سبق نمبر 41
جنسی معاملیاں بارے بائبل چ کیہہ دَسیا گیا اے؟
بوہت سارے لوکاں نُوں جنسی معاملیاں بارے گل کردے ہوئیاں شرم آندی اے۔ پر بائبل چ ایس موضوع بارے بڑے واضح تے عزت والے انداز چ گل کیتی گئی اے۔ ایہدے بارے بائبل چ جیہڑیاں وی گلاں دَسیاں گئیاں نیں اوہ بوہت فائدہمند نیں کیونکہ اوہ ساڈے خالق یہوواہ وَلّوں نیں۔ اوہنوں پتہ اے کہ ساڈے لئی کیہہ چنگا اے تے کیہہ بھیڑا اے۔ ایس لئی اوہ سانوں دَسدا اے کہ اَسی اوہنوں خوش کرن لئی کیہہ کر سکنے آں تے خوشیاں بھری زندگی کیویں پا سکنے آں۔
1. جنسی معاملیاں بارے یہوواہ دی سوچ کیہہ اے؟
جنسی ملاپ کرن دی صلاحیت یہوواہ وَلّوں اِک نعمت اے۔ اوہ چاہندا اے کہ صرف اوہی مرد تے عورت اِک دُوجے نال جنسی تعلق کرن جنہاں دا آپس چ ویاہ ہویا اے۔ جنسی ملاپ دے ذریعے میاں بیوی نہ صرف اولاد پیدا کر سکدے نیں سگوں اِک دُوجے لئی اپنا پیار وی ظاہر کر سکدے نیں۔ ایسے لئی خدا دے کلام چ لکھیا اے کہ تُوں اپنی جوانی دی بیوی نال خوش رہ۔ (امثال 5:18، 19) یہوواہ چاہندا اے کہ شادیشُدہ مسیحی اِک دُوجے دے وفادار رہن تے زِناکاری توں بچن۔—عبرانیوں 13:4 نُوں پڑھو۔
2. حرامکاری کیہہ اے؟
بائبل چ دَسیا گیا اے کہ حرامکار خدا دی بادشاہی دے وارث نئیں ہون گے۔ (1-کُرنتھیوں 6:9، 10) بائبل چ جیس یونانی لفظ دا ترجمہ حرامکاری کیتا گیا اے، اوہ اصل چ پورنیا اے۔ پورنیا چ کیہہ کجھ شامل اے؟ ایہہ لفظ ایہناں تِن غلط کماں وَل اشارہ کردا اے (1) اوہناں لوکاں دا اِک دُوجے نال جنسی تعلق a کرنا جنہاں دی آپس چ شادی نئیں ہوئی، (2) مرداں دا مرداں نال تے عورتاں دا عورتاں نال جنسی تعلق تے (3) کسے انسان دا جانوراں نال جنسی تعلق۔ جدوں اَسی حرامکاری توں دُور رہنے آں تے اَسی خدا نُوں خوش کرنے آں تے ساڈا وی بھلا ہوندا اے۔—1-تھسلُنیکیوں 4:3۔
ہور سوچوچار لئی
غور کرو کہ تُسی حرامکاری توں کیویں بچ سکدے او تے اِنج کرن نال توانوں کیہہ فائدہ ہوئے گا۔
3. حرامکاری توں بھجو
یہوواہ دے اِک وفادار بندے نے حرامکاری توں بچن لئی بڑی کوشش کیتی۔ پیدایش 39:1-12 نُوں پڑھو تے فیر ایہناں سوالاں تے گل بات کرو:
-
یوسف حرامکاری توں بچن دے قابل کیویں ہویا؟—9 ایت نُوں ویکھو۔
-
کیہہ توانوں لگدا اے کہ یوسف نے جو کیتا اوہ بالکل صحی سی؟ جے ہاں تے کیوں؟ جے نئیں تے کیوں نئیں؟
