41 УРОКИ
Со пхенел и Библия далкхеске те совес декхаса?
Буте манушенге си неудобно те хоратинен за секс. Ама кана и Библия хоратинел далкхеске, ой пхенел о букя ясно тай с уважение. О букя, колато си пишиме лате, си амаре лачшипнаске, соскето о Йехова кергяс амен тай жанел со си най-лачшо аменге. Ов пхенел аменге со те керас, за те овас амала леса тай те овел амен шукар животос завинаги.
1. Со мислинел о Йехова далкхеске те совес декхаса?
О сексуална отношения си подаръки таро Йехова. Ов мангел он те анен радост е ромеске тай е ромняке, колато си законно прандеме. О Йехова диняс лен кавка подаръки, ма само за те ащи те овен лен чшаве, а също за те ащи те сикавен, кай наистина дехен пес тай манген те овен заедно. Аке соске и Библия пхенел: „Нека те овел тут радост те ромняса, която лилян туке, кана синянас терно.“ (Притчи 5:18, 19) О Йехова мангел о християня те овен верна пе роменге тай пе ромниенге тай те на пхирен йекх упрал авересте. (Четине Евреи 13:4.)
2. Саве сексуална отношения си мелале е Девлеске андо якха?
И Библия пхенел аменге, кай „калка, колато керен блудство, ... нанай те живинен анде Девлескоро Царство“. (1 Коринтяни 6:9, 10) О мануша, колато пишинде и Библия, използвинде и дума „порнѝа“, демек „блудство“, за те сикавен саве сексуална отношения си мелале е Девлеске андо якха. Кайка дума означинел 1) ром тай ромни, колато нанай законно прандеме те совен заедно a, 2) мруш те совел мрушеса или жувли жувляса тай 3) мануш те керел мръсна букя животнонеса. Като на керас блудство, дикхас амаре лачшипнаске тай анас радост е Йеховаске. (1 Солунци 4:3)
РОДЕ ПО-ХОРЕСТЕ
Ахальов сар ащи те нашес таро сексуална отношения, колато си мелале е Девлеске андо якха тай соске си тере лачшипнаске те ачшовес шужо англал лесте.
3. Наш таро сексуална отношения, колато си мелале е Девлеске андо якха
О Йосиф откажингяс йекхе ромняке, която мангелас те совел леса. Четинен Битие 39:1-12 тай хоратинен калке въпросиенге:
-
Соске о Йосиф нашло тари ромни? (Дикх о 9 стихи.)
-
Мислинес ли, кай о Йосиф лиляс о правилно решение? Соске?
Сар ащи йекх терно мануш те нашел таро блудство, сарто кергяс о Йосиф? Дикхен о КЛИПИ.
О Йехова мангел саворе те отчшиен о сексуална отношения, колато си мелале лескере якхенде. Четинен 1 Коринтяни 6:18 тай хоратинен калке въпросиенге:
-
Кана мануш ащи те ресел жи отхе те керел букя, колато си мелале е Девлеске андо якха?
-
Сар ащи те нашес таро букя, колато си мелале е Девлеске андо якха?
4. Ту ащи те нашес таро изкушение
Соске ащи те овел туке пхаро те нашес таро букя, колато си мелале е Девлеске андо якха? Дикхен о КЛИПИ тай хоратинен калке въпросиенге:
-
Со кергяс о пхрал таро клипи, кана ахалило, кай ако мислинел тай керел десаве букя, ащи те ресел жи отхе те жал авере ромняса?
Даже е верноне християниенге подекхана си пхаро те пазинен пи годи таро мръсна мислес. Сар ащи те отчшиес те гогятар о мръсна мислес? Четинен Филипяни 4:8 тай хоратинен калке въпросиенге:
-
Саве букиенге требе те мислинас?
-
Сар давкха те четинас и Библия тай те керас по-бут анди служба ка помагинел аменге те на керас безех?
5. О букя, колато мангел о Йехова амендар, си амаре лачшипнаске
О Йехова жанел со си най-лачшо аменге. Ов пхенел аменге сар те ачшовас шуже англал лесте тай соске кавка си амаре лачшипнаске. Четинен Притчи 7:7-27 или дикхен о КЛИПИ тай хоратинен калке въпросиенге:
-
Сар кавка терно мануш коркоро цидингяс ко дром кариг о безех? (Дикх Притчи 7:8, 9.)
-
Андо Притчи 7:23, 26 пишинел саве кханиле букя ащи те ачшон, кана мануш керел безех. Саве проблемиендар ка нашас, ако ачшовас шуже е Девлеске андо якха?
-
Ако дикхас те ачшовас шуже англал о Дел, саве благословиес ка овен амен ко бъдеще?
Анди Библия пишинел, кай си безех, кана мруш совел мрушеса тай жувли жувляса. Десаве мануша мислинен, кай кавка закони си бут жестоко тай сикавел, кай о Дел на дехел амен. Ама о Йехова, амаро Дел, си любов тай мангел секоне манушес те овел шукар животос завинаги. За те ащи те овел амен савка животос, требе те живинас сарто ов мангел. Четинен 1 Коринтяни 6:9-11 тай хоратинен калке въпросиеске:
-
Дали е Девлеске андо якха си безех само кана мруш совел мрушеса или жувли жувляса или иси авер-да букя, колато ов на приеминел?
За те анас радост е Йеховаске, саворе аме требе те променинас десаве букя амаре животосте. Заслужинел ли песке? Четинен Псалм 19:8, 11 тай хоратинен калке въпросиенге:
-
Мислинес ли, кай о букя, колато о Йехова мангел амендар си бут трудна? Соске?
О Йехова помагингяс буте манушенге те започнинен те живинен, сарто ов мангел, тай ащи те помагинел туке-да
ДЕСАВЕ МАНУША ПХЕНЕН: „Нанай значение кой каса совел, най-важно си те дехен пес.“
-
Со ка пхенес ту?
СО СИКЛИЛЯМ
О сексуална отношения си подаръки таро Йехова е ромеске тай е ромняке, колато си законно прандеме.
О най-важна букя таро уроки
-
Саве сексуална отношения си мелале е Девлеске андо якха?
-
Со ка помагинел аменге те на керас букя, колато си мелале е Девлеске андо якха?
-
Соске си амаре лачшипнаске те живинас, сарто о Йехова мангел?
АХАЛЬОВ ПО-БУТ
Дикх соске о Йехова мангел йекх ром тай йекх ромни, колато манген те живинен заедно, те пранденен законно.
Какво казва Библията за съжителството без брак? (статия на jw.org)
И Библия пхенел, кай си безех мруш те совел мрушеса тай жувли те совел жувляса, ама на пхенел, кай требе те мразинас салке манушен.
Четине сар пазинен амен е Девлескере законя за секса.
Андо разкази „Те проявиха уважение към мене“ дикх со традингяс йекхе манушес, ковато преди жалас мрушенца те променинел по животос, за те керел е Девлескери воля.
Библията променя живота на хората („Стражева кула“ 1 април 2011)
a Мелале сексуална отношения, или блудство, си също те керес орален или анален секс тай те галинес авере манушескере полова органя.
