RÄ LECCIÓN 41
¿Hämꞌu̱ dä za nꞌa rä ñꞌo̱ho̱ dä mꞌe̱ngui nꞌa rä ꞌme̱hñä?
¿Hämꞌu̱ dä za nꞌa rä ñꞌo̱ho̱ dä mꞌe̱ngui nꞌa rä ꞌme̱hñä? Ndunthi yä jäꞌi di ntsa dä ñä de gehnä. Pe rä Biblia ñä claro de gehnä ꞌne di ja ko ndunthi rä tꞌekꞌei. Nuꞌu̱ yä konseho uni, faxte ndunthi. Koꞌmu̱ rä Zi Dada Jeoba go geꞌä mä Hyokätehu̱, Näꞌä mänꞌa pädi ndaꞌä mä ñhouihu̱. Rä Zi Dada Jeoba xikägihu̱ te debe gä pe̱fihu̱ ꞌne te debe gä ebitahu̱. Mu̱ gä o̱tehu̱, ma gä johyabihu̱ rä koraso ꞌne dä za gä disfrutahu̱ de rä bida dende nubye̱ ꞌne pa nzäntho.
1. ¿Hanja handi rä Zi Dada Jeoba ora nꞌa rä ñꞌo̱ho̱ ꞌme̱ngui nꞌa rä ꞌme̱hñä?
Rä Zi Dada Jeoba hingi proibi ge nꞌa rä ñꞌo̱ho̱ dä mꞌe̱ngui nꞌa rä ꞌme̱hñä, ngeꞌä xa pa geꞌä bi hyoki; pe siempre y kuando nuꞌmu̱ xä nthäti. Rä Zi Dada Jeoba bi uni rä nthäti ngu nꞌa rä regalo. Ngeꞌä njabu̱ tanto rä däme ngu rä ꞌme̱hñä dä za dä ꞌñudi rä mhäte nꞌa ngu mänꞌaa, ꞌne mu̱ dä ne dä me̱ꞌtsi yä bätsi. Rä Biblia enä: «Johya ko näꞌä ri ꞌme̱hñä gä nthätui nuꞌmu̱ ngi bäsjäꞌi» (Proverbios 5:18, 19). Rä Zi Dada Jeoba di mändabi nuꞌu̱ xä nthäti ge nunka di debe dä mꞌe̱ngui mä nꞌa rä jäꞌi (hñeti Hebreos 13:4, TNM).
2. ¿Toꞌo nuꞌu̱ handi Äjuä ngu yä ꞌñätsa ꞌne yä tsꞌu̱di jäꞌi?
Rä Biblia enä: «Nuꞌu̱ yä ꞌñätsa ꞌne yä tsꞌu̱di jäꞌi o̱tꞌe yä pekado ko yä ndoyꞌo [...] hingä ma dä hñäni de gä erensia rä Tsꞌu̱tꞌhui Äjuä» (1 Corintios 6:9, 10, TNM). Rꞌa de nuꞌu̱ yä yꞌofo de rä Biblia bi usa rä noya pornéia de rä idioma griego, pa bi referi nuꞌu̱ yä pekado o̱tꞌe ko yä ndoyꞌo nuꞌu̱ yä ꞌñätsa ꞌne yä tsꞌu̱di jäꞌi. Por ejemplo: 1) Nuꞌmu̱ nꞌa rä ñꞌo̱ho̱ ꞌme̱ngui nꞌa rä ꞌme̱hñä näꞌä hinxä nthätui (fädi ngu yä ꞌñädinthäti). a 2) Nuꞌmu̱ nꞌa rä ñꞌo̱ho̱ ꞌme̱ngui rä mi ñꞌo̱ho̱ui o nꞌa rä ꞌme̱hñä ꞌme̱ngui rä mi ꞌme̱hñäui. 3) Nuꞌmu̱ nꞌa rä jäꞌi ꞌme̱ngui o di ñhuxhui nꞌa rä zuꞌue o mboꞌni. Mu gä ebitahu̱ ꞌne gä rechazahu̱ nuya yä kosa xi xä ntsꞌo, pa mä ñhouise̱hu̱ ꞌne ma gä johyabihu̱ rä koraso rä Zi Dada Jeoba (1 Tesalonicenses 4:3, TNM).
