SMALKANKA 41
¿Waitna mairin wal prawaia lâka ba dukiara Baibil dîa wisa?
Waitna mairin wal prawaia tânka ba dukiara upla manis aisaia laik apia sa, ban sakuna Baibil ba baha dukiara aisisa taim param bara rispik lâka wal tânka marikisa. Bara baha tânka briaia ba yamni wan munisa. Baku kaia sa, kan Jehova Baibil ba wankan sa bara witin nu sa yawan dukiara dîa kau yamni ba witin wan paskan bamna. Gâd wan smalkisa wan daukanka nani wal nahki ai kupia lilia daukaia sip sa, bara raya ban kaia lâka briaia dukiara dîa hilp wan munbia ba sin.
1. ¿Waitna mairin wal prawaia lâka ba dukiara Jehova dîa smalkisa?
Waitna mairin wal prawaia lâka ba Jehova wina prisant kum sa. Witin want sa waitna mairin wal marit takan ba liliakira prawbia. Marit nani mapara diara yamni sa, kan baku luhpa briaia sip sa, bara pana pana witin nani ai latwanka lâka ba marikisa. Baha mita Baibil wisa: “Wahma kapram mairka kan ba wal, liliam bris” (Sins Lâka 5:18, 19). Jehova want sa kristian nani marit takan ba pana pana kasak kabia. Baha mita kristian kum ba marit lâka sauhkaia apia sa (Hibru Nani 13:4 aisi kaikma).
2. ¿Upla wal prawi rug lâka daukaia ba dîa tânka sa?
Baibil ba wan wisa “ai maya takras tâski lâka dauki ba [...] Gâd king aimaki ba lâka ra ai dukia bribia apia” (1 Korint 6:9, 10). Grîk bîla ra Baibil ulban uplika nani ba rug lâka tânka dukiara ulban taim por·neiʹa bîla ba yus munan. Baha tânka tilara naha daukanka nani bâra sa (1) upla marit takras wal prawi rug lâka daukaia, a (2) waitna ai tahkia wal, apia kaka mairin ai tahkia wal rug lâka daukisa, bara (3) upla daiwan wal rug lâka daukisa. Upla ba “marit takras kaka, ai maya briaia apia sa”, yawan Jehova bîla walisa kaka, witin lilia kabia bara wan rayaka ba yamni takisa (1 Tesalonaika 4:3).
KAU LAN TAKS
Laki kaiks dîa muni rug lâka daukaia apia ba, bara baku rayakam ra dîa sât yamnika nani brima ba sin.
3. Rug lâka ba wina plapaia sa
Baibil ra waitna kum, nina Josep ba karna trai munan mairin kum wal rug lâka daukaia apia dukiara. Blasi Sturka 39:1-12 aisi kaikma, bara naha dukiara aisi banhma:
-
¿Dîa tânka mita Josep ba rug lâka ba wina plapan? (bors 9 ba kaiks).
-
¿Man lukisma Josep daukan ba yamni kan? ¿Dîa muni?
Josep daukan baku, ¿naiwa piua ra wahma bara tiara nani ba nahki sip sa rug lâka ba wina plapaia? LILKA ba kaikma.
Jehova want sa yawan sut ba rug lâka ba wina plapbia. 1 Korint 6:18 aisi kaikma, bara naha dukiara aisi banhma:
-
¿Dîa sât daukanka nani tâka, rug lâka ra kauhaia sip sa?
-
¿Man nahki sip sma ki rug lâka ba wina plapaia?
4. Traika kaikanka ba man pura luaia sip sma
¿Dîa dukia nani mita rug lâka mapara aiklabaia karna wan munaia sip sa? LILKA ba kaikma, bara naha dukiara aisi banhma.
-
Lilka kaikan ba ra, ¿kristian waitna ba nahki ai tânka brin, witin diara dauki bara luki kan ba ai maritka lâka sauhkaia sip kan ba? bara ¿dîa daukan?
Kristian kasakkira kat sin ai lukanka ba sunu bri kaia wisi karna aiklabisa. ¿Man dîa daukaia sip sma rug lâka ra lukaia apia dukiara? Pilipai 4:8 aisi kaikma, bara naha dukiara aisi banhma:
-
¿Dîa sât dukia nani ra yawan lukaia sa?
-
Yawan Baibil aisi kaiki bara Jehova warkka daukisa kaka, ¿nahki hilp wan munaia sip sa traika kikanka nani pura luaia?
