SAK 41
Biiblã pʋgẽ, bõe la b yet pag ne rao lagengã wɛɛngẽ?
Neb wʋsg getame tɩ gom pag ne rao lageng yellã yaa yãnd bũmbu. La Biiblã pʋgẽ, b sã n wa gomd pag ne rao lageng yelle, b gomda rẽ yell vẽeneg-vẽenega, la ne waoogre. B sẽn yet bũmb ning Biiblã pʋgẽ wã nafda tõndo. Woto pa lingd tõnd ye. Bala yaa a Zeova sẽn yaa d Naandã n kɩt tɩ b gʋls Biiblã. Dẽnd a mii sẽn yaa sõma ne tõnd n tɩ yɩɩdã. A wilgda tõnd d sẽn tõe n maan to-to n ta a yam, la bũmb ning sẽn tõe n sõng-do, tɩ d vɩɩmd ne sũ-noog wakat sẽn kõn sa.
1. A Zeova tagsg yaa wãn ne pag ne rao lagengã?
Pag ne rao lagengã yaa a Zeova kũuni. A ratame tɩ yɩ bũmb sẽn kõt pag ne rao sẽn kẽ kãadem ne taab sũ-noogo. Lagengã pa kɩtd tɩ pag ne rao rog kamb bal ye. Kɩtdame me tɩ b tõe n wilg tɩ b nonga taaba, tɩ kõ-b sũ-noogo. Rẽ n so tɩ b yet Wẽnnaam Gomdã pʋgẽ yaa: “Maan sũ-noog ne f bi-bɩɩlem wakatẽ paga.” (Yel-bũnã 5:18, 19) A Zeova ratame tɩ kiris-neb a yiib sẽn kẽ kãadem ne taab maan sɩd ne taaba. Dẽnd b pa segd n zãmb taab ye.—Karm-y Ebre-rãmb 13:4.
2. Yoob yaa bõe?
Biiblã pʋgẽ, b yetame tɩ “yoaadbã . . . pa na n paam Wẽnnaam Rĩungã ye.” (1 Korẽnt rãmbã 6:9, 10) Gɛrkã gom-bil ning Biiblã gʋlsdb sẽn pʋte, b sã n wa gomd yoob yellã yaa porneya. Gom-bilã bilgda 1) pag ne rao sẽn pa kẽ kãadem ne taab sẽn kẽed ne taaba, a 2) rao ne raoa, wall pag ne pag sẽn kẽed ne taaba, la 3) ned sẽn kẽed ne rũnga. D sã n ‘lak d mens ne yoobo,’ d tata a Zeova yam, la nafda tõnd mẽngã—1 Tesalonik rãmb 4:3.
D BAO N BÃNG N PAASE
D ges d sẽn tõe n maan to-to n gil yoobo, la rẽ maaneg sẽn nafd tõnd to-to wã.
3. Zoe-y yoobo
Wẽn-sakd a ye yʋʋr sẽn boond t’a Zozɛf modgame n pa yo ye. Karm-y Sɩngr 39:1-12, tɩ rẽ poor bɩ y leok sogsgã:
-
Yaa bõe yĩng la a Zozɛf sẽn zoe wã?—Ges-y vɛrse a 9
-
Yãmb tagsdame t’a Zozɛf sẽn yãk yam ningã yaa sõma bɩ? Bõe yĩnga?
Wãn to la kom-bɩɩsã tõe n dɩk a Zozɛf togs-n-taar rũndã-rũndã, n zoe yoobo? Ges-y VIDEO wã.
A Zeova ratame tɩ tõnd fãa zãag d mens ne yoobo. Karm-y 1 Korẽnt rãmb 6:18, tɩ rẽ poor bɩ y leok sogsgã:
-
Yel-bʋs n tõe n wa kɩt tɩ ned yo?
-
Bõe n tõe n sõng-y tɩ y zoe yoobo?
4. Y tõe n tõoga y meng n da wa lʋɩ yoob pʋgẽ ye
Bõe n tõe n wa kɩt tɩ yɩ toog ne ned t’a ra lʋɩ yoob pʋgẽ? Ges-y VIDEO wã, tɩ rẽ poor bɩ y leok sogsgã.
-
Video wã pʋgẽ, saam-biigã sẽn bãng t’a tagsa wã la a tʋʋm-tʋmdɩ wã tõe n wa kɩtame t’a zãmb a pagã, bõe la a maan-yã?
Baa kiris-ned sẽn tũud Wẽnnaam ne a sũur fãa segd n mi n wõra a menga, n da wa tall tags-yood ye. Bõe n tõe n sõng-y tɩ y ra wa tagsd yoob yelle? Karm-y Filip rãmb 4:8, tɩ rẽ poor bɩ y leok sogsgã:
-
Bõe yell la d segd n tagsdẽ?
