LEKSION 41
¿Wiˈixë Biiblyë tmaytyaˈaky ko jäˈäy yˈity tsyëënë?
Mayë jäˈäy kyaj tnimaytyäˈägäˈändë wiˈix tsyëën jyukyˈattë tuˈugë yetyëjk mët tuˈugë toxytyëjk. Perë Biiblyë wintsëˈkën myëët tmaytyaˈaky ets kyaj tkuyuˈutsy, ets mbäät nmëbëjkëm mët ko yëˈë yajjääyë Jyobaa, mëdiˈibë ojts xyajkojëm ets nyijäˈäwëp ti mbäät ndukˈoyˈäjtëm. Yëˈë xyˈanmäˈäyëm wiˈix mbäät njukyˈäjtëm parë jotkujk nnayjyäˈäwëm ets nanduˈun parë ndukxondakëm ja jukyˈäjtën xëmëkyëjxm.
1. ¿Wiˈixë Jyobaa tˈixy ko jäˈäy yˈit tsyëënëdë?
Jyobaa Dios yëˈë ojts tpëjktaˈaky etsë jäˈäy yˈit tsyëënëdët. Tsyojkypy ets ja yetyëjk mët ja toxytyëjk mëdiˈibë të pyëk të yˈuuktën ttukxondäˈäktët. Dios kyaj jeˈeyë ojts tpëjktaˈaky etsë kasäädë jäˈäy tpäättëdë yˈuˈunk yˈënäˈk, nanduˈunën parë nyaytsyokëdët. Pääty mä yˈAyuk jyënaˈany: “Tukxondäˈäk ja mgudëjk mëdiˈibë mëët të mˈënäˈkˈaty” (Proverbios 5:18, 19). Jyobaa tyukˈaneˈempy ja kasäädë jäˈäy mëdiˈibë mëduunëdëp ets nyaywyingutsëˈëgëdët. Pääty, ninäˈä mbäät kyatsëënë mëdë wiinkpë (käjpxë Ebreeʉsʉty 13:4).
2. ¿Näˈä Dios dyajkuboky ko jäˈäy yˈit tsyëënëdë?
Biiblyë jyënaˈany: ‘Mä ja Dios ja kyutujktaknën käˈäp yajpäädäˈändë mëdiˈibë jyot nyiniˈkx yäjktëbën’ o yajtuundëp axëëk (1 Corintios 6:9, 10, TY). Ko Biiblyë yajjääy, yëˈë tuunë yäˈädë ayuk grieegë pornéia ko jäˈäy dyajtuny tëgatsy o axëëk ja nyiniˈkx. Extëm 1) ko tsyëënëdë pënaty kyajnëm pyëktë o ko kasäädë jäˈäy tsyëënë mëdë wiinkpë, a 2) ko tsyëënëdë ak yetyëjk o ak toxytyëjk ets 3) ko tsyëënëdë mëdë jëyujk animal. Ko njëjpkudijëmë duˈumbë poky, ta agujk jotkujkë Jyobaa nyajnayjyäˈäwëm ets mëjwiin kajaa ndukˈoyˈäjtëm (1 Tesalónikʉ 4:3).
AK NIJAWË NIˈIGYË
Min nˈakˈijxëm wiˈix mbäät mnaygyuentëˈatyëty parë kyaj xyajtunët tëgatsy ja mniniˈkx ets wiˈix xytyukˈoyˈatäˈäny pën wäˈäts ja mjukyˈäjtën xyajnëjkxy.
3. Kugaˈak ko myajtëgoyäˈänëdët tuˈugë yetyëjk o toxytyëjk
José, tuˈugë Diosmëduumbë mëdiˈibë tëëyëp jukyˈäjt, kyaj tkupëjky ko tuˈugë toxytyëjk jyamëttsëënëyanë. Käjpxtë Génesis 39:1-12 ets nimaytyäˈäktë mëdiˈibë yä yajtëëpy:
-
¿Ti José pudëjkë parë ojts tkugeˈeky ja toxytyëjk? (Ixtë bersikulo 9).
-
Wiˈix mˈokwinmay, ¿oyëdaa mëdiˈibë José tyuun ko ojts tkugeˈeky? ¿Ets tiko duˈun mwinmay?
