MSOLO 41
Ko Baibolo ichanena chani pankhani yogonana?
Wanthu azinji achakhala omangika kuyankhula nkhani zogonana. Olo kuti vili teno, Baibolo ikambafotokoza nkhani zogonana ichafotokoza mu njira yaulemu na mosabisa kanthu. Ndipo vomwe ichafotokoza vichaphindulisa isepano. Mwevi ni vobveka. Kuposha vose Yahova ni Mlengi wanthu. Ndipo iye achadziwa vomwe ni vabwino kwa ise. Ndipo iye achatiwonesa momwe vochita vathu vingamutamandire iye na vomwe vingatithandize kuti tikhale wokondwa na moyo mpakana kalekale.
1. Ko Yahova achaona tani nkhani yogonana?
Kugonana ni mphaso yochokera kwa Yahova. Ndipo iye achada kuti mphaso mweyi imbakhale yokomedza kwa mwamuna na nkazi omwe niwolowolana. Mphaso mweyi sikuti ilitene ndawa yakundofuna kukhala na wana koma ni njira pomwe yowoneserana chikondi kwa wanthu omwe ni wolowolana koma mwanjira yachibadwa. Ndipomwapa mawu ya Mulungu yachalewa kuti: ‘Ukondwe na nkazi wa pa ulumbwana wako.’ (Miyambo 5:18, 19) Yahova achada kuti mabanja yachikhrisitu yakhale yokhulupirirana kuti apewe kuchita chigololo.—Lewengani Aheberi 13:4.
2. Ko chigololo ni chani?
Baibolo ichatiuza kuti: ‘Achigololo adzangenelini mu Ufumu wa Mulungu.’ (1 Akorinto 6:9, 10) Omwe adanemba Baibolo mu Chigiriki adaphatisira basa mawu yakuti por·neiʹa pakufuna kuthandauzira mawu yakuti chigololo. Mawu mwaya yachathandauza kuti chakuyamba 1) kugonana a pakati pa wanthu omwe ni wosalowolana, 2) kugonana kwa amuna panango akazi okhaokha, ndipo 3) kugonana na nyama. Tichalemekeza Yahova ndipo tichadziphindulisa tekha ‘tikapewa ntundu uliwose wachigololo.’—1 Atesalonika 4:3.
PFUNZIRANI VIZINJI
Onani momwe imwepo mungapewere chigololo na momwe mungakhalire wochena m’maganizo.
3. Thawani chigololo
Mwamuna wokhulupirika Yosefe, adakwanisa kuthawa na kupitiriza kukhala wochena. Lewengani Genesis 39:1-12, ndipo patsogolo pake kambiranani mibvunzo aya:
-
Ko ni chani chomwe chidalimbikisa Yosefe kuti athawe?—Onani vesi 9.
-
Ko munkuwona kuti Yosefe adasalula bwino? Ndawa chani?
Ko alumbwana ntsiku zathu zino angatewedzere tani Yosefe pankhani yothawa chigololo? Wonesani VIDIYO.
Yahova achada kuti aliyese wa ise athawe chigololo. Lewengani 1 Akorinto 6:18, ndipo patsogolo pake kambiranani mibvunzo aya:
-
Ko ni vochitika viponi vomwe vingakuchitiseni imwepo kuti muchite chigololo?
-
Ko imwepo mungathawe tani chigololo?
4. Ko mungapirire tani chiyeso?
Ko ni chani chomwe chingachitise kuti kupewa chiyeso kukhale koshupa? Wonesani VIDIYO, patsogolo pake kambiranani mbvunzo uyu.
-
Pomwe m’bale ule mu vidiyo waona kuti maganizo yake na vochita vake vingamalizire kumuchitisa chigololo na kukhala wosakhulupirika kwa nkazi wake, ni chani chomwe wachita?
Olo Mkhrisitu wolimba mwauzimu nthawe zinango angashupike kuti apitirize kukhala wochena m’maganizo. Ko imwepo mungapewe tani kuganizira vinthu vomwe vingakuchitiseni chigololo? Lewengani Afilipi 4:8, patsogolo pake kambiranani mibvunzo aya:
-
Ko ni khaindi yanyi ya vinthu vomwe tichadekana kuganizira?
