UYONO 41
Me Yi Baibol na ọ Tare Kpahen Ehware?
Ihworho buebun i vwa guọlọ ta kpahen ehware-e. Ọrẹn, Baibol na ọrhọ hunute ehware, ọ dabu dje yi fiotọre izede ọghọ. Oborẹ i Baibol na ọ tare kpahiẹn ọ yẹ ọwan erere. Ọhọ ọ havwiẹ fọkime Jehova yẹ Ọmemama ọwan. Omarana, o rhe oborẹ ọ mai rhomu rẹn ọwan. Ọ ta rẹn ọwan oborẹ ene ruo nẹ oma ọ merhiẹn, ọrhẹ oborẹ ọnọ ha userhumu rẹn ọwan riamerhen akpenyerẹn bẹmẹdẹ.
1. Ukẹro ọgo yi Jehova ọ ha ni ehware?
Ehware ẹghẹlẹ ro nẹ obẹ i Jehova rhe. Ọ guọlọre nẹ ọhworhare ọrhẹ ọmase ri rọnmọ ne i riamerhiẹn. Ẹghẹlẹ ọnana ọ lẹrhẹ aye vwiẹ emọ, ọ ji lẹrhẹ aye vwo ẹguọlọ ọrhẹ ọdamẹ kpahen owuowọnwan izede omamerhomẹ. Ọnana yẹ ọsoriẹ Ẹmro Osolobrugwẹ ọ ta: “Ghọghọ rhẹ ane wu rọnmọren ọke uphuphẹn ọnọ.” (Proverbs 5:18, 19) Jehova ọ guọlọre nẹ Ilele Kristi ri rọnmọ ne, i fuevwan kpahen ọrẹ aye i rọnmọren, neneyo aye i ja rha ghwọwe.—Se Hebrews 13:4.
2. Me yẹ irueruo ọfanrhiẹn?
Baibol na ọ ta rẹn ọwan taghene “eri vwo uruemru ọfanrhiẹn . . . i ha Uvie Osolobrugwẹ riuku-u.” (1 Corinthians 6:9, 10) Eri ha edjadjẹ i Greek ya i Baibol na, i ha ẹmro na por·neiʹa e dje uruemru ọfanrhiẹn fiotọre. Ẹmro ọrana o sekpahen (1) irueruo ehware a uvwre ihworho ri vwa ji rọnmọ, (2) uruemru ọhworhare ọrhẹ ọhworhare, yanghene ọmase ọrhẹ ọmase e bru ehware, ọrhẹ (3) uruemru rẹ ohworho o lele aranmo bru ehware. Ọwan a lẹrhẹ oma merhen i Jehova, jeghwai mẹrẹn erere arha “kẹnoma rẹn irueruo ọfanrhiẹn.”—1 Thessalonians 4:3.
YONO KODO RHỌ
Yono kpahen oborẹ wu ne ru kẹnoma rẹn irueruo ọfanrhiẹn, ọrhẹ oborẹ wu ne ru mẹrẹn erere wu rha fon ọrẹ uruemru.
3. Kẹnoma rẹn irueruo ọfanrhiẹn
Joseph ro rhiẹ ọhworhare rọ fuevwan, ọ tenren ọke ọmase owu ọ guọlọ gba ye gbọfanrhiẹn. Se Genesis 39:1-12, orho ru, are i gba kpahenrhọ enọ enana:
-
Me yo mwu i Joseph zẹ?—Se oghwẹmro ọrẹ 9.
-
Wu rorori taghene i Joseph o brorhiẹn ro serhọ? Mesoriẹ?
Marhẹ iphuphẹn ine ru sabu hẹrokele i Joseph kẹnoma rẹn irueruo ọfanrhiẹn inyenana? Kporo IVIDIO na.
Jehova ọ guọlọre nẹ ọwan ephian i ten irueruo ọfanrhiẹn. Se 1 Corinthians 6:18, orho ru, are i gba kpahenrhọ enọ enana:
-
Erhirhiẹ ego yi na sabu lẹrhẹ ohworho ruẹ irueruo ọfanrhiẹn?
-
Marhẹ wu ne ru sabu kẹnoma rẹn irueruo ọfanrhiẹn?
4. Wu na sabu fi ọdamuni kparobọ
Me yọ nọ sabu lẹrhiẹ bẹn re ne fi ọdamuni re ne ruẹ irueruo ọfanrhiẹn kparobọ? Kporo IVIDIO na, orho ru, are i gba kpahenrhọ onọ ọnana.
-
Ọke omizu ọhworhare uvuẹn ividio na ọ mẹrẹnvwrurhe taghene iroro ọrhẹ idjaghwẹ ye ina sabu lẹrhiẹ ja fuevwan kpahen aniẹ, me yo ruru?
Ilele Kristi ra fuevwan dede, a wọnrọn kọke kọke nẹ iroro aye ọ sabu fon ọke ephian. Marhẹ wu ne ru sabu kẹnoma rẹn iroro ri sekpahen ọfanrhiẹn? Se Philippians 4:8, orho ru, are i gba kpahenrhọ enọ enana:
-
Ekwakwa ego yo fori nẹ ọwan i rhe roro kpahan?
