LĒSONI 41
Ko e Hā ʻOku Leaʻaki ʻe he Tohi Tapú Fekauʻaki mo e Fehokotaki Fakasinó?
Ko e kakai tokolahi ʻoku nau ongoʻi feifeitamaki ke talanoa fekauʻaki mo e fehokotaki fakasinó. Neongo ia, ʻi he taimi ʻoku lave ai ʻa e Tohi Tapú ki he fehokotaki fakasinó, ʻokú ne fai ia ʻi he founga hangatonu kae fakaʻapaʻapa. Ko e meʻa ʻokú ne leaʻaki fekauʻaki mo iá ʻoku tau maʻu ʻaonga mei ai. ʻOku ʻuhinga mālie ia he ko Sihova ʻa hotau Tokotaha-Fakatupú. ʻOkú ne ʻiloʻi ʻa e lelei taha maʻa kitautolú. ʻOkú ne tala mai ʻa e meʻa ke tau fai ke lava ai ke tau fakahōifuaʻi iá mo e meʻa te ne tokoniʻi kitautolu ke fiefia ʻi he moʻuí ʻo taʻengatá.
1. Ko e hā ʻa e vakai ʻa Sihova ki he fehokotaki fakasinó?
Ko e fehokotaki fakasinó ko ha meʻaʻofa fakaʻofoʻofa ia meia Sihova. ʻOkú ne finangalo ke fiefia ai ha tangata mo ha fefine ʻokú na ʻosi mali. Ko e meʻaʻofa ko ení ʻoku ʻikai ngata pē heʻene fakaʻatā ʻa e ongo meʻa malí ke na maʻu ha fānaú kae toe fefakahāhāʻaki ʻa e ʻofá mo e fetokangaʻakí. Ko e ʻuhinga ia ʻoku pehē ai ʻe he Folofola ʻa e ʻOtuá: “ʻOfa ke ke fiefia ʻi ho uaifi naʻá ke maʻu ʻi hoʻo kei talavoú.” (Palōveepi 5:18, 19) ʻOku ʻamanekina ʻe Sihova ʻa e ngaahi hoa mali Kalisitiané ke nau mateaki ki honau ngaahi hoá, ko ia heʻikai ai ke nau tono.—Lau ʻa e Hepelū 13:4.
2. Ko e hā ʻa e fehokotaki fakasino taʻetaau?
ʻOku tala mai ʻe he Tohi Tapú “ko e faʻahinga ʻoku fehokotaki fakasino taʻetāú . . . ʻe ʻikai hanau tofiʻa ʻi he Puleʻanga ʻo e ʻOtuá.” (1 Kolinitō 6:9, 10) Ko e kau hiki Tohi Tapu lea faka-Kalisí naʻa nau ngāueʻaki ʻa e foʻi lea ko e por·neiʹa ke fakamatalaʻi ʻa e fehokotaki fakasino taʻetāú. Ko e foʻi lea ko iá ʻoku kau ki ai ʻa e (1) fehokotaki fakasino ʻi he vahaʻa ʻo e faʻahinga taʻemali tāutaha, a (2) fakasōtoma, pea mo e (3) mohe mo e manu. ʻOku tau fakahōifuaʻi ʻa Sihova pea tau maʻu ʻaonga tonu ai ʻi he taimi ʻoku tau “fakaʻehiʻehi mei he fehokotaki fakasino taʻetāú.”—1 Tesalonaika 4:3.
KELI LOLOTO ANGE
Fakakaukau ki he founga ʻe lava ai ke ke fakaʻehiʻehi mei he fehokotaki fakasino taʻetāú mo e founga hoʻo maʻu ʻaonga koeʻuhí ko hoʻo nofoʻaki maʻa fakaeʻulungāngá.
3. Hola mei he fehokotaki fakasino taʻetāú
Ko Siosifa naʻá ne fakafisingaʻi ha fefine naʻá ne feinga ke fehokotaki fakasino mo ia. Lau ʻa e Sēnesi 39:1-12, pea lāulea leva ki he ngaahi fehuʻi ko ení:
-
Ko e hā naʻá ne ueʻi ʻa Siosifa ke holá?—Sio ki he veesi 9.
-
ʻOkú ke fakakaukau naʻe fai ʻe Siosifa ʻa e fili totonú? Ko e hā hono ʻuhingá?
ʻE lava fēfē ʻa e toʻutupú ke faʻifaʻitaki kia Siosifa pea hola mei he fehokotaki fakasino taʻetāú he ʻahó ni? Huluʻi ʻa e VITIOÓ.
ʻOku finangalo mai ʻa Sihova kiate kitautolu kotoa ke talitekeʻi ʻa e ʻulungaanga taʻetāú. Lau ʻa e 1 Kolinitō 6:18, pea lāulea leva ki he ongo fehuʻi ko ení:
-
Ko e hā ʻa e ngaahi tuʻunga te ne taki atu nai ha taha ki he fehokotaki fakasino taʻetāú?
-
ʻE lava fēfē ke ke hola mei he ʻulungaanga taʻetāú?
4. ʻE lava ke ke fakafepakiʻi ʻa e fakatauelé
Ko e hā ʻe lava ke ne ʻai ke faingataʻa ke fakafepakiʻi ʻa e fakatauele ke fehokotaki fakasino taʻetāú? Huluʻi ʻa e VITIOÓ, pea lāulea leva ki he fehuʻi hokó.
-
Ko e hā naʻe fai ʻe he tokoua ʻi he vitioó ʻi heʻene ʻiloʻi ko e ngaahi meʻa naʻá ne faí mo fakakaukau ki aí ʻe lava ke taki atu ia ke taʻefaitōnunga ki hono uaifí?
Naʻa mo e kau Kalisitiane faitōnungá ʻoku nau fāinga he taimi ʻe niʻihi ke tauhi ʻenau fakakaukaú ke maʻa. ʻE lava fēfē ke ke fakaʻehiʻehi mei he nōfoʻi ʻi he ngaahi meʻa taʻetāú? Lau ʻa e Filipai 4:8, pea lāulea leva ki he ongo fehuʻi ko ení:
-
Ko e hā ʻa e ngaahi meʻa ʻoku totonu ke tau fakakaukau ki aí?
-
ʻE lava fēfē ʻe he lau Tohi Tapú mo e femoʻuekina ʻi he ngāue ʻa Sihová ʻo tokoniʻi kitautolu ke talitekeʻi ʻa e fakatauele ke faiangahalá?
5. ʻOku tau maʻu ʻaonga mei he ngaahi tuʻunga ʻa Sihová
ʻOku ʻiloʻi ʻe Sihova ʻa e lelei taha maʻa kitautolú. ʻOkú ne tala mai ʻa e founga ke tau hanganaki maʻa fakaeʻulungaanga aí pea maʻu ʻaonga ai mei heʻetau fai peheé. Lau ʻa e Palōveepi 7:7-27 pe huluʻi ʻa e VITIOÓ, pea lāulea leva ki he ngaahi fehuʻi hokó.
-
Naʻe anga-fēfē ʻa e laka atu ʻa e kiʻi talavoú ki ha tuʻunga fakatauelé?—Sio ki he Palōveepi 7:8, 9.
-
Fakatatau ki he Palōveepi 7:23, 26, ʻoku ʻi ai hono nunuʻa fakatuʻutāmaki ʻo e fehokotaki fakasino taʻetāú. Kapau te tau nofoʻaki maʻa fakaeʻulungaanga, ko e hā ʻa e ngaahi palopalema ʻe lava ke tau hao mei aí?
-
ʻOku lava fēfē ke tokoniʻi kitautolu ʻe he maʻa fakaeʻulungāngá ke tau fiefia ʻi he moʻuí ʻo taʻengatá?
