BINELÍWAMI 41
¿Piri aní echi Biblia echi nasawíliami jitra?
Wiká pagótami we riwela nili raʼichia echi nasawíliami jitra. Nalí japalí echi Biblia raʼicha echi nasawíliami jitra, aʼlárika ruyé alí ke cha riká. Jiti la, we natéami ju japi ta machiboa. ¿Chúsiá? Jiti Jeobá níwala ju japi aní echoná Biblia. Echi tamó niwali alí we aʼlá machí japi chúriká ti nokisáré jiti kanila pirélipo sinibí.
1. ¿Piri aní Jeobá echi nasawíliami jitra?
Echi nasawíliami bilé chiliwéliami ju japi Jeobá nijili. Alí echi ko nakí japi bilé rijoi alí bilé mukí japi niwíkami ju, echi riká nokimea. Jepuná ko iʼwiri jiti kúchuwami nima alí ayénachó jiti newa nokimea japi we galé anakupi niraa. Jiti la, echi Onorúami Raʼicháala aní: “Kanílika isí mujé upila yúa japi mi ne chokichí jona olá” (Proverbios 5:18, 19). Jeobá ko nakí japi echi niwíkami ke bilecho yúa nasawima japi ke echi upila ju o kunala ma. Jiti la, echi japi Jeobá nijéwami ju ke siné isísaré echi chati namuti (leeri Hebreos 13:4).
2. ¿Chu yiri ju echi nasawíliami japi ke aʼlá ju?
Echi Biblia ko aní japi “echi jaré chati sitíi oláami chuwé bilétari yuwa kochíami pagótami” ke tasi pirélima japalí ma nulasa Onorúami Gobiérnowala (1 Corintios 6:9, 10). Japalí echi Biblia osáami raʼíchili echi chati nasawíliami jitra, echi ko néeli echi raʼíchali griego niraa pornéia. Alí echi raʼíchali ko aniwáami ju 1) japalí bilé rijoi alí bilé mukí nasawí kecho niwíkami nisa, a 2) japalí bilé rijoi bilecho rijoi yúa nasawí o bilé mukí bilecho mukí yúa nasawí alí 3) japalí nasawí echi namuti jákami yúa. Ati iʼwérili nokisáaká ke nokayá echi chati namuti, ati we kanílitipo Jeobá alí ayénachó tamujé kanílipo (1 Tesalonicenses 4:3).
AMINABI NATABO JAPI TA BINÉ
Ma binepo piri mi omero isiá jiti mi ke isima echi nasawíliami chati alí chúriká mi bitélima ami nijéwisaká japi Onorúami nulá echi nasawíliami jitra.
3. Kiti isí echi nasawíliami japi chati ju
Bilé rijoi José riwéami iʼwérili isili jiti ke isima japi chati ju. Leérisi Génesis 39:1-12 alí raʼichasi jepuná jitra:
-
¿Chúsiá másili José? (Inesi echi versículo 9).
-
¿Achi mi mayé japi José we aʼlá isili? ¿Chúsiá?
Japi riká José, ¿piri omero nokayá echi remalí jiti ke nokimea echi nasawíliami japi chati ju? Inesi echi VIDEO.
Jeobá ko nakí japi ta sinéami ke nokiboa echi nasawíliami japi chati ju. Leérisi 1 Corintios 6:18 alí raʼichasi jepuná jitra:
-
¿Piri namuti isímiré japi bilé isima echi nasawíliami japi chati ju?
-
¿Piri mi omero isiá jiti mi ke isima echi nasawíliami japi chati ju?
4. Piri mi iʼwírima jiti mi ke isima namuti japi chati ju
¿Piri namuti isima japi sapú nokiboa echi nasawíliami japi chati ju? Inesi echi VIDEO alí raʼichasi jepuná jitra:
-
Japalí echi hermano machili japi isimí namuti japi we omonáritima echi upila, ¿piri isili?
