YE TI MANDA 41
Bible atene nyen na ndö ti bungbingo koli na wali?
A sara azo mingi kamene ti sara tënë na ndö ti bungbingo koli na wali. Ye oko, tongana Bible asara tënë na ndö ni, a sara ni na mbeni lege so ayeke polele nga so ane zo. Ye so Bible atene na ndö ni a-aidé e. A yeke na lege ni ndali ti so Bible alondo na Jéhovah, Lo so acréé e. Tongaso, lo hinga ye so ayeke nzoni mingi ndali ti e. Lo fa na e aye so ayeke nzoni e sara ti nzere na lo nga aye so ayeke aidé e ti ngbâ na fini lakue lakue.
1. Jéhovah abâ bungbingo koli na wali tongana nyen?
Bungbingo koli na wali ayeke mbeni cadeau so alondo na Jéhovah. Lo ye si a mû ngia na mbeni koli na wali so asara mariage. Cadeau so amû lege na acouple ti dü amolenge nga ti fa na mba so ala ye terê na mbeni lege so ayeke na lege ni nga so anzere na ala. Ndani la Bible atene: “Zia mo duti na ngia na wali ti lâ ti maseka ti mo.” (aProverbe 5:18, 19). Jéhovah ahunda na aChrétien so asara mariage awe ti ngbâ be-ta-zo na mba, tongaso ala yeke gi wali wala koli nde lâ oko ape.—Diko aHébreu 13:4.
2. Lango-sioni ayeke nyen?
Bible atene so “azo ti sarango lango-sioni, . . . Royaume ti Nzapa ayeke ga ti ala pëpe.” (1 aCorinthien 6:9, 10). Azo so asû Bible na Grec asara kua na tënë pornéïa ti sara tënë ti lango-sioni. Tënë ni asara tënë ti (1) bungbingo koli na wali sân mariage, (2) bungbingo koli na koli wala wali na wali nga (3) bungbingo na anyama. a Tongana e “gbanzi terê ti [e] na lango-sioni”, e yeke zia ngia na bê ti Jéhovah nga a yeke ga na e aye ti nzoni.—1 aThessalonicien 4:3.
GI TI HINGA AYE MINGI
Bâ aye so mo peut ti sara ti kpe lango-sioni nga aye ti nzoni so mo yeke wara tongana mo sara lango-sioni ape.
3. Kpe yongoro na lango-sioni
Joseph, so ayeke be-ta-zo, asara lani kue ti sara lango-sioni ape. Diko Genèse 39:1-12, na pekoni kiri tënë na ahunda so:
-
Nyen la apusu Joseph ti kpe?—Bâ versê 9.
-
Mo pensé so Joseph amû lani nzoni desizion? Ngbanga ti nyen?
Tongana nyen la amaseka apeut ti sara ye tongana Joseph nga ti kpe yongoro na lango-sioni laso? Zia VIDÉO ni.
Jéhovah aye ti tene e kue e ke lango-sioni. Diko 1 aCorinthien 6:18, na pekoni kiri tënë na ahunda so:
-
Aye wa la apeut ti gue na mbeni zo ti sara lango-sioni?
-
Tongana nyen la mo peut ti kpe yongoro na lango-sioni?
4. Mo peut ti ke ti tï na yâ ti tara
Nyen la apeut ti sara si a yeke ngangu na mo ti ke ti sara lango-sioni tongana bê ti mo apusu mo ti sara ni? Zia VIDÉO ni, na pekoni kiri tënë na hunda so.
-
Na ngoi so ita-koli ti yâ ti vidéo ni abâ so apensé ti lo nga na asarango ye ti lo apeut ti gue na lo ti ngbâ be-ta-zo na wali ti lo ape, nyen la lo sara?
Na ambeni ngoi, même aChrétien so ayeke be-ta-zo ayeke tiri ti pensé na asioni ye ape. Tongana nyen la mo peut ti kpe ti pensé na asioni ye? Diko aPhilippien 4:8, na pekoni kiri tënë na ahunda so:
-
Aye wa la a yeke nzoni e pensé na ni?
