41 YACHACHIKUY
¿Imaninmi Biblia warmi-qhari puñuymanta?
Askha runakunan p’enqakunku warmi-qhari puñuymanta rimayta. Bibliapin ichaqa sut’ita chaykunamanta rimashan. Kamaqninchis Jehová Diostaq Bibliata yuyaycharqan chayqa Bibliapi chaykunamanta yachayqa allinninchispaqmi. Chaymantapas Diosqa allintan yachan imas allinninchispaq kanman imataq mana chayta. Paymi yachachiwasun imaynatas kusichisunman, imaynatas wiñaypaq kusisqa kausasunman chaykunata.
1. ¿Imaynatan Jehová Dios qhawarin warmi-qhari puñuyta?
Warmiwan qhariwan kaspa kusirikuyqa Diospa regalonmi. Payqa munan casarasqakuna chay regalowan kusirikunankutan. Diospa chay qosqanwanmi paykunaqa wawakunayoq kayta atinku. Chaymantapas, paykunapuran sumaqta munayta munanakunku, munayta cariñonkuta rikuchinakunku. Chaychá Bibliaqa nin: “Wayna tiempo esposallaykiwan kusikuy”, nispa (Proverbios 5:18, 19). Jehová Diosqa casarasqakuna wañupunankukama kuska tiyanankutan munan. Manan mayqenninkupas jujwanqa pantanankuchu (leey Hebreos 13:4).
2. ¿Iman qhelli jucha ruway?
Biblian nin: “Qhelli juchapi puriqkunaqa [...] manan Diospa gobiernonmanqa jaykunqakuchu”, nispa (1 Corintios 6:9, 10). Griego rimaypi qhelli juchamanta rimaspaqa pornéia ninmi. Chayta nispaqa rimashan mana casarakuspalla warmiwan qhariwan kaymanta, a qharipurapas warmipurapas warmiwan qhariwan jina kaymanta, animalkunawan qhellikuna ruwaymanta iman. Sichus chay qhelli ruwaykunamanta ayqesunchis chayqa Jehová Diospa sonqontan kusichisunchis, kusisqataqmi kausasunpas (1 Tesalonicenses 4:3).
ASTAWAN YACHASUNCHIS
Kunanqa astawan yachasun imakunatas ruwanayki ama qhelli juchapi urmanaykipaq chayta, ima bendicionkunatas chaskinki ch’uyata kausaspa chaytapas.
3. Qhelli jucha ruwaymanta ayqekuy
Yachasun Josemanta, payqa Dios sonqo kayninpin mana munarqanchu juj warmi “noqawan kay” niqtin. Leeychis Génesis 39:1-12 textota, jinaspa jamuq tapuykunaman jina parlariychis:
-
¿Imaraykun José ayqekurqan? (Qhaway 9 versiculota).
-
¿Allinchu karqan chay ruwasqan? ¿Imarayku?
¿Imaynatan wayna-sipaskunapas José jina qhelli ruwaymanta ayqekunkuman? VIDEOTA qhawaychis.
Jehová Diosqa manan munanchu qhelli ruwaykuna ruwananchista. Leeychis 1 Corintios 6:18 textota, jinaspa jamuq tapuykunaman jina parlariychis:
-
¿Ima ruwaykunan tanqawasunman qhelli jucha ruwayman?
-
¿Imatan ruwawaq qhelli juchaman ama urmanaykipaq?
4. Kallpachakuy qhelli juchaman ama urmanaykipaq
¿Iman mayninpi qhelli jucha ruwayman apawasunman? ¿Imatan ruwana ama chayman urmanapaq? VIDEOTA qhawaychis, jinaspa jamuq tapuyman jina parlariychis:
-
¿Imatan chay videopi hermano ruwarqan imachus ruwasqan mana allinchu kasqanta reparakuspa?
Allin iñiyniyoq hermanokunapas tukuy atisqankutan kallpachakunanku piensasqanku ch’uya kananpaq. ¿Imatan qanpas ruwawaq qhelli piensaykuna umaykiman jamuqtin? Leeychis Filipenses 4:8 textota, jinaspa jamuq tapuykunaman jina parlariychis:
-
¿Imakunapin astawan piensananchis?
