GIHEVBULO 41
Bhibhiliya yari khiyo ginani khu malawu?
Vathu nya vangi kha va tshulegi gu bhula khu malawu. Ganiolu, tepo Bhibhiliya yi ganeyago khu malawu yo ganeya khu gukongoma, ambari ulolo khu ndziya nya githawo. Esi Bhibhiliya yi ganeyago yo gireya gu hi phasa. Isoso si ngu pwisisega, kholu Jehovha khuye Muvangi wathu nigu a ngu siti esi si gu sadi gwathu. Uye a ngu hi embeya esi hi yedego gu gira gasi gu mu tsakisa, ni esi si na hi phasago gu simama gu tsaka.
1. Khu yavbini mawonelo ya Jehovha khu malawu?
Malawu giningwa gya Jehovha. Uye o vbweta gu khuye malawu ma hengedwa khu mwama ni nyamayi va tshadhidego. Giningwa gegi kha gi phasi ava va tshadhidego gu velega sanana basi, ganiolu gi ngu va phasa gambe gu yeyedzana lihaladzo khu ndziya nya tumbunugo neyi nyo tsakise. Khigyo gi girago Bhibhiliya yi ganeya, khiyo: “Tangadziswa khu mwangadzi wa wudzahani wago.” (Mavingu 5:18, 19) Jehovha o vbweta gu khuye Makristo ma tshadhidego ma tumbega ga mwama mwendro mwangadzi wawe. Vo gira isoso, va di hadzi potsa gu gira wubhayi. — Leri Vahebheru 13:4.
2. Ginani wubhayi?
Bhibhiliya yari khiyo ‘va nya sibhayi gima kha va na bela Mufumoni wa Ndzadzini.’ (1 Vakorinto 6:9, 10) Valovi nya Bhibhiliya va lovidego khu Gigreki va thumiside lito porneía gasi gu tshamuseya wubhayi. Lito leli lo pata 1) malawu ma hengedwago a khu mwama ni nyamayi va nga mba tshadha, 2) malawu ma hengedwago khu mwama ni mwama mwendro nyamayi ni nyamayi, ni 3) gu hengeya malawu ni sirengo. Ho ‘gimbileya hwindzo ni wubhayi’, hi na tsakisa Jehovha hi bwe hi phasega nethu.” — 1 Vatesalonika 4:3.
GIRA WUGEVISISI NYO ETE
Wona edzi u nga gimbileyago khidzo hwindzo ni wubhayi u bwe u wona gambe edzi u nga phasegago khidzo khu gu manega ni mavbanyelo nyo age.
3. Gimbileya hwindzo ni wubhayi
Bhibhiliya yi ngu ganeya khu mwama nyo tumbege nyo pwani khu Josefa a nga bomba gu lala ni nyamayi nyo khaguri a nga ba a vbweta gu lala naye. Lerini Genesi 39:1-12, mu vbedza mu bhula khu siwudziso sesi:
-
Ginani gi giridego Josefa a tutuma? — Wona livhesi 9.
-
Wo si wona kharini, ina Josefa giride gwadi khu gu tutuma? Khu ginani?
Vaphya muhuno va nga pimedzeya kharini Josefa khu gu gimbileya hwindzo ni wubhayi? Sistirini VHIDHYU.
Jehovha o vbweta gu khuye hatshavbo hi wu nyenya wubhayi. Lerini 1 Vakorinto 6:18, mu vbedza mu bhula khu siwudziso sesi:
-
Siemo muni si nga hi girago hi gira wubhayi?
-
U nga gira kharini gasi u gimbileya hwindzo ni wubhayi?
4. U nga si kodza gu pala silingo
Ginani gi nga girago gu si garadza gu dwanisana ni gilingo nyo gire wubhayi? Sistirini VHIDHYU, mu vbedza mu bhula khu giwudziso gegi.
-
Omu nya vhidhyu, ginani egi ndriyathu nyo khaguri a giridego tepo a nga tugula khuye mapimo ni sigiro saye si di hadzi mu gira a si tumbegi ga mwangadzi waye?
Dzimbe dzitepo ambari Makristo nyo tumbege ma ngu dwanisana ni mapimo nya mba handzega. Ginani gi na gu phasago gu mba khaleya gu pimisa silo nya mba handzega? Lerini Vafilipi 4:8, mu vbedza mu bhula khu siwudziso sesi:
-
Silo muni hi yedego gu pimisa khiso?
-
Gu leri Bhibhiliya ni gu khala na hi pharegide thumoni wa Jehovha si nga hi phasa kharini gu pala silingo?
