OSHILESHWA 41
Ombiimbeli otayi ti ngiini kombinga yomilalo?
Aantu oyendji ihaya kala ya manguluka okupopya kombinga yomilalo. Ihe Ombiimbeli oya popya kombinga yadho, noye dhi popya momukalo gwesimaneko. Shoka ya popya otashi tu etele uuwanawa noshi li lela mondjila, oshoka oya za kuJehova ngoka oye Omushiti gwetu. Onkene oku shi shoka tashi tu opalele. Ohe tu lombwele shoka tu na okuninga, opo tu mu nyanyudhe, naashoka tashi vulu oku tu kwathela, tu nyanyukilwe onkalamwenyo sigo aluhe.
1. Jehova okwa tala ko ngiini omilalo?
Omilalo omagano ga za kuJehova. Okwa hala dhi kale pokati komulumentu nomukiintu, mboka ya hokana. Omagano ngaka ihaga kwathele owala aaihokani ya mone aanona, ihe oyu ulukilathane wo ohole momukalo gwopaunshitwe notagu ya uvitha nawa. Onkee ano, Oohapu dhaKalunga otadhi ti: “Nyanyukilwa omukulukadhi gwoye wa za naye kuufuko.” (Omayeletumbulo 5:18, 19) Jehova okwa tegelela aaihokani Aakriste ya kale aadhiginini kookuume kawo kopandjokana, opo kaaya ye moluhondelo. — Lesha Aahebeli 13:4.
2. Omilalo dha nyata oshike?
Ombiimbeli otayi ti kutya ‘aantu mboka aaholume itaya ka ya mOshilongo shaKalunga.’ (1 Aakorinto 6:9, 10) Aanyoli yOmbiimbeli oya longitha oshitya shOshigreka porneia, ya yelithe kutya uuholume nenge omilalo dha nyata oshike. Oshitya shoka osha kwatela mo (1) omilalo a pokati kaantu inaaya hokana, (2) uushenge nosho wo (3) okuya momilalo noshinamwenyo. Ohatu nyanyudha Jehova nohashi tu etele uuwanawa, ngele tatu ‘yanda oluhondelo.’ — 1 Aatessalonika 4:3.
ILONGA OSHINDJI
Ilonga nkene to vulu okuyanda omilalo dha nyata nankene to vulu okumona uuwanawa ngele owa kala to shi ningi.
3. Yanda omilalo dha nyata
Omulumentu gumwe omudhiginini gwedhina Josef, okwa li a tindi okuya momilalo dha nyata. Lesha Genesis 39:1-12, e tamu kundathana omapulo taga landula:
-
Oshike shi inyengitha Josef a ye ondapo? — Tala ovelise 9.
-
Sho to tala, mbela Josef okwa ninga ngaa etokolo li li mondjila? Omolwashike to tile ngawo?
Aagundjuka kunena otaya vulu ngiini okuholela Josef nokuyanda omilalo dha nyata?Dhana OKAVIDIO.
Jehova okwa hala atuhe tu yande omilalo dha nyata. Lesha 1 Aakorinto 6:18, e tamu kundathana omapulo taga landula:
-
Oonkalo dhini tadhi vulu okuningitha omuntu a ye momilalo dha nyata?
-
Ongiini to vulu okuyanda omilalo dha nyata?
4. Oto vulu okusinda omamakelo
Oshike tashi vulika shi shi ningithe oshidhigu komuntu a sinde emakelo lyokuya momilalo dha nyata? Dhana OKAVIDIO, e tamu kundathana epulo tali landula.
-
Omumwatate okwa ningi po shike, sho a dhimbulula kutya omadhiladhilo ge noonkatu dhe otadhi vulu oku mu ningitha a kale kee shi omudhiginini komukulukadhi gwe?
Omathimbo gamwe Aakriste aadhiginini nayo ohaya kondjo nokukaleka omadhiladhilo gawo ga yogoka. Ongiini to vulu okuyanda okudhiladhila kombinga yiinima ya nyata? Lesha Aafilippi 4:8, e tamu kundathana omapulo taga landula:
-
Iinima yini tu na okukala hatu dhiladhila kuyo?
