ƐZUKOALƐDEƐ 41
Duzu A Baebolo Ne Ka Ye Wɔ Nla Nwo A?
Menli dɔɔnwo se nyiane kɛ bɛbaha nla nwo edwɛkɛ. Noko, Baebolo ne ka nwolɛ edwɛkɛ wienyi wɔ adenle kpalɛ zo. Mɔɔ ɔka la boa yɛ. Ndelebɛbo wɔ ɛhye anu, ɔluakɛ Gyihova a bɔle yɛ a. Ɔti ɔdaye a ɔze mɔɔ ɔle kpalɛ ɔmaa yɛ a. Ɔmaa yɛnwu mɔɔ yɛyɛ a ɔbazɔ ɔ nye nee mɔɔ baboa yɛ yeamaa yɛ nye alie dahuu la.
1. Kɛzi Gyihova bu nla ɛ?
Nla le ahyɛlɛdeɛ mɔɔ vi Gyihova ɛkɛ. Ɔkulo kɛ nrenyia nee raalɛ mɔɔ bɛgya la fa die bɛ nye. Ahyɛlɛdeɛ ɛhye maa agyalɛma kola wo mralɛ na eza bɛkulo bɛ nwo wɔ anyelielɛ nu. Ɛhye ati a Nyamenle Edwɛkɛ ne ka kɛ: “Ɛ nee ɛ ye mɔɔ ɛgyale ye wɔ wɔ mgbavolɛ nu la anye ɛlie” la. (Mrɛlɛbulɛ 5:18, 19) Gyihova kpondɛ kɛ Kilisienema mɔɔ bɛgya la di nɔhalɛ maa bɛ nwo amaa bɛanzɛkye agyalɛ ɛlɛ.—Kenga Hibuluma 13:4.
2. Duzu a le adwɔmane ɛbɛla?
Baebolo ne ka kɛ ‘menli mɔɔ bɔ adwɔmane la ɛnrɛnyia Nyamenle Belemgbunlililɛ ne.’ (1 Kɔlentema 6:9, 10) Menli mɔɔ hɛlɛle Baebolo ne wɔ Giliki nu la vale edwɛkɛkpɔkɛ por·neiʹa hanle adwɔmane ɛbɛla nwo edwɛkɛ. Ɛhye mɔ bie a le (1) nla nu ngitanwolilɛ a mɔɔ kɔ zo wɔ menli mɔɔ bɛtɛgyale bɛ nwo la avinli, (2) menli mɔɔ bɛ awodeɛ le ko la avinli nla yɛɛ (3) nane mɔɔ bɛ nee ye da la. Saa ‘yɛtwe yɛ nwo yɛfi adwɔmane ɛbɛla nwo a’ ɔmaa Gyihova anye die na ɔboa yɛdayɛ mumua ne.—1 Tɛsalonaekama 4:3.
SUKOA DƆƆNWO
Nea kɛzi ɛbahola wɔahwe ɛ nwo wɔavi adwɔmane ɛbɛla nwo nee kɛzi ɛkɔ zo ɛmaa wɔ ɛbɛlabɔlɛ nwo te a ɔbaboa wɔ la.
3. Nriandi adwɔmane ɛbɛla
Dwosefi mɔɔ di nɔhalɛ la bɔle mɔdenle kpalɛ maanle ye ɛbɛlabɔlɛ nwo dele. Kenga Gyɛnɛsese 39:1-12, na akee bɛzuzu kpuya ɛhye mɔ anwo:
-
Duzu a boale Dwosefi maanle ɔnriandile a?—Nea ngyɛnu 9.
-
Ɛnea a Dwosefi zile kpɔkɛ kpalɛ ɔ? Kɛmɔti ɛ?
Kɛ ɔkɛyɛ na mgbavolɛ nee mbɛlɛra azukoa Dwosefi na bɛanriandi adwɔmane ɛbɛla ɛnɛ ɛ? Ye VIDIO ne.
Gyihova kpondɛ kɛ yɛ muala yɛkpo ɛbɛlatane. Kenga 1 Kɔlentema 6:18, na akee bɛzuzu kpuya ɛhye mɔ anwo:
-
Tɛnlabelɛ boni mɔ a bahola amaa awie abɔ adwɔmane ɛbɛla a?
-
Kɛ ɔkɛyɛ na wɔanriandi ɛbɛlatane bie ɛ?
4. Ɛbahola wɔaho wɔatia sɔnea
Duzu a bahola amaa yeayɛ se kɛ yɛbaho yɛatia adwɔmane ɛbɛla nwo sɔnea a? Ye VIDIO ne, na akee bɛzuzu kpuya ɛhye anwo.
-
Mekɛ mɔɔ adiema nrenyia ne mɔɔ wɔ vidio ne anu la nwunle kɛ mɔɔ ɔlɛdwenle nwo nee mɔɔ ɔlɛyɛ la bahola amaa yeayɛ awie mɔɔ ɛnli nɔhalɛ ɛmmaa ɔ ye la, duzu a ɔyɛle a?
Ɔyɛ a Kilisienema mɔɔ di nɔhalɛ bɔbɔ la bɔ mɔdenle kpalɛ amaa bɛ nzuzulɛ nwo ade. Kɛ ɔkɛyɛ na wɔanva wɔ adwenle wɔangɔ ɛbɛlatane zo ɛ? Kenga Felepaema 4:8, na akee bɛzuzu kpuya ɛhye mɔ anwo:
-
Ninyɛne boni mɔ a ɔwɔ kɛ yɛdwenle nwo a?
-
Kɛzi yɛkenga Baebolo ne na yɛkɔ zo yɛyɛ dɔɔnwo wɔ Gyihova ɛzonlenlɛ nu a ɔboa yɛ ɔmaa yɛko yɛtia ɛtane nwo sɔnea ɛ?
