THUTO 41
Beibele e Re’ng ka Thobalano?
Batho ba bantši ga ba lokologe go bolela ka thobalano. Eupša Beibele yona ge e re botša ka thobalano ga e re fihlele selo, e bile e re botša ka yona ka tsela e hlomphegago. Dilo tšeo Beibele e re botšago tšona ka thobalano di a re hola. Ka baka la’ng? Ka gobane Beibele e tšwa go Jehofa, yena yo a re bopilego. Ka gona, o tseba dilo tšeo di ka re holago. E bile o re botša dilo tšeo re swanetšego go di dira gore re mo thabiše, le gore re ka dira eng gore re tle re thabele bophelo go ya go ile mo lefaseng.
1. Jehofa o re’ng ka thobalano?
Thobalano ke mpho e botse kudu yeo a e filego batho. O nyaka gore monna le mosadi bao ba nyalanego ba ipshine ka yona. Ke nnete gore mpho ye ya thobalano, e dira gore banyalani ba kgone go ba le bana, eupša e dira le gore ba bontšhane gore ba a ratana le go tiiša lenyalo la bona. Ke ka baka leo Beibele e rego: “O thabe le mosadi wa bofseng bja gago.” (Diema 5:18, 19) Jehofa o nyaka gore banyalani ba tshepagalelane, ba se tsoge ba bile le thobalano le batho ba bangwe.—Bala Baheberu 13:4.
2. Bootswa ke eng?
Beibele e re ‘diotswa di ka se je bohwa bja mmušo wa Modimo.’ (1 Bakorinthe 6:9, 10) Bangwadi ba Beibele ba šomišitše lentšu la Segerika por·neiʹa go hlalosa bootswa, goba go itshwara gampe ka tša thobalano. Lentšu le le bolela ka dilo tše di latelago: (1) Thobalano magareng ga batho bao ba sa nyalanago, a (2) banna bao ba robalago le banna (di-gay), le basadi bao ba robalago le basadi (di-lesbian) le (3) go ba le thobalano le diphoofolo. Ge re ‘ila bootswa’ re tlo thabiša Jehofa e bile le rena re tlo holega.—1 Bathesalonika 4:3.
ITHUTE KA MO GO TSENELETŠEGO
Ekwa gore o ka dira eng gore o se dire bootswa, le gore o tlo holega bjang ge o dula o itshwere gabotse.
3. Tšhaba bootswa
Ka ge Josefa a be a tshepega, o ile a gana go robala le mosadi wa monna yo mongwe. Balang Genesi 39:1-12, gomme le boledišaneng ka dipotšišo tše di latelago:
-
Ke’ng seo se ilego sa dira gore Josefa a gane go robala le mosadi yoo?—Bona temana 9.
-
O nagana gore Josefa o dirile phetho e botse ka go gana go robala le mosadi yoo? Go re’ng o re’alo?
Bafsa ba ka ekiša Josefa bjang ka go tšhaba go dira bootswa? Bapalang BIDIO ye.
Jehofa o nyaka gore ka moka ga rena re tšhabe bootswa. Balang 1 Bakorinthe 6:18, gomme le boledišaneng ka dipotšišo tše di latelago:
-
Ke dilo dife tšeo di ka dirago gore motho a feleletše a dirile bootswa?
-
O ka dira’ng gore o se dire bootswa?
4. O ka kgona go gana ge o lekega go dira sebe
Ke’ng seo se ka dirago gore go be thata go gana go itshwara gampe ka tša thobalano ge o lekega go dira bjalo? Bapalang BIDIO ye, gomme le boledišaneng ka potšišo e latelago:
-
Ngwanabo rena wa mo bidiong ye, o ile a dira’ng ka morago ga gore a bone gore dilo tšeo a bego a di nagana le go di dira, di be di ka feleletša di mo dirile gore a se sa tshepagalela mosadi wa gagwe?
Ka dinako tše dingwe le Bakriste bao ba tshepegago ba ka fela ba nagana dilo tša go tšwa tseleng. Bjale o ka thušwa ke’ng gore o se ke wa dula o nagana ka dilo tšeo? Balang Bafilipi 4:8, gomme le boledišaneng ka dipotšišo tše di latelago:
-
Go ya ka lengwalo le, re swanetše go nagana ka dilo dife?
