ELONGESO 41
Oityi Ombimbiliya Ipopia Tyiyemba Kotyinepo Tyopoula?
Ovanthu vamwe okupopia otyinepo tyopoula tyivekala omapita. Mahi Ombimbiliya ityipopia umwe nawa-nawa, otyo ngwe kaitukana ovanthu. Otyipuka Ombimbiliya ipopia otyinepo tyopoula, okutyisoka umwe nawa, tyaviuka. Mahi omo umwe, tyina umwe okuviuka mokonda Ombimbiliya o Yomutungi wetu Siovaa. Atyiho Siovaa apopia, opala ouwa wetu muene! Utupopila etyi tuna okulinga tumuhambukiswe opo ha tukakaleko apeho.
1. Oñgeni Siovaa Huku atala otyinepo tyopoula?
Otyinepo tyopoula otyipuka tyimwe otyiwa Siovaa aavela ovanthu! Mahi wapopia okuti tyina vala okulingwa novanthu vevali velinepa. Oityi apopila ngotyo? Omokonda tyina vokuelinepa valinga otyinepo tyopoula, oupanga wavo upama vali, tupu vetyivila okukala novana. Ombimbiliya yapopia okuti: “Hambukilwa omuhikuena muelinepa nae puetyi ankho umukuendye.” (Provérbios 5:18, 19) Siovaa uhanda ovanthu vokuelinepa velikuate-po atee-tee, apahamono nawike uyapuka oula. — Tanga Ova Hebeleu 13:4.
2. Oityi Siovaa ahahande tyilingwe?
Ombimbiliya yati: ‘Vana valinga ovipengi kavakanyingila Mouhamba wa Huku.’ (1 Ova Kolindu 6:9, 10) Ondaka oyo yokuatiwa ovipengi, melaka lyo Ngeleku, ondaka porneia. Mo Mbimbiliya, ondaka oyo porneia, a ipopia (1) ovanthu valala kumwe mahi otyo vehelinepele, (2) ovahikuena valala novahikuena vakuavo, novakuendye valala novakuendye vakuavo, (3) ovanthu valala novinyama. Tyina tuahalingi ovipuka ovio viasila, tuhambukiswa Siovaa, no onthwe vala muene tukala nawa. — 1 Ova Tesalonika 4:3.
KUHANDE OKUNOÑGONOKA VALI?
Monoñgonoka etyi upondola okulinga wende-nkholo ovinepo viasila. Tupu motale okuti okuahalingi ovinepo viasila, no ove muene ukala nawa.
3. Enda-nkholo ovinepo viasila
Kwali omukuendye umwe ankho uhole Huku utiwa o Susee. Nthiki imwe, omuhikuena umwe aende ku Susee, emukengelela alale nae. Susee ehetavela, akahateka. Tangei Gênesis 39:1-12, amutomphola omapulo aa:
-
Omokonda yatyi Susee aila-nkholo? — Tala povelesikulu 9.
-
Ku ove, Susee walinga wakahateka? Oityi wapopila ngotyo?
Oityi ovakuendye novahikuena vena okulinga valinge nga Susee, avehetavela okulinga ovipuka viasila? Talei OVIDIU.
Siovaa kahande tulinge ovinepo viasila. Tangei 1 Ova Kolindu 6:18, amutomphola omapulo aa:
-
Oityi tyipondola okulingisisa omunthu, akalinga umwe otyipuka tyasila, Huku eyele?
-
Tyina utala ñgaa, ovipuka patyi upondola okulinga wehelipake movinepo viasila?
4. Wehetavele tyina uhongiliyua
Ku vamwe, katyapepukile okuanya ovanthu vevehanda, vahanda valinge navo ovipuka viasila. Mahi omokonda yatyi tyivepuiyila okuveanya? Talei OVIDIU, amutomphola epulo eli.
-
Etyi omukuendye walekeswa movidiu etyimona okuti ngoti ankho uli nokuhanda omuhikuena omukuavo, oityi alinga?
Novanthu umwe omapanga omanene a Siovaa, pamwe vapondola okusoka kovipuka viasila. Mahi pahe oityi ove una okulinga wahasoke unene kovipuka ovio? Tangei Ova Filipu 4:8, amutomphola omapulo aa:
-
O kovipuka patyi tuna okusoka?
-
Oñgeni okutanga Ombimbiliya, nokuundapa unene movilinga vya Siovaa tyitukuatesako atuehetavela tyina tuhongiliyua okulinga ovinepo viasila?
