SAMBIRU 41
Vo Bayibolu Likamba pa Nkhani Yakugonana
Ŵanthu anandi achita soni kukamba nkhani zakukwaskana ndi kugonana. Kweni asani Bayibolu likamba nkhani zenizi, likonkhoska vinthu mwakuvwika umampha ndipuso mwaulemu. Vo Bayibolu likamba pa nkhani yakugonana vakovya. Venivi vakuziziswa cha, chifukwa Bayibolu likutuliya kwaku Yehova yo ndi Mlengi widu. Iyu waziŵa vo tingachita kuti vinthu vitiyendiyengi umampha. Watitikambiya vo tingachita kuti timukondwesengi kweniso vo vingatiwovya kuti tikondwengi ndi umoyu mpaka muyaya.
1. Kumbi Yehova watiyiwona wuli nkhani yakugonana?
Kugonana ndi mphasu yakutuliya kwaku Yehova. Iyu wakhumba kuti munthulumi kweniso munthukazi wo akutorana, ndiwu akondwengi ndi mphasu yeniyi. Mphasu yeniyi yitovya ŵanthu wo akutorana kuti abalengi ŵana pe cha, kweniso kuti alongoranengi chanju munthowa yapade ndipuso kuti akondwengi. Ndichu chifukwa chaki Mazu ngaku Chiuta ngakamba kuti: “Ukondwi ndi munthukazi wa pa unyamata waku.” (Nthanthi 5:18, 19) Yehova wakhumba kuti ŵanthu wo akutorana angachitanga chigololu cha kweni ajengi akugomezgeka ku munyawu yo akutorana nayu.—Ŵerengani Aheberi 13:4.
2. Kumbi ureŵi ung’anamuwanji?
Bayibolu lititikambiya kuti “ŵanthu wosi wo achita ureŵi . . . azamuhara cha Ufumu waku Chiuta.” (1 Akorinto 6:9, 10) Pakulemba vakukwaskana ndi ureŵi, ŵanthu wo alembanga Bayibolu angugwiriskiya ntchitu mazu nga Chigiriki ngakuti por·neiʹa. Mazu yanga ngang’anamuwa vinandi kusazgapu (1) kugonana a kwa pakati pa ŵanthu wo akutorana cha, (2) kugonana anthulumi pamwenga anthukazi pe, ndipuso (3) kugona nyama. Tikondwesa Yehova kweniso vinthu vititiyende umampha asani ‘tichita ureŵi cha.’—1 Atesalonika 4:3.
SAMBIRANI VINANDI
Wonani vo mungachita kuti muleki kuchita ureŵi kweniso mo venivi vingakuwovyiyani.
3. Thaŵani ureŵi
Yosefi yo wenga munthu wakugomezgeka wangukana kuchita ureŵi. Ŵerengani Genezesi 39:1-12, pavuli paki kambiskanani mafumbu yanga:
-
Ntchifukwa wuli Yosefi wanguthaŵa?—Wonani vesi 9.
-
Kumbi muwona kuti Yosefi wanguchita umampha? Ntchifukwa wuli muwona viyo?
Kumbi achinyamata angamuyezga wuli Yosefi mazuŵa nganu pa nkhani yakukana kuchita ureŵi? Woneriyani VIDIYO.
Yehova wakhumba cha kuti tichitengi ureŵi. Ŵerengani 1 Akorinto 6:18, pavuli paki kambiskanani mafumbu yanga:
-
Kumbi ndi vakuchitika nivi vo vingachitiska kuti munthu wachiti ureŵi?
-
Kumbi mungachita wuli kuti muthaŵi ureŵi?
4. Mungafiska kukana mayeseru
Kumbi ntchinthu wuli cho chingachitiska kuti munthu watondeki kukana mayeseru mpaka kufika pa kuchita ureŵi? Woneriyani VIDIYO, pavuli paki kambiskanani fumbu lo le mumphata.
-
Nge po tawone muvidiyo, kumbi mubali wanguchita wuli wati waziŵa kuti maŵanaŵanu ndipuso vakuchita vaki, vingamuchitiska kuti waleki kuja wakugomezgeka ku muwolu waki?
Akhristu akugomezgeka nawu nyengu zinyaki aŵanaŵana vinthu viheni. Sonu kumbi mungachita wuli kuti muleki kulutirizga kuŵanaŵana vinthu viheni asani vaza mumutu? Ŵerengani Afilipi 4:8, pavuli paki kambiskanani mafumbu yanga:
-
Kumbi tikhumbika kuŵanaŵana vinthu vamtundu wuli?
