MPANTTA 41
Isiyani Ibiiblya inhimyaaya nhina urupihana?
Atthu enci anawoonela ihaaya woopela mwaha urupihana. Masi Ibiiblya khinkhuwakhuwa hataa itthu wo wuuluma uyo mwahooyo. Masi inooluma uyo mwahooyo niihisima. Ni itthu inhimyaaya inaaniphwanyiha ifayita hiiva. Niisariyaaya, kontha Yehova Mumpiihu naacuwela itthu inniphwanyiha ifayita. Uyo naanihimyeera itthu inlamuliyeehu upanka wiira nintteelihe nrima ni itthu inhala unikavihera ukhala ootteeliya mpaka.
1. Nluku noonela cani urupihana?
Urupihana ikhanle itthuvo inkhuma wa Yehova. Uyo nopheela wiira iyo itthwiiyo apankeke nlopwana ni nthiyana athelanne. Iyo itthuvo Yehova yaavahilyaawe anamathelaneeyo inawaakavihera waayara asaana, masi ciicammo wooniherana ufentana waya. Nuulumo na Nluku nineera: “Yuutteelihe nrima amwaaraa eemirawaa.” (Miruku 5:18, 19) Yehova nopheela wiira nlopwana ni nthiyana athelanne aheettelane uluva. Phimaana, khaavo nkristau eekhweeli aahala upheela upanka iyo itthwiiyo.—Nsome Maberewu 13:4.
2. Urupihana woohiloka ikhanle isiyani?
Ibiiblya ineera: “Atthu anrupihana woohiloka . . . khanrwaa ukela wuumweneni wa Nluku.” (1 Akorintu 6:9, 10) Nuulumo neekereeku ninromoliya mbiiblyani waaciyaka urupihana woohiloka nikhanle porneía. Nna nuulumonna ninhela nhina (1) urupihana nlopwana ni nthiyana oohithelana a [moone niwehero], (2) urupihana alopwanaru awula athiyanaru ni (3) urupihaca inama. Hiiva nanyemaka urupihana woohiloka ninantteeliha nrima Yehova ni ciicammo ninaaphwanyera ifayita muukumini wihu.—1 Atesalonika 4:3.
MUNCERERE WIITTHUCA WINYU
Moone mananna ootthawa urupihana woohiloka ni moone ifayita cinhaleenyu uphwanya nlattu wookhalana moopuwelelo omaana.
3. Ntthawe urupihana woohiloka
Mbiiblyani naaromoliya nlopwana mmoca eehaniya Yusufu eekurumicile cinene wiira akhotte urupihana woohiloka. Nsome Uphattuwaca 39:1-12, ni mwamalihaka usoma, moopele mwaha ala makohwaala:
-
Isiyani yankurumicile Yusufu utthawa?—Moone iveerusu 9.
-
Nyuuva woonela winyu, itthu yaapankilyaawe Yusufu yaari yomaana? Kontha isiyani?
Manannani amirawo cinlamuliyaaya untakiha Yusufu ni utthawa uraruwa? Moone IVIDIYU.
Yehova nopheela wiira hiivano ninyeme urupihana woohiloka. Nsome 1 Akorintu 6:18, ni mwamalihaka usoma, moopele mwaha ala makohwaala:
-
Citthuni caahala umwiiriha ntthu urupihana woohiloka?
-
Manannani nyuuva cinlamuliyeenyu utthawa urupihana woohiloka?
4. Wanaakhitirya nyuuva utthema mwattehiyakavale
Isiyani yaahala unirikarikihela ukhotta urupihana woohiloka? Moone IVIDIYU, ni mwamalihaka woona, moopole mwaha nna nikohonna:
-
Munna nimonneehu nvidiyuni ahoonelela wiira moopuwelelwaawe ni citthu caapankaawe canhala umwiiriha weetta uluva. Isiyani yaapankilyaawe woonelela wawe iyo itthwiiyo?
Ikwaha ikhwaawe hataa makristau ookhuluvelya ahaana yeekurumicaka wiira ahikhalane moopuwelelo oohiloka. Isiyani inhala wuukaviherani nyuuva unyema wuupuwela citthu co usece? Nsome Afilipo 4:8, ni mwamalihaka usoma, moopele mwaha ala makohwaala:
-
Citthuni hiivano cinlamuliyeehu wuupuwela?
