LESONA 41
O le ā le Manatu o le Tusi Paia i Feusuaʻiga?
O le toʻatele o tagata e faigatā ona talanoa e faatatau i feusuaʻiga. Peitaʻi, o loo faamatalaina i le Tusi Paia i se auala manino ma faaaloalo. O mea o loo tusia ai e tatou te maua ai aogā. E talafeagai lenā manatu, auā o Ieova na foafoaina i tatou, ma e na te silafia le mea e sili ona lelei mo i tatou. Ua ia faailoa mai le auala e faafiafiaina ai o ia i a tatou gaoioiga, ma le auala e tatou te maua ai se olaga fiafia e faavavau.
1. O le ā le silafaga a Ieova i feusuaʻiga?
O feusuaʻiga o se meaalofa mai iā Ieova. E finagalo o ia ina ia maua ai e se ulugalii faaipoipo le fiafia. O lenei meaalofa e lē gata e maua ai e se ulugalii ni fanau, ae e faaalia ai foʻi le alofa faapelepele o le tasi i le isi, i se auala e faafiafiaina ai i laʻua. O le māfuaaga lenā ua faapea mai ai le Afioga a le Atua: “Ia e fiafia i lau avā na fai a o e tauleʻaleʻa.” (Faataoto 5:18, 19) E faatalitalia e Ieova Kerisiano faaipoipo ia faamaoni i a latou paaga, ma aua nei faia le mulilua.—Faitau le Eperu 13:4.
2. O le ā e uiga i ai amioga lē mamā taufeusuaʻiga?
Ua faapea mai le Tusi Paia “o ē e faia amioga lē mamā taufeusuaʻiga . . . e lē fai mo latou tofi le Malo o le Atua.” (1 Korinito 6:9, 10) Na faaaogā e tusitala o le Tusi Paia i le gagana Eleni le upu por·neiʹa, e faamatala ai le faitaaga po o amioga lē mamā taufeusuaʻiga. O lenā upu e aofia ai (1) feusuaʻiga i le vā o tagata e leʻi faaipoipo, a (2) faiga faatauatane ma tauafafine, ma (3) feusuaʻiga ma manu. E tatou te faafiafiaina Ieova ma maua aogā, pe a tatou “faamamao mai i amioga lē mamā taufeusuaʻiga.”—1 Tesalonia 4:3.
SAʻILIʻILI ATILI
Iloilo pe faapefea ona e ʻalofia le faia o amioga lē mamā taufeusuaʻiga, ma le auala e maua aogā pe a tausia le mamā tauamio.
3. Ia sola ese mai amioga lē mamā taufeusuaʻiga
Na tauivi malosi Iosefa ina ia tausia le mamā tauamio. Faitau le Kenese 39:1-12, ona talanoa lea i fesili nei:
-
O le ā na uunaʻia ai Iosefa e sola ese?—Tagaʻi i le fuaiupu 9.
-
Pe e te manatu na faia e Iosefa le filifiliga saʻo? Aiseā?
E faapefea ona faaaʻoaʻo talavou i aso nei iā Iosefa, ma sola ese mai i amioga lē mamā taufeusuaʻiga? Faaali le VITIŌ.
E finagalo Ieova ia tatou teena amioga lē mamā. Faitau le 1 Korinito 6:18, ona talanoa lea i fesili nei:
-
O ā tulaga e ono taʻitaʻia atu ai se tasi i le faia o amioga lē mamā taufeusuaʻiga?
-
E faapefea ona e sola ese mai i amioga lē mamā?
4. E mafai ona e teena faaosoosoga
Aiseā e ono faigatā ai ona teena faaosoosoga e faia amioga lē mamā? Faaali le VITIŌ, ona talanoa lea i le fesili lenei:
-
Ina ua iloa e le uso i le vitiō, e iʻu ina lē faamaoni i lana avā ona o ona mafaufauga ma gaoioiga, o le ā na ia faia?
E oo lava i Kerisiano faamaoni e ono faigatā i nisi taimi ona latou tausisi i mafaufauga mamā. E faapefea ona e ʻalofia le mafaufau i mea lē mamā? Faitau le Filipi 4:8, ona talanoa lea i fesili nei:
-
O ā mea e tatau ona tatou mafaufau i ai?
-
E faapefea i le faitauina o le Tusi Paia ma le pisi pea i le auaunaga iā Ieova, ona fesoasoani iā i tatou e teena ai faaosoosoga e faia le agasala?
5. E tatou te maua aogā i tapulaa a Ieova
E silafia e Ieova le mea e sili ona lelei mo i tatou. Ua ia faailoa mai le auala e tausia ai le mamā tauamio, ma aogā e maua pe a faia faapea. Faitau le Faataoto 7:7-27 pe faaali le VITIŌ, ona talanoa lea i fesili nei:
-
Na faapefea ona oo atu se tama talavou i faaosoosoga?—Tagaʻi i le Faataoto 7:8, 9.
-
E tusa ai ma le Faataoto 7:23, 26, o amioga lē mamā taufeusuaʻiga e iʻu atu ai i āuga leaga. O ā faafitauli o le a tatou ʻalofia, pe a tausia le mamā tauamio?
-
E faapefea ona fesoasoani le mamā tauamio e maua ai se olaga fiafia e faavavau?
E lē fiafia nisi i le manatu o le Tusi Paia i faiga faatauatane ma tauafafine. Ae e finagalo Ieova le Atua alofa, ia maua e tagata uma se olaga fiafia e faavavau. Ina ia maua le ola e faavavau, e tatau ona tatou ola e ōgatusa ma ana tapulaa. Faitau le 1 Korinito 6:9-11, ona talanoa lea i le fesili lenei:
-
Pe na o le tauatane ma le tauafafine e inosia e le Atua?
Ina ia faafiafiaina le Atua, e manaʻomia ona tatou faia ni suiga. Po o le a aogā na taumafaiga? Faitau le Salamo 19:8, 11, ona talanoa lea i fesili nei:
-
Pe e te manatu e talafeagai tapulaa tauamio a Ieova? Aiseā?
Ua fesoasoani Ieova i le toʻatele o tagata e usitaʻia ana tapulaa tauamio. E mafai foʻi ona ia fesoasoani iā te oe
UA FAAPEA MAI NISI: “E lē afāina le faia o feusuaʻiga tusa lava pe e leʻi faaipoipo, ae o le mea tāua ia alofa le tasi i le isi.”
-
O le ā sou manatu?
AOTELEGA
O feusuaʻiga o se meaalofa mai iā Ieova, ina ia maua ai e tane ma avā le fiafia.
Fesili Autalu
-
O ā mea e aofia ai i amioga lē mamā taufeusuaʻiga?
-
O le ā e fesoasoani iā i tatou e ʻalofia ai amioga lē mamā taufeusuaʻiga?
-
O ā aogā e tatou te maua pe a usitaʻia tapulaa tauamio a Ieova?
MANATU FAAOPOOPO
Iloilo pe aiseā e tāua ai i le Atua le faaipoipo o se ulugalii.
“O le ā le Manatu o le Tusi Paia i le Nonofo Faatasi a o Leʻi Faaipoipo?” (Mataupu i le jw.org)
Po o faapea mai le Tusi Paia e tatau ona tatou ʻinoʻino iā i latou o loo faia le tauatane ma le tauafafine?
“Pe e Sesē le Tauatane ma le Tauafafine?” (Mataupu i le jw.org)
Mātau pe faapefea i tulafono a le Atua e faatatau i feusuaʻiga ona puipuia ai i tatou.
“Po o se Feusuaʻi le Faia o Feusuaʻiga e Faaaogā ai le Gutu?” (Mataupu i le jw.org)
I le tala, “Sa Faatalofa Lelei Mai Molimau ma Agalelei Mai,” mātau pe na faapefea ona suia le olaga o se tasi na faia le tauatane ina ia faafiafia ai le Atua.
“E Mafai e le Tusi Paia Ona Suia Olaga” (Le Olomatamata, Aperila 1, 2011)
a E aofia ai le faia o feusuaʻiga, o feusuaʻiga e faaaogā ai le gutu ma le alāfeʻau, ma le loteloteina o totogasā o le isi tagata ina ia faagaee ai faalogona taufeusuaʻiga.