ZIRLAI 41
Bible-in Mipat Hmeichhiatna Chungchângah Eng Nge A Sawi?
Mi tam tak chuan mipat hmeichhiatna chungchâng sawi chu nuam an ti lo. Mahse, Bible-in mipat hmeichhiatna chungchâng a sawi hian, tlang tak leh zahawm takin a sawi a ni. Jehova chu min Siamtu leh kan tâna ṭha ber tûr hretu a nih avângin, mipat hmeichhiatna chungchâng a sawite chu kan hlâwkpui a. Ani chuan amah tilâwm tûra kan tih ngaite leh chatuana hlim tûra min ṭanpuitu thilte chu min hrilh a ni.
1. Mipat hmeichhiatna chungchâng Jehova thlîr dân chu eng nge ni?
Mipat hmeichhiatna hi Jehova thilpêk a ni a. Chu chu nupa inkâra hlimna thlentu ni tûrin a duh a ni. He thilpêk hi nupate tân fa neih theih nân mai ni lovin, an inhmangaihna leh ngainatna chu hlimawm taka an inlantîr theih nân a ni. Chuvângin, Pathian Thu chuan: “I tleirâwl lai nupuiah chuan hlim rawh,” tiin a sawi. (Thufingte 5:18, 19) Jehova chuan Kristian nupate chu uirena suala an tlûk luh ngaih loh nân, an kawppuite chunga rinawm reng tûrin a beisei a ni.—Hebrai 13:4 chhiar rawh.
2. Nungchang bawlhhlawhna chu eng nge ni?
Bible chuan: ‘Inngaih hmangte chuan Pathian Ram an luah lo vang,’ tiin min hrilh a. (1 Korinth 6:9, 10) Grik ṭawnga Bible ziaktute chuan nungchang bawlhhlawhna hrilhfiah nân por·neiʹa tih thu mal hi an hmang a. Chu thu malah chuan (1) innei lote inkâra mipat hmeichhiatna hman te, a (2) neih inang inkawpna te, leh (3) ran nêna inpâwlna te a tel a ni. ‘Inngaih kan bânsan’ hian Pathian Jehova kan tihlâwm bâkah, keimahni ngei pawhin kan hlâwkpui a ni.—1 Thessalonika 4:3.
ZIR BELHIN HMUH BELH RAWH
Nungchang bawlhhlawhna i pumpelh theih dân leh nungchang thianghlimna vawn tlat i hlâwkpui theih dân ngaihtuah rawh.
3. Nungchang bawlhhlawhna tlânsan rawh
Mi rinawm Josefa chuan nungchang thianghlimna vawng tlat tûrin theih tâwp a chhuah a. Genesis 39:1-12 chhiarin, hêng zawhnate hi sawiho vang che u:
-
Engin nge Josefa chu nungchang bawlhhlawhna tlânsan tûra chêttîr?—Châng 9-na en rawh.
-
Josefa chuan thu tlûkna dik a siamin i hria em? Engvângin nge?
Engtin nge tûn laia ṭhalaite chuan Josefa entawnin nungchang bawlhhlawhna an tlânsan theih? VIDEO chu chhuah rawh.
Jehova chuan kan za hian nungchang bawlhhlawhna tlânsan tûrin min duh a. Korinth thawn khat 6:18 chhiarin, hêng zawhnate hi sawiho vang che u:
-
Eng dinhmunin nge mi chu nungchang bawlhhlawhna suala tlûk luhtîr thei?
-
Engtin nge nungchang bawlhhlawhna i tlânsan theih?
4. Thlêmna i do thei
Engin nge nungchang bawlhhlawh tûra thlêmna do chu tiharsa thei? VIDEO chu chhuah la, a hnuaia zawhna hi sawiho vang che u.
-
Video-a unaupa chuan a ngaihtuahna leh thiltihte’n a nupui chunga rinawm lohna a thlen thei tih a hriat chuan eng thil nge a tih?
A châng chuan Kristian rinawmte pawhin ngaihtuahna thianghlim neih reng chu harsa an ti thei a. Engtin nge nungchang bawlhhlawhna lam thilte ngaihtuah reng chu i pumpelh theih? Philippi 4:8 chhiarin, hêng zawhnate hi sawiho vang che u:
-
Eng thilte nge kan ngaihtuah ang?
