LÉZIʼI 41

Biible gôôn ngié kô na lénouŋé mambaŋa po manzuiée?

PLAY

Pʉa ta ngiôôn jouʼ a tʉʉ mbwo pôb tèʼ lé chouŋé na lénouŋé mambaŋa po manzuiée. Ŋwaʼné Ssé né ngôôn no moo, échʉéchʉé ngôôn na nti yé mboŋo. Ngouo mmo yié a gôôn kuiété wégé. Jéova zo la zôôn mbouoon wégé. A ping nzsé mmo yié a poŋo mbwo pégé. A gnièe wégé mmo yié ngouo pégé gʉo a poŋo yé, ayaa ma zo gé ping gʉo pégé gʉo ngwiée léwô témi.

1. Jéova kouaŋa kô nti lénouŋé mambaŋa po manzuiée?

Lénouŋé mambaŋa po manzuiée, aa taʼ kado yié Jéova la naa mbwo pʉa pié po zôôʼ. Yèe kado té gʉo po ndaʼ ngié mambaŋa po manzuié gwiée pénkʉ wô, a ying nkuiété wôb lé gnia nkouŋo yôb tsétsaa pôb. Aa mmo yié a gʉo Ŋwaʼné Ssé gôôn ngié: «Gwiée lékag lé nzuié wou» (Provèebe 5:18, 19). Jéova né nkouŋo ngié mambaŋa ké nzsé po ndaʼ nzuié wé, manzuié ké nzsé po ndaʼ ndoum wé (Toŋo Héber 13:4).

2. Ée yèe nti lénouŋé mambaŋa po manzuiée yié é pouou mbʉaga Jéova?

Biible gôôn ngié, «pʉa pié po poumté wôôwôô paa poo nouŋé nouŋé, po tée ndaʼa ngwiée yôb jʉʼ tsèe no léfouô Ssé wô» (1 Korénto 6:9, 10). Mé gôôn pʉa pié é poumté wôôwôô paa poo nouŋé nouŋé, a wo paʼ mé laa na chouŋo Ngélékia ntoŋo lé por·neiʹa, a lôgô ndaʼté: (1) Mambaŋa po manzuiée pié po nouŋé té wo yié po zôôʼ a, (2) mbaŋa pié é sélé ngʉo no mambaŋa po manzuiée tsétsèe pôb ka panzuiée wôô, (3) pʉa pié é nouŋé lé ménôôn. Pʉa pié po kouʼté yôb nnè ta po té «poumté wôôwôô paa poo nouŋé nouŋé wô» po gwiée mépiŋé mboŋo, Jéova Ssé ping nzuiŋé wôb (1 Tésalonika 4:3).

YING NKUIʼI NZIʼI

Gia nti yié ngouo o gʉo ta o lé poumté maawôôwôô pi yé nouŋé nouŋé wô, mbing ngiè mépi mié ngouo o jʉo.

3. Kʉo no magab

Yésièb laa taʼ ngouachoum wuié a la kouèe na Ssé. A la lʉôʼ ta nké ngouo po ndʉng ndʉng amvfo Ssé. Toŋo Génèze 39:1-12, ndéen nké chouŋé na môôn ménzaté:

Akô la gʉo Yésièb kʉo? (lié nkang 9).
Ta o kouang ngié Yésièb la tsôʼô manzsé mboŋo? Nti kô?

Ngouo pouô ngouachoum fʉʼʉ Yésièb mbing nkʉo no magab lékô? Tsôʼô VIDÉO.

VIDÉO: Kʉo no magab (5:06)

Jéova né nkouŋo ngié pégé métsém pou ngouaʼa no magab. Toŋo 1 Korénto 6:18, ndéen nké chouŋé na môôn ménzaté:

Ée sèe choum sié ngouo é tsoté gning lé gʉo magab?
Ngouo o kʉo no magab lékô?

4. Ngouo o lʉôʼ nkouaʼté

Ngouo kô gʉo a tʉʉ lé lʉôʼ nkouaʼté lé gʉo no magab? Tsôʼô VIDÉO, ndéen nké chouŋé na yôôn nzaté.

VIDÉO: Lʉôʼ nkouaʼté ntchʉaté na létoŋo Biible (3:02)

Mambaŋa wuié aa tsèe vidéo la gʉo lékô fʉʼ yié a la giè ngié ngouo méngʉoo no mé tsoté yé naa na no magab?

A gʉa tso fʉʼ, mboo Mékréeté pié po kouè nnè na Ssé po gwiée lé lʉôʼ ménkouaŋa magab. Ngouo o gʉo lékô ta ménkouaŋa magab lé jʉo two jou wô? Toŋo Filipo 4:8, ndéen nké chouŋé na môôn ménzaté:

A zèté ngié pégé tʉôg nkouaŋa wégé na sèe choum?
Ngouo létoŋo Biible po lé faʼa mbwo Jéova fʉʼ ntsém kuiété wégé lé lʉôʼ nkouaʼté lékô?

5. Mémbʉʉ mié Jéova tʉôôg é pong

Jéova zsé mmo yié aa mbong mbwo pégé. A chouŋo wégé nti yié ngouo pégé gʉo ta ndôg ngouaʼa no magab, mbing chouŋo wégé pi yié ngouo pégé jʉo moo. Toŋo Provèebe 7:7-27 ka ntsôʼô VIDÉO wô, ndéen nké chouŋé na môôn ménzaté.

VIDÉO: Ta pégé zag léghié (9:31)

Nti kô wôôn ngouachoum la giè ntchʉʼ thié po tsèe nkouaʼté? (lié Provèebe 7:8, 9).
Paʼ Provèebe 7:23, 26 gôôn la, pʉa pié é poumté maawôôwôô paa poo nouŋé nouŋé, ngouo po gwiée mépiŋé ta ngiôôn. Pégé lôôn mbou ngouaʼa no magab mbaa ngouo pégé kʉo mèe méngégé?
Ntémté yié ée na léwoo ndʉalʉʉa po légwiée léwô témi ée yèe?

Tso pʉa kouang ngié nti yié Biible lôg ngôôn no na pambaŋa pié é sélé nzôʼô pétso ka panzuiée wôô, é lôgô tée ndaʼté nkouŋé wô. Taʼ, Jéova wuié aa Ssé nkouŋé né nkouŋo ngié pʉa métsém gʉo ngwiée léwô témi. Lézuièʼ, aa lé yiŋé na mémbʉʉ mé. Toŋo 1 Korénto 6:9-11, ndéen nké chouŋé na yôôn nzèté:

Mbaŋa pié é sélé nnouŋé lé pétso ka panzuiée wôô aa ndaʼ mmo yié Ssé té koung kée?

Pégé lôôn né nkouŋo ngié Ssé zuiŋé wégé, mba a zaté ngié pégé métsém gʉo ménkoubté. Ta aa péʼé ngouo tʉnzuing? Toŋo Zôbô ntsé 19:8, 11, ndéen nké chouŋé na môôn ménzaté: