ISIFUNDO 41
IBhayibhili Lithini Ngokuya Emacansini?
Abantu abanengi kabakhululekanga ukukhuluma ngendaba zemacansini. Kodwa iBhayibhili liyakhuluma ngendaba le futhi liyibeka ngendlela elesithunzi. Elikutshoyo kuyasinceda njalo kuyasivikela ngoba kuvela kuJehova uMdali wethu. UJehova ufuna senze okumthokozisayo ngoba uyakwazi ukuthi ukwenza njalo kuzasenza sithokoze kuze kube nini lanini.
1. UJehova uthini ngokuya emacansini?
Ukuya emacansini yisipho uJehova asinike abantu. Kodwa uthi indoda lomfazi abatshadileyo yibo kuphela okumele baye emacansini. Isipho lesi sinika abatshadileyo ithuba lokuthi batshengisane ukuthi bayathandana lelokuba labantwana. IBhayibhili lithi: “Thokoza ngomfazi wobutsha bakho.” (IZaga 5:18, 19) UJehova ufuna amaKhristu atshadileyo athembeke kubomkawo. Lokhu kutsho ukuthi akumelanga aye emacansini labanye abantu.—Bala uHebheru 13:4.
2. Kutshoni ukungaziphathi?
IBhayibhili lithi: “Labo abafebayo . . . abasoze balithole ilifa loMbuso kaNkulunkulu.” (1 KwabaseKhorinte 6:9, 10) Abalobi beBhayibhili ababhala ngesiGrikhi basebenzisa ibala elithi por·neiʹa ngesikhathi bekhuluma ngokungaziphathi. Ibala leli ligoqela (1) ukuya emacansini lomuntu ongatshadanga laye, a (2) ukuba yisitabane (3) lokulala lenyamazana. Ukubalekela “ubufebe” kwenza uJehova athokoze njalo kuyasivikela.—1 KwabaseThesalonika 4:3.
GEBHA UJULE
Engxenyeni le uzabona ukuthi ungenzani ukuze ubalekele ubufebe lokuthi ukwenza njalo kuzakunceda njani.
3. Balekela ubufebe
Ijaha elalithembekile okuthiwa nguJosefa labaleka ngesikhathi owesifazana othile efuna ukulala lalo. Bala uGenesisi 39:1-12 beselixoxa ngemibuzo le:
-
Kuyini okwenza uJosefa wabaleka?—Khangela ivesi 9.
-
Ucabanga ukuthi okwenziwa nguJosefa kwakuqondile yini? Kungani usitsho njalo?
Abasakhulayo bangamlingisela njani uJosefa endabeni yokubalekela ukungaziphathi? Bukelani IVIDIYO.
UJehova ufuna sonke sibalekele ubufebe. Bala u-1 Khorinte 6:18 beselixoxa ngemibuzo elandelayo:
-
Yiziphi izimo ezingenza umuntu acine efebile?
-
Ungakubalekela njani ukungaziphathi?
4. Ungasinqoba isilingo!
Kuyini okungenza kube nzima ukunqoba isilingo sokuthi ufebe? Bukelani IVIDIYO beselixoxa ngombuzo olandelayo.
-
Umfowethu wenzeni ngesikhathi enanzelela ukuthi izinto azenzayo lazicabangayo zizakwenza ukuthi acine engasathembekanga kumkakhe?
AmaKhristu athembekileyo lawo ayake athwale nzima ngezinye izikhathi ukuthi ahlale elemicabango ehlanzekileyo. Ungenzani ukuze ukhiphe imicabango emibi engqondweni yakho? Bala uFiliphi 4:8 beselixoxa ngemibuzo le:
-
Yizinto ezinjani okumele sicabange ngazo?
-
Ukubala iBhayibhili lokwenza okunengi emsebenzini kaJehova kungasinceda njani ukuthi sibalekele ukwenza isono?
5. Ukulalela uJehova kuyasinceda
UJehova uyakwazi ukuthi kuyini okungasenza sithokoze. Ngakho uyasitshela ukuthi siziphathe njani lokuthi ukwenza njalo kuzasinceda njani. Bala iZaga 7:7-27 kumbe libukele IVIDIYO beselixoxa ngemibuzo elandelayo.
-
Ijaha elisakhulayo lazifaka njani esilingweni?—Khangela iZaga 7:8, 9.
-
IZaga 7:23, 26 zitshengisa ukuthi ukungaziphathi kubangela ubuhlungu obukhulu. Ukubalekela ubufebe kusivikela njani?
-
Ukuziphatha kuhle kungasinceda njani ukuthi sihlale sithokoza?
Abanye abantu bathi okutshiwo liBhayibhili mayelana lobutabane kucindezela abanye. Kodwa okwenza uJehova wafaka imithetho enjalo yikuthi ufuna sithokoze. Abalalela imithetho le bazaphila kuze kube nini lanini. Bala u-1 Khorinte 6:9-11 beselixoxa ngombuzo lo:
-
Ngaphandle kobutabane, yiziphi ezinye izinto eziqanjwe emavesini la ezingamthokozisiyo uNkulunkulu?
Sonke kumele sitshintshe indlela esiphila ngayo ukuze sithokozise uNkulunkulu. Kungani kuqakathekile ukuthi senze njalo? Bala iHubo 19:8, 11 beselixoxa ngemibuzo elandelayo:
-
Ubona angani indlela uJehova afuna siziphathe ngayo iqondile yini? Kungani usitsho njalo?
UJehova usencedise abantu abanengi ukuthi benelise ukuphila ngendlela ayifunayo. Uzakuncedisa lawe
ABANYE BATHI: “Akukubi ukuthi abantu abathandanayo balale bonke.”
-
Ungamphendula usithini umuntu otshonjalo?
ISIFINQO
Ukuya emacansini yisipho uJehova asinike indoda lomfazi abatshadileyo.
Ufundeni?
-
Kutshoni ukuziphatha kubi?
-
Kuyini okuzasinceda sibalekele ubufebe?
-
Kusinceda ngani ukulalela imithetho kaJehova emayelana lokuziphatha?
THOLA OKUNENGI
Bala isihloko lesi ukuze ubone ukuthi kungani uNkulunkulu efuna indoda lomfazi baqale batshade bengakahlali bonke.
Bala isihloko lesi uzwe ukuthi kungani kungamelanga sizizonde izitabane lanxa iBhayibhili lisithi ubutabane abuqondanga.
“Ukuba Yisitabane Kubi Yini?” (Isihloko esikuwebhusayithi yethu)
Bala isihloko lesi ukuze ubone ukuthi imithetho kaNkulunkulu emayelana lokuziphatha isivikela njani.
Bala isihloko esithi “Abazange Bangenyanye” ukuze ubone ukuthi kuyini okwenza indoda eyayiyisitabane yatshintsha indlela eyayiphila ngayo ukuze ithokozise uNkulunkulu.
“IBhayibhili Liyamntshintsha Umuntu” (INqabayokulinda, April 1, 2011)
a Lokhu kugoqela ukuya emacansini usebenzisa isitho sokuya ngaphandle loba ukumumuza kumbe ukuphulula izitho zensitha zomunye umuntu.
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