-
Tongana nyen la dikongo Bible nga dutingo na aye mingi na yâ ti kua ti Jéhovah apeut ti aidé e ti dö sese na aye so apusu e ti sara siokpari?
5. Andia ti Jéhovah ayeke ndali ti nzoni ti e
Jéhovah ahinga ye so ayeke nzoni mingi ndali ti e. Lo fa na e tongana nyen ti bata terê ti e si e ga sioni ape nga na anzoni ye ti peko ni. Diko aProverbe 7:7-27 wala zia VIDEO ni, na pekoni kiri tënë na ahunda so:
-
Tongana nyen la maseka-koli so ague atï na yâ ti tara?—Bâ aProverbe 7:8, 9.
-
Ti gue oko na aProverbe 7:23, 26, lango-sioni apeut ti ga na angangu kpale. Tongana e bata terê ti e si e ga sioni ape, akpale wa la e yeke wara ape?
-
Tongana nyen la ti duti na sioni oko ape apeut ti aidé e ti ngbâ na fini lakue lakue?
Ambeni zo apensé so tënë so Bible atene na ndö ti bungbingo koli na koli wala wali na wali ayeke sioni mingi. Me Jéhovah, Nzapa ti ndoye, aye si azo kue angbâ na fini lakue lakue. Ti ngbâ na fini lakue lakue, a lingbi e sara aye so lo hunda na e ti sara. Diko 1 aCorinthien 6:9-11, na pekoni kiri tënë na hunda so:
-
Na lê ti Nzapa, eskê a yeke gï nzara ti bungbingo koli na koli wala wali na wali la ayeke sioni?
Ti nzere na lê ti Nzapa, e kue e bezoin ti sara achangement. A yeke nzoni ti sara ni? Diko Psaume 19:8, 11, na pekoni kiri tënë na ahunda so:
-
Mo pensé so andia ti Jéhovah na ndö ti nzoni sarango ye ayeke na lege ni? Ngbanga ti nyen?
Jéhovah a-aidé azo mingi ti sara ye alingbi na andia ti lo na ndö ti nzoni sarango ye. Lo peut ti aidé mo nga kue
AMBENI ZO ATENE: “Tongana azo aye terê, a yeke sioni ape ti tene ala bungbi.”
-
Mo tene ti mo nyen?
NA NDURU TËNË
Bungbingo koli na wali ayeke mbeni cadeau so Jéhovah amû na mbeni koli na wali ti lo.
Dango bê
-
Lango-sioni andu aye wa?
-
Nyen la ayeke aidé e ti sara lango-sioni ape?
-
Tongana e sara ye alingbi na andia ti Jéhovah na ndö ti nzoni sarango ye, e yeke bâ nzoni dä tongana nyen?
GI NDA TI YE
Bâ ndani so Nzapa aye ti tene mbeni koli na wali so aye ti vivre ndo oko asara mariage si.
Bâ ndani so ndia ti Bible na ndö ti bungbingo koli na koli wala wali na wali apusu zo ti ke amba ti lo ape.
“Eskê a yeke sioni ti bungbi koli na koli wala wali na wali?” (Article na ndö ti site)
Bâ tongana nyen la andia ti Nzapa na ndö ti afason kue ti bungbingo koli na wali abata e.
“Eskê bungbingo na zo na yanga ayeke biani bungbingo koli na wali?” (Article na ndö ti site)
Na yâ ti article “Ala sara ye na mbi lani na nengo zo,” bâ ye so apusu mbeni koli so abungbi na amba ti lo koli ti changé sarango ye ti lo ti nzere na Nzapa.
“Bible achangé fini ti azo” (Tour ti Ba Ndo ti lango 1 ti avril 2011)
a Bungbingo koli na wali so ayeke na lege ni ape andu nga aye nde nde tongana bungbingo koli na wali na yanga nga na ngbonda nga gbungo mbeni zo so ayeke wali wala koli ti mo pëpe na terê ti lo ti wali wala ti koli ti sara na ngia.
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
