LEKCIJA 41
So e Biblija phenel pal o seks?
But manuša phenen: „Oda baro džungaľipen pal ajso te vakerel.“ Aľe nane oda avka. Sar e Biblija vareso pisinel pal o seks, na garuvel oda lav, aľe pisinel pal oda paťivales a so phenel, amenge anel chasna. Ala lava hine le Jehovastar. Ov džanel, so hin predal amende nekfeder, bo amen kerďa. Phenel amenge, kana leske amaro dživipen kerel radišagos a sar šaj chudas nekfeder dživipen akanastar pro furt.
1) Sar o Jehovas dikhel pro seks?
O Jehovas ada kerďa predal o manuša sar daros. Kamel, kaj olestar te radisaľol ča o rom la romňaha, so hine solacharde (veradune). Kada daros nane ča pre kada, kaj len te en o čhave, aľe tiš jekh avreske aleha presikaven kamiben. Vašoda le Devleskero lav phenel: „Radisaľuv la romňaha, sava iľal, sar salas terno.“ (Príslovia 5:18, 19) O Jehovas užarel savore kresťanendar, so hine solacharde, hoj peske ena verna a hoj ňigda na džana aver muršeha abo džuvľaha. (Pregen Hebrejom 13:4)
2) So savoro hin o lubipen?
Andre Biblija hin, hoj ola, so keren o lubipen, na chudena le Devleskero kraľišagos. (1. Korinťanom 6:9, 10) Murša, so pisinenas e Biblija andre greciko čhib, pisinde pro lav lubipen o lav porneja. Andre kada hin: (1) seks a maškar o dujdžene, so nane veradune (solacharde), (2) seks maškar duj murša abo duj džuvľa the (3) seks le zvjeratoha. O Jehovas amendar radisaľola, te pes zľikeraha le lubipnastar a amenge oda anela ča lačho. (1. Tesaloničanom 4:3)
DODŽAN TUT BUTER
So tuke pomožinela, kaj tut te na scirdel o lubipen? So lačho tut ela olestar, te ačheha žužo andre goďi the andro jilo?
3) Ma de tut te scirdel pro lubipen!
Verno murš o Jozef pes na diňa te scirdel pro lubipen. Pregen 1. Mojžišova 39:1–12 a paľis vakeren jekhetane:
-
Soske o Jozef denašľa ola džuvľijatar? (Dikh o tekstos 9.)
-
Mišľines tuke, hoj o Jozef kerďa mište? Soske?
Sar o pribehos pal o Jozef šaj pomožinel adaďives le ternenge, kaj pes te na den te scirdel pro lubipen? Mukh o VIDEJO.
O Jehovas kamel amendar savorendar, kaj amenge o lubipen te džungľol. Pregen 1. Korinťanom 6:18 a paľis vakeren jekhetane:
-
So šaj varekas ľidžal kijo lubipen?
-
Sar šaj denašes le lubipnastar?
4) Hin tut pre oda te zľikerel pes
So šaj kerel, hoj sig bisteraha, hoj kamas te denašel le lubipnastar? Mukh o VIDEJO a paľis vakeren jekhetane.
-
O phral avľa upre, hoj oda, pal soste rozmišľinel a so kerel les šaj ľidžal, hoj na ela peskera romňake verno. So oleha kerďa?
The le lačhe kresťanoske pes varekana šaj ačhel, hoj leske avel pre goďi vareso džungalo. So te kerel, kaj oda andre peste te na mukhel te barol? Pregen Filipanom 4:8 a paľis vakeren jekhetane:
-
Pal soste hin lačhes te rozmišľinel?
-
Sar oda, hoj peske genas e Biblija a hin amen but buťi predal o Jehovas amenge pomožinel, kaj te na peras andro binos?
5) O Jehovas kamel predal amende oda nekfeder
O Jehovas džanel, so hin predal amende nekfeder. Phenel amenge, sar šaj ačhas žuže andro jilo the andre goďi a so lačho oda anel. Pregen Príslovia 7:7–27 abo mukh o VIDEJO a paľis vakeren jekhetane.
-
Sar pes o terno dochudňa pro dilino drom? (Dikh Príslovia 7:8, 9.)
-
O Príslovia 7:23, 26 phenen, hoj ko kerel lubipen, doperela igen namištes. So nalačho na zadživaha, te denašas le lubipnastar?
-
Soske amen šaj el nekfeder dživipen akanastar pro furt, te dživas žužes?
Vareko phenel: „Soske hiňi e Biblija kajsi zoraľi, sar peha dživen duj murša abo duj džuvľa?“ O Jehovas hino lačho. Kamel, kaj savore te dživen nekfeder dživipen pro furt. Aľe, kaj te chudas ajso dživipen, mušinas te dživel kavka, sar ov phenel. Pregen 1. Korinťanom 6:9–11 a paľis vakeren jekhetane:
-
So mek užarel o Del le manušendar, kaj pestar te odčhiven? Hin nalačho andre leskere jakha ča oda, te peha dživen duj murša abo duj džuvľa?
Te kamas, kaj o Jehovas te el pre amende barikano, sakoneske amendar kampel furt pre peste vareso te prekerel. So lačho oda anel, te pes na vzdas? Pregen Žalm 19:8, 11 a paľis vakeren jekhetane:
-
Mišľines tuke, hoj oda, so amendar o Jehovas kamel, hino nekfeder? Soske?
O Jehovas diňa zor imar but manušen, kaj te dživen avka sar ov kamel. Dela zor the tut
VAREKO ŠAJ PHENEL: „Te pes duj džene rado dikhen, ta nane ňič nalačho, hoj peha the soven.“
-
Tu bi so pre kada phenehas?
SO SIKHĽIĽAM
O seks hin daros le Jehovastar predal o rom the romňi, so hine veradune (solacharde).
So bi phenehas
-
So savoro hin o lubipen?
-
Sar šaj denašas le lubipnastar?
-
So lačho hin amen olestar, te dživas avka sar o Jehovas kamel?
DIKH TUKE BUTER
Soske o Del na kamel, kaj vareko peha te dživel bijo solach?
„Čo hovorí Biblia o spolužití bez manželstva?“ (arakheha pro jw.org)
Oda, hoj e Biblija na domukhel, kaj peha te dživen duj murša abo duj džuvľija, amen na sikhľarel te nanavidzinel ole manušen. Pregen tuke pal oda.
Pregen tuke, so lačho tut ela olestar, te achaľoha, so o Del phenel pal o seks.
Pregen tuke jekh člankos „Správali sa ku mne s úctou“, soske jekh murš, so dživelas le muršeha, prekerďa peskero dživipen, kaj te kerel le Devleske radišagos.
a Nadomukhlo nane ča oda, hoj peha soven. Aľe tiš te keren oralno seks (mujeha), abo keren analno seks (palunestar), abo chuden jekh avres tele, kaj peske te keren lačhes.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
