CHIDZIDZO 41
Bhaibheri Rinotii Nezvebonde?
Vanhu vakawanda havanzwi vakasununguka kutaura nezvebonde. Asi Bhaibheri rinotaura nyaya iyi zviri pachena, asi zviine ruremekedzo. Zvarinotaura zvinotibatsira. Hazvingambotadzi kutibatsira nekuti Jehovha ndiye Musiki wedu. Anoziva zvakanyatsotinakira. Anotiratidza kuti tinofanira kuzvibata sei kuti timufadze uye kuti chii chingatibatsira kuti tizorarama nekusingaperi tichifara.
1. Jehovha anoona sei nyaya dzebonde?
Kurara kwemurume nemukadzi chipo chinobva kuna Jehovha. Asi anoda kuti izvi zviitwe nemurume nemukadzi vakaroorana vachifara. Chipo ichi chinoita kuti murume nemudzimai vave nevana uye kuti varatidzane kuti vanodanana. Ndokusaka Shoko raMwari richiti: “Fara nemudzimai weudiki hwako.” (Zvirevo 5:18, 19) Jehovha anotarisira kuti vaKristu vakaroorana vave vakavimbika, saka havafaniri kuita upombwe.—Verengai VaHebheru 13:4.
2. Chii chinonzi upombwe?
Bhaibheri rinotiudza kuti “mhombwe . . . ha[dzi]zogari nhaka yeUmambo hwaMwari.” (1 VaKorinde 6:9, 10) Vanyori veBhaibheri vakanyora nechiGiriki vakashandisa shoko rekuti por·neiʹa vachitsanangura kuita bonde kwese kusiri pamutemo. Shoko racho rinobatanidza (1) vanhu vasina kuroorana vanorara vese, a (2) ungochani, (3) kurara nemhuka, nezvimwewo. Kana ‘tikarega upombwe’ tinofadza Jehovha uye isu vacho zvinotibatsira.—1 VaTesaronika 4:3.
WEDZERA KUONGORORA
Dzidza zvaunogona kuita kuti usaita upombwe uye ona kuti zvakanakirei kuti urambe uine tsika dzakachena.
3. Tiza upombwe
Murume akanga akatendeka, Josefa, akaita zvese zvaaigona kuti arambe aine tsika dzakachena. Verengai Genesisi 39:1-12, mobva makurukura muchishandisa mibvunzo iyi:
-
Chii chakaita kuti Josefa atize?—Ona vhesi 9.
-
Unofunga kuti zvakaitwa naJosefa kuchenjera here? Nei uchidaro?
Vechidiki vangatevedzera sei Josefa votiza upombwe mazuva ano? Ngationei VHIDHIYO.
Jehovha anoda kuti tese tisaita upombwe. Verengai 1 VaKorinde 6:18, mobva makurukura muchishandisa mibvunzo iyi:
-
Mamiriro api ezvinhu anogona kuita kuti munhu azopedzisira aita upombwe?
-
Ungatiza sei upombwe?
4. Unogona kukunda muedzo
Chii chinogona kuita kuti zviome kukunda muedzo wekuita upombwe? Ngationei VHIDHIYO, tobva takurukura mubvunzo unotevera.
-
Hama iri muvhidhiyo iyi yaita sei payaona kuti pfungwa dzayo nezviito zvinogona kuita kuti ipedzisire yatadzira mudzimai wayo nekuita upombwe?
Kunyange vaKristu vakatendeka pane dzimwe nguva dzavanomboomerwa nekuramba vachifunga zvinhu zvakachena. Ungaite sei kuti pfungwa dzako dzisaramba dziri pazvinhu zvisina kuchena? Verengai VaFiripi 4:8, mobva makurukura muchishandisa mibvunzo iyi:
-
Tinofanira kugara tichifunga zvinhu zvakaita sei?
-
Kuverenga Bhaibheri uye kugara takabatikana nebasa raJehovha zvingatibatsira sei kukunda muedzo wekuita chivi?