5. Etyi Siovaa etupopila, opala ouwa wetu muene
Siovaa wii etyi tyitukalesa nawa, netyi tyitunyona. Pahe mokonda utuhandela vala otyiwa, mo Mbimbiliya wahoneka-mo etyi tuna okulinga tuehelipake movinepo viasila, nouwa tupola-ko. Tangei Provérbios 7:7-27. Okuti hatyo, talei OVIDIU, amutomphola omapulo aa:
-
Oñgeni omukuendye oo ekelipaka motyitateka? — Tala Provérbios 7:8, 9.
-
Omukanda wa Provérbios 7:23, 26, upopia umwe nawa okuti omunthu wokulinga ovinepo viasila ulietela vala. Ovitateka patyi tulityilika tyina tutavela etyi Siovaa apopia, atuahalingi ovinepo viasila?
-
Oviwa patyi matukamona komutwe wandyila ine tulikuatehila atuahalingi ovipuka viasila?
Ombimbiliya iilika ovalume okulala poyavo, novahikuena okulala poyavo. Ovanthu vamwe vehole okupopia okuti, ‘opo Huku kapopile nii.’ Mahi Siovaa Huku uhole unene ovanthu; uhanda aveho vakakale-ko apeho. Opo tukakale-ko apeho, atuhambukwa vala ononthiki ambuho, tuna okutavela atyiho Ngwe apopia. Tangei 1 Ova Kolindu 6:9-11, amutomphola epulo eli:
-
Okuti Huku wailika umwe vala ovalume okulala poyavo, novahikuena okulala poyavo, ine wailika novipuka ovikwavo vali?
Opo tuhambukiswe Huku, atuho tuna ovipuka vimwe tuna okuyekapo. Tangei Salmo 19:8, 11, amutomphola omapulo aa:
-
Okuti ovipuka Siovaa etutuma tuvilinge, onthwe tuvivila umwe okuvilinga? Oityi wakumbululila ngotyo?
Siovaa wakuatesako-ale ovanthu ovanyingi ankho valinga ovivi, aveviyekepo. No ove mekukuatesako
OVANTHU VAMWE VATI: “Ine ovanthu velihole, opo tyitupu tyimwe, vapondola okulinga otyinepo tyopoula.”
-
Ove oityi usoka?
ETYI WELILONGESA
Siovaa wapopia okuti otyinepo tyopoula tyilingwa umwe vala na ava velinepa.
Okupitulula
-
Ovipuka patyi viasila viayemba kotyinepo tyopoula, Siovaa atuma tulityilike-vyo?
-
Oityi tuna okulinga tuehelipake movinepo viasila?
-
Ouwa patyi tupola-ko tyina tulinga etyi Siovaa etutuma?
KUHANDE OKUOVOLA VALI?
Tala oityi Huku ahandela ovalinepi velihonekese kombonge.
“Okuti Ombimbiliya Itavela Ovanthu Vehelihonekesile Kombonge Vakale Kumwe?” (Mo jw.org)
Ombimbiliya ipopia okuti omuhikuena kapondola okulala na muhikuena mukuavo, omukuendye kapondola okulala na mukuendye mukuavo, tyapenga. Okuti pahe ovanthu vokulinga ovipuka ovio vena umwe vala okulingwa onya?
“Okuti Tyapenga Omukuendye Okulala na Mukuendye Mukuavo?” (Mo jw.org)
Etyi Huku apopia tyayemba kotyinepo tyopoula opala ouwa wetu vala.
“Okuti Okukwata Olutu Lwove Olupake Komulungu wa Mukwenyi Tyitupu Etyi Tyilinga?” (Mo jw.org)
Omukulu ou puetyi ankho omukuendye ankho ulala na vakuendye vakuavo. Mahi oityi apilulukila akala omunthu uhambukiswa Huku. Tanga onthele yati: “Kavandingile Omukuele.”
“Ombimbiliya Ipilulula Omuenyo Wovanthu” (onthele Yomutala Womulavi)
a Ondaka oyo porneia kaipopi vala omulume nomuhikuena okulilala. Mahi tupu ipopia nomulume okukuata olutu lwae elupake konyima oo komulungu wa mukuavo, tyilinge womukuendye mukuavo oo womuhikuena. Tupu ipopia nomunthu ukwataila umwe tyawina kounthu wa mukuavo!
