MUTU 41
Kansi Baibolo yunena chinji pa nkhani yokhuza kuyonana?
Ŵanthu anyinji owona kuti nkhani yokhuza kuyonana yuyumisha pakamwa. Koma olo ntetyo, Baibolo ikayamba nena vokhuza kuyonana, yunena vinthu mosapita m’mbali, koma mwaulemu. Ndipo vinthu vayunena vuyavya ngakosoti. Vamene ivi n’vomvwika. Chifukwa Yehova niye etilenga sewo tonse. Tetyo oziŵa luweme vinthu vingatiyavye kuti tikonkhala na moyo uweme. Yove otiuja vinthu vatufunikila kuchita kuti tikomukondwelesa komasoti vinthu vingatiyavye kuti tikosangalala na moyo kuyambila lomba teti mpaka kale-kale.
1. Kansi maganizo a Yehova ni otyani pa nkhani ya kuyonana?
Kuyonana ni mphaso yofumila kwa Yehova. Yove eipeleka kwa ŵanthu amane ni olungulana kuti akosangalala nayo. Mphaso yamene iyi ikungoyavyalini kuti ŵanthu akovyala ŵana yayi, koma yuŵayavyasoti kuti akowoneshana chikondi nosangalala. N’chifukwa chake Mawu a Mulungu onena kuti: “Usangalale na mwanakazi wapaulumbwana wako.” (Miyambo 5:18, 19) Yehova oyembekezela kuti Akhilisitu olungulana akonkhala okhulupilika m’banja, ndipo akachita vamene ivi angachitelini chigololo.—Ŵelengani Aheberi 13:4.
2. Kansi chiwelewele ni chinji?
Baibolo yutiuja kuti “adama kapena kuti [achiwelewele] . . . azaloŵelini mu Ufumu wa Mulungu.” (1 Akorinto 6:9, 10) Olemba Baibolo ayakine amene eyilemba mu Chigiriki ekatishila ntchito mawu akuti por·neiʹa polaŵila za chiwelewele. Mawu amane aŵa olaŵila za (1) kuyonana a kwa ŵanthu amene alilini pabanja, (2) kuyonana kwa analume olo anakazi ŵeka-ŵeka, komasoti (3) kuyonana na nyama. Tukondwelesa Yehova komasoti tunkhala na moyo uweme keno tuyeja-yeja “kupewa dama” olo kuti chiwelewele.”—1 Atesalonika 4:3.
VATI TIPHUNZILE
Tiphunzile noziŵa vamungachite kuti mupewe chiwelewele komasoti pindu yamungafwane keno mungayeje-yeje kupitilija kunkhala na minkhalidwe ituŵa.
3. Mukoyeja-yeja kupewa chiwelewele
Yosefe, wamene enze munthu wokhulupilika, ekana kuyonana na mzimayi muyakine wamene enzemunyengelela kuti achite naye zachiwelewele. Ŵelengani Genesis 39:1-12, ndipo pavuli pake mukambilane makonsho aŵa:
-
Ndaŵa yanji Yosefe ekana kuchita chiwelewele?—Onani vesi 9.
-
Kansi muganiza kuti Yosefe echita vinthu mwanzelu? Ndaŵa yanji mwayankha tetyo?
Kansi masiku ŵano achilumbwana angakonkheje tyani Yosefe pa nkhani yokana kuchita chiwelewele? Lolelani VIDIYO.
Yehova ofuna kuti tonse sewo tikoyeja-yeja kupewa chiwelewele. Ŵelengani 1 Akorinto 6:18, ndipo pavuli pake mukambilane makonsho aŵa:
-
Kansi ni vinthu votyani vamene vingapangishe munthu kuchita chiwelewele?
-
Kansi mungachite tyani kuti mupewe chiwelewele?
4. Chitani vamungakwanishe kuti osati mugonje pa mayeselo
Kansi n’chinji chingachitishe kuti munthu agonje mosavuta akayesewa kuti achite chiwelewele? Lolelani VIDIYO, ndipo pavuli pake mukambilane konsho iyi.
-
Kansi m’bale wamuvidiyo yamene iyi echita tyani pechiziŵa kuti vinthu viyakine venzeganiza na kuchita sembe vichitisha kuti osati ankhale okhulupilika kwa nkazi wake?
Olo Akhilisitu okhulupilika ofunika kuchita khama kuti osati akoganiza vinthu viipa. Kansi mungachite tyani kuti osati mukoganizila vinthu va chiwelewele? Ŵelengani Afilipi 4:8, ndipo pavuli pake mukambilane makonsho aŵa:
-
Kansi ni vinthu votyani vatufunikila kuviganizila ngako?