5. Jehova smalkanka lâka nani ba hilp wan munisa
Jehova nu sa, yawan dukiara dîa ba kau pain sa. Witin wan wisa nahki wan daukanka bara wan lukanka sunu briaia sip ba, bara baku yawan yamnika sâkbia. Sins Lâka 7:7-27 aisi kaikma, bara LILKA ba kaikma. Ningkara naha dukiara aisi banhma:
-
¿Wahmika ba nahki tnatka ra silp traika kaikanka ra diman? (Sins Lâka 7:8, 9 ba kaiks).
-
Sins Lâka 7:23, 26 aisi baku, rug lâka dauki uplika ba sip sa trabil tara ra dimaia. Baha daukanka tâsti ba yawan daukras kaka, ¿dîa trabilka nani bribia apia?
-
Wan daukanka bara wan lukanka yawan sunu brisa kaka, ¿nahki hilp wan munaia sip sa ban kaia ra lilia iwaia dukiara?
Upla kum kum lukisa waitna, apia kaka mairin ai tahkia wal prawaia mapara Baibil aisi ba uba karna sa. Sakuna Jehova latwan lâka Gâdka sa, bara witin want sa upla nani sut ban kaia ra lilia iwbia, baha liliaka briaia wisi yawan ba Gâd lâka nani kat iwaia sa. 1 Korint 6:9-11 aisi kaikma, bara naha dukiara aisi banhma:
-
¿Gâd ba waitna apia kaka mairin ai tahkia wal prawaia brinka bri nani ra baman saura kaikisa ki?
Gâd yamni wan kaikbia dukiara wan rayaka chens munaia sa. ¿Karna trai munaia ba aitani pain sa ki? Lawana Nani 19:8, 11 aisi kaikma, bara naha dukiara aisi banhma:
-
¿Wan daukanka wapni briaia Jehova wan smalki ba karna sa ki bîla walaia? ¿Dîa muni baku lukisma?
Jehova upla ailal ra hilp munan sa ai lâka bîla walbia. Man ra sin hilp mai munaia sip sa
UPLA KUM KUM NAKU LUKISA: “Upla ba pana pana latwan kaikisa kaka, rug lâka ba saura apia sa”.
-
¿Baha dukiara man dîa wima?
DÎA LAN TAKRAM
Waitna mairin wal prawaia lâka ba Gâd bui paskan, bara marit takan nani lilia kabia dukiara, prisant baku yabisa.
Wan kupia krawaia
-
Rug lâka ba tilara, ¿dîa daukanka saura nani bâra sa?
-
¿Dîa hilp wan munbia rug lâka ra kauhaia apia dukiara?
-
Jehova wan smalkisa wan daukanka bara wan lukanka ba sunu briaia, yawan baku daukbia kaka, ¿wan rayaka ba nahki yamni takbia ki?
KAU PLIKI KAIKS
Laki kaiks dîa muni waitna bara mairin ra Gâd makabisa, wâl briaia want sa kaka marit takbia.
“¿Marit takras wâl briaia ba dukiara Baibil dîa wisa?” (jw.org ra kaiks)
Baibil smalkisa waitna ai tahkia bara mairin ai tahkia wal prawaia ba saura sa, sakuna kaiks dîa muni witin nani ra misbara kaikaia tânka apia sa.
“¿Waitna ai tahkia, apia kaka mairin ai tahkia wal prawi ba saura sa ki?” (jw.org ra kaiks)
Lan taks nahki Gâd lâka nani ba rug lâka sâtka sut wina wan rayaka kan kahbisa.
“¿Upla wîna sirpika wal bîla ni pulaia ba sin rug lâka sa ki?” (jw.org ra kaiks)
Ulbanka kum “Witin nani ba rispik lâka wal ai aisan” ba aisi kaiks. Waitna kum ai tahkia wal rug lâka dauki kan ba ai sturka wan aisisa. Gâd kupia lâka daukaia dukiara, nahki witin baha sât rugka lâka swin ba kaiks.
“Baibil ba upla rayaka chens munisa” (La Atalaya abril 1, 2011)
a Rug lâka tânka tilara, daukanka tâski nani bâra sa: upla wal prawi ai bîla apia kaka tnata wal rug lâka dauki ba, baku sin upla wala ra kangbi mihta puli ba.
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