-
Manannani usoma Ibiiblya ni wiikurumica uvara miteko ca Yehova cinhalaaya unikavihera utthema nattehiyakavale?
5. Malakihero annivahaawe Yehova ninaaphwanyera ifayita
Yehova naacuwela itthu inniphwanyiha ifayita. Uyo naaniitthuciha mananna ookhalana meettelo omaana ni ciicammo ifayita imphwanyereehu nakhalanaka ayo meettelwaayo. Nsome Miruku 7:7-27 awula moone IVIDIYU, ni mwamalihaka, moopele mwaha ala makohwaala:
-
Isiyani mmirawooyo yaapankilyaawe yaamwiirihile ukhala mmasakhani?—Moone Miruku 7:8, 9.
-
Toko cinthoonyeraaya Miruku 7:23, 26, urupihana woohiloka pooti umwiiriha ntthu ukhalana masakha menci. Hiiva nanyemaka urupihana woohiloka, masakhani anhaleehu usempa?
-
Manannani ukhalana meettelo omaana unhalaaya unikavihera ukhala mpaka?
Atthu akiina anoopuwela wiira itthu inhimyaaya Ibiiblya nhina urupihana alopwanaru awula athiyanaru khinthoonyera nifento. Masi Yehova khanle Nluku oofenta nopheela wiira atthu otheene akhale ootteeliya. Wiira iyo itthwiiyo yiirannye, hiivano nihaana niiwelelaka ile inhimyaawe. Nsome 1 Akorintu 6:9-11, ni mwamalihaka usoma, moopele mwaha nna nikohonna:
-
Maweherwaawe Nluku, niireke urupihana alopwanaru awula athiyanaru phi itthu inlamuliyeehu unyema paasi?
Wiira nintteelihe nrima Nluku, otheene cihu nihaana nipankaka marukunuso muukumini wihu. Niireke wanaareera wiikurumica upanka iyo itthwiiyo? Nsome Isaalimu 19:8, 11, ni mwamalihaka usoma, moopele mwaha nna nikohonna:
-
Nyuuva woonela winyu, niireke malamulo annivahaawe Yehova akhanle omaana? Kontha isiyani?
Yehova haakavihera atthu enci wiiwelela malamulwaawe annikurumica ukhalana meettelo omaana. Uyo ciicammo pooti wuukaviherani nyuuva.
ATTHU AKIINA ANEERA: “Wakhalaka wiira atthu eeli anaacivelana khuntakhala urupihana.”
-
Nyuuva nnoonela cani?
UTHIKILELA
Urupihana ikhanle itthuvo Yehova yaavahilyaawe anamathelana.
Wuupuwela
-
Citthuni cimpanka mphantte urupihana woohiloka?
-
Isiyani inhala unikavihera utthawa urupihana woohiloka?
-
Kontha isiyani weettela malamulo a Nluku unaaniphwanyiha ifayita?
MWAPHEELAKA UCUWELA CITTHU CIKIINA
Moone kontha isiyani Nluku noonaawe ukhala itthu yofayita nlopwana ni nthiyana ukhala wamoca anathelanneene.
Hataa ukhalaka wiira Ibiiblya ineera wiira uruparupa alopwanaru awula athiyanaru ikhanle itthu yootakhala, moone kontha isiyani iyo itthwiiyo khinthoonyera wiira ahaana yathanyiyaka ale ampanka iyo itthwiiyo.
“Unaatakhala urupihana alopwanaru awula athiyanaru?” (Mwaha umphwanyannya nsayitini jw.org)
Moone manannani malamulo a Nluku anooluma urupihana annikhikiceraaya.
“Urupihana wo mmwano niireke khweeliini ukhanle urupihana?” (Mwaha umphwanyannya nsayitini jw.org)
Mwapheela ucuwela itthu yankurumicile nlopwana mmoca uhiya waaruparupana alopwana akhunanawe wiira antteelihe nrima Nluku, nsome ihantisi irina muru uneera “Ayo yahokitafiti sana-saana.”
“Ibiiblya inaarukunusa makhalelo aatthu” (Ukhalenla, 1 yo Abril yo 2011)
a Niwehero: Uhiya paasi urupihana, nuulumo porneía ciicammo ninaaca urupihana niinanna cikhwaawe toko urupihana wo mmwano, woomakhuttuni ni ciicammo uvarakaca ithiyana awula ilopwana ya ntthu nkiina.