-
Kansi kuŵelenga Baibolo komasoti kunkhala na vochita vinyinji potumikila Yehova, kungatiyavye tyani kuti tipewe mayeselo?
5. Mfundo za Yehova n’zopindulisha pa moyo wasu
Yehova oziŵa vinthu vingatipindulishe pa moyo wasu. Yove otiuja vatingachite kuti tinkhale na minkhalidwe iweme, komasoti ubwino wochita vamene ivi. Ŵelengani Miyambo 7:7-27 olo lolelani VIDIYO, ndipo pavuli pake mukambilane makonsho aŵa.
-
Kansi mulumbwana wamene uyu echita chinji chamene sembe chimuloŵesha m’mayeselo?—Onani Miyambo 7:8, 9.
-
Mokatijana na lemba ya Miyambo 7:23, 26, yuwonesha kuti kuchita chiwelewele kungatiletele mavuto akulu-akulu. Lomba kansi tingapewe mavuto otyani tikoyeja-yeja kunkhala na minkhalidwe ituŵa?
-
Kansi kunkhala na minkhalidwe ituŵa kungatiyavye tyani kuti tikosangalala na moyo palipano komasoti mpaka kale-kale?
Ŵanthu ayakine owona kuti vayunena Baibolo pa nkhani ya kuyonana kwa analume komasoti anakazi ŵeka-ŵeka, ni kuyumisha vinthu. Koma vamene ivi ni vachendilini chifukwa Yehova otikonda ndipo ofuna kuti tonse tikosangalala na moyo palipano komasoti mpaka kale-kale. Kuti vamene ivi vikwanishike, tikoyeja-yeja kukonkheja mfundo zake. Ŵelengani 1 Akorinto 6:9-11, ndipo pavuli pake mukambilane konsho iyi:
-
Kansi kuyonana kwa analume na anakazi ŵeka-ŵeka ni nkhalidwe tyala yamene iyi yakuzondana nayo Mulungu?
Kuti tikosangalasa Mulungu, sewo tonse tufunikila kuyeja-yeja kuchinja moyo wasu. Kansi kuchita vamene ivi n’kothandiza? Ŵelengani Salimo 19:8, 11, ndipo pavuli pake mukambilane makonsho aŵa:
-
Kansi Yehova echita luweme kutipasa mfundo za minkhalidwe iweme olo kapena echingoyumisha vinthu? Ndaŵa yanji mwayankha tetyo?
Yehova wayavya ŵanthu anyinji kunkhala na minkhalidwe iweme. Mwewo namwe angakuyavyeni
ŴANTHU AYAKINE ONENA KUTI: “Paliye vuto kuyonana na munthu aliyense wamufuna, chikulu mwakondana.”
-
Kansi mwewo mungamuuje votyani munthu woteti?
MFUNDO ZACHIDULE
Kuyonana ni mphaso yofumila kwa Yehova ndipo yuyavya kuti mwanalume na mwanakazi akosangalala.
Makonsho oweleja
-
Kansi kuchita chiwelewele kupamikijapo kuchita chinji?
-
N’chinji chingatiyavye kuti tipewe kuchita chiwelewele?
-
Kansi tupindula tyani tikokonkheja mfundo za Yehova za minkhalidwe iweme?
PHUNZILANI VINYINJI
Onani chifukwa chake Yehova ofuna kuti mwanalume na mwanakazi akoyamba amanga banja akaliye tolana.
Baibolo ikophunzisa kuti kuyonana kwa analume na anakazi ŵeka-ŵeka n’kophoniyeka, yutanthauzalini kuti tikozondana na ŵanthu amene ochita vinthu vamene ivi, onani chifukwa chake.
“Kansi kuyonana kwa analume olo anakazi ŵeka-ŵeka n’kuipa?” (Nkhani yapa webisaiti)
Onani mwamene malamulo a Mulungu pa nkhani yokhuza kuyonana mwakutitetezela.
“Kansi kuyonana m’kamwa kunkhala chendi kuyonana?” (Nkhani yapa webisaiti)
Mu nkhani yakuti, “Enilondela mwaulemu ngako,” onani vamene viyavya munthu muyakine kuleka nkhalidwe yoyonana na analume ayake na cholinga chakuti akosangalasa Mulungu.
“Baibolo yuchinja moyo wa ŵanthu” (Nsanja ya Olonda, 1 April, 2011)
a Vamene ivi vupamikijapo kuchita vinthu monga chiwelewele, kuyonana m’kamwa, kuyonana kumatako komansoti kuseŵelesha viwalo va munthu muyakine na cholinga chofuna kuwusha olo kukhutilisa chilakolako cha kuyonana.
