PĚNGANGĚNDUNGANG 41
Apa Niul᷊ịu Alkitapẹ̌ soal u Seks?
Lawọ taumata tawe wiasa mẹ̌bisara soal u seks. Katewe, mạeng Alkitapẹ̌ mẹ̌bisara soal u seks, ene terus terang dingangu sopan. Apa niul᷊ịu Alkitapẹ̌ soal u seks ene piạ gunane si kitẹ. Ene masuẹ̌ su akal᷊ẹ̌ ual᷊ingu Yehuwa kai Měndariading i kitẹ. Hakị u ene, i Sie masingkạ apa kapaelange gunang i kitẹ. I Sie naul᷊ị apa harusẹ̌ koateng i kitẹ tadeạu makal᷊uasẹ̌ si Sie. I Sie lai naul᷊ị apa sarung makatul᷊ung si kitẹ měbiahẹ̌ mal᷊uasẹ̌ sarang karěngụe.
1. Kerea pěndang i Yehuwa soal u seks?
Seks ene kai hadiah bọu i Yehuwa. I Sie mapulu seks makarěntang karal᷊uasẹ̌ su sěngkawingang. Hadiah ini tawe kětạeng makakoạ sěngkawingang makaěbạ anạ, katewe lai botonge měnodẹ kakěndagi sire su sěmbaụ su wal᷊inẹ dingangu cara alami lai makal᷊uasẹ̌. Hakị u ene, Hengetangu Mawu naul᷊ị, ”Karimạko i kau mal᷊uasẹ̌ dingangu kawing seng nipẹ̌kawingangu su tempong mangudạ.” (Amsal 5:18, 19) Yehuwa mělẹ̌harapẹ̌ tau Kristen apang seng bọu nẹ̌kawing masatia su kawing i sire, tadeạu i sire tawe berzina.—Basa Ibrani 13:4.
2. Kai apa kakanoạ amoral ene?
Alkitapẹ̌ naul᷊ị, ”Taumata apang měkẹ̌koạ barang amoral . . . tawe kapusakatengu Kararatuangu Mawu.” (1 Korintus 6:9, 10) Měmamohẹ Alkitapẹ̌ něpakẹ werang Yunani por·neiʹa gunang mělahẹ kakanoạ amoral. Bawera ene mangal᷊ene (1) hubungan seksual * dingangu taumata bal᷊inẹ kawinge, (2) homoseksual, lai (3) hubungan seksual dingangu binatang. Mạeng ”mẹ̌těngkarau bọu kakanoạ amoral”, i kitẹ makal᷊uasẹ̌ si Yehuwa dingangu makariagạ watangeng i kitẹ.—1 Tesalonika 4:3.
BANGKA PAKARAL᷊UNG
Mahịe měngěndung kerea i kau botonge mẹ̌těngkarau bọu kakanoạ amoral dingangu kerea i kau sarung makaěbạ gunane mạeng měndiagạ moral tatapẹ̌ burěsi.
3. Tal᷊angke bọu kakanoạ amoral
Sěngkatau esẹ masatia arenge Yusuf, nẹ̌tawakal᷊i tatapẹ̌ burěsi secara moral. Basa Kejadian 39:1-12, bọu ene bisarai manga kakiwal᷊o ini:
-
Kawe nụe i Yusuf timal᷊ang?—Pěmanda ayatẹ̌ 9.
-
Tumuhụ si kau, apa i Yusuf někoạ putusang nihino? Kawe nụe?
Kerea mangangudạ botonge mẹ̌těno si Yusuf kụ tumal᷊ang bọu kakanoạ amoral orasẹ̌ ini? Putarẹ̌ VIDEONE.
Yehuwa mapulu i kitẹ kěbị mẹ̌těngkarau bọu kakanoạ amoral. Basa 1 Korintus 6:18, bọu ene bisarai manga kakiwal᷊o ini:
-
Situasi kerea makakoạ sěngkatau měkoạ kakanoạ amoral?
-
Kerea i kau botonge tumal᷊ang bọu kakanoạ amoral?
4. I kau botonge lumawang sasal᷊ukạ
Kawe nụe lumawang sasal᷊ukạ měkoạ barang amoral ene tawe gampang? Putarẹ̌ VIDEONE, bọu ene bisarai kakiwal᷊one.
-
Su tempong saudara su video ene nasadarẹ̌ tiněna dingangu kakanoạe sarung makakoạ si sie tawe masatia su kawinge, apa nikoạe?
Tau Kristen masatia lai pẹ̌sěngsul᷊ẹ harusẹ̌ mẹ̌tawakal᷊i gunang měndiagạ tiněnang i sire tatapẹ̌ burěsi. Kerea tadeạu i kau tawe turusẹ̌ mẹ̌tiněna barang amoral? Basa Filipi 4:8, bọu ene bisarai manga kakiwal᷊o ini:
-
Manga hal᷊ẹ̌ kerea harusẹ̌ tiněnang i kitẹ?
