ADESUA 41
Nzu Yeɛ Bible Ne Kã Fa Bienzua Ne Brasua Nnaa Nwo Ɔ?
Mmeni pẽe nguro kyɛ bɛkɔbɔ bienzua ne brasua nnaa nwo ngɔmmɔ. Nakoso sɛ Bible ne kã bienzua ne brasua nnaa nwo dwirɛ a, ɔkã ye pefee wɔ obuo atẽe so. Yenya bɔ Bible ne kã naso mvasoɛ paa. Na enu koso la berɛ. Ofikyɛ Yehowa bɔ ɔte yɛ Bɔfoɛ ne yeɛ ɔhwerɔle Bible ne ɔ. Yeti ɔse bɔ ɔte pa ma yɛ ɔ. Ɔmaa yenwu bɔ yɛyɛ a, yɛkɔsɔ yenye ɔ, ɔne bɔ ɔkɔboka yɛ maa yɛnye kɔgye daa ɔ.
1. Yehowa adwene wɔ bienzua ne brasua nnaa nwo yeɛ ole sɛɛ?
Bienzua ne brasua nnaa te akyɛdeɛ bɔ ofi Yehowa berɛ ɔ. Ɔpena kyɛ bienzua ne brasua bɔ bagya bɛnwo ne nya nnaa nu anigye. Nná mmaa ngome yeɛ ɔpena kyɛ agyaafoɛ fa wo ɔ, na mmom ɔpena kyɛ bɛfa bɛda bɛ ngate ne bɛdɔ ali bekyire bɛnwo. Ɛhene ati yeɛ Nyameɛpiri Dwirɛ kã kyɛ: “Ɛne wɔ mmrandeberɛ nu aye nye gye” ne. (Anyandera 5:18, 19) Yehowa pena kyɛ Kristofoɛ bɔ bagya di bɛnwo nahorɛ, yɛsɔ ti ɔmbena kyɛ bɛsɛkye agyaa.—Kenga Hebrifoɛ 13:4.
2. Nzu yeɛ ole adwamammɔ?
Bible ne kã kyɛ “adwamammɔfoɛ . . . ngɔnya Nyameɛpiri Ahennie ne.” (1 Korintofoɛ 6:9, 10) Atwerɔfoɛ bɔ bɛfale Greek dwudwolɛ bɛhworɔle Bible ne fale por·neiʹa yeɛ bɛfa behyirele adwamammɔ nu ɔ. Bɔ ɔboka por·neiʹa so yeɛ ole (1) bienzua ne brasua a bɔ bɛtte agyaafoɛ bɔ bɛda, (2) bienzua ne bienzua bɔ bɛda anaa brasua ne brasua bɔ bɛda, ɔne (3) sona bɔ ɔne kaka da ɔ. Sɛ “yɛtwe yɛnwo yefi adwamammɔ” nwo a, ɔmaa yɛsɔ Yehowa nye, na yenya so mvasoɛ koso.—1 Tɛsalonikafoɛ 4:3.
SUA PẼE BOKASO
Nea atẽe bɔ ɛkɔhora kɔfa so kɔhwẽ wɔnwo kofi adwamammɔ nwo, ɔne mvasoɛ bɔ ɛkɔhora konya kofi w’abrabɔ bɔ ɛkɔmaa yenwo kɔte naso ɔ.
3.Twẽ wɔnwo fi adwamammɔ nwo
Yosef, bienzua bɔ né odi nahorɛ ne bɔle mmɔden kyɛ ɔkɔmaa yenwo kɔte. Kenga Gyenɛsis 39:1-12, na susu nzɛmmisa hemɔ anwo:
-
Nzu yeɛ ɔbokale Yosef maa ɔhwẽne yenwo fili adwamammɔ nwo ɔ? —Nea ngyekyɛmuɛ 9.
-
Ɛnea a, Yosef sili gyinaeɛ pá anaa? Nzuati ɔ?
Sɛɛ yeɛ mmabunu bɔ bɛwɔ berɛ ɛnnɛ ne kɔhora kosuasua Yosef, na bahwẽ bɛnwo bafi adwamammɔ nwo ɔ? Bɔ VIDIO ne.
Yehowa pena kyɛ yɛtwẽ yɛnwo yefi brabɔne biala nwo. Kenga 1 Korintofoɛ 6:18, na susu nzɛmmisa hemɔ anwo:
-
Tebea beni yeɛ ɔkɔhora kɔmaa ebie kɔbɔ adwaman ɔ?
-
Ɛkɔyɛ sɛɛ na ahwẽ wɔnwo afi adwamammɔ nwo?
4. Ɛkɔhora kɔpo nzɔhwɛ
Nzu yeɛ ɔkɔmaa ɔkɔyɛ se kɔma ebie kyɛ ɔkɔpo adwamammɔ nwo nzɔhwɛ ɔ? Bɔ VIDIO ne, na susu nzɛmmisa bɔ olili so he anwo.
-
Mmerɛ bɔ aliemaa bɔ ɔwɔ vidio nanu ne nwuni kyɛ, nningyein bɔ ɔdwene yenwo, ɔne ye nneyɛe kɔhɔ kooyia kyɛ ongoli nahorɛ ngɔma ɔye ne, nzu yeɛ ɔyɛle ɔ?
Ɔtɔ mmerɛ bie a, nahorɛ Kristofoɛ pó yere bɛnwo kora na bahora bamaa bɛ nzusueɛ nwo ate. Ɛkɔyɛ sɛɛ na ahora ayakyi brasɛkyelɛ nwo adwenedwene? Kenga Filipifoɛ 4:8, na susu nzɛmmisa hemɔ anwo:
-
Nzu yeɛ odikyɛ yɛdwenedwene yenwo ɔ?
