SULA MAR 41
Ang’o ma Muma Wacho e Wi Nindruok?
Ji mang’eny ok oheroga wuoyo e wi weche mag nindruok. Kata kamano, sama Muma wuoyo e wi weche mag nindruok, otimo kamano e yor luor kendo ma ok opand gimoro amora. Weche manie Muma konyowa. To mano winjore maler nikech Jehova e Jachuech. Omiyo, ong’eyo gima nyalo konyowa. Onyisowa gik ma wanyalo timo mondo wamore, kod gik ma nyalo miyo wabed mamor nyaka chieng’.
1. Jehova neno nade wach nindruok?
Nindruok en mich moa kuom Jehova. Odwaro ni michno okel mor ne dichwo gi dhako mokendore. Michno konyogi mondo gibed gi nyithindo kendo miyogi thuolo maber mar nyiso ni giherore. Mano e momiyo Wach Nyasaye wacho niya: ‘Bed mamor gi chi tinni.’ (Ngeche 5:18, 19) Jehova dwaro ni Jokristo mokendore omakre motegno gi joma gikendorego kendo kik gichod.—Som Jo-Hibrania 13:4.
2. Terruok en ang’o?
Muma nyisowa ni “joterruok . . . ok noyud pok e Pinyruodh Nyasaye.” (1 Jo-Korintho 6:9, 10) Joma ne ondiko Muma e dho Grik notiyo gi wach mar por·neiʹa mondo gilergo timbe mag terruok. Wachno oriwo (1) nindruok a e kind joma ok okendore, (2) nindruok e kind chwo gi chwo kod mon gi mon, kod (3) nindo gi le. Wamoro Jehova kendo wayudo ber ka ‘wawere gi terruok.’—1 Jo-Thesalonika 4:3.
TIM NONRO
Non ane kaka inyalo tang’ gi timbe mag terruok kod ber ma ibiro yudo ka ibedo gi timbe maler.
3. Ringuru terruok
Josef notemo matek mondo osik ka en gi timbe maler. Som Chakruok 39:1-12, kae to uwuo e wi penjo ma luwogi:
-
Ang’o ma ne ojiwo Josef mondo oring terruok?—Ne kwan matindo 9.
-
Be iparo ni Josef notimo yiero maber? Ang’o momiyo iwacho kamano?
Ere kaka rowere nyalo luwo ranyisi mar Josef kendo ringo terruok e kindewagi? Tug VIDIO.
Jehova dwaro ni waduto wakwed timbe mag terruok. Som 1 Jo-Korintho 6:18, kae to uwuo e wi penjo ma luwogi:
-
Gin ang’o ma nyalo miyo ng’ato odonj e timbe mag terruok?
-
Ere kaka inyalo ringo terruok?
4. Kaka inyalo kwedo tembe
Gin ang’o ma nyalo miyo kwedo timbe mag terruok obed matek? Tug VIDIO, kae to uwuo e wi penjo ma luwo.
-
En ang’o ma owadwa manie vidiono notimo, sama nofwenyo ni pache kod timbene ne nyalo miyo odonj e chode?
Kata mana Jokristo motegno bende temoga matek mondo gibed gi paro maler. Inyalo timo ang’o mondo kik isik kiparo gik mochido? Som Jo-Filipi 4:8, kae to uwuo e wi penjo ma luwogi:
-
Gin gik moko kaka mage ma onego wapar?
-
Ere kaka somo Muma kod bedo modich e tij Jehova, nyalo konyowa mondo wakwed timbe maricho?
5. Chike mag Jehova konyowa
Jehova ong’eyo gik ma nyalo kelonwa ber. Onyisowa gik monego watim mondo wabed gi timbe maler kod kaka timo kamano nyalo konyowa. Som Ngeche 7:7-27 kata tug VIDIO, kae to uwuo e wi penjo ma luwo.
-
Ere kaka wuoyino nodonjo e tem?—Ne Ngeche 7:8, 9.
-
Ngeche 7:23, 26, konyowa ng’eyo ni terruok nyalo kelo hinyruok mang’eny. Gin chandruoge mage ma ok wabi yudo ka wabedo gi timbe maler?
-
Ere kaka bedo gi timbe maler konyowa mondo wabed mamor nyaka chieng’?
Nitie joma wachoga ni gima Muma wacho e wi terruok e kind chwo gi chwo kod mon gi mon ok en gima nyiso ni Nyasaye oherowa. Kata kamano, Jehova en Nyasaye ma jahera kendo odwaro ni ji odag gi mor nyaka chieng’. Mondo wadag e ngimano, nyaka waluw chikene. Som 1 Jo-Korintho 6:9-11, kae to uwuo e wi penjo ma luwoni:
-
Be gombo mar nindruok e kind chwo gi chwo kata mon gi mon e gombo kende marach e wang’ Nyasaye?
Mondo wamor Nyasaye, waduto nyaka watim lokruok. To be nitie ber ma wanyalo yudo ka watimo lokruok? Som Zaburi 19:8, 11, kae to uwuo e wi penjo ma luwogi:
-
Be iparo ni chike mag Jehova ma wuoyo e wi timbe mabeyo konyowa? Ang’o momiyo iwacho kamano?
Jehova osekonyo ji mang’eny mondo giluw chikene ma wuoyo e wi timbe mabeyo. In bende onyalo konyi
PARO MA JOMOKO NIGO: “Inyalo nindo gi ng’ato ang’ata, tek mana ni oyie.”
-
Inyalo dwoko nade?
PUONJ MADUONG’
Nindruok en mich moa kuom Jehova ma omiyo dichwo gi dhako mokendore mondo giyudgo mor.
Ang’o ma ipuonjori?
-
Terruok oriwo timbe mage?
-
Ang’o ma biro konyowa mondo wawere gi timbe mag terruok?
-
Wayudo ber mage sama waluwo chike makare mag Jehova?
MED TIMO NONRO
Non ane gimomiyo Nyasaye dwaro ni dichwo gi dhako modak kanyachiel okendre kaluwore gi chik.
“Ang’o ma Muma Wacho e Wi Dak Kanyachiel ka Pok Ukendoru?” (Sula ma yudore e jw.org)
Non ane gimomiyo puonj mag Muma ma wuoyo e wi terruok e kind chwo gi chwo kod mon gi mon ok nyis ni onego wasin gi joma kamago.
“Be Terruok e Kind Chwo gi Chwo Kata Mon gi Mon En Gima Rach?” (Sula ma yudore e jw.org)
Non ane kaka chike Nyasaye ma wuoyo e wi nindruok ritowa.
“Be Nindruok mar Dhok En Terruok?” (Sula ma yudore e jw.org)
Som sula ma wiye wacho ni “Ne Ok Gijara,” mondo ine gima ne ochwalo ng’at moro ma ne terore gi chwo wetene mi oloko kit ngimane mondo omor Nyasaye.
a Mano oriwo nindruok e kind joma ok okendore, nindruok mar dhok kata mar sianda, kata tugo gi duong’ mar ng’ato.
Samoro Inyalo Hero Magi Bende
PENJO MA JI JOPENJO
Ere Kaka Joneno mag Jehova Puonjoga Ji Muma?
E puonjruok Muma ma Joneno mag Jehova tayoga, inyalo tiyo gi Muma moro amora mihero. Bed thuolo gwelo joodu duto kata osiepeni e puonjruok.