-
Kerea pẹ̌bawasang Alkitapẹ̌ dingangu sibukẹ̌ měkoạ hal᷊ẹ̌ i Yehuwa makatul᷊ung si kitẹ lumawang sasal᷊ukạ měkoạ dosa?
5. Atorang i Yehuwa piạ gunane si kitẹ
Yehuwa masingkạ apa kapaelange gunang i kitẹ. I Sie naul᷊ị si kitẹ kerea carane tatapẹ̌ burěsi secara moral dingangu apa gunane mạeng měkoạ ene. Basa Amsal 7:7-27 arau putarẹ̌ VIDEONE, bọu ene bisarai manga kakiwal᷊one.
-
Kerea sěngkatau umbaseng dimal᷊eng sarang situasi makasal᷊ukạ si sie?—Pěmanda Amsal 7:8, 9.
-
Tumuhụ Amsal 7:23, 26, tětal᷊u kakanoạ amoral ene sěbạe serius. Mạeng i kitẹ měndiagạ moral tatapẹ̌ burěsi, i kitẹ tawe makahombang masalah kerea?
-
Kawe nụe burěsi secara moral makatul᷊ung si kitẹ měbiahẹ̌ mal᷊uasẹ̌ sarang karěngụe?
Pirang katau nẹ̌tiněna apa niul᷊ịu Alkitapẹ̌ soal u homoseksual ene kaku. Katewe, Yehuwa, Mawung kakěndagẹ̌, mapulu kěbị taumata měbiahẹ̌ mal᷊uasẹ̌ sarang karěngụe. Tadeạu botonge měbiahẹ̌ mal᷊uasẹ̌ sarang karěngụe, i kitẹ harusẹ̌ tumol᷊e atorang’E. Basa 1 Korintus 6:9-11, bọu ene bisarai kakiwal᷊o ini:
-
Su těngong Yehuwa, apa hal᷊ẹ̌ nẹ̌sal᷊a ene kětạeng kapulu homoseksual?
Tadeạu makal᷊uasẹ̌ Mawu, i kitẹ kěbị harusẹ̌ měkoạ pẹ̌bawal᷊ui. Katewe, apa ene piạ gunane? Basa Mazmur 19:8, 11, bọu ene bisarai kakiwal᷊o ini:
-
Tumuhụ si kau, apa atorang i Yehuwa soal u moral ene masuẹ̌ su akal᷊ẹ̌? Kawe nụe?
Yehuwa seng nẹ̌tul᷊ung lawọ taumata gunang tumol᷊e atorang’E soal u moral. I Sie lai botonge makatul᷊ung si kau
PIẠ U NAUL᷊Ị: ”Mạeng duang katau měkoạ hubungan seks ene tawẹ apa-apa, asal᷊ẹ̌ i rẹ̌dua mahumpuluang sěmbaụ su wal᷊inẹ.”
-
Kerea tumuhụ si kau?
RINGKASAN
Seks kai hadiah bọu i Yehuwa gunang i sire apang seng bọu nẹ̌kawing.
Apa seng nikaěndungangu?
-
Manga hal᷊ẹ̌ apa botonge ikawera kakanoạ amoral?
-
Apa makatul᷊ung si kitẹ mẹ̌těngkarau bọu kakanoạ amoral?
-
Apa gunane mạeng i kitẹ tumol᷊e atorang i Yehuwa soal u moral?
PĚMANDA LAI
Pěngěndungke kawe nụe Yehuwa mapulu esẹ dingangu wawine apang seng měbẹ̌biahẹ̌ sěngkasio harusẹ̌ mẹ̌kawing.
”Apa Niul᷊ịu Alkitapẹ̌ soal u Měbiahẹ̌ Sěngkasio Těntal᷊ang Bědang Tawe Nẹ̌kawing?” (Artikel web)
Pěmanda kawe nụe těntirong Alkitapẹ̌ soal u homoseksual ene bal᷊inẹ mangal᷊ene i kitẹ harusẹ̌ mawěngsing su taumata apang měkẹ̌koạ ene.
Pěngěndungke kerea hukungu Mawu soal u kěbị kakanoạ seksual ene makariagạ si kitẹ.
Su pengalaman ”Iạ Nakapěndang Lẹ̌arěgang”, pěmanda apa nakakoạ sěngkatau homoseksual němal᷊ui pěbawiahe tadeạu makal᷊uasẹ̌ Mawu.
”Alkitapẹ̌ Makawal᷊ui Pěbawiahẹ̌” (Menara Pengawal, 1 April 2011)
^ par. 7 Manga kakanoạ nẹ̌sal᷊a wal᷊inẹ ene kai seks oral, seks anal, dingangu merangsang alat kelamin taumata wal᷊inẹ.
