LESOGNE 41
Ino ty Rehafe ty Baiboly Miomba Tihoe Lahilahy Naho Ampela Mifampila?
Hafahafa amy ty ndaty ila’e ty maharey ty rehake tihoe mifampila. Faie tsy miolakolake ty Baiboly naho fa mirehake ty miomba izay, sady am-pagnajagne ty fomba irehafa’e aze. Mahasoa antikagne ty raha rehafegne ao. Boake amy i Jehovah, i Mpamorogne antikagney o Baibolio, le i reke ty tena mahafantatse ze mahasoa antikagne. Saontsie’e amantikagne ze raha toko’e hataontikagne naho te hampifale aze tikagne sady naho te hankamamy o fiaignagneo nainai’e.
1. Akore ty fihevera i Jehovah tihoe lahilahy naho ampela mifampila?
Fagnomezagne boake amy i Jehovah tihoe lahilahy naho ampela mifampila. Ty lahilahy naho ty ampela fa mpivaly ara-dalàna ty tea’e hankamamy io. Manjare managne anake iareo, sady afake mifaneho hatea naho mahazo fahafinaretagne ka. Izay ty mahavy ty Saontsin’Andrianagnahare mirehake tie: “Mifalea amy i vali’o avao manahake i reke mbe nitanoray.” (Ohabolana 5:18, 19) Tea i Jehovah hifankatea lognandro o mpivalio amy izay iareo tsy hila ndaty hafa ankoatse i vali’e.—Vakio ty Hebreo 13:4.
2. Ino ty dika tihoe mijangajanga?
Mirehake ty Baiboly fa ‘tsy handova ty Fanjakàn’Andrianagnahare ze mpijangajanga.’ (1 Korintianina 6:9, 10) Ty rehake grike tihoe pôrneia ro nampiasae o mpanoratse Baibolio mba hirehafagne tihoe fijangajangagne. Inogne iaby ty atao tihoe fijangajangagne? 1) Ndaty tsy mpivaly mifampila a, 2) lahilahy sambe lahilahy ndra ampela sambe ampela mifampila, sady 3) ndaty mila biby. Mampifale i Jehovah tikagne sady mandrambe soa naho fa ‘mifaly ty fijangajangagne.’—1 Tesalonianina 4:3.
ANDAO HANDINEKE TY PITSOPITSO’E
Hodinehentikagne ato tie inogne ty hagnampe azo hagnalavitse ty fijangajangagne, sady ino ty soa ho rambese’o naho fa malio findesam-batagne lognandro rehe.
3. Ilaiso ty fijangajangagne
Nikezake ho soa findesam-batagne lognandro ty Josefa mpanompon’Andrianagnahare. Vakio ty Genesisy 39:1-12, sady iharò midineke ty fagnonteneagne retoa:
-
Nagnino ty Josefa ro nilay naho fa nitaone i ampelay hila aze?—Henteo ty andine’e 9.
-
Nimete vao ty natao i Josefa arake ty heve’o? Ino ty anto’e?
Ino ty hagnampe o tanorao hilay ty fijangajangagne manahake ty natao i Josefa? Alefaso i VIDEO oy.
Tea i Jehovah hagnalavitse o fijangajangagneo tikagne iaby. Vakio ty 1 Korintianina 6:18, sady iharò midineke ty fagnonteneagne retoa:
-
Ino ty va’e hitarike ty ndaty raike hijangajanga?
-
Ino ty azo’o atao naho te hilay ty fijangajangagne rehe?
4. Ho vita’o ty hanohetse tsapa hevetse
Nagnino ro va’e ho sarotse kindraike ty lomay ty tsapa hevetse hijangajanga? Alefaso i VIDEO oy, sady iharò midineke ty fagnonteneagne toy.
-
Ino ty natao i rahalahy tamy i video teoy naho fa nitsapa’e tie va’e hahavy aze hila ampela hafa ty raha nieretserete’e naho ty raha natao’e?
Ndra ty Kristiana tsy mivalike aza kindraike, le mila mialy mafe mba tsy hieretseretse raha vetaveta. Ino areke ty hagnampe azo? Vakio ty Filipianina 4:8, sady iharò midineke ty fagnonteneagne retoa:
-
Raha manao akore ty toko’e hoeretseretentikagne avao?
