KĨTHOOMO KĨA 41
Nĩatĩa Bibiria Yugaga Bwegie Kũmenyana Kĩmwĩrĩ?
Antũ babaingĩ nĩ baigagua nthoni kwarĩĩria mantũ jegie kũmenyana kĩmwĩrĩ. Amwe nou, rĩrĩa Bibiria ĩkwarĩĩria mantũ jegie kũmenyana kĩmwĩrĩ, ĩgwetaga mantũ carũrũkũ, ĩndĩ na njĩra ya gĩtĩĩo. Jarĩa yugaga nĩjatũtethagia. Ũntũ bũu nĩbũkũgwatanĩra na mathũgaanio. Gĩtũmi nĩ tontũ Bibiria yumĩte kĩrĩ Jehova, ũrĩa nĩ Mũũmbi weetũ. Kwou, naijĩ jarĩa jagũtwagĩra. Natwĩrĩte jarĩa tũbatere kũthithia nĩkenda tũmũgwĩria, na jarĩa jagatũtethia nĩkenda tũgwĩrĩrua ũtũũro kenya na kenya.
1. Jehova arĩna maoni jarĩkũ jegie kũmenyana kĩmwirĩ?
Kũmenyana kĩmwĩrĩ nĩ kĩewa kuuma kĩrĩ Jehova. Endaga mũkũrũ na mwekũrũ barĩa bagũrene bagwĩrĩrua kĩewa kĩu bobaĩrĩ. Kĩewa gĩkĩ nĩgĩtũmaga barĩa bagũrene bagĩa aana na kinya bomba kwonania wendo bũrĩa bwonanagua gatĩgatĩ ka muntũ mũrũme na muntũ mũka na njĩra ya kũgwĩrĩrua. Kĩu nĩkĩo gĩtũmi Rũteto rwa Mũrungu rugaga: “Gwiragua ni muka wa withi bwaku.” (Njuno 5:18, 19) Jehova arĩrĩgĩĩra Mũkristũ ũrĩa ũgũrene ae mwĩtĩkua kĩrĩ ũrĩa bagũrene nawe, nĩkenda batĩkeje gũtonya kĩrĩ ũthũngĩĩri kinya rĩ.—Thooma Ahibirania 13:4.
2. Ũthũngĩĩri nĩmbi?
Bibiria ĩtwĩraga atĩ “athungiiri . . . batigakuruka Unenene bwa Murungu.” (1 Akorintho 6:9, 10) Andĩki ba Bibiria barĩa baatumĩĩre kĩngĩriki, baatumĩre riĩtwa por·neiʹa gũtarĩĩria ũthũngĩĩri. Riĩtwa rĩrĩ rĩarĩĩragia (1) kũmenyana kĩmwĩrĩ a na muntũ ũtĩ mũkũrũ kana mwekũrũ waaku, (2) kũmenyana kĩmwĩrĩ antũ ba mũthemba jũmwe, na (3) kũmenyana kĩmwĩrĩ na nyoomo. Nĩtũgwĩragia Jehova na tũkagunĩka rĩrĩa twaciebania na ũthũngĩĩri.”—1 Athesalonike 4:3.
ĨNJA NKŨRŨKI
Iritane ũrĩa ũũmba gũciebania na ũthũngĩĩri na ũrĩa ũkagunĩka wathingatĩĩra mĩtugo ya wagĩru.
3. Matũka ũthũngĩĩri
Muntũ mũrũme mwĩtĩkua ũrĩa wetagwa Jusufu, naciũmĩrie mono nĩkenda atĩkathithie ũthũngĩĩri. Thooma Kiambiriria 39:1-12, rĩu bwarĩĩrie biũria bibi:
-
Nĩmbi biatũmĩre Jusufu amatũka?—Tega mũstaarĩ jwa 9.
-
Ũrĩthũgaania ĩtagaaria rĩrĩa Jusufu aajũkĩrie nĩ rĩarĩ rĩriega? Nĩkĩ ũgũcookia ũu?
Nĩatĩa antũ babeethĩ bomba kwigerekania na Jusufu na bakamatũka ũthũngĩĩri? Tega VIDIO.
Jehova arĩenda twinthe tũregana na ũthũngĩĩri. Thooma 1 Akorintho 6:18, rĩu bwarĩĩrie biũria bibi:
-
Nĩ mantũ ta jarĩkũ joomba gũtũma muntũ athithia ũthũngĩĩri?
-
Gwe-rĩ, nĩatĩa ũũmba kũmatũka ũthũngĩĩri?
4. Womba kũregana na magerio
Nĩmbi biũmba gũtũma gũkethĩrwa bũrĩ ũntu bũbũũmũ kũgwa kĩgerione gĩa kũthithia ũthũngĩĩri? Tega VIDIO, rĩu bwarĩĩrie kĩũria gĩkĩ kĩthingatĩte.
-
Kĩrĩ vidio, nĩatĩa mũtaana-wa-baaba aathithĩrie rĩrĩa aamenyere atĩ mantũ jamwe jarĩa aathũgaanagia na kũthithia jarĩngĩtũma akethĩrwa atĩ mwĩtĩkua kĩrĩ mwekũrũ waawe?
Kinya Akristũ barĩa etĩkua magiita jamwe nĩbarũjaga na mathũgaanio jamathũũku. Nĩatĩa ũũmba gũtiga kũthũgaanĩria mantũ jamathũũku? Thooma Afilipi 4:8, rĩu bwarĩĩrie biũria bibi:
-
Nĩ mantũ jarĩkũ tũbuĩrĩte kũthũgaanĩria?