5. Gyihova ngyinlazo ne mɔ boa yɛ
Gyihova ze mɔɔ le kpalɛ maa yɛ la. Yemaa yɛnwu kɛzi ɔwɔ kɛ yɛmaa yɛ ɛbɛlabɔlɛ nwo te nee nvasoɛ mɔɔ wɔ zo la. Kenga Mrɛlɛbulɛ 7:7-27 anzɛɛ ye VIDIO ne, na akee bɛzuzu kpuya ɛhye mɔ anwo.
-
Kɛzi kpavolɛ ne hɔdɔle sɔnea nu ɛ?—Nea Mrɛlɛbulɛ 7:8, 9.
-
Kɛ mɔɔ Mrɛlɛbulɛ 7:23, 26 kile la, adwɔmane ɛbɛla bahola ava ngyegyelɛ kpole ara. Saa yɛkɔ zo yɛmaa yɛ ɛbɛlabɔlɛ nwo te a, ngyegyelɛ boni mɔ a yɛbahwe yɛ nwo yɛavi nwo a?
-
Kɛzi yɛ ɛbɛlabɔlɛ nwo te a ɔbamaa yɛanyia anyelielɛ dahuu ɛ?
Bie mɔ dwenle kɛ mɔɔ Baebolo ne ka ye wɔ menli mɔɔ bɛ awodeɛ le ko nla nwo la ɛngile ɛlɔlɛ. Noko Gyihova le ɛlɔlɛ Nyamenle, na ɔkulo kɛ awie biala nyia anyelielɛ dahuu. Amaa ɛhye ayɛ boɛ la, ɔwɔ kɛ yɛfa ye ngyinlazo ne mɔ yɛbɔ yɛ ɛbɛla. Kenga 1 Kɔlentema 6:9-11, na akee bɛzuzu kpuya ɛhye anwo:
-
Wɔ Nyamenle anye zo, asoo mrenyia mɔɔ nyia bɛ gɔnwo mɔ mrenyia nwo ɛhulolɛ la angome a ɛnle kpalɛ ɔ?
Amaa yɛazɔ Nyamenle anye la, ɔwɔ kɛ yɛ muala yɛyɛ nzenzaleɛ. Asoo ɔfɛta kɛ yɛbɔ mɔdenle yɛyɛ zɔ? Kenga Edwɛne 19:8, 11, na akee bɛzuzu kpuya ɛhye mɔ anwo:
-
Ɛnea a ndelebɛbo wɔ nu kɛ Gyihova ɛmaa yɛ ɛbɛlabɔlɛ nwo mɛla ɔ? Duzu ati ɔ?
Gyihova ɛboa menli dɔɔnwo ɛmaa bɛli ye ɛbɛlabɔlɛ nwo mɛla ne azo. Ɔbahola yeaboa ɛdawɔ noko
BIE MƆ KA KƐ: “Saa menli nwiɔ kulo bɛ nwo na bɛda a ɛtane biala ɛnle nwo.”
-
Duzu a ɛbaha a?
EDWƐKƐ TITILI
Nla le ahyɛlɛdeɛ mɔɔ Gyihova ɛva ɛmaa kunli nee yelɛ kɛ bɛva bɛlie bɛ nye a.
Ndinu
-
Adwɔmane ɛbɛla bie mɔ a le boni?
-
Duzu a baboa yɛ yeamaa yɛahwe yɛ nwo yɛavi adwɔmane ɛbɛla nwo a?
-
Kɛzi yɛdi Gyihova ɛbɛlabɔlɛ nwo ngyinlazo ne mɔ azo a ɔboa yɛ ɛ?
KPONDƐ DƆƆNWO
Sukoa deɛmɔti Nyamenle kulo kɛ nrenyia nee raalɛ mɔɔ kulo kɛ bɛtɛnla la gya bɛ nwo la anwo debie.
“Duzu A Baebolo Ne Ka Ye Wɔ Menli Mɔɔ Bɛtɛgyale Noko Bɛde La Anwo A?” (Edwɛkɛ mɔɔ wɔ jw.org azo)
Nea deɛmɔti mɔɔ Baebolo ne ka ye wɔ menli mɔɔ bɛ awodeɛ le ko nla nwo la ɛngile kɛ ɔwɔ kɛ yɛkpɔ bɛ la.
“Asoo Mrenyia Mɔɔ Fa Mrenyia Nee Mraalɛ Mɔɔ Fa Mraalɛ La Ɛnle Kpalɛ?” (Edwɛkɛ mɔɔ wɔ jw.org azo)
Sukoa kɛzi Nyamenle mɛla mɔɔ fale nla ngitanwolilɛ kɔsɔɔti anwo la bɔ yɛ nwo bane la anwo debie.
“Asoo Awie Awodeɛ Mɔɔ Bɛtafe Nwo La Le Nla?” (Edwɛkɛ mɔɔ wɔ jw.org azo)
Wɔ anwubielɛ ne mɔɔ se “Bɛlile Me Eni” la anu, nea debie mɔɔ maanle nrenyia bie mɔɔ nee mrenyia da la hakyile ye ɛbɛlabɔlɛ maanle ɔzɔle Nyamenle anye la.
a Ngitanwolilɛ ɛhye mɔ mɔɔ ɛnle kpalɛ la bie a le adwɔmanebɔlɛ, awie anwo mɔɔ bɛtafe, awie mɔɔ bɛfa ye wɔ ɔ nzi, anzɛɛ awie mrenyianu anzɛɛ mraalɛnu mɔɔ bɛsosɔ amaa bɛanyia nla nwo nganeɛdelɛ la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