-
Kumbi kuŵerenga Bayibolu kweniso kutangwanika ndi ntchitu yaku Yehova, kungatiwovya wuli kuti tikani mayeseru?
5. Fundu zaku Yehova zititiwovya
Yehova waziŵa vo tingachita kuti vinthu vitiyende umampha. Iyu watitikambiya vo tingachita kuti tithaŵi ureŵi kweniso mo venivi vingatiwovye. Ŵerengani Nthanthi 7:7-27 pamwenga woneriyani VIDIYO, pavuli paki kambiskanani mafumbu ngo nge mumphata.
-
Kumbi mnyamata wangujisereza wuli mu mayeseru?—Wonani Nthanthi 7:8, 9.
-
Lemba la Nthanthi 7:23, 26 lilongo kuti munthu wangakumana ndi masuzgu ngakulu asani wachita ureŵi. Kumbi tingakumana ndi masuzgu wuli asani tingachita ureŵi?
-
Kumbi kuleka kuchita ureŵi kungatiwovya wuli kuti tikondwengi ndi umoyu mpaka muyaya?
Ŵanthu anyaki awona kuti vo Chiuta wakamba mu Bayibolu vakukaniza kugonana kwa anthulumi pamwenga anthukazi pe, vilongo kuti iyu walivi chanju. Kweni uneneska ngwakuti, Yehova yo ndi Chiuta wachanju wakhumba kuti weyosi wakondwi ndi umoyu mpaka muyaya. Kuti tisaniyi vitumbiku venivi, tikhumbika kulondo fundu zaki. Ŵerengani 1 Akorinto 6:9-11, pavuli paki kambiskanani fumbu ili:
-
Kumbi lemba ili lilongo kuti Chiuta wakaniza kugonana kwa anthulumi pamwenga anthukazi pe?
Tosi tikhumbika kusintha vinthu pa umoyu widu kuti tikondwesengi Chiuta. Kumbi pe phindu lelosi lo tisaniya? Ŵerengani Salimo 19:8, 11, pavuli paki kambiskanani mafumbu yanga:
-
Kumbi yimwi muwona kuti fundu zaku Yehova zakovya? Ntchifukwa wuli muwona viyo?
Yehova wawovyapu ŵanthu anandi kuti avwiyengi marangu ngaki. Namwi wangakuwovyani
ŴANTHU ANYAKI AKAMBA KUTI: “Weyosi wangagonana ndi munthu weyosi yo wakhumba, chikulu atanjana.”
-
Kumbi yimwi muwona wuli?
KUMBI MWASAMBIRANJI?
Kugonana ndi mphasu yakutuliya kwaku Yehova yo wakupaska munthulumi ndi munthukazi wo akutorana kuti akondwengi.
Kuweriyamu
-
Kumbi ureŵi ung’anamuwanji?
-
Ntchinthu wuli cho chingatiwovya kuti tileki kuchita ureŵi?
-
Kumbi kulondo fundu zaku Yehova kutitiwovya wuli?
FUFUZANI
Wonani chifukwa cho Chiuta wakhumbiya kuti munthulumi ndi munthukazi wo akhumba kujaliya limoza atoranengi dankha.
“Kumbi Bayibolu Likambanji pa Nkhani Yakujaliya Limoza Kwambula Kutolana?” (Nkhani ya pa webusayiti)
Kumbi fundu ya mu Bayibolu yakuti kugonana anthulumi pamwenga anthukazi pe nkhuheni yichiska kuti tiŵatinkhengi ŵanthu wo achita venivi?
“Kumbi Kugonana kwa Anthulumi Pamwenga Anthukazi pe Nkhuheni?” (Nkhani ya pa webusayiti)
Wonani mo marangu ngaku Chiuta ngakukwaskana ndi nkhani zakugonana ngatitivikiliya.
“Kumbi Kugonana Mumulomu Kuja Nadi Kugonana Chayiku?” (Nkhani ya pa webusayiti)
Mu nkhani ya mutu wakuti “Angundilondere Umampha Ukongwa,” wonani vo vinguchitiska munthulumi yo wagonananga ndi anthulumi anyaki kuti wasinthi umoyu waki ndi kwamba kukondwesa Chiuta.
“Bayibolu Lisintha Ŵanthu” (Chigongwi cha Alinda, April 1, 2011)
a Venivi visazgapu kugonana, kugonana mumulomu, kugonana kumataku kweniso kuseŵeresa viŵalu vakubisika va munthu munyaki.
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