-
Engtin nge Bible chhiarna leh Jehova rawngbâwlnaa buai rengna chuan sual tûra thlêmna do tûrin min ṭanpui theih?
5. Jehova tehnate kan hlâwkpui
Jehova chuan kan tâna ṭha ber tûr a hria a. Ani chuan nungchang thianghlimna vawn reng dân leh chutianga tih kan hlâwkpui dân min hrilh a ni. Thufingte 7:7-27 chhiar la, a nih loh leh VIDEO chu chhuahin, a hnuaia zawhnate hi sawiho vang che u.
-
Engtin nge he tlangvâl hian thlêmna a pan?—Thufingte 7:8, 9 chhiar rawh.
-
Thufingte 7:23, 26 sawi angin, nungchang bawlhhlawhna chuan sawhkhâwk pawi tak a nei thei a. Nungchang thianghlimna kan vawn tlat chuan eng buainate nge kan pumpelh theih?
-
Engtin nge nungchang thianghlimna chuan chatuana hlim tûra min ṭanpui theih?
Mi ṭhenkhat chuan Bible-in neih inang inkawpna chungchâng a sawi hi hmangaihna a neih lohthlâk niin an hria a. Mahse, hmangaihna Pathian Jehova chuan mi tinte chu chatuana hlim tûrin a duh a ni. Chutianga hlim thei tûr chuan a tehnate mila kan nun ngei a ngai. Korinth thawn khat 6:9-11 chhiarin, he zawhna hi sawiho vang che u:
-
Pathian thlîr dân aṭangin neih inang inkawp châkna hi châkna dik lo awmchhun a ni em?
Pathian tilâwm tûr chuan kan za hian kan inthlâk danglam a ngai a. Inthlâk danglam tûra theih tâwp chhuah chu a phû em? Sâm 19:8, 11 chhiarin, hêng zawhnate hi sawiho vang che u:
-
Nungchang lama Jehova tehnate chu a inâwmin i hria em? Engvângin nge?
Jehova chuan mi tam tak chu nungchang lama a tehnate zâwm tûrin a ṭanpui a. Nang pawh a ṭanpui thei che
MI ṬHENKHAT SAWI DAN: “An inhmangaih phawt chuan mi pahnih mut dun chu a pawi lo.”
-
Engtin nge i ngaih?
KHAIKHAWMNA
Mipat hmeichhiatna hi nupate hnêna Pathian Jehova thilpêk a ni.
Ennawnna
-
Nungchang bawlhhlawhnaah chuan eng nge tel?
-
Nungchang bawlhhlawhna pumpelh tûrin engin nge min ṭanpui ang?
-
Nungchang lama Jehova tehnate kan zawm hian engtin nge kan hlâwkpui?
HRIAT BELH NAN
Mipa leh hmeichhia chêng dûn duhte chu Pathianin innei tûra a duh chhan chhiar rawh.
“Innei Si Lova Chên Dun Chungchâng Bible-in Eng Nge A Sawi?” (Website thuziak)
Neih inang inkawpna chungchânga Bible tehna hi anmahni haw tûra zirtîrna a nih loh chhan ngaihtuah rawh.
Mipat hmeichhiatna chungchânga Pathian dânte’n min vênhim dân chhiar rawh.
“Kâa Châkna Inhrîkthlâksak Hi Mipat Hmeichhiat Hmanna A Tling Em?” (Website thuziak)
“Zahawm Takin Min Cheibâwl” tih thiltawnah neih inang kawp chîng pa pakhatin Pathian tilâwm tûra a nun thlâk danglamtîrtu a sawi chu chhiar rawh.
a He mipat hmeichhiatna hmannaah hian thiltih chi hrang hrang, dân pângngaia inpâwlna te, kâa inpâwlna te, mawngkuaa inpâwlna te, leh zahmawh inkhâlsakna te a tel a ni.
You May Also Like
ZAWH FO ṬHIN ZAWHNATE
Jehova Thuhretute Ruahman Bible Zirna Chu Eng Nge Ni?
Jehova Thuhretute ruahman a thlâwna sawihona phûrawm takah Bible lehlin eng pawh i hmang thei a. I chhûngte leh i ṭhian tu pawh i sâwm thei a ni.