¿Wiˈix mbäädë ënäˈktëjk tpanëjkxëdë José yˈijxpajtën ets tkugaˈaktët ko yajtëgoyäˈänëdët ja yetyëjk o ja toxytyëjk? Ixtë BIDEO.
Jyobaa tsyojkypy ets niˈamukë nnaygyuentëˈäjtëm parë kyaj nduundëgoˈoyëm mëdë yetyëjk o toxytyëjk. Käjpxtë 1 Korintʉ 6:18 ets nimaytyäˈäktë mëdiˈibë yä yajtëëpy:
-
¿Tijaty mbäät tuˈugë jäˈäy yajkäˈäyëty parë tyuundëgoyët mëdë yetyëjk o toxytyëjk?
-
¿Wiˈix mbäät xykyugeˈeky ko myajtuundëgoyäˈänëdët ja yetyëjk o toxytyëjk?
4. Mijts mbäät xyjyëjpkudijë parë kyaj mdëgoyët
¿Tiko mbäät xytsyiptakxëm njëjpkudijëm ko xyajtuundëgoyäˈänëm tuˈugë yetyëjk o toxytyëjk? Ixtë BIDEO ets nimaytyäˈäktë mëdiˈibë yä yajtëëpy:
-
¿Ti të ttuny ja nmëguˈukˈäjtëm ko të tpëkyë kuentë ko tijaty tyuumpy ets wyinmaapy mbäät yajtëgoyëty mëdë wiink toxytyëjk?
Axtë pënaty oy Diosmëduundëp, tsojkëp ttundëdë mëjääw parë dyaˈittëdë jyot wyinmäˈäny wäˈäts. ¿Ti mbäät xytyuny parë kyaj xywyinmääyˈadëˈëtsët ja axëkˈäjtën mëdiˈibë mbäät myajtëgoyëty? Käjpxtë Filipʉs 4:8 ets nimaytyäˈäktë mëdiˈibë yä yajtëëpy:
-
¿Tijatyxyëp mbäät nbawinmäˈäyëm?
-
Wiˈix mˈokwinmay, ¿mbäädëdaa xypyudëjkëm ko ngäjpxëmë Biiblyë ets ko jot winmäˈäny nyaˈijtëm mä Diosë tyuunk parë njëjpkudijëm tijaty xyajtëgoyäˈänëm? ¿Tiko duˈun mwinmay?
5. Ndukˈoyˈäjtëm ko nmëmëdoˈowëmë Jyobaa yˈanaˈamën
Jyobaa nyijäˈäwëp ti mbäät ndukˈoyˈäjtëm. Pääty xyˈanmäˈäyëm wiˈix mbäät nyajnëjkxëm wäˈäts ja jukyˈäjtën ets wiˈix ndukˈoyˈatäˈänëm ko duˈun nduˈunëm. Käjpxtë Proverbios 7:7-27 ets ixtë BIDEO. Ta net xynyimaytyäˈäktët mëdiˈibë yä yajtëëpy:
-
¿Wiˈixë yäˈädë mixy ojts nyayajtëkëty jotmayoty? (Ixtë Proverbios 7:8, 9).
-
Proverbios 7:23, 26 jyënaˈany ko mëkë jäˈäy tkuˈayowë ko yajtëgoyëty ja nyiniˈkx. ¿Wiˈix ndukˈoyˈatäˈänëm pën wäˈäts ja jukyˈäjtën nyajnëjkxëm?
-
Ko nyajnëjkxëm wäˈäts ja jukyˈäjtën, ¿tijaty kunuˈkxën nˈaxäjëyäˈänëm mä tiempë myiny kyëdaˈaky?
Ko Biiblyë dyajkubokyë jäˈäy tsyëënëdë ak yetyëjk o ak toxytyëjk, ta näägë jäˈäy wyinmaytyë ko mëkë yˈanaˈamën ets ko Dios kyaj dyaˈixyëtyë tsojkën. Perë Jyobaa yëˈë tuˈugë Dios mëdiˈibë tsojkp ets tyukmëtsojkypy niˈamukë jäˈäy parë jyukyˈattët xëmëkyëjxm. Jeˈeyë ko tsojkëp nyajnëjkxëm ja jukyˈäjtën extëm yëˈë tniˈanaˈamë. Käjpxtë 1 Korintʉ 6:9-11 ets nimaytyäˈäktë mëdiˈibë yä yajtëëpy:
-
¿Yëˈëyë Dios yajkubojkypy ko jäˈäy tmëttsëënëyaˈanyë myëëyetyëjk o myëëdoxytyëjk?