-
Okulesha Ombiimbeli nokukala aluhe twi ipyakidhila niilonga yaJehova, ohaku tu kwathele ngiini tu yande okuyona?
5. Omithikampango dhaJehova ohadhi tu etele uuwanawa
Jehova oku shi shoka tashi tu opalele. Ohe tu lombwele nkene tu na okuyanda omikalo dha nyata, nuuwanawa mboka tatu ka mona ngele otwe shi ningi. Lesha Omayeletumbulo 7:7-27 nenge wu dhane OKAVIDIO, e tamu kundathana omapulo taga landula.
-
Omulumentu omugundjuka okwi ifala ngiini memakelo? — Tala Omayeletumbulo 7:8, 9.
-
Ngaashi sha popiwa mOmayeletumbulo 7:23, 26, omilalo dha nyata ohadhi vulu okweeta iizemo iiwinayi noonkondo. Ngele ihatu yi momilalo dha nyata, uupyakadhi wuni tatu vulu okuyanda?
-
Okuyanda omikalo dha nyata otaku vulu ngiini oku tu kwathela tu kale nonkalamwenyo ombwanawa sigo aluhe?
Aantu yamwe ohaya dhiladhila kutya shoka Ombiimbeli tayi ti kombinga yuushenge kashi li pahole. Ihe Jehova, Kalunga omunahole, okwa hala aantu ayehe ya kale nonkalamwenyo ombwanawa sigo aluhe. Opo tu kale nonkalamwenyo yi li ngawo, otu na okuvulika komithikampango dhe. Lesha 1 Aakorinto 6:9-11, e tamu kundathana epulo tali landula:
-
Pataloko lyaKalunga, mbela uushenge owo owala wa puka?
Opo tu nyanyudhe Kalunga, atuheni otwa pumbwa okuninga omalunduluko. Mbela osha simana ngaa? Lesha Episalomi 19:8, 11, e tamu kundathana omapulo taga landula:
-
Sho to tala, mbela omithikampango ndhoka Jehova a tula dhi na ko nasha nokuyanda omikalo dha nyata, odhi li ngaa pandjele? Omolwashike to tile ngawo?
Jehova okwa kwathela aantu oyendji ya vulike komithikampango dhe dhi na ko na sha nokuyanda omikalo dha nyata. Nangoye ota vulu oku ku kwathela
AANTU YAMWE OHAYA TI: “Okuya momilalo inaku puka, shampa owala aantu ye holathane.”
-
Oto ke mu yelithila ngiini?
OWI ILONGO SHIKE?
Omilalo omagano ga za kuJehova, nodhi na owala okukala pokati komulumentu nomukiintu mboka ya hokana.
Omapulo geendululo
-
Omilalo dha nyata odha kwatela mo shike?
-
Oshike tashi tu kwathele tu yande omilalo dha nyata?
-
Uuwanawa wuni hatu mono, uuna tatu landula omithikampango dhaJehova dhi na ko nasha nokuyanda omikalo dha nyata?
UUYELELE WA GWEDHWA PO
Ilonga kutya omolwashike Kalunga a hala omulumentu nomukiintu mboka ya hala okukala pamwe, ya hokane.
Ilonga kutya omolwashike Ombiimbeli tayi ti kutya uushenge owa puka, ihe shoka itashi ti kutya otu na okutonda omashenge.
“Mbela uushenge owa puka?” (Oshitopolwa shi li kepandja lyetu lyokointaneta)
Tala nkene oompango dhaKalunga dhi na ko nasha nomilalo hadhi tu gamene.
Lesha oshimoniwa: “Oya ungaunga nangame nesimaneko,” wu uve shoka shi inyengitha gumwe a ethe po uushenge, opo a hokiwe kuKalunga.
“Ombiimbeli ohayi lundulula onkalamwenyo yaantu” (Oshungolangelo, 1 Apilili 2011)
a Omilalo ndhoka odha kwatela mo okuya momilalo dho dhenedhene, okulathathana kiilyo yoluvalo, omulumentu te ende omukiintu konima nosho wo okugumaguma iilyo yoluvalo yomuntu ngoka inaamu hokana naye.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