5. Mitemo yaJehovha inotibatsira
Jehovha anoziva zvakanyatsotinakira. Anotiudza kuti tirambe tiine tsika dzakachena uye kuti kuzviita kunotibatsira sei. Verengai Zvirevo 7:7-27 kana kuti onai VHIDHIYO, mobva makurukura mibvunzo inotevera.
-
Jaya iri rakapinda sei mumamiriro ezvinhu akaripinza mumuedzo?—Ona Zvirevo 7:8, 9.
-
Maererano naZvirevo 7:23, 26, upombwe hunogona kuunza matambudziko akakura. Kana tikaramba tiine tsika dzakachena tinonzvengana nematambudziko api?
-
Kuva netsika dzakachena kunotibatsira sei kuti tirarame nekusingaperi tichifara?
Vamwe vanhu vanofunga kuti Bhaibheri riri kukurudzira kuvenga vamwe vanhu parinoshora ungochani. Asi Jehovha, Mwari werudo, anoda kuti munhu wese ararame nekusingaperi achifara. Kuti tikodzere kurarama nekusingaperi, tinofanira kurarama tichitevedzera mitemo yake. Verengai 1 VaKorinde 6:9-11, mobva makurukura muchishandisa mubvunzo uyu:
-
Kubva pane zvataurwa, ungochani ndihwo hwega hwanzi hwakaipa here?
Tese tinotofanira kushanda nesimba kuti tichinje mararamiro edu, tifadze Mwari. Asi kushandira zviripo here? Verengai Pisarema 19:8, 11, mobva makurukura muchishandisa mibvunzo iyi:
-
Unofunga kuti mitemo yaJehovha pamusoro pekuzvibata inotiomesera here? Nei uchidaro?
Jehovha akabatsira vakawanda kuti vararame zvinoenderana nemitemo yake yekuzvibata. Anogona kukubatsirawo
VAMWE VANOTI: “Kana vanhu vakarara vese hazvina basa chero vachidanana.”
-
Iwe unotiwo chii?
PFUPISO
Kurara kwemurume nemukadzi chipo chakabva kuna Jehovha chaanoda kuti chifadze vanhu vakaroorana.
Kudzokorora
-
Upombwe hunosanganisira maitiro akaita seapi?
-
Chii chingatibatsira kuti tisaita upombwe?
-
Tinobatsirwa sei nekutevera mitemo yaJehovha pamusoro pekuzvibata?
WEDZERA PANE ZVAWADZIDZA
Ongorora kuti nei Mwari asingafadzwi nekuti vanhu vangogara vese vasina kuchata.
“Bhaibheri Rinotii Nezvekugara Pamwe Chete Musina Kuchata?” (Nyaya iri paIndaneti)
Ongorora uone kuti zvinotaurwa neBhaibheri nezveungochani hazvirevi kuti riri kukurudzira kuvenga vamwe vanhu.
Dzidza kuti mitemo yaMwari pamusoro penyaya dzese dzebonde inotichengetedza sei.
“Kuita Bonde Nemumuromo Kunganzi Kuita Bonde Here?” (Nyaya iri paIndaneti)
Munyaya yakanzi, “Vakandiremekedza,” ona kuti chii chakaita kuti mumwe aiita zveungochani achinje mararamiro ake kuti afadze Mwari.
“Bhaibheri Rinochinja Upenyu” (Nharireyomurindi, April 1, 2011)
a Izvi zvinosanganisira kurara chaiko pabonde, kushandisa muromo pakuita bonde, kuita bonde nekunobuda netsvina, kubatana-batana nhengo dzekubereka nadzo.
Zvimwe Zvaunogona Kufarira
MIBVUNZO INONYANYA KUBVUNZWA
Kosi yeBhaibheri Inoitiswa neZvapupu zvaJehovha Yakaita Sei?
Paunoita kosi yeBhaibheri inoitiswa neZvapupu zvaJehovha, unogona kushandisa chero Bhaibheri raunaro. Mhuri yako neshamwari vanogona kuvapowo paunenge uchidzidza.