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä pädihu̱ hanja dä za gä ebitahu̱ nuꞌu̱ yä pekado o̱tꞌe ko yä ndoyꞌo nuꞌu̱ yä ꞌñätsa ꞌne yä tsꞌu̱di jäꞌi, ꞌne te mä benefisio ma gä hänihu̱ mu̱ gä ꞌmu̱ihu̱ xä ntꞌaxi ante yä da Äjuä.
3. ꞌUege de nuꞌu̱ yä kosa xä ntsꞌo o̱tꞌe yä ꞌñätsa ꞌne yä tsꞌu̱di jäꞌi
Nꞌa rä pa nꞌa rä bäsjäꞌi mrä thuhu José bi ñhandui nꞌa rä tentasio: Rä ꞌme̱hñä näꞌä rä hmuu, bi yꞌapäbi ge xä mꞌe̱ngui. Hñetihu̱ Génesis 39:1-12, ꞌnepu̱ thädihu̱ nuya yä ntꞌani:
-
¿Te bi japäbi José bi bo̱ni rä nhextꞌihi ꞌne bi zopu̱ näꞌä ꞌme̱hñä? (Hyandihu̱ mänꞌaki rä versículo 9).
-
¿Gi kamfri ge bi me̱fi xä ñho José? ¿Por hanja?
Näꞌä rä hogä ejemplo bi zoogi José, ¿hanja dä za dä matsꞌi yä bäsjäꞌi pa dä ꞌuege de yä tentasio? Yꞌe̱ntsꞌihu̱ rä BIDEO.
Rä Zi Dada Jeoba ne ge kada nꞌa de gekhu̱, gä rechazahu̱ yä tentasio ꞌne nuꞌu̱ yä pekado o̱tꞌe yä ꞌñätsa jäꞌi ko yä ndoyꞌo. Hñetihu̱ 1 Corintios 6:18, TNM, ꞌnepu̱ thädihu̱ nuya yä ntꞌani:
-
¿Te dä za dä zitsꞌi nꞌa rä jäꞌi dä dagi ha nꞌa rä tentasio ꞌne dä yꞌo̱tꞌe yä pekado ko rä ndoyꞌo?
-
Xi nuꞌi, ¿hanja dä za gi rechaza yä tentasio ꞌne nuꞌu̱ yä pekado o̱tꞌe yä ꞌñätsa jäꞌi ko yä ndoyꞌo?
4. Nuꞌi dä za gi rechaza yä tentasio
¿Hämꞌu̱ dä za dä jaꞌi xä ñhei gi rechaza nꞌa rä tentasio? Yꞌe̱ntsꞌihu̱ rä BIDEO, ꞌnepu̱ thädihu̱ nunä rä ntꞌani:
-
Ja ngu dä handihu̱ ha rä bideo, ¿te bi me̱fi nꞌa rä ku ora bi da ngue̱nda ge näꞌä mi mbeni ꞌne näꞌä mi pe̱fi, mi nꞌa rä däta peligro ꞌne xä za xä zitsꞌi xä hyatꞌi rä ꞌme̱hñä?
Asta nuꞌu̱ yä kristianu pe̱päbi rä Zi Dada Jeoba ngu ri ꞌñehe, rꞌabu̱ di japäbi xä ñhei dä me̱ꞌtsi yä mfeni xä ntꞌaxi. Xi nuꞌi, ¿te dä za gi pe̱fi pa njabu̱ gi yꞌe̱ni de ha ri ñäxu yä tsꞌo mfeni? Hñetihu̱ Filipenses 4:8, ꞌnepu̱ thädihu̱ nuya yä ntꞌani:
-
Ja ngu dä handihu̱ ha rä testo, ¿te mä kosa di debe gä e̱ntꞌihu̱ ha mä mfenihu̱?
