41 KAQ YACHAKUNËKIPAQ
¿Bibliachöqa ima nintaq warmiwan ollqu oqllanakuyanqampaq?
Warmiwan ollqu oqllanakuyanqampaq o juntakäyanqampaq parlëqa wakinkunapaqqa penqakuypaqmi. Peru Bibliachöqa tsë asuntupaq cläru y respëtuwanmi parlan, y ninqankunaqa yanapamantsikmi. Jehoväqa kamamaqnintsik karmi musyan noqantsikpaq ima alli y ima mana alli kanqanta. Tsëmi Palabranchö cläru nimantsik oqllanakuy asuntuchöpis ima alli y ima mana alli kanqanta. Pë nimanqantsikta cäsukushqaqa kushikunmi, y imëyaqpis kushishqa kawakunatam permitimäshun.
1 KAQ: ¿Ima nintan Jehovä warmiwan ollqu oqllanakuyanqampaq?
Jehoväqa munan warmiwan ollqu oqllanakur kushishqa kayänantam, peru tsëpaqqa casakuyänanran. Ishkan oqllanakuyanqanqa manam wamrayoq kayänanllapaqtsu, sinöqa ishkankuna kuyanakur kushishqa kayänampaqmi. Tsëmi Bibliachöqa nin: “Jövin kënikichö casakunqëki warmillawanmi imëpis [kushishqa] kanëki” (Proverbius 5:18, 19). Jehoväqa munan, majankunata respetayänanta y kuyayänantam. Tsëmi cristiänukunaqa majankunata jukwanqa engañayänantsu (leyi Hebrëus 13:4).
2 KAQ: ¿Imakunatan melanëpaq rurëkuna kayan?
Bibliachömi nin ‘oqllanakur melanëpaqkunata ruraqkunaqa’ Diospa Gobiernunta mana chaskiyänampaq kaqta (1 Corintius 6:9, 10). Melanëpaq rurëkunapaq parlarqa, Bibliata qellqaqkunaqa pornëia nirmi griëgu idiömachö qellqayarqan. Tsë palabrataqa churayarqan kë mana alli rurëkunapaq parlarmi: 1) manaraq casakur warmiwan ollqu oqllanakuyanqampaq, a 2) ollqupura o warmipura kakuyanqampaq y 3) animalkunawan kakuyanqampaq. Tsë melanëpaq rurëkunapita cuidakurqa, Teytantsik Jehovätam kushitsishun y kikintsikpis kushishqam kawakushun (1 Tesalonicensis 4:3).
MASLLA YACHAKUSHUN
Piwampis mana allita rurëpita cuidakunëkipaq y tsë asuntupaq Jehovä mandakunqankunata cäsukur kushishqa kawakunëkipaq kaqtam yachakushun.
3 KAQ: Piwampis mana allita rurëpita cuidakuy
Jehoväpa sirweqnin Josëqa manam jukpa warminwan kakuyta munarqantsu. Leyiyë Genesis 39:1-12 ima ninqanta y këkunapaq parlayë:
-
¿Imanirtan Josëqa Potifarpa warminwan oqllanakuyta munarqantsu? (Rikäyë 9 kaq versïculuta).
-
¿Imanirtan Josë ruranqanqa alli karqan?
Jövinkunaqa, ¿imanötan Josënölla cuidakuyanman warmiwampis o ollquwampis kakuypita? VIDEUTA rikäyë.
Jehovätaqa manam gustantsu mana majankunawan kakuyaptin, y tsëpitam cuidakunantsik. Leyiyë 1 Corintius 6:18 ima ninqanta y këkunapaq parlayë:
-
¿Imakunaraq jutsata rurar piwampis kakuyman chätsimashwan?
-
¿Imatataq rurankiman manaraq casakur piwampis mana kakunëkipaq?
4 KAQ: Piwampis mana kakunëkipaq cuidakuytaqa puëdinkim
¿Imakunatan piwampis oqllanakuyman chätsimashwan? VIDEUTA rikäyë y këpaq parlayë:
-
Videuchö rikanqantsik wawqiqa pensanqankuna y rurëkanqankuna warminta engañëman chätsinampaq kaqtam cuentata qokurqan, ¿imatataq rurarqan tsëta cuentata qokurir?
Jehoväpa sirweqninkunapis höraqa melanëpaqkunata pensarmi qallëkuyanman, tsëmi alläpa cuidakuyänan. Y qamqa, ¿imatataq rurankiman mana alli rurëkunata mana pensanëkipaq? Leyiyë Filipensis 4:8 ima ninqanta y këkunapaq parlayë:
-
Leyirinqantsiknöpis, ¿imakunamantan pensanantsik?