-
Marhẹ isese i Baibol na ọrhẹ ọra dabu fiomarhẹ owian i Jehova, ono ru ha userhumu rẹn ọwan fi ọdamuni re ne ruẹ ọdandan kparobọ?
5. Evwan i Jehova a yẹ ọwan erere
Jehova o rhe oborẹ ọ mai rhomu rẹn ọwan. Ọ ta rẹn ọwan oborẹ ene ru sẹrorẹ ẹfuọn ọrẹ iruemru ọwan, kugbe erere ra na mẹrẹn. Se Proverbs 7:7-27 yanghene kporo IVIDIO na, orho ru, are i gba kpahenrhọ enọ enana.
-
Marhẹ idama na o ru nya ruẹ erhirhiẹ ọdamuni?—Se Proverbs 7:8, 9.
-
Jerẹ oborẹ Proverbs 7:23, 26 ọ tare, irueruo ọfanrhiẹn ọ rhua emiamiamo sansan sa. Arha sẹrorẹ ẹfuọn ọrẹ uruemru ọwan, ebẹnbẹn ego ya na sabu vabọ ye?
-
Marhẹ ẹfuọn ọrẹ uruemru ọwan ono ru ha userhumu rẹn ọwan riamerhen akpenyerẹn bẹmẹdẹ?
Ihworho ezẹko e roro taghene oborẹ i Baibol na ọ tare kpahen uruemru rẹ ehworhare a gbẹ ehworhare yanghene emẹse a gbẹ emẹse, o dje ẹguọlọ phia-a. Ọrẹn, Jehova, Osolobrugwẹ ẹguọlọ, ọ guọlọre nẹ ihworho ephian i riamerhen akpenyerẹn bẹmẹdẹ. Na sabu mwuovwan akpọ ọrana, ene vi nyerẹnmwu evwan enẹyen. Se 1 Corinthians 6:9-11, orho ru, are i gba kpahenrhọ onọ ọnana:
-
Uvuẹn ikẹro Osolobrugwẹ, ojemẹ uruemru rẹ ehworhare a gbẹ ehworhare yanghene emẹse a gbẹ emẹse ọvo yi sọre?
Na sabu lẹrhẹ oma merhen Osolobrugwẹ, ọwan ephian ine vi ruẹ ewene. Ana mẹrẹn erere nie rhe? Se Psalm 19:8, 11, orho ru, are i gba kpahenrhọ enọ enana:
-
Wu rorori taghene evwan egbagba i Jehova i dje ọhọ phia? Me wu rorori? Mesoriẹ?
Jehova ọ ha userhumu rẹn ihworho buebun nyerẹnmwu evwan egbagba enẹyen ne. Ọye ọnọ ji sabu ha userhumu wẹn
OBORẸ IHWORHO EZẸKO A TA: “Ihworho awanva ina sabu bru ehware, takpu aye i vwo ẹguọlọ kpahen omoma aye.”
-
Me wu na sabu ta?
ME WU YONORIN?
Ehware ẹghẹlẹ ri Jehova o tiobọnu rẹn esa ọrhẹ aniẹ nẹ aye i riamerhiẹn.
Ẹzẹkoko
-
Me yẹ uruemru ọfanrhiẹn o sekpahen?
-
Me yọ nọ ha userhumu rẹn ọwan kẹnoma rẹn uruemru ọfanrhiẹn?
-
Erere ego ya na mẹrẹn erhe nyerẹnmwu evwan egbagba i Jehova?
GUỌLỌ IYẸNRẸN ERỌRỌ
Yono oborẹ ọsoriẹ i Jehova ọ guọlọ nẹ ọhworhare ọrhẹ ọmase i rọnmọ, nẹ aye i ki rhirhiẹ kugbe.
Yono oborẹ ọsoriẹ o vwo fo ne vwo utuoma kpahen ehworhare ra gbe ehworhare yanghene emẹse ra gbe emẹse, dedevwo i Baibol na ọ kparehasuẹ uruemru na.
Yono oborẹ irhi Osolobrugwẹ kpahen irueruo ehware ephian ine ru sẹrorẹ ọwan.
“Me yi Baibol na ọ ta Kpahen Irueruo Ehware ra ha Ugbunu Ruẹ?” (Urhomu-ẹmro rọ ha uvuẹn itanẹti)
Uvuẹn ikuegbe akpenyerẹn na “Aye i Brọghọ Rhọ mẹ Oma,” se kpahen oborẹ o mwu ọhworhare owu rọ gbẹ ehworhare bi, o ru wene akpenyerẹn yen nọ sabu lẹrhẹ oma merhen Osolobrugwẹ.
a Iruemru esọsọ enana i sekpahen irueruo sansan jerẹ ehware rọ vwọ fon, re bru ehware rhẹ unu, ehware unu ọphioro, ọrhẹ uruemru ra ha abọ mwuẹrhiẹn eghọn ra ha bru ehware ọrẹ ọwọrọ izede ehware.
