CIIYO 41
Ncinzi Bbaibbele Ncolyaamba Kujatikizya Koonana?
Bantu banji tabaanguluki kubandika makani aakoonana. Nokuba boobo, ciindi Bbaibbele nolyaamba makani aakoonana, lilaamba cacigaminina pele munzila yabulemu. Nzyolyaamba zilatugwasya kapati. Alimwi eeci cilalimvwisya. Amana buya, Jehova Mulengi wesu. Aboobo ulizyi zintu zikonzya kutugwasya. Ulatwaambila ncotweelede kucita kutegwa tumukkomanisye alimwi acikonzya kutugwasya kutegwa tukapone kukabe kutamani.
1. Ino Jehova waabona buti makani aakoonana?
Koonana ncipego kuzwa kuli Jehova. Uyanda kuti mwaalumi amukaintu ibakwetene kabakukkomanina. Cipego eeci cipa coolwe kubanabukwetene cakutondezyanya luyando ikutali buyo nzila yakuzyala abana. Nkakaambo kaako Jwi lya Leza lyaamba kuti: “Kokkomana amukaintu wakubukubusi bwako.” (Tusimpi 5:18, 19) Jehova uyanda kuti Banakristo banabukwetene kabasyomeka kuli umwi amweenzinyina, kutegwa bataciti bumambe.—Amubale Bahebrayo 13:4.
2. Ino bwaamu ninzi?
Bbaibbele litwaambila kuti “basibwaamu . . . tabakanjili mu Bwami bwa Leza.” (1 Bakorinto 6:9, 10) Balembi ba Bbaibbele ibakalemba mumwaambo wa Chigiriki bakabelesya bbala lyakuti por·neiʹa kupandulula bwaamu. Ibbala eeli libikkilizya (1) koonana a kwabantu batakwetene, (2) koonana kwabantu bakozyenye zizo, alimwi (3) akoonana abanyama. Tulamukkomanisya Jehova alimwi tulagwasyigwa swebo kutugama ciindi ‘notulilesya kubwaamu.’—1 Batesalonika 4:3.
AMWIIYE ZINJI
Amubone mbomukonzya kubutantamuka bwaamu alimwi ambomukonzya kugwasyigwa kuti mwazumanana kusalala mukulilemeka.
3. Amubutije bwaamu
Mwaalumi uusyomeka Josefa wakasolekesya kutegwa azumanane kusalala mukulilemeka. Amubale Matalikilo 39:1-12, akubandika mibuzyo eeyi:
-
Ncinzi cakamukulwaizya Josefa kutija?—Amubone kapango 9.
-
Sena muyeeya kuti Josefa wakasala kabotu? Nkaambo nzi?
Mbuti bakubusi mazuba aano mbobakonzya kumwiiya Josefa akubutija bwaamu? Atweebelele VIDIYO.
Jehova uyanda kuti toonse tubutantamuke bwaamu. Amubale 1 Bakorinto 6:18, akubandika mibuzyo eeyi:
-
Mbukkale nzi ibukonzya kupa kuti umwi acite bwaamu?
-
Mbuti mbomukonzya kubutija bwaamu?
4. Mulakonzya kulizunda sunko
Ino ncinzi cikonzya kupa kuti cikatazye kuzunda sunko lyakucita bwaamu? Atweebelele VIDIYO, akubandika mubuzyo uutobela.
-
Ciindi mukwesu muvidiyo naakabona kuti mizeezo yakwe alimwi azintu nzyaakali kucita zilakonzya kumupa kutasyomeka kumukaintu wakwe, ncinzi ncaakacita?
Nobaba Banakristo basyomeka zimwi ziindi cilabakatazya kuzumanana kuba amizeezo iisalala. Mbuti mbomukonzya kukutantamuka kuzumanana kuyeeya zintu ziletela muzeezo wakoonana? Amubale Bafilipi 4:8, akubandika mibuzyo eeyi:
-
Nzintu zili buti nzyotweelede kuyeeya?
-
Mbuti kubala Bbaibbele alimwi akujata bubi mumulimo wa Jehova mbokukonzya kutugwasya kutantamuka sunko lyakucita cibi?
5. Zyeelelo zya Jehova zilatugwasya
Jehova ulizyi zintu zikonzya kutugwasya. Ulatwaambila mbotukonzya kuzumanana kusalