LESON 41
Wat Nao Bible Talem Abaotem Sex?
Staka pipol no feel free for story abaotem sex. Bat taem Bible story abaotem sex, hem story stret abaotem and story witim respect. Samting wea Bible storyim hem helpem iumi. Datwan hem mek sense bikos Bible kam from Jehovah, wea hem Creator blo iumi. So hem savve lo best samting for iumi. Hem talem iumi tingting blo hem abaotem sex wea if iumi followim, datwan bae mekem hem hapi and wat bae helpem iumi for enjoyim laef for olowe.
1. Wat nao tingting blo Jehovah abaotem sex?
Sex hem present from Jehovah. Hem laekem man and woman wea marit nomoa for enjoyim datwan. Datfala present hem for mekem hasband and waef garem pikinini, and tu, for showim love and feeling wea tufala garem for each other. Dastawe Bible sei: “Hemi gud fo yu laekem tumas . . . waef wea yu maritim fastaem.” (Provebs 5:18, 19) Jehovah expectim olketa Christian wea marit for faithful lo hasband or waef blo olketa, mekem olketa no duim adultery.—Readim Hebrew 13:4.
2. Wat nao hem minim for durong?
Bible sei “pipol wea durong . . . bae no kasem Kingdom blo God.” (1 Corinth 6:9, 10) Taem olketa man wea raetem Bible lo Greek languis storyim wei for durong, olketa iusim word por·neiʹa. Datfala Greek word savve minim (1) man and woman wea no marit duim sex, a (2) sem sex marit, and (3) for duim sex witim animal. Taem iumi “no durong,” iumi mekem Jehovah hapi and iumi kasem gud samting.—1 Thessalonica 4:3.
DIG GO MOA
Bae iumi storyim wat iu savve duim for no durong and gud samting wea iu savve kasem taem iu followim standard blo Jehovah for keepim wei and tingting blo iu klin.
3. Ranawe from wei for durong
Joseph ranawe from wanfala woman wea laek durong witim hem. Readim Jenesis 39:1-12, then discussim tugeta olketa kwestin hia:
-
Wat nao mekem Joseph for ranawe?—Lukim verse 8 and 9.
-
Iu tingse Joseph disaedem stret samting? Why nao olsem?
Wat nao olketa young pipol distaem savve duim for followim example blo Joseph and ranawe from wei for durong? Pleim VIDEO.
Jehovah laekem iumi evriwan for stap klia from wei for durong. Readim 1 Corinth 6:18, then discussim tugeta olketa kwestin hia:
-
Wat nao samfala situation wea savve mekem samwan durong?
-
Wat nao iu savve duim for ranawe from wei for durong?
4. Iu savve winim eni temptation
Wat nao savve mekem hem hard for ranawe from temptation for durong? Pleim VIDEO, then discussim tugeta disfala kwestin.
-
Wat nao brata lo video duim taem hem luksavve samfala samting wea hem duim bae mekem hem for no faithful lo waef blo hem?
Samfala taem olketa Christian wea faithful tu stragol for gohed tingim olketa gud samting. Wat nao iu savve duim for no tingting abaotem olketa samting wea savve mekem man for laek durong? Readim Philippi 4:8, then discussim tugeta olketa kwestin hia:
-
Wat nao olketa samting wea iumi shud tingting abaotem?
-
Taem iumi readim Bible and busy lo waka blo Jehovah, hao nao datwan savve helpem iumi for winim temptation for duim sin?
5. Olketa standard blo Jehovah savve helpem iumi
Jehovah savve lo best samting for iumi. Hem talem iumi hao for keepim wei and tingting blo iumi klin and gud samting wea iumi savve kasem from datwan. Readim Provebs 7:7-27 and pleim VIDEO, then discussim tugeta olketa kwestin hia.
-
Wat nao datfala young man duim wea mekem hem for kasem temptation for durong?—Lukim Provebs 7:8, 9.
-
Olsem Provebs 7:23, 26 storyim, wei for durong savve mekem man for kasem barava nogud samting. If iumi keepim wei and tingting blo iumi klin, wat nao olketa problem wea iumi bae no kasem?
-
Taem iumi keepim wei and tingting blo iumi klin, hao nao datwan savve helpem iumi for kasem laef olowe?
Samfala pipol tingse wat Bible talem abaotem sem sex marit, hem no showim love. Bat Jehovah hem God blo love and hem laekem iumi evriwan for enjoyim laef for olowe. For kasem datwan, iumi mas followim standard blo Jehovah. Readim 1 Corinth 6:9-11, then discussim tugeta kwestin hia:
-
Lo tingting blo God, hao, sem sex marit nomoa hem samting wea no stret?
For mekem God hapi, iumi evriwan need for changem samfala samting lo laef blo iumi. Hao, iumi savve kasem gud samting taem iumi duim olsem? Readim Sams 19:8, 11, then discussim tugeta olketa kwestin hia:
-
Iu tingse olketa standard blo Jehovah hem mek sense? Why nao olsem?
Jehovah helpem finis staka pipol for followim olketa law blo hem. Hem savve helpem iu tu
SAMFALA SAVVE TALEM: “No eniting rong for tufala wea lovem each other duim sex.”
-
Wat nao bae iu talem?
MAIN POINT
Sex hem present from Jehovah for man and woman wea marit for enjoyim.
Review
-
Wat nao hem minim for durong?
-
Wat nao bae helpem iumi for ranawe from wei for durong?
-
Wat nao gud samting wea iumi savve kasem taem iumi followim standard blo Jehovah?
FAENDAOT MOA
Read abaotem why God laekem man and woman wea stap tugeta for mas marit.
“Wat Nao Bible Talem Abaotem Wei for Stap Tugeta Bat No Marit?” (Article lo jw.org)
Read abaotem why olketa standard lo Bible abaotem sem sex marit no minim iumi shud heitim pipol wea duim datwan.
Lanem hao olketa law blo God abaotem evri wei for duim sex wea no stret hem protectim iumi.
“Hao, for Iusim Mouth for Duim Sex Hem Minim Man Duim Sex?” (Article lo jw.org)
Lo datfala experience “Olketa Respectim Mi,” lukim hao wanfala gay changem laef blo hem for mekem God hapi.
“Bible Changem Laef Bilong Pipol” (The Watchtower, April 1, 2011)
a Datfala word por·neiʹa no minim man and woman wea marit duim sex, bat hem savve minim for duim sex lo mouth and lo ass. And tu, for holehole lo private part blo narawan witim tingting for durong.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