-
Mu̱ gä nxadihu̱ rä Biblia ꞌne todo tiempo gä mꞌu̱ihu̱ ocupado ha rä ꞌme̱fi rä Zi Dada Jeoba, ¿hanja geꞌä ma dä maxkägihu̱ pa hingä tagihu̱ ha yä tentasio o ha yä pekado?
5. Nuꞌu̱ yä mhända rä Zi Dada Jeoba di benefisiagihu̱
Rä Zi Dada Jeoba pädi xä ñho ndaꞌä mä ñhouihu̱. Hänge Näꞌä xikägihu̱ hanja di debe gä ꞌmu̱ihu̱ xä ntꞌaxi, ꞌne te mä benefisio ma gä hänihu̱. Hñetihu̱ Proverbios 7:7-27 ꞌne yꞌe̱ntsꞌihu̱ rä BIDEO. ꞌNepu̱ thädihu̱ nuya yä ntꞌani:
-
¿Te bi japäbi nꞌa rä bäsjäꞌi bi nthintꞌi ha nꞌa rä däta peligro ꞌne bi dagi ha nꞌa rä tentasio? (Hyandihu̱ mänꞌaki Proverbios 7:8, 9).
-
Ja ngu udi Proverbios 7:23, 26, toꞌo tagi ha nuꞌu̱ yä pekado otꞌe yä ꞌñätsa jäꞌi ko yä ndoyꞌo di xofo ndunthi yä xuñha ꞌne yä u̱gi. Hänge, ¿de te ma gä librahu̱ mu̱ gä rechazahu̱ nuꞌu̱ yä pekado o̱tꞌe yä tsꞌu̱di jäꞌi?
-
Mu̱ di pe̱ꞌtsihu̱ nꞌa rä mꞌu̱i xä ntꞌaxi ante yä da Äjuä, ¿hanja geꞌä ma dä maxkägihu̱ pa gä johyahu̱ dende nubye̱ ꞌne pa nzäntho?
Rꞌa yä jäꞌi enä ge Äjuä rä tsꞌomꞌu̱i ngeꞌä di proibi ge nꞌa rä ñꞌo̱ho̱ dä mꞌe̱ngui rä mi ñꞌo̱ho̱ui o ge nꞌa rä ꞌme̱hñä dä mꞌe̱ngui rä mi ꞌme̱hñäui. Pe rä Zi Dada Jeoba rꞌakägihu̱ nuya yä mhända ngeꞌä di mäkägihu̱ ꞌne pa mä ñhouihu̱. Mu̱ gä o̱dehu̱, ma dä za gä pe̱ꞌtsihu̱ nꞌa rä mꞌu̱i temäꞌentho dende nubye̱ ꞌne xudi ndämäni dä za gä ꞌmu̱ihu̱ pa nzäntho. Hñetihu̱ 1 Corintios 6:9-11, TNM, ꞌnepu̱ thädihu̱ nunä rä ntꞌani:
-
Äjuä di proibi ge nꞌa rä ñꞌo̱ho̱ dä mꞌe̱ngui rä mi ñꞌo̱ho̱ui o nꞌa rä ꞌme̱hñä dä mꞌe̱ngui rä mi ꞌme̱hñäui. Pe, ¿ndaꞌu̱ nuꞌu̱ märꞌa yä kosa di kondenä Äjuä?
Mu̱ di nehu̱ ge Äjuä dä numäñhogihu̱, pe̱ꞌtsi te gä paati mä mꞌu̱ihu̱. ¿Hingi kamfri ge di bale rä penä gä he̱gihu̱ nuꞌu̱ yä kosa di u̱tsa Äjuä? Hñetihu̱ Salmo 19:8, 11, ꞌnepu̱ thädihu̱ nuya yä ntꞌani:
-
¿Gi senti ge xa xä ñhei nuꞌu̱ yä mhända uni rä Zi Dada Jeoba? ¿Por hanja?
Rä Zi Dada Jeoba xä matsꞌi ndunthi yä jäꞌi dä zitsꞌi nꞌa rä mꞌu̱i xä ntꞌaxi ja ngu di mända. ¡Näꞌä ꞌnehe dä za dä maxꞌäꞌi!