-
Go bala Beibele ka mehla le go dula re swaregile ka go hlankela Jehofa go ka re thuša bjang gore re se ke ra dira sebe?
5. Melao ya Jehofa e hola rena
Jehofa o tseba dilo tšeo di re holago. O re botša gore re se ke ra dira bootswa, le gore re tlo holega bjang ge re ekwa molao woo. Balang Diema 7:7-27 goba le bapaleng BIDIO ye, gomme le boledišaneng ka dipotšišo tše di latelago:
-
Lesogana leo go bolelwago ka lona lengwalong le, le ile la bontšha bjang gore le bapala ka mollo?—Bona Diema 7:8, 9.
-
Go ya ka Diema 7:23, 26, go dira bootswa go na le ditlamorago tše mpe. Re tlo holega bjang ge e ba re sa dire bootswa?
-
Go dula re itshwere gabotse go tlo re thuša bjang gore re thabele bophelo go ya go ile?
Batho ba bangwe ba re Jehofa o a re gatelela ge a re batho ba bong bja go swana ba se ke ba ba le thobalano. Seo ga se nnete ka gore Jehofa o re rata kudu, o nyaka gore ka moka ga rena re thabele bophelo go ya go ile. Eupša re swanetše go phela ka melao ya gagwe gore re tle re hwetše bophelo bjoo. Balang 1 Bakorinthe 6:9-11, gomme le boledišaneng ka potšišo e latelago:
-
Modimo ga a nyake gore batho ba kganyoge go robala le batho ba bong bja go swana le bja bona. Eupša na go sa na le dilo tše dingwe tšeo Modimo a sa nyakego re di dira?
Re swanetše go lahla mekgwa e mebe e le gore re thabiše Modimo. Na go bohlokwa gore re dire bjalo? Balang Psalme 19:8, 11, gomme le boledišaneng ka dipotšišo tše di latelago:
-
Na o nagana gore melao ya Jehofa e a re gatelela? Go re’ng o re’alo?
Jehofa o thušitše batho ba bantši gore ba phele ka melao ya gagwe. Le wena a ka go thuša
BATHO BA BANGWE BA RE: “Ga se phošo ge batho ba eba le thobalano, sa bohlokwa ke ge ba ratana.”
-
Wena o ka re’ng go bona?
O ITHUTILE ENG?
Thobalano ke mpho yeo Jehofa a e neilego monna le mosadi bao ba nyalanego gore ba ipshine ka yona.
Dipotšišo
-
Ke mekgwa efe yeo e sepedišanago le bootswa?
-
Re ka thušwa ke’ng gore re se ke ra dira bootswa?
-
Re tlo holega bjang ge e ba re phela ka melao ya Jehofa?
ITHUTE KA MO GO OKETŠEGILEGO
Ekwa gore ke ka baka la eng Modimo a nyaka gore monna le mosadi ba nyalane pele ba ka dula ka moka.
Na ge Beibele e re ke phošo ge batho ba bong bjo bo swanago ba ratana, e ra gore re swanetše go hloya batho ba mohuta woo? Ekwa karabo sehlogong se se latelago:
“Na ke Phošo Gore Batho Bong bjo bo Swanago ba Ratane?” (Sehlogo seo se lego wepesaeteng)
Ekwa gore melao ya Modimo ya mabapi le thobalano e re šireletša bjang.
“Na go Latswana Ditho tša Pelego go ka Lebelelwa e le Thobalano?” (Sehlogo seo se lego wepesaeteng)
E le gore o kwe gore monna yoo a bego a ratana le banna o ile a thušwa ke eng gore a fetoše bophelo bja gagwe, bala sehlogo seo se rego, ‘Di Ile tša Ntshwara ka Tlhompho.’
a Thobalano yeo Modimo a sa e nyakego e ka akaretša mekgwa e mentši e bjalo ka go latswana ditho tša bong, go di tsenya ka morago, le go phopholaphophola ditho tša motho yo mongwe tša bong ka morero wa go ikgotsofatša ka tša thobalano.
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