اَج نوجوان یوسف وانگوں حرامکاری توں کیویں بچ سکدے نیں؟ ویڈیو چلاؤ۔
یہوواہ چاہندا اے کہ اَسی سارے حرامکاری توں بچئے۔ 1-کُرنتھیوں 6:18 نُوں پڑھو تے فیر ایہناں سوالاں تے گل بات کرو:
-
اِک بندہ کیہڑے حالاتاں چ حرامکاری دی ازمیش چ پے سکدا اے؟
-
تُسی حرامکاری توں کیویں بچ سکدے او؟
4. تُسی حرامکاری دی ازمیش توں بچ سکدے او
حرامکاری دی ازمیش توں بچنا مشکل کیوں ہو سکدا اے؟ ویڈیو چلاؤ تے فیر ایس سوال تے گل بات کرو:
-
ویڈیو چ وکھائے گئے بندے نُوں جدوں احساس ہویا کہ اوہ اپنی سوچ تے کماں دی وجہ توں اپنی بیوی نُوں دھوکھا دین دے خطرے چ پے گیا اے تے اوہنے کیہہ کیتا؟
یہوواہ خدا دے وفادار بندیاں نُوں وی کدی کدار اپنی سوچ نُوں پاک رکھن لئی جیتوڑ کوشش کرنی پیندی اے۔ تُسی اپنے ذہن چوں گندے خیال کڈھن لئی کیہہ کر سکدے او؟ فِلپّیوں 4:8 نُوں پڑھو تے فیر ایہناں سوالاں تے گل بات کرو:
-
سانوں کیہو جہیاں گلاں بارے سوچنا چاہی دا اے؟
-
جدوں ساڈا دھیان بائبل پڑھن تے یہوواہ دی خدمت کرن تے رہندا اے تے اَسی گُناہ کرن دی ازمیش توں بچن دے قابل کیویں ہنے آں؟
5. یہوواہ دے اصول تے معیار ساڈے فائدے لئی نیں
یہوواہ نُوں پتہ اے کہ ساڈے لئی کیہہ چنگا اے تے کیہہ بھیڑا۔ ایس لئی اوہ سانوں دَسدا اے کہ اَسی جنسی بدکاری توں کیویں بچ سکنے آں تے ایہدا سانوں کیہہ فائدہ ہوئے گا۔ امثال 7:7-27 نُوں پڑھو یاں ویڈیو چلاؤ تے فیر ایہناں سوالاں تے گل بات کرو:
-
ایہہ نوجوان ازمیش چ کیویں پے گیا؟—امثال 7:8، 9 نُوں ویکھو۔
-
امثال 7:23، 26 دے مطابق حرامکاری دا بڑا بھیڑا انجام ہوندا اے۔ ایہدے توں دُور رہ کے اَسی کیہڑیاں مشکلاں توں بچ جانے آں؟
-
جنسی بدکاری توں دُور رہن دی وجہ توں اَسی ہمیشاں تک خوشیاں بھری زندگی دا مزہ کیویں لے سکنے آں؟
بائبل چ مرداں دا مرداں نال تے عورتاں دا عورتاں نال جنسی تعلق کرنا منع اے۔ پر کجھ لوک کہندے نیں کہ ایہہ گل صحی نئیں۔ پر سانوں پتہ اے کہ یہوواہ پیار کرن والا خدا اے تے اوہ چاہندا اے کہ اَسی سارے ہمیشاں تک خوشیاں بھری زندگی گزارئیے۔ ایس لئی اوہدے اصولاں تے معیاراں مطابق چلنا ضروری اے۔ 1-کُرنتھیوں 6:9-11 نُوں پڑھو تے فیر ایس سوال تے گل بات کرو:
-
کیہہ خدا دی نظر چ اِک مرد دا دُوجے مرد لئی تے اِک عورت دا دُوجی عورت لئی جنسی کشش محسوس کرنا ای بس اِک بھیڑا کم اے؟