Echi cristianos japi we nijéwami ju, isini kaachi ayénachó iʼwérili noká ke natamia japi chati ju. Jiti mi ke natama echi namuti japi chati ju, ¿piri mi isísaré? Leérisi Filipenses 4:8 alí raʼichasi jepuná jitra:
-
¿Piri namuti nalí ti natásaré?
-
¿Achi mi mayé japi leeria echi Biblia alí nóchilia Jeobá tamó iʼwírima jiti ke nokiboa japi chati ju? ¿Chúsiá?
5. Japi Jeobá nulá sinibí tamó iʼwiri
Jeobá ko we aʼlá machí chúriká ti kanila pirélipo. Jiti la, echi tamó ané piri namuti ke nokisáré alí tamó ruyé chúsiá we aʼlá ju japi ta nijéwipo. Leérisi Proverbios 7:7-27 alí inesi echi VIDEO, miná ko raʼichasi jepuná jitra:
-
¿Piri namuti isili echi remalí japi ke aʼlá nili? (Inesi Proverbios 7:8, 9).
-
Japi riká aní Proverbios 7:23, 26, ¿piri ikimea echi japi noká nasawíliami japi chati ju, alí chúsiá we aʼlá ju japi ta ke echi riká nokiboa?
-
¿Piri tamó iyama Jeobá ke ti nokisáaká echi nasawíliami japi chati ju?
Jaré ko mayé japi Onorúami ke galéami ju jiti echoná Biblia aní japi echi homosexualidad we chati ju. Nalí Jeobá ko a we galéami ju alí nakí japi sinéami pagótami we kanílika pirélima sinibí. Jiti la, ata sinibí pirélinalaká, ata nijéwisaré suwaba japi echi nulá. Leérisi 1 Corintios 6:9-11, TNM, alí raʼichasi jepuná jitra:
-
Japi noká echi homosexuales, ¿achi echi bi ju japi Onorúami cha riká iné?
Japi Onorúami amígowala nínali, ¿achi aʼlá nima japi iʼwérili nokimea riwea japi chati ju? Leérisi Salmo 19:8, 11 alí raʼichasi jepuná jitra:
-
¿Achi mi mayé japi Onorúami nulá sinibí we aʼlá ju? ¿Chúsiá mi echi riká nata?
Jeobá ko ma wiká iʼwírili jiti nokimea japi echi galé, alí ayénachó mi iʼwírima.
JAPI ANÍ JARÉ PAGÓTAMI: “Ke chati ju nasawilia pe chuwé yúa”.
-
Mujé, ¿piri mi animea?
JAPI MI BINELI
Echi nasawíliami ko bilé chiliwé ju japi Jeobá nijili, alí echi ko nakí japi bilé mukí alí bilé rijoi japi ma niwíkami ju, kanílima echi riká nokayá.
Piri mi animea
-
¿Chu iyiri ju jaré nasawíliami japi chati ju?
-
¿Piri tamó iʼwírima jiti ke nokiboa echi nasawíliami japi chati ju?
-
¿Chúsiá we aʼlá ju japi nijéwipo japi Jeobá nulá echi nasawíliami jitra?
JITI MI CHE BINEMA
Biné chúsiá Onorúami nakí japi bilé mukí alí bilé rijoi japi napawika pirélinali niwima.
Chúsiá japi aní echi Biblia ke isimí japi echi pagótami kichima alí cha riká inema echi homosexuales.
“¿We chati ju homosexual niya?” (Oselí japi nirú echoná jw.org)
Leeri chúriká echi busuréliami japi aní echi Biblia echi nasawíliami jitra tamó iʼwiri.
¿Piri namuti iʼwírili bilé rijoi japi biteili japi riká mukí jiti riwema echi riká isiá? Leeri echi biografía “We aʼlá tamí riwíwili”.
“Binesa echi Biblia jipi ko we kaníliami ju” (Echi Nawésami, 1 inárachi abril 2011)
a Echi nasawíliami chati ayénachó ju japalí bilé rijoi bakiri echi bisalá echi mukí muchílachi o echoná rinílachi, alí japalí chapiká riʼecha biléala muchila o bisalá ma jiti kanílima.
