokwa kulatelela likuka zahae mwa bupilo bwaluna. Mubale 1 Makorinte 6:9-11, mi kihona mukanyakisisa puzo yelatelela:
-
Ka kuya ka mubonelo wa Mulimu, kana kalombe ki ona feela mukwa ofosahalile?
Kuli lutabise Mulimu, kaufelaa luna lutokwa kueza licinceho mwa bupilo. Kana kueza cwalo kwatusa? Mubale Samu 19:8, 11, mi kihona mukanyakisisa lipuzo zelatelela:
-
Kana munahana kuli likuka zatomile Jehova za muzamao ki zende? Ki kabakalañi hamubulela cwalo?
Jehova utusize batu babañata kulatelela milao yahae. Kacwalo, ni mina wakona kumitusa
BABAÑWI BABULELANGA KULI: “Hakusika fosahala kueza buhule ni mutu ufi kamba ufi, ibile feela kuli mwalatana.”
-
Nemuka alaba cwañi mutu yabulela cwalo?
LITABA KA BUKUSWANI
Somano ki mpo yezwa ku Jehova yafile muuna ni musali babanyalani kuli baikole.
Mulundulule
-
Kuba ni muzamao wa buhule kukopanyelezañi?
-
Ki lika mañi zeka lutusa kuambuka muzamao wa buhule?
-
Kulatelela likuka za Jehova za muzamao kulutusa cwañi?
MUBONE LITABA ZEÑWI
Munyakisise libaka Mulimu habata kuli muuna ni musali bababata kupila hamoho banyalane.
Muitute libaka sikuka sa mwa Bibele sesibulela ka za kalombe hasisa talusi kuli luswanela kutoya batu babacwalo.
Mubone libaka milao ya Mulimu ka za muzamao wa buhule hai lusileleza.
“Kana Somano ya Mwahanu ki Somano Luli?” (Taba ya fa webusaiti)
Mwa taba yeli, “Nebanibonisize Likute,” mubone zenetusize muuna yanaaezanga kalombe kucinca mupilelo wahae ni kupila ka nzila yetabisa Mulimu.
“Bibele Yacincanga Bupilo Bwa Batu” (Tawala ya Mulibeleli, April 1, 2011)
a Somano yeo ikopanyeleza likezo zeshutana-shutana, zecwale ka somano yeeziwa ki muuna ni musali, somano ya mwahanu, ni somano ya mokuzwela zemaswe za mutabani, kamba kuswala-swala mutu yosika nyalana ni yena kwa lilama za lupepo.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