Parë Jyobaa xykyupëjkëm, tsojkëp niˈamukë nyajtëgäjtsëm ja jukyˈäjtën. ¿Wiˈix ndukˈoyˈatäˈänëm ko duˈun nduˈunëm? Käjpxtë Salmo 19:8, 11 ets nimaytyäˈäktë mëdiˈibë yä yajtëëpy:
-
¿Mwinmaapy ko Diosë yˈanaˈamën tsip nmëmëdoˈowëm? ¿Ets tiko duˈun mwinmay?
Jyobaa të tpudëkë nimayë jäˈäy parë myëmëdowëdët ets mijts mbudëkëyanëp nanduˈun.
NÄÄGË JÄˈÄY JYËNÄˈÄNDË: “Kyaj wyiˈixëty ko nimajtskë jäˈäy yˈit tsyëënëdë pën naytsyojkëdëp”.
-
Per mijts, ¿wiˈix mˈokjënäˈäny?
TI TË NJÄJTËM
Jyobaa duˈun ojts dyajkojˈyë naxwinyëdë jäˈäy parë yˈit tsyëënëdët ets tsyojkypy parë jyotkujkˈattët ja yetyëjk mët ja toxytyëjk mëdiˈibë të pyëktë.
Ajamyatsë
-
¿Näˈä Dios dyajkuboky ko jäˈäy yˈit tsyëënëdë?
-
¿Ti xypyudëkëyäˈänëm parë kyaj nduundëgoˈoyëm mët tuˈugë yetyëjk o toxytyëjk?
-
¿Wiˈix ndukˈoyˈäjtëm ko nyajnëjkxëm ja jukyˈäjtën extëmë Jyobaa tniˈanaˈamë?
AK PAYEˈEY
Nijawë tiko Dios ttsoky ets jawyiin pyëkët tuˈugë yetyëjk mët tuˈugë toxytyëjk mä kyajnëm nyaywyowëdë.
“¿Wiˈixë Biiblyë jyënaˈany ko jäˈäy tsyëënëdë mä kyajnëm pyëktë?” (Myiny mä jw.org)
Biiblyë yajkubojkypy ko jäˈäy tsyëënëdë ak yetyëjk o ak toxytyëjk, per kyaj yëˈë tˈandijy ko nˈaxëkˈijxëmë duˈumbë jäˈäy.
“¿Axëëgëdaa ko jäˈäy tmëttsëënë myëëyetyëjk o myëëdoxytyëjk?” (Myiny mä jw.org)
Nijawë wiˈix xykyuwäˈänëm ja Diosë yˈanaˈamën parë kyaj tëgatsy nyajtuˈunëm ja niniˈkx.
“¿Ijt tsënääytyëbë netyë jäˈäy ko ja nyiniˈkx dyajtëkëdë yˈääwoty?” (Myiny mä jw.org)
¿Ti pudëjkë tuˈugë yetyëjk mëdiˈibë nety myëttsënaabyë myëëyetyëjk parë dyajtëgäjtsyë jyukyˈäjtën etsë Dios kyupëjkë? Käjpx wiˈix tnimaytyaˈaky mä jyënaˈany “Wintsëˈkën myëëdëts ojts xyˈagëˈë xyˈaxäjëdë”.
“Biiblyë yëˈë yajtëgäjtsëdë jyukyˈäjtën” (Myiny mä Diˈib Xytyukˈawäˈänëm)
a Yëˈë nanduˈun yˈandijpy ko jäˈäy dyajtundë tëgatsy o axëëk ja nyiniˈkx ko tsyëënëdë, ko dyajtëkëdë yˈääwoty o yˈëxkëˈëytsyoow ets ko nyaytyoˈonxëdë ja nyiniˈkx.
You May Also Like
DIˈIB XËMË NAYAJTËËWËDËP
¿Wiˈixë Jyobaa tyestiigëty dyaˈëxpëktë jäˈäy?
Ko mˈëxpëkët mëdë Jyobaa tyestiigëty namayˈäjtën, mbäät xyajtunyë Biiblyë mëdiˈibë mdimytsyojkënyëˈajtypy. Mbäät nanduˈun xywyoy pënaty mdimywyowaampy, duˈunë mfamilyë o mëtnaymyaayëbë.