-
Bibliata leeypas, juñunakuyman riypas, Diosmanta willaq riypas, ¿yanapawasunmanchu qhelli juchakunamanta ayqenanchispaq? ¿Imaraykutaq chhaynata ninki?
5. Jehová Diospa kamachikuyninkunaqa allinninchispaqmi
Jehová Diosqa yachanmi imakunas allinninchispaq chayta. Chayraykun yachachiwanchis imaynatas ch’uyata kausasunman, imaraykus chay allinpuni chayta. Leeychis Proverbios 7:7-27 textota, chaymantataq VIDEOTA qhawaychis, jinaspa jamuq tapuykunaman jina parlariychis:
-
¿Ima ruwasqanmi chay waynata aysarqan qhelli ruwayman urmananpaq? (Qhawaychis Proverbios 7:8, 9 textokunata).
-
Proverbios 7:23, 26 textopi nisqan jina qhelli jucha ruwayqa imaymana sasachakuytataq apamun chayqa, ¿imaynan kausayninchis kanqa ch’uyata kausananchispaq kallpachakuqtinchis?
-
¿Yanapawasunmanchu ch’uyata kausay wiñaypaq kusisqa kausananchispaq?
Wakinmi ninku: “Warmipura qharipura kaspaqa munanakuspachá riki tiyanku. Chayta jark’aspaqa, ¿manachu Biblia aswanpas cheqninakuyta yachachishan?”, nispa. Manan chhaynachu aswanmi Diosqa munakuq kayninpi llapa runapas wiñaypaq kusisqa kausanankuta munan. Chayta chaskinapaqmi ichaqa kamachisqanman jina kausana. Leeychis 1 Corintios 6:9-11 textota, jinaspa jamuq tapuyman jina parlariychis:
-
¿Warmipura qharipura kayllatachu Jehová Dios qhelli juchapaq qhawarin?
Diosta kusichinapaqqa llapanchismi imallapipas cambiananchis. Chayta ruwayqa allinninchispaqmi. Leeychis Salmos 19:8, 11 textota, jinaspa jamuq tapuykunaman jina parlariychis:
-
Imaniwaqmi, ¿allinninchispaqchu Diospa churasqan kamachikuykuna? ¿Imaraykutaq chhaynata ninki?
Jehová Diosqa askha runakunatan yanaparqan ch’uyata kausanankupaq, chhaynaqa qantapas yanapasunkin.
WAKIN RUNAKUNAN NINKU: “Munanakuspachá riki warmipurapas qharipurapas tiyakunku, imanantaq chayri”, nispa.
-
Personaykiri, ¿imaninkitaq?
IMATAN YACHAMURQANCHIS
Warmiwan qhariwan kaspa kusirikuyqa Jehová Diospa regalonmi, ichaqa casarasqakunallamanmi chay regalotaqa qorqan.
Yuyarisun
-
¿Imakunan qhelli jucha ruway?
-
¿Iman yanapawasunman ama qhelli juchaman urmananchispaq?
-
¿Allinninchispaqchu Jehová Diospa churasqan kamachikuykuna? ¿Imarayku?
ASTAWAN YACHANAYKIPAQ
Jehová Diosqa manan munanchu warmi-qhari mana casarakuspalla tiyanankutaqa. Chaymantan kaypi willashan.
“¿Allinchu kanman mana casarakuspalla piwanpas tiyay?” (jw.org paginapi leey)
Bibliaq nisqanman jinaqa, juchan warmipurapas qharipurapas warmiwan qhariwan jina kayqa, ichaqa manan pitapas cheqnikunachu. Chaymantan kaypi willashan.
“¿Juchachu qharipura otaq warmipura warmi-qhari jina puñuy?” (jw.org paginapi leey)
Kaypin astawan yachanki warmiwan qhariwan kanapaq Diospa churasqan kamachikuykunaqa allinninchispaq kasqanta.
¿Iman juj runata yanaparqan warmi jina kayta saqespa Jehová Diospa munayninman jina kausananpaq? Leey Guadalupe Villarrealpa willakusqanta.
“Bibliaq yanapayninwan cambianku” (Qhawaq, 2011 watapi 1 julio)
a Chay qhelli ruway ukhupin kashan warmi-qharipi imaymanankuta ch’onqanakuy, jatun jisp’ananta t’inkinakuy, jujpa qharikayninta warmi kaynintapas q’apipayay ima.
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