5. Milayo ya Jehovha yi ngu hi phasa
Jehovha a ngu siti esi si gu sadi gwathu. Uye a ngu hi hevbudza esi hi nga girago gasi hi manega ni mavbanyelo nyo age ni edzi hi na phasegago khidzo gu gira isoso. Lerini Mavingu 7:7-27 mwendro sistirini VHIDHYU, mu vbedza mu bhula khu siwudziso sesi.
-
Ginani li giridego lidzaha leli gi yeyedzago gu khigyo li di gu dzi bedza gigaradzoni? — Wona Mavingu 7:8, 9.
-
Khu guya khu Mavingu 7:23, 26, wubhayi wu nga hi vangeya sigaradzo nya sikhongolo. Ho manega ni mavbanyelo nyo age, sigaradzo muni hi nga si potsago?
-
Mavbanyelo nyo age ma nga hi phasa kharini gu vbanya kala gupindruga?
Vathu nyo khaguri vari khavo esi Bhibhiliya yi ganeyago khu gu hengeya malawu nya mwama ni mwama mwendro nyamayi ni nyamayi si lemede ngudzu nigu kha si yeyedzi lihaladzo. Ganiolu, Jehovha, Nungungulu nya lihaladzo, o vbweta gu khuye vathu vatshavbo va vbanya kala gupindruga. Gasi si kodzega isoso, gu vbwetega hi vbanya khu milayo yaye. Lerini 1 Vakorinto 6:9-11, mu vbedza mu bhula khu giwudziso gegi:
-
Khu mawonelo ya Nungungulu, gu hengeya malawu nya mwama ni mwama mwendro nyamayi ni nyamayi khugo gonga gudogoreya nyo vivbe hi yedego gu gu potsa?
Gasi gu tsakisa Nungungulu, hatshavbo gu vbwetega hi vbindrugedza silo nyo khaguri guvbanyani gwathu. Ina si na ni lisima gu dzi garadza gu gira isoso? Lerini Ndzimo 19:8, 11, mu vbedza mu bhula khu siwudziso sesi:
-
Wo si wona kharini, ina milayo ya Jehovha nya mavbanyelo yi ngu pwisisega? Khu ginani u ganeyago isoso?
Jehovha phaside vathu nya vangi gu engisa milayo yaye nya mavbanyelo. Tiyisega gu khuwe anuwe a na gu phasa
VAMBE VARI KHAVO: “Kha sa vivba gu vathu vavili va hengeya malawu, vo nga nga ba va haladzana basi.”
-
U di hadzi khuwe ginani?
REZUMO
Malawu giningwa gya Jehovha ga mwama ni nyamayi va tshadhidego.
Siwudziso nyo wusedze
-
Sigiro muni si pategago avba nya wubhayi?
-
Ginani gi na hi phasago gu gimbileya hwindzo ni wubhayi?
-
Khu ginani si phasago gu engisa milayo ya Jehovha nya mavbanyelo?
HEVBULA SIMBE
Wona gu khuwe khu ginani si gu sa lisima ga Nungungulu gu mwama ni nyamayi va vbanya vatshavbo na va tshadhide.
“Ginani egi Bhibhiliya yi ganeyago khu gu mwama ni nyamayi va vbanya vatshavbo na va sa tshadha?” (Ndrima nya jw.org, khu Giputukezi)
Ambari olu Bhibhiliya yi hevbudzago gu khiyo gu hengeya malawu nya mwama ni mwama mwendro nyamayi ni nyamayi si vivbide, wona gu khuwe khu ginani hi gu mba yela gu nyenya ava va girago isoso.
“Ina si vivbide gu mwama ni mwama mwendro nyamayi ni nyamayi va hengeya malawu?” (Ndrima nya jw.org, khu Giputukezi)
Hevbula khedzi milayo ya Nungungulu khu malawu yi hi vhikeyago khidzo.
“Ina gu hengeya malawu khu kanani si vivbide kamo?” (Ndrima nya jw.org, khu Giputukezi)
Gasi gu wona egi gi kutsidego mwama a nga ba a hengeya malawu ni vama vakwawe gu vbindrugedza womi gasi a tsakisa Jehovha, wona matimu “Va di nyi phara khu ndziya nya githawo”.
“Bhibhiliya yi ngu vbindrugedza womi nya vathu” (Mukhedziseyi nya 1 nya Abril nya 2011, khu Giputukezi)
a Vbavbandze nya gu hengeye malawu basi, lito porneía lo pata simbe sigiro nya malawu, nya nga gu hengeya malawu khu kanani, gu hengeya malawu khavba nyo dzi rume khavbo ni gu pharaphara givbango nya wuvelegi nya muthu gasi gu mu wuseya gudogoreya nya malawu.
You May Also Like
SIWUDZISO VA TALAGO GU GIRA
Ginani gihevbulo nya Bhibhiliya?
Mana mihlamulo nya edzi hi girago khidzo gihevbulo nya Bhibhiliya.