خدا نُوں خوش کرن لئی سانوں ساریاں نُوں اپنی زندگی چ تبدیلیاں کرنیاں پیندیاں نیں۔ پر کیہہ ایہدا واقعی کوئی فائدہ ہوئے گا؟ زبور 19:8، 11 نُوں پڑھو تے فیر ایہناں سوالاں تے گل بات کرو:
-
تواڈے خیال چ کیہہ جنسی معاملیاں بارے یہوواہ دے اصول تے معیار مناسب نیں؟ جے ہاں تے کیوں؟ جے نئیں تے کیوں نئیں؟
یہوواہ نے بوہت سارے لوکاں دی مدد کیتی اے تاکہ اوہ جنسی معاملیاں بارے اوہدے اصولاں مطابق زندگی گزارن۔ اوہ تواڈی مدد وی کر سکدا اے۔
کجھ لوکاں دی رائے: ”جے دو پیار کرن والے آپس چ جنسی ملاپ کر لین تے ایہدے چ کوئی بُرائی نئیں۔“
-
ایہدے بارے تواڈا کیہہ خیال اے؟
خلاصہ
جنسی ملاپ کرن دی صلاحیت یہوواہ وَلّوں اِک نعمت اے۔ اوہ چاہندا اے کہ صرف میاں بیوی ایس نعمت توں خوشی حاصل کرن۔
دہرائی
-
حرامکاری چ کیہہ کجھ شامل اے؟
-
حرامکاری توں بچن لئی کیہڑی چیز ساڈی مدد کرے گی؟
-
جدوں اَسی جنسی معاملیاں بارے یہوواہ دے اصولاں تے معیاراں مطابق چلنے آں تے سانوں کیہہ فائدہ ہوندا اے؟
ہور جانن لئی
ایس مضمون چ پڑھو کہ شادی دے بغیر کٹھے رہن بارے یہوواہ خدا دی سوچ کیہہ اے۔
بائبل چ شادی دے بغیر کٹھے رہن بارے کیہہ دَسیا گیا اے؟ (ویبسائٹ تے مضمون)
ایس مضمون چ پڑھو کہ بائبل چ ہمجنسپرستی بارے جو کجھ دَسیا گیا اے اوہدا ایہہ مطلب نئیں کہ سانوں ہمجنسپرست لوکاں توں نفرت کرنی چاہی دی اے۔
ایس مضمون چ پڑھو کہ جنسی معاملیاں بارے خدا دے اصولاں تے عمل کر کے ساڈی حفاظت کیویں ہوندی اے۔
کیہہ مُونہہ دے ذریعے جنسی عمل واقعی سیکس کرنا ہوندا اے؟ (ویبسائٹ تے مضمون)
مضمون ”وہ میرے ساتھ بڑی عزت سے پیش آئے“ چ پڑھو کہ اِک ہمجنسپرست بندے نے کیویں اپنی زندگی بدلی تے خدا نُوں خوش کیتا۔
پاک کلام کی تعلیم زندگی سنوارتی ہے (مینارِنگہبانی دا مضمون)
a ایس نا جائز جنسی تعلق چ موُنہہ دے ذریعے کسے دے جنسی اعضا نُوں چھیڑنا، پاخانے والی جگہ توں جنسی کم کرنا تے کسے دے جنسی حصیاں نال چھیڑچھاڑ کرنا وی شامل اے۔
ایہہ وی ویکھو
اوہ سوال جیہڑے لوک اکثر ساڈے بارے پچھدے نیں
یہوواہ دے گواہ بائبل کورس کیویں کراندے نیں؟
یہوواہ دے گواہواں نال بائبل کورس کردے ویلے تُسی جیہڑا وی بائبل ترجمہ چاہوو استمال کر سکدے او۔ نالے تُسی اپنے سارے گھر والیاں یاں اپنے دوستاں نُوں وی ایہدے چ شامل ہون لئی کہہ سکدے او۔
