XIDONDZRO 41
Xana Bibele Dzri Li Yini Hi Timhaka Ta Tinkuku?
Vanyingi a va swi zrandzri ku vulavula hi timhaka ta tinkuku. Nambitanu, loko Bibele dzri khanela hi timhaka ta tinkuku, dzri swi hlaya hi ku kongoma kambe hi ndlela ya xitxhavu. Leswi dzri swi hlayaka swa hi pfuna. Leswo swa twala. U nga dzrivali leswaku Yehovha i Mutumbuluxi wezru. Xileswo, awa swi tiva leswi nga swinene kwezru. A hi byela leswi hi fanelaka ku swi yentxa leswaku hi mu nyonxisa ni leswi taka hi pfuna ku tikholisa hi wutomi hi lani ku nga helikiki.
1. Xana Yehovha a ti vonisa kuyini timhaka ta tinkuku?
A timhaka ta tinkuku i xihiwa lexinene lexi pfaka ka Yehovha. A djula leswaku wanuna ni wansati lava txhatiki xikan’we va tikholisa ha tone. Handle ka ku yentxa leswaku va kuma vana, xihiwa lexi xi tlhela xi yentxa leswaku va kombisana lizrandzru hi ndlela ya ntumbuluku ni leyi nyonxisaka. Xileswo, a Zritu dzra Xikwembu Nkulukumba dzri li: ‘Tsrhavela nsati wa vu-mpshwa byaku.’ (Amaproverbia 5:18, 19) Yeho-vha a langusele leswaku vakriste lava txhatiki va dumbeka ka vakatavu, xileswo a va fanelanga ku mbuyeta nikutsrongo.—Dondzra Ba-Heberu 13:4..
2. I yini swiyentxo swa tingana hi tlhelo dzra tinkuku?
A Bibele dzri hi byela leswaku ‘loko ve vawoswani . . . va nga ka va nga di pfindla dzra Mfumu wa Xikwembu Nkulukumba’. (1 Ba-le-Korinte 6:9, 10) A vatsrali va Bibele lava tsraliki hi Xigriki va tizrise zritu ledzri liki por·neiʹa loko va khanela hi swiyentxo swa tingana hi tlhelo dzra tinkuku. Zritu ledzro dzri patsra 1) kuva vhanu lava nga txhatangakiki xikan’we va hamba timhaka ta tinkuku a, 2) ku hamba timhaka ta tinkuku ni mhunu mun’wana wa limbewu ledzri fanaka, ni 3) ku hamba timhaka ta tinkuku ni xihazri. Loko hi ‘dzrela vumbuye’ kumbe hi nga byi yentxi, hi va na hi nyonxisa Yehovha ku tlhela ku pfuneka hine.—1 Ba-le-Thesalonika 4:3.
KELISISA
Kambisisa leswaku u nga yentxa yini leswaku u fulazrela mahanyela ya ku biha hi tlhelo dzra tinkuku ni leswi u nga pfunekisaka xiswone hi ku tsrhama na u basile a mahanyeleni.
3. Tsrutsruma swiyentxo swa tingana hi tlhelo dzra tinkuku
Wanuna mumbeni wa ku dumbeka, lweyi a vitaniwaka Yosefa, a yalile loko wansati wa kukazri a djule ku yetlela na yene hikusa a a djula ku va ni mahanyela lama basiki. Dondzrani Genesis 39:1-12, mi gama mi bulisana hi swivutiso leswi:
-
I yini xi yentxiki Yosefa a tsrutsruma?—Vonani ndzrimana 9.
-
U vona leswaku Yosefa a teke xiboho lexinene? Ha yini?
Xana vampshwa va masiku lawa va nga mu yetiselisa kuyini Yosefa hi ku tingawula swiyentxo swa tingana hi tlhelo dzra tinkuku? Vonani VHIDIYU.
Yehovha a djula leswaku hinkwezru hi hambula mahanyela lama bihiki hi tlhelo dzra tinkuku. Dondzrani 1 Ba-le-Korinte 6:18, mi gama mi bulisana hi swivutiso leswi:
-
I swiyimu muni leswi nga yentxaka mhunu a tipeta ka swiyentxo swa tingana hi tlhelo dzra tinkuku?
-
U nga swi tingawulisa kuyini swiyentxo swa tingana?
4. U nga swi kota ku hlula ndzringo
I yini swi nga yentxaka swi kazrata ku hlula ndzringo wa ku tikhoma hi ndlela ya ku biha a mhakeni ya tinkuku? Vonani VHIDIYU, mi gama mi bulisana hi xivutiso lexi landzrelaka.
-
Xana makwezru wa le ka vhidiyu a yentxe yini loko a vone leswaku miyanakanyu ni mintizro yake a swi ta mu yentxa a nga dumbeki ka nsati wake?
Nambi vakriste va ku dumbeka minkama yimbeni a swi va nabyaleli ku tsrhama na va basile a miyanakanywini. U nga swi tingawulisa kuyini ku tsrhamela ku pimisela mintxhumu ya ku biha? Dondzrani Ba-le-Filipi 4:8, mi gama mi bulisana hi swivutiso leswi:
-
I mintxhumu muni leyi hi fanelaka ku pimisa ha yone?