-
Nĩatĩa kũthooma Bibiria na kwĩthĩrwa na jamaingĩ jakũthithia ũtungatĩrine bwa Jehova, kũũmba gũtũtethia gũcinda magerio jarĩa joomba gũtũtonyia wĩyiene?
5. Mawaatho ja Jehova nĩjatũtethagia
Jehova naijĩ mantũ jarĩa jagũtwagĩra. Natwĩraga ũrĩa tũũmba kwĩthĩrwa na mĩtugo yagĩrĩte na mooguni ja kũthithia ũu. Thooma Njuno 7:7-27 kana ũtege VIDIO, rĩu bwarĩĩrie biũria bibi bithingatĩte.
-
Niatĩa mũtaana ũmwe ũmwĩthĩ aatonyere kĩgerione?—Tega Njuno 7:8, 9.
-
Kũringana na Njuno 7:23, 26, ũthũngĩĩri bũũmba kwĩthĩrwa na maumĩĩra jarĩkũ jamathũũku. Rĩrĩa twethĩrwa na mĩtugo ya wagĩru, nĩ mathĩĩna jarĩkũ tũciebanagia najo?
-
Nĩatĩa mĩtugo ya wagĩru yũũmba gũtũtethia kũgwĩrĩrua ũtũũro kenya na kenya?
Antũ bamwe bathũgaanagia atĩ jarĩa Bibiria yugaga bwegie kũmenyana kĩmwĩrĩ antũ ba mũthemba jũmwe, nĩ ũntũ bũtĩ bwa wendo. Ĩndĩ Jehova, Mũrungu wa wendo, endaga antũ bonthe bagwĩrĩrua ũtũũro kenya na kenya. Nĩkenda ũũmba kwĩja kũbũgwĩrĩrua, no mwanka ũtũũre kũringana na mawaatho jaawe. Thooma 1 Akorintho 6:9-11, rĩu bwarĩĩrie kĩũria gĩkĩ:
-
Kũringana na maoni ja Mũrungu-rĩ, wirirĩria bwa muntũ mũrũme kana muntũ mũka kũmenyana kĩmwĩrĩ na muntũ wa mũthemba jwawe, nĩbu akĩ tũbuĩrĩte kũregana nabu?
Nĩkenda tũgwĩria Mũrungu, twĩnthe nĩtũkũbatara kũthithia ũgarũrũku. Rĩ, nĩbwega gũciũmia kũthithia ũu? Thooma Zaburi 19:8, 11, rĩu bwarĩĩrie biũria bibi:
-
Ũrĩthũgaania mawaatho ja Jehova jegie mĩtugo ya wagĩru nĩjakũgwatanĩra na mathũgaanio? Nĩkĩ ũkuuga ũu, kana nĩkĩ ũtĩgwĩtĩkanĩĩria na ũntũ bũu?
Jehova natethetie antũ babaingĩ gũtũũra kũringana na mawaatho jaawe ja wagĩru. Omba gũgũtethia kinya gwe.
ANTŨ BAMWE BAUGAGA: “Gũtĩ thĩĩna antũ baĩrĩ kũmenyana kĩmwĩrĩ, bunka akĩ bendene.”
-
Ũgwe ũrĩona atĩa?
NA NJĨRA ĨNKUĨ
Kũmenyana kĩmwĩrĩ nĩ kĩewa kĩrĩa Jehova aete mũkũrũ na mwekũrũ barĩa bagũreene nĩkenda bakĩgwĩrĩrua.
Gũcookera
-
Nĩ mantũ ta jarĩkũ jagwetanagĩrua na ũthũngĩĩri?
-
Nĩmbi bigatũtethia kũregana na ũthũngĩĩri?
-
Nĩatĩa tũgunĩkaga rĩrĩa twathingatĩĩra mawaatho ja Jehova ja wagĩru?
CŨNKŨŨNA
Iritane nĩkĩ Mũrungu akwenda muntũ mũrũme na muntũ mũka barĩa bakwenda gũkarania amwe, bethĩrwe bagũrene.
Iritane nĩkĩ mawaatho ja Bibiria jegie kũmenyana kĩmwĩrĩ kĩrĩ antũ ba mũthemba jũmwe tĩ ũntũ bunjagĩĩra rũmena.
“Rĩ, Nĩ Wĩyia Antũ ba Mũthemba Jũmwe Kũmenyana Kĩmwĩrĩ?” (Thooma intanetine)
Iritane ũrĩa mawaatho ja Mũrungu jegie kũmenyana kĩmwĩrĩ jatũkaragia.
“Rĩ, Kũmenyana Kĩmwĩrĩ na Kanyua, Kamma Nĩ Kũmenyana Kĩmwĩrĩ?” (Thooma intanetine)
Kĩrĩ ũntũ bũrĩa bwonetwe “Nĩbanthithĩĩrie na Njĩra ya Gĩtĩĩo,” ona nĩmbi biekĩĩre inya muntũ mũrũme ũrĩa wamenyanaga kĩmwĩrĩ na arũme bangĩ, kũgarũra mũtũũrĩre jwawe nĩkenda agwĩria Mũrungu.
“Bibiria Nĩgarũraga Ũtũũro” (Mnara wa Mlinzi, Ĩpurũ 1, 2011)
a Mĩtugo ĩu mĩthũũku nĩkũgwata mantũ jamaingĩ ta, kũmenyana kĩmwĩrĩ na kanyua, na nyuma, muntũ mũrũme na muntũ mũka barĩa batĩgũrene, na kinya kũgwatagwata irũngo bia ũciari bĩa muntũ ũngĩ nĩkenda ũũkia mairirĩria ja kũmenyana kĩmwĩrĩ.