-
Sɛɛ yeɛ Bible ne bɔ yɛkɔkenga, ɔne Yehowa sõen bɔ yɛkɔmaa yenwo kohia yɛ ne kɔboka yɛ maa, yɛkɔpo nzɔhwɛ bɔ ɔkɔmaa yɛkɔyɛ bɔne ɔ?
5. Yenya Yehowa mmraa ahoroɛ so mvasoɛ
Yehowa se bɔ ɔte pá ma yɛ ɔ. Ɔmaa yenwu kyɛbɔ yɛkɔmaa yɛnwo kɔte wɔ abrabɔ nu, ɔne mvasoɛ bɔ sɛ yɛyɛ sɔ a, yekonya yekofi so ɔ. Kenga Anyandera 7:7-27 anaa bɔ VIDIO ne, na susu nzɛmmisa bɔ olili so he anwo.
-
Atẽe beni aso yɛe abrandeɛ ne fale yenwo oowurale nzɔhwɛ nu ɔ? —Nea Anyandera 7:8, 9.
-
Kyɛbɔ Anyandera 7:23, 26 kã ne, adwamammɔ le nzunzuasoɛ tɛɛ. Sɛ yɛmaa yɛnwo te wɔ abrabɔ nu a, asane beni yeɛ yɛkɔhora yɛkɔpo ɔ?
-
Sɛ yɛmaa yɛnwo te wɔ abrabɔ nu a, sɛɛ yeɛ ɔkɔhora kɔboka yɛ maa yekonya asetena nu anigye daa ɔ?
Ebiemɔ te ngã kyɛ bɔ Bible ne kãfa bienzua ne bienzua ɔne brasua ne brasua bɛ bɛda nwo ne ngyire ɔdɔ. Nakoso Yehowa Nyameɛpiri bɔ ɔte ɔdɔ ne pena kyɛ ebiala nya asetena nu anigye daa. Sɛ yɛnye kɔhora kɔgye a, sana yedi ye mmraa so. Kenga 1 Korintofoɛ 6:9-11, na susu nzɛmmisa he anwo:
-
Ɛnea a, bienzua ne bienzua anaa brasua ne brasua bɔ bɛda ngome yeɛ ɔte bɔne wɔ Nyameɛpiri nye so anaa?
Sɛ yɛkɔhora yɛkɔsɔ Nyameɛpiri nye a, odikyɛ yɛmukoraati yɛyɛ nzakraeɛ. Mvasoɛ beni yeɛ ɔwɔ so kyɛ yɛkɔyɛ sɔ ɔ? Kenga Edwein 19:8, 11, na susu nzɛmmisa hemɔ anwo:
-
Ɛnea a, ndeaseɛ wɔ Yehowa mmraa bɔ ɔfa abrabɔ nwo nanu anaa? Nzuati ɔ, anaa nzuati yeɛ enné nni ɔ?
Yehowa aboka mmeni pẽe maa bahora bali ye mmraa bɔ ɔfa abrabɔ nwo naso. Ɔkɔhora kɔboka wɔ koso
EBIEMƆ KÃ KYƐ: “Sɛ mmenia nyɔ dɔ bɛnwo na bɛne bɛnwo da a, mvomsoɛ biala nne nu.”
-
Nzu yeɛ ɛkɔhã ɔ?
YEMUABƆLƐ
Bienzua ne brasua nnaa te akyɛdeɛ bɔ ofi Yehowa berɛ, na wafa wama agyaafoɛ kyɛbɔ ɔkɔyɛ a bɛnye kɔgye ɔ.
Ndimu
-
Nzu yeɛ ɔboka adwamammɔ so ɔ?
-
Nzu yeɛ ɔkɔboka yɛ maa yɛkɔhwẽ yɛnwo yekofi adwamammɔ nwo ɔ?
-
Sɛ yɛfa Yehowa mmraa bɔ ɔfa abrabɔ nwo ne yɛyɛ adwuma a, mvasoɛ beni yeɛ yekonya yekofi so ɔ?
NEA ƐHE KOSO
Nea nikyehorɛ tibɔ Nyameɛpiri pena kyɛ bienzua ne brasua gya kora, na babɔ nu batena ɔ.
Nea nikyehorɛ tibɔ Bible mmraa bɔ ɔfa bienzua ne bienzua bɔ bɛda, ɔne brasua ne brasua bɔ bɛda nwo ne ngyire kyɛ odikyɛ yɛpɔ bɛbɔ bɛyɛ sɔ ne ɔ.
Nea kyɛbɔ Nyameɛpiri mmraa bɔ ɔfa nnaa nwo ne bɔ yɛnwo waen ɔ.
Wɔ suanwu bɔ yeɛ ole “Bɛlale Obuo Ali Behyirele Me” nu ne, nzu yeɛ ɔhyɛle ebie bɔ ne ɔfa yenwo wura bienzua ne bienzua bɔ bɛda ɔne brasua ne brasua bɛda ngunaen maa bɛyɛle nzakraeɛ, na ɔhora sɔre Nyameɛpiri nye ɔ?
a Abrabɔ tɛɛ bɔ Yehowa nye gye yenwo biekũ yeɛ ole, bienzua ne brasua bɔ bɛtte agyaafoɛ bɔ bɛda, ebie tenvelema bɔ ɔfa tafe ebie brenzua nwo anaa ebie brasua nu, ebie bunu bɔ bɛfa, ebie sa bɔ ɔfa sosɔ ebie brenzua nu anaa ɔfa wurowura ebie brasua nu ɔ.