-
Ko kuwerenga Baibolo na kupitiriza kutumikira Yahova, kungatithandize tani kupirira chiyeso chakuti tichimwe?
5. Malamulo ya Yahova achatiphindulisa
Yahova achadziwa vomwe ni vabwino kwa ise. Iye chatiuza momwe tingakhalire ochena na kuphindula tikambachita vimwevi. Lewengani Miyambo 7:7-27 panango wonesani VIDIYO, patsogolo pake kambiranani mibvunzo aya.
-
Ko mulumbwana ule wakhala tani pachiyeso?—Onani Miyambo 7:8, 9.
-
Mwakubverana na Miyambo 7:23, 26, kuchita chigololo kungakhale na votsatira voipa maninge. Ko ni mabvuto yaponi yomwe tingapewe tikapitiriza kukhala wochena m’maganizo?
-
Ko kukhala wochena m’maganizo kungatithandize kukhala wochena munjira iponi?
Wanthu anango achati vomwe Baibolo ichanena pankhani yogonana kwa amuna panango akazi okhaokha kulilini bwino. Koma Yahova ni Mulungu wachikondi, iye achada kuti aliyese akondwe na moyo. Kuti tikhale woyenerera tichadekana kumbatewedzera mpfundo zake. Lewengani 1 Akorinto 6:9-11, patsogolo pake kambiranani mbvunzo uyu:
-
Mobverana na momwe Yahova achawonera, ko kugonana kwa amuna panango kwa akazi okhaokha ni kugonana kubodzi kokha komwe ni kosabvumizika?
Kuti tilemekeze Mulungu aliyese wa ise achadikana kuchinja. Ndipo mwevi nivothandiza maninge? Lewengani Salimo 19:8, 11, patsogolo pake kambiranani mibvunzo aya:
-
Ko munkuganiza kuti mpfundo za Yahova pankhani ya chigololo ni zabwino? Peno neye, ndawa chani?
Yahova adathandiza wanthu azinji kuti aleke khalidwe yawo yachigololo. Iye angakuthandizenimbo imwepo
WANTHU ANANGO ACHATI: ‘Kugonana pakati pa wanthu awiri nthawe zose ni kwabwino malingana peno wanthuawo ankukondana.’
-
Imwepo mungalewe tani?
CHIGWATO
Kugonana ni mphaso yochokera kwa Mulungu kwa mwamuna na nkazi wake kuti akondwe.
Kubwerezera
-
Ko chigololo chinkuphatanidzapo vinthu viponi?
-
Ko ni chani chomwe chingatithandize kupewa chigololo?
-
Ko tichaphindula tani tikatewedza maganizo ya Yahova pankhani ya makhalidwe yabwino?
KUTI MUDZIWE VIZINJI
Onani kuti ndawa chani ni vodekana kwa Yahova kuti mwamuna na nkazi omwe ankufuna kukhala pabodzi anembese banja yawo ku boma.
‘Ko Baibolo ichanena chani pankhani yokhala pabodzi mosaloworana mwalamulo?’ (Nkhani ya pa intaneti)
Onani kuti ndawa chani vomwe Baibolo ichanena pankhani ya wanthu omwe achagonana amuna panango akazi okhaokha, ichathandauzalini kuti tichadekana kuzonda wanthu mwawa.
‘Ko kugonana kwa amuna panango akazi okhaokha ni koipa?’ (Nkhani ya pa intaneti)
Onani momwe malamulo ya Yahova pa nkhani yogonana kuchatitetezera isepano.
‘Ko kugonana nkamwa nikugonanadi chaiko?’ (Nkhani ya pa intaneti)
Onani chomwe chidalimbikisa munthu yemwe angagonana na munthu yemwe wenze wolingana naye vidzo adachinjira moyo wake nkuyamba kulemekeza Mulungu mu nkhani yakuti: ‘Adayamba kumbanilemekeza.’
a Kugonana kosabvumizika kumoku, kunkuphatanidzapo kugonana kosiyanasiyana ninge, kugonana nkamwa kugonana kumatako, na kuphatanaphatana kumaliseche mu njira ya kugonana.
