AISISIAET NA 41
Anyoika bo Nuebala Ebaibuli Kanuikamunitos Aelo?
Ekuriaka itunga luipu einer nuikamunitos aelo. Konye, naetiroria Ebaibuli nuikamunitos aelo, inera eitena, ido kopone loitodunit ayongit. Imedauni oni kotoma akiro nuinerit Ebaibuli. Eraasi nu nukabeit naarai Yawe nges Lokasubaniwok. Ejeni ngesi nueinakinete oni aimedaun. Itejenikinit ngesi oni epone loepedoriata aswamisiowok aisiyalamikin nges ka nuingarakinete oni alelakin aijar ikar kere.
1. Anyoika bo nuebala Yawe kanuikamunitos aelo?
Erai aelo ainakinet naebunit kaneejai Yawe. Ekoto ngesi aelo korai naelelakinitos aberu keda ekiliokit luedukokina. Ecamakinit ainakinet na luedukokina mere aur bon, konye aitodun aminakec kopone loejok ka loka aiyalama. Ngun nges ebalar Akirot Naka Edeke ebe: “Kolakara kaberu naka atumunikon.” (Awaragasia 5:18, 19) Ekoto Yawe Ikristayon luedukokina araut luemunooko kodukonekec, tetere mam kesi edotiaros.—Kosiom Iburanian 13:4.
2. Inyoin bo adoteu?
Ebala Ebaibuli ebe “idotea . . . mam irumete Ajakanut Naka Edeke.” (1 Ikorinton 6:9, 10) Ikewadikak Ebaibuli kotoma Ayonanin apotu kitwasamata akirot por·neiʹa aitetemio nuikamunitos adoteu. Imoriarit akirot ngin (1) itunga aelo a komam edukokina, (2) ikiliok aitep ikiliok, keda (3) itunganan aelo keda itiang. Isiyalamikini oni Yawe ido imedauni oni ‘kinac oni adoteu.’—1 Isesalonikan 4:3.
KISISIAU NUIPU
Kisisiau epone loipedoria ijo ainac adoteu keda epone loimedaunia ijo kotoma asalakinit ilai kotoma akiro nuka aelo.
3. Kinacata adoteu
Abu Yosep kongerok aberu naakoto aelo kangesi. Kosiom Ageun 39:1-12, kosodete aimor aingiseta nuta:
-
Inyo bo abu koinak Yosep akerit? —Koany ikokoron 9.
-
Iwomit kereka ijo ebe adolit aseunet naka Yosep? Kanuinyo?
Epone ani epedoriata atumunak aputoor Yosep kosodete ainac adoteu? Koboliak EBIDIO.
Ekoto Yawe oni kere aisac adoteu. Kosiom 1 Ikorinton 6:18, kosodete aimor aingiseta nuta:
-
Ani bo ejautene loepedori ainakin itunganan adotiar?
-
Epone ani ipedoria jo ainac adoteu?
4. Ipedori ijo aipikor acodunio
Inyo epedori ainakin itunganan etionikinit aipikor acodunio naka adoteu? Koboliak EBIDIO, kosodete aimor aingiset naetupakini.
-
Naajenikinia onac kobidio ebe epedorete akewomisio ka aswamisio ainakin ngesi araun lomam emunoono kaneejai akeberu, inyo abu ngesi kiswama?
Kapakio ace, Ikristayon luemunooko da epedori ationikinit aidar aomisiokec koraasi nuelaete. Epone ani ipedoria ijo aisac ainyikokinit aomoom akiro nuadoteu? Kosiom Ipilipin 4:8, kosodete aimor aingiseta nuta:
-
Anyoika bo akiro nuibusakinit oni aomoom?
-
Epone ani epedoria asiomenen Ebaibuli keda akukuranut kotoma aijaanakin Yawe aingarakin oni aipikor acodunio?
5. Imedauni oni kotoma aicoreta nuka Yawe
Ejeni Yawe nuepedorete aingarakin oni aimedaun. Elimokinit ngesi oni epone lopedoret asalakin ilai kotoma oponesio keda ajokisio nuidumuni oni. Kosiom Awaragasia 7:7-27 arai bo koboliak EBIDIO, kosodete aimor aingiseta nuetupakinete.
-
Epone ani abu atumunan kitor orot loayangaari ngesi toma acodunio?—Koany Awaragasia 7:8, 9.
-
Katupitos Awaragasia 7:23, 26, eyauni adoteu atiokisio nueroko noi. Anu bo atiokisio nuinaci oni kisac oni adoteu?
-
Epone ani epedoria asalakinit ilai kotoma akiro nuikamunitos aelo aingarakin oni alelakin aijar ikar kere?
Eomitos icetunga ebe nuinera Ebaibuli kanuikamunitos ikatepak ikiliok, eraasi nuitodunitos elait. Konye karaida eomitos kesi kwangin, erai Yawe Edeke loka amin ido ekoto ngesi itunga kere alelakin aijar ikar kere. Kanu adolokin aijar ngin, ibusakinit oni arimaarit aicoretake. Kosiom 1 Ikorinton 6:9-11, kosodete aimor aingiset nata:
-
Aitep ikiliok nges kereka bon eipud loeseseni Edeke kwape loerono?
Kanu aisiyalamikin Edeke, ibusakinit oni kere aiswamaun aijulanakineta. Ipedori kereka oni aimedaun kotoma aswam ngun? Kosiom Isabulin 19:8, 11, kosodete aimor aingiseta nuta:
-
Iwomit kereka ijo ebe ejokuka aicoreta nuka Yawe nuikamunitos aelo? Kanuinyo, arai bo kanuinyo mam?
Engaraki Yawe itunga luipu aijulakin ka atupakin aicoretake. Epedori ngesi aingarakin ijo da
EBAKASI ICETUNGA EBE: “Mam erono itunganan aelo keda idiotunganan kere, bon ebe eminanara kesi.”
-
Itemari bo jo ai?
NUIDAU AISISIAUN
Erai aelo ainakinet naijaikinit Yawe ekiliokit keda akeberu alelakin.
Ainyogoor
-
Imoriarit bo adoteu, inyo?
-
Inyoin bo ingarakini oni aisac adoteu?
-
Epone ani imedaunia oni kotoma aicoreta nuka Yawe nuikamunitos aisac adoteu?
ISISIAU BOBO NUTA
Kisisiau kanuinyo ekotor Edeke ekiliokit keda aberu luaseutu aiboi nepepe adukokin.
Kisisiau kanuinyo mam aicoreta nuka Ebaibuli nuitoronitos aitep ikiliok eraatar numam itodunitos ebe ilait oni ikatepak ikiliok.
Isisiau epone loeyuwaritotor oni ikisila luka Edeke luikamanara keda aelo.
“Erai Kereka Cut Ainak Itunganan Neileicike, Aelo?” (Aisisiaet naka olago)
Kotoma akou naka akirot “Ayaitos Kesi Eong Ejok,” koany nuapotu koinakisi atepan ikiliok aiswamaun aijulanakineta kotoma aijarake kanu aisiyalamikin Edeke.
“Ijulakini Ebaibuli Itunga” (Watchtower, Elap Loiwongonet 1, 2011)
a Aswamisio nu nueroko nuka aelo imoriaritos aelo kitunganan yenimam edukokina kajo, ainak itunganan neileicike, aitep nges kauke, aiminimin itunganan neileicike kanu aitodolikin eipud loka aelo.