-
Nagnino tikagne ro hahavita hanohetse tsapa hevetse naho mamaky Baiboly isan’andro sady mifantoke amy ty fanompoagne i Jehovah?
5. Mahasoa antikagne ty fitsipy i Jehovah
Fanta i Jehovah ty raha tena mahasoa antikagne. Saontsie’e amantikagne tie ino ty toko’e hatao naho te ho soa findesam-batagne lognandro, sady ino ty soa rambesegne boake amy izay. Vakio ty Ohabolana 7:7-27 ndra alefaso i VIDEO oy, sady iharò midineke ty fagnonteneagne retoa.
-
Nagnino i ajalahỳ ro nagnoho-doza ty tegna’e?—Henteo ty Ohabolana 7:7-9.
-
Tena raty ty voka ty fijangajangagne arake ty Ohabolana 7:23, 26. Ino iaby ty olagne tsy hahazo antikagne naho soa findesam-batagne lognandro tikagne?
-
Naho soa findesam-batagne tikagne, ino iaby ty fitahiagne ho azontikagne amy ty hoavy?
Misy ty mieretseretse tie hentetse loatse ty raha rehafe ty Baiboly miomba ty lahilahy sambe lahilahy ndra ty ampela sambe ampela mifampila. Faie Andrianagnahare hatea ty Jehovah, le tea’e ho sambatse nainai’e ze kila ndaty. Tsy maintsy magnorike ty fitsipi’e tikagne naho te hiaigne nainai’e. Vakio ty 1 Korintianina 6:9-11, sady iharò midineke ty fagnonteneagne toy:
-
Ty lahilahy sambe lahilahy ndra ty ampela sambe ampela mifampila avao vao ty tsy tea i Jehovah?
Toko’e hanao fiovagne iaby tikagne naho te hampifale an’Andrianagnahare. Mate antoke vao tikagne naho manao izay? Vakio ty Salamo 19:8, 11, sady iharò midineke ty fagnonteneagne retoa:
-
Hentetse loatse vao ty fitsipy i Jehovah arake ty heve’o? Ino ty anto’e?
Maro ty ndaty fa nampea i Jehovah hagnorike ty fitsipi’e. Afake magnampe azo ka reke
MISY TY MIREHAKE TIE: “Naho fa mifankatea ty ndaty roe, le fa afake mifampila.”
-
Akore ty havale’o izay?
FAMINTIGNAGNE
Fagnomezagne boake amy i Jehovah ty lahilahy naho ty ampela mifampila sady ze ndaty fa mpivaly ara-dalàna avao ty tea’e hankamamy aze.
Fameregnagne
-
Ino ty tafilitse amy tihoe mijangajanga?
-
Ino ty hagnampe antikagne hagnalavitse ty fijangajangagne?
-
Ino ty soa ho rambesentikagne naho magnorike ty fitsipy i Jehovah tikagne?
FAGNAZAVAGNE FAGNAMPE’E
Nagnino ro lahibey aman’Andrianagnahare tihoe mpivaly ara-dalàna ty ndaty roe?
Mandrisike antikagne halaigne ty lahilahy mila lahilahy ndra ty ampela mila ampela vao ty Baiboly?
Nagnino ty lalàn’Andrianagnahare miomba ze filagne iaby atao o ndatio ro miaro antikagne?
“Tena Filagne vao ty Ndaty Manao amy ty Vava?” (Lahatsoratse amy jw.org ao)
Nifampila tamy ty lahilahy mitovy ama’e avao ty lahilahy raike toy tie taloha. Ino ty nandrisike aze hiova naho hampifale an’Andrianagnahare?
“Magnova Ndaty ty Baiboly” (Fitalakesan-davitse 1 Avrily 2011)
a Tsy ty filagne mahazatse avao ty atao tihoe mijangajanga, fa agnisa izay ka ty filagne atao amy ty tsy toko’e ho ie. Ohatse atao amy ty vava, lavam-piambesaragne, naho ty fikasikasihagne ty maha lahilahy ndra ty maha ampela ty ndaty hafa.
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