-
Xana ku dondzra Bibele ni ku tsrhama na hi khomekile a ntizrweni wa Yehovha, swi nga hi pfunisa kuyini ku hlula loko hi dzringiwa hi xidoho?
5. A milawu ya Yehovha yi pfuna hine
Yehovha awa swi tiva leswi nga swinene kwezru. A hi byela leswi nga hi pfunaka ku tsrhama na hi basile a mahanyeleni ni mabindzru lawa hi taka ma kuma. Dondzrani Amaproverbia 7:7-27 kumbe vonani VHIDIYU, mi gama mi bulisana hi swivutiso leswi landzrelaka.
-
Xana mumpshwa a nghenise kuyini ka xiyimu lexi dzringanaka?—Vonani Amaproverbia 7:8, 9.
-
Hi ku ya hi Amaproverbia 7:23, 26, a swiyentxo swa tingana hi tlhelo dzra tinkuku swi nga va ni mihandzru leyi bavaka swinene. Xana hi nga huluka ka swikazratu muni hi ku tsrhama na hi basile a mahanyeleni?
-
Ku basa a mahanyeleni swi nga hi pfunisa kuyini akuva hi hanya hi ku nyonxa hi la ku nga helikiki?
Vambeni va pimisa leswaku leswi Bibele dzri swi hlayaka mayelanu ni ku va mhunu a hamba timhaka ta tinkuku ni mhunu mun’wana wa limbewu ledzri fanaka, a swi kombisi lizrandzru. Kambe Yehovha, Xikwembu Nkulukumba wa lizrandzru, a djula leswaku hinkwavu va tikholisa hi wutomi hi la ku nga helikiki. Akuva hi faneliwa hi wutomi lebyo, hi fanela ku hanya hi milawu yake. Dondzrani 1 Ba-le-Korinte 6:9-11, mi gama mi bulisana hi xivutiso lexi:
-
Hi ku ya hi vonela dzra Xikwembu Nkulukumba a timhakeni ta tinkuku, ko va wusodoma ntsena byi bihiki?
Akuva hi nyonxisa Xikwembu Nkulukumba, hinkwezru hi fanela ku txintxa swa kukazri. Xana hi ta bindzrula yini? Dondzrani Amapsalma 19:8, 11, mi gama mi bulisana hi swivutiso leswi:
-
U vona leswaku swa koteka ku landzra milawu ya Yehovha ya mahanyela? Ha yini?
Yehovha a pfuna vanyingi ku hanya hi milawu yake. Na wene a nga ku pfuna
VAN’WE VA LI: “A ku na xa ku biha hi ku yetlela ni lweyi u mu djulaka, a xikulu i kuva mi zrandzranana.”
-
Wene ke, u li yini?
NKATSRAKANYU
A timhaka ta tinkuku i xihiwa lexi pfaka ka Yehovha. A djula leswaku nuna ni nsati va tikholisa ha xone.
Mpfuxeto
-
Xana swiyentxo swa tingana hi tlhelo dzra tinkuku swi patsra yini?
-
I yini xi nga hi pfunaka ku tingawula swiyentxo swa tingana a timhakeni ta swa tinkuku?
-
Hi pfunekisa kuyini loko hi landzra milawu ya Yehovha ya mahanyela?
HANDZRISISA
Kambisisa leswaku ha yini Xikwembu Nkulukumba a djula leswaku wanuna ni wansati lava djulaka ku hanya xikan’we va txhata.
“Xana Bibele Dzri Li Yini Hi Ku Hanya Xikan’we Na Mi Nga Txhatanga?” (Leswi kumekaka ka jw.org)
Loko Bibele dzri dondzrisa leswaku swi bihile kuva mhunu a hamba timhaka ta tinkuku ni mhunu mun’wana wa limbewu ledzri fanaka, a swi hlayi swone leswaku hi hambula lava hambaka leswo. Kambisisa leswaku ha yini.
Tiva leswaku milawu ya Xikwembu Nkulukumba mayelanu ni mixaka hinkwayu ya timhaka ta tinkuku yi hi sizrelelisa kuyini.
“Xana Ku Nyan’wa Swizro Swa Limbewu I Ku Yentxa Timhaka Ta Tinkuku?” (Leswi kumekaka ka jw.org)
Ka mfambu lowu liki “Va Ni Khome Hi Ndlela Ya Xitxhavu”, vona leswi susumeteliki wanuna wa kukazri lweyi a a hamba timhaka ta tinkuku ni mhunu mun’wana wa limbewu ledzri fanaka, akuva a txintxa mahanyela yake leswaku a nyonxisa Xikwembu Nkulukumba.
“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Abrili wa 2011)
a Swiyentxo leswi nga yamukelekiki, swi patsra ku hamba timhaka ta tinkuku hi ku kongoma, hi nomu, hi le ntsrhaku kumbe ku swoswela swizro swa limbewu swa mhunu mumbeni hi nkongometo wa ku pfuxa ku navela timhaka ta tinkuku.