Ko e kakai ʻe niʻihi ʻoku nau fakakaukau ko e meʻa ʻoku leaʻaki ʻe he Tohi Tapú fekauʻaki mo e fakasōtomá ʻoku taʻeʻofa. Ka ko Sihova, ko e ʻOtua ʻo e ʻofá, ʻokú ne finangalo ki he tokotaha kotoa ke fiefia ʻi he moʻuí ʻo taʻengata. Ke maʻu iá kuo pau ke tau moʻuiʻaki ʻene ngaahi tuʻungá. Lau ʻa e 1 Kolinitō 6:9-11, pea lāulea leva ki he fehuʻi ko ení:
-
ʻI he vakai ʻa e ʻOtuá, ko e holi fakasōtomá pē ʻoku fiemaʻu ke tau talitekeʻí?
Ke fakahōifuaʻi ʻa e ʻOtuá, ko kitautolu kotoa ʻoku fiemaʻu ke tau fai ʻa e ngaahi liliu. ʻOku tuha ʻa e feingá? Lau ʻa e Saame 19:8, 11, pea lāulea leva ki he ongo fehuʻi ko ení:
-
ʻOkú ke fakakaukau ko e ngaahi tuʻunga fakaeʻulungaanga ʻa Sihová ʻoku faingataʻa ke talangofua ki ai? Ko e hā hono ʻuhingá?
Kuo tokoniʻi ʻe Sihova ʻa e tokolahi ke nau talangofua ki heʻene ngaahi tuʻunga fakaeʻulungāngá. Te ne lava foki ʻo tokoniʻi mo koe
ʻOKU PEHĒ ʻE HE NIʻIHI: “Ko e fehokotaki fakasino ʻa ha ongo meʻa ʻoku ʻikai hano maumau, kehe pē ʻokú na feʻofaʻaki.”
-
Ko e hā haʻo lau?
FAKANOUNOU
Ko e fehokotaki fakasinó ko ha meʻaʻofa fakaʻofoʻofa ia meia Sihova ki he husepānití mo e uaifí ke na fiefia ai.
Fakamanatu
-
Ko e hā ʻoku kau ki he fehokotaki fakasino taʻetāú?
-
Ko e hā te ne tokoniʻi kitautolu ke fakaʻehiʻehi mei he fehokotaki fakasino taʻetāú?
-
ʻOku tau maʻu ʻaonga fēfē mei he muimui ki he ngaahi tuʻunga taau ʻa Sihová?
AKO LAHI ANGE
Ako pe ko e hā ʻoku mahuʻinga ai ki he ʻOtuá ki ha ongo meʻa ke na mali.
“Ko e Hā ʻOku Leaʻaki ʻe he Tohi Tapú Fekauʻaki mo e Nonofo Taʻemalí?” (Kupu ʻi he uepisaití)
Ako ki he ʻuhinga ʻoku akoʻi ai ʻe he Tohi Tapú ko e tōʻonga fakasōtomá ʻoku hala, ka ʻi he taimi tatau ʻoku ʻikai ʻuhingá ke fehiʻa ki he kau fakasōtomá.
Ako ki he anga hono maluʻi kitautolu ʻe he lao ʻa e ʻOtuá ʻi he fekauʻaki mo e fehokotaki fakasinó.
“Ko e Fehokotaki Fakasino Ngutú ko e Fehokotaki Fakasino Moʻoni?” (Kupu ʻi he uepisaití)
ʻI he talanoa “Naʻa Nau Fakafeangai Mai Kiate Au ʻi he Ngeia,” sio ki he meʻa naʻá ne ueʻi ha tokotaha fakasōtoma ke liliu ʻa ʻene founga moʻuí ke fakahōifuaʻi ʻa e ʻOtuá.
“Liliu ʻe he Tohi Tapú ʻa e Moʻuí” (Toʻo mei he Ko e Taua Leʻo)
a Ko e ngaahi feohi taʻetotonu ko ení ʻoku kau ki ai ha faʻahinga pē ʻo e fehokotaki fakasinó, fehokotaki fakasino ngutu, fehokotaki fakasino ʻi he halanga tuʻu mamaʻó mo hono ngāngaahi ʻo e kupu fakafanau ha taha ʻi he founga fakafehokotaki fakasinó.
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