-
Bibliata leyinqantsik y Jehoväta sirwir ocupädu kanqantsikqa, ¿yanapamashwantsuraq mana alli rurëkunaman mana chänapaq? ¿Imanir?
5 KAQ: Jehovä mandakunqankunata cäsukurqa kushishqam kashun
Jehoväqa musyanmi noqantsikpaq ima alli kanqanta. Tsëmi nimantsik piwampis jutsa rurëpita cuidakunapaq, y cäsukurqa kushishqam kashun. Leyiyë Proverbius 7:7-27 ima ninqanta y VIDEUTA rikäyë y këkunapaq parlayë:
-
¿Imanirtan kë jövinqa tsë warmiwan oqllanakuyman charqan? (Rikäyë Proverbius 7:8, 9).
-
Proverbius 7:23, 26 ninqannömi piwampis kakoqkunaqa alläpa sufriyan. Piwampis kakuypita cuidakurqa, ¿ima problëmakunapatan pasashuntsu?
-
Jehovä mandakunqankunata cäsukunqantsikqa, ¿imanötan yanapamantsik imëpis kushishqa kawakunapaq?
Ollqupura o warmipura kakoqkunapaq Bibliachö ninqanta leyirmi, wakinkunaqa pensayan pëkunata Diosnintsik mana kuyanqanta. Peru manam tsënötsu, Jehoväqa alläpa kuyakoqmi y llapankuna mana wanurna kawakuyänanta munarmi pë mandakunqankunata cäsukuyänanta munan. Leyiyë 1 Corintius 6:9-11 ima ninqanta y këpaq parlayë:
-
Teytantsik Jehoväpaqqa, ¿ollqupura o warmipura kakuyta munayanqanllaku mana alli? ¿O imakuna mastan?
Jehovä munanqannö kawanapaqqa llapan mana alli rurëkunatam dejanantsik. Peru kallpachakunqantsikqa, ¿allipaqtsuraq kanman? Leyiyë Salmus 19:8, 11 ima ninqanta y këpaq parlayë:
-
¿Oqllanakuy asuntupaq Jehovä mandakunqanqa sasa o aja cumplinanku? ¿Imanirtan tsënö pensanki?
Mëtsikaqtam Jehoväqa yanapashqa pë munanqannö kawakuyänampaq, y qamtapis yanapashunkim.
WAKIN IMA NIYANQAN: “Kuyanakoqkunaqa mana casakurpis oqllanakur kakuyta puëdiyanmi”.
-
Qamqa, ¿ima ninkitan?
KËTAM YACHAKURQUNKI
Jehoväqa munan warmiwan ollqu oqllanakur kushishqa kayänantam, peru tsëpaqqa casakuyänanran.
¿Yarpankiku?
-
¿Ima rurëkunatan melanëpaq rurëkuna kayan?
-
¿Imatan yanapamäshun piwampis oqllanakuypita cuidakunapaq?
-
¿Imanötan yanapamantsik Jehovä mandakunqankunata cäsukunqantsik?
MASTA YACHAKUY
¿Imanirtan Diosnintsik mandakun ollquwan warmi juntu kawëta munarqa casakuyänantaraq?
Ollqupura o warmipura oqllanakuyta munaqkunapaq Bibliachö ima ninqanta maslla yachakuy.
“¿Mana allitsuraq ollqupura o warmipura oqllanakur kakuyta munë?” (jw.org päginachö yarqamoq)
Melanëpaq rurëkunapita cuidakunapaq Jehovä mandakunqankuna ollqutapis warmitapis imanö yanapanqanta leyi.
“Shiminkunapa ruranakuyanqampis, ¿rasumpatsuraq alläpa jutsa?” (jw.org päginachö yarqamoq)
Ollqu mayinkunawan oqllanakur kakoq nuna Jehovä munanqannöna kawanampaq ima yanapanqanta musyanëkipaq, “Alli y respëtuwanmi tratayämarqan” neqta leyi.
“Bibliam yanapashqa jukläyana kawakuyänampaq” (Täpakoq, 1 de abril 2011)
a Këkunapis melanëpaq rurëkunam kayan: manaraq casakur warmiwan ollqu oqllanakur kakuyanqan, shiminkunapa ruranakuyanqan, sikipa ruranakuyanqan y ollqupa o warmipa partinkunata yatapäyanqan.