-
D sã n karemd Biiblã, la d wɩngd ne a Zeova tʋʋmã, wãn to la rẽ tõe n sõng-d tɩ d tõog d meng n da wa maan yel-wẽnde?
5. A Zeova noyã nafda tõndo
A Zeova mii sẽn yaa sõma ne tõnd n tɩ yɩɩda. A wilgda tõnd d sẽn tõe n maan n da wa tʋm tʋʋm-dẽgdo, la rẽ sẽn nafd-d to-to wã. Karm-y Yel-bũn 7:7-27 wall y ges VIDEO wã, tɩ rẽ poor bɩ y leok sogsgã.
-
Wãn to la bi-bɩɩgã kẽes a meng yellã pʋgẽ?—Ges-y Yel-bũn 7:8, 9.
-
Yel-bũn 7:23, 26 wilgdame tɩ yoobã tõe n waa ne zu-loees meng-menga. D sã n zãag d meng ne yoobo, zu-loe-bʋs la d na n gili?
-
D sã n zãagd d meng ne yoobo, wãn to la rẽ na n sõng-d tɩ d wa paam n vɩɩmd wakat sẽn kõn sa?
Neb kẽer tagsdame tɩ b sẽn yet bũmb ning Biiblã pʋgẽ rao ne raoa, wall pag ne pag sẽn kẽed ne taabã wɛɛngẽ wã wilgdame tɩ Wẽnnaam pa nonglem soab ye. La a Zeova yaa Wẽnnaam sẽn yaa nonglem soaba, n dat tɩ nebã fãa vɩɩmd wakat sẽn kõn sa. D sã n dat n wa paam woto, yaa tɩlɛ tɩ d tũ a noyã. Karm-y 1 Korẽnt rãmb 6:9-11, tɩ rẽ poor bɩ y leok sokrã:
-
Yaa rao ne raoa, wall pag ne pag sẽn kẽed ne taabã bal n yaa wẽng a Zeova nifẽ bɩ?
Sẽn na yɩl n ta Wẽnnaam yam, yaa tɩlɛ ne d fãa tɩ d toeem bũmb kẽere. Rẽ maaneg tara yõod bɩ? Karm-y Yɩɩn-sõamyã 19:8, 11, tɩ rẽ poor bɩ y leok sogsgã:
-
Yãmb tagsdame t’a Zeova sẽn kõ-d noy nins n wilg d sẽn segd n zã d mens to-to wã yaa dem-dem bɩ? Bõe yĩnga?
A Zeova sõnga neb wʋsgo, tɩ b tõog n tũud noy nins a sẽn kõ-d n wilg d sẽn segd n zã d mens to-to wã. A tõe n sõnga yãmb me
NEB KẼER SẼN YETE: “F tõe n kẽe ne sẽn yaa ned ning fãa, sã n mik tɩ y nonga taaba.”
-
Yãmb na n leokame tɩ bõe?
KƲMSGO
Pag ne rao lagengã yaa a Zeova kũuni, tɩ tõe n kõ pag ne a sɩd sũ-noogo.
Lebg-n-gese
-
B sã n gomd yoob yelle, bõe ne bõe n naage?
-
Bõe n na n sõng tõnd tɩ d gil yoobo?
-
D sã n tũud noy nins a Zeova sẽn kõ-d n wilg d sẽn segd n zã d mens to-to wã, wãn to la nafd tõndo?
BŨMB A TAABA
Bõe yĩng tɩ Wẽnnaam dat tɩ pag ne rao sẽn dat n vɩɩmd ne taab reng n kẽ kãadem?
Bõe yĩng tɩ Biiblã pʋgẽ, b sẽn gɩdg tɩ rao ne raoa, wall pag ne pag ra kẽ ne taabã, pa rat n yeel tɩ d segd n kisga sẽn maand-b woto wã?
“Rao sẽn kẽed ne raoa, wall pag sẽn kẽed ne paga: Yaa wẽng bɩ?” (Bee jw.org)
Wãn to la noy nins Wẽnnaam sẽn lugl pag ne rao lagengã wɛɛngẽ wã kogend tõndo?
“Pag ne rao sã n mogsd taab raoolem bɩ poglem, rẽ me yaa lageng bɩ?” (Bee jw.org)
Sõsg ning gom-zug sẽn yaa “B wilgame tɩ b nand-m lame” wã pʋgẽ, ges-y bũmb ning sẽn sõng rao a ye sẽn da kẽed ne rap t’a toeem sẽn na yɩl n ta Wẽnnaam yam.
“Biiblã toeemda neba” (Yʋʋmd 2011 tʋʋl-nif kiuug pipi daar Gũusg Gasgã)
a Leb n tõe n yaa b sẽn mogsd taab raoolem bɩ poglem, bɩ ned a ye wã sẽn na n gãe a to wã a se-nifẽ, wall n salemd a to wã raoolem bɩ a poglem.