RꞌA YÄ JÄꞌI ENÄ: «Di enga ge mu̱ nꞌa rä jäꞌi dä mꞌe̱ngui mä nꞌa rä jäꞌi mäske hinxä nthäti; mientra di mädi, geꞌä mänꞌa di mporta».
-
¿Te ma gi thädi mu̱ nꞌa rä jäꞌi dä xiꞌi njabu̱?
NÄꞌÄ DÄ PÄDIHU̱
Rä Zi Dada Jeoba hingi proibi ge nꞌa rä ñꞌo̱ho̱ dä mꞌe̱ngui nꞌa rä ꞌme̱hñä, ngeꞌä xa pa geꞌä bi hyoki; pe siempre y kuando nuꞌmu̱ xä nthäti.
Pa gä benihu̱
-
¿Te mä kosa di proibi rä Zi Dada Jeoba gä pe̱fihu̱ ko mä ndoyꞌohu̱?
-
¿Te ma dä maxkägihu̱ pa gä ꞌuegehu̱ de nuꞌu̱ yä pekado o̱tꞌe yä ꞌñätsa jäꞌi ko yä ndoyꞌo?
-
Rä Zi Dada Jeoba xikägihu̱ hanja di debe gä ꞌmu̱ihu̱. ¿Te mä benefisio ma gä hänihu̱ mu̱ gä o̱tehu̱ nuꞌu̱ yä mhända?
HABU̱ DÄ ZA GI PÄDI MÄ NꞌA TU̱I
Pädi te to̱ꞌmi Äjuä de nꞌa rä ñꞌo̱ho̱ ꞌne nꞌa rä ꞌme̱hñä nuꞌu̱ ne dä mꞌu̱i mähye̱gi.
Äjuä di proibi ge nꞌa rä ñꞌo̱ho̱ dä mꞌe̱ngui rä mi ñꞌo̱ho̱ui o nꞌa rä ꞌme̱hñä dä mꞌe̱ngui rä mi ꞌme̱hñäui. Pe Äjuä hingi u̱tsa nuꞌu̱ yä jäꞌi, sino näꞌä pe̱fi.
Rä Zi Dada Jeoba xikägihu̱ hanja di debe gä trata mä ndoyꞌohu̱. Mu̱ gä o̱tehu̱ nuꞌu̱ yä tsꞌofo rꞌakägihu̱, pa mä ñhouihu̱.
Ha rä esperiensia «Nuꞌu̱ bi tratagi ko ndunthi rä tꞌekꞌei», hyandi hanja nꞌa rä ñꞌo̱ho̱ näꞌä mi ꞌme̱ngui yä mi ñꞌo̱ho̱ui, bi za bi paati rä mꞌu̱i ko rä mfatsꞌi rä Biblia ꞌne nubye̱ ꞌmu̱i ja ngu di mända Äjuä.
«Rä Mäkä Tꞌofo bi patuäbi yä mꞌu̱i» (La Atalaya, 1 de abril de 2011)
a Rä Zi Dada Jeoba handi ꞌnehe ngu nꞌa rä pekado mu̱ nꞌa rä ñꞌo̱ho̱ o nꞌa rä ꞌme̱hñä kontsꞌuäbi o teꞌspäbi rä mpo̱ngä ꞌmitꞌi näꞌä jäꞌi hinxä nthätui. O mu̱ nꞌa rä ñꞌo̱ho̱ foꞌtsuäbi rä mpo̱ngä ꞌmitꞌi ha rä mpo̱ngä foho nꞌa rä ꞌme̱hñä.
Puede que también le interese
NÄꞌÄ DI ÑꞌANI YÄ JÄꞌI
¿Tengu nuꞌu̱ yä curso de rä Mäkä Tꞌofo uni yä testigo rä Jeoba?
Ora ma gi hñäni ri curso, nuꞌi dä za gi usa näꞌä rä Biblia go gi ne. ꞌNehe dä za gi mbitabi ri familia o nuꞌu̱ ri amigo pa dä nxadi rä Biblia kongeꞌi.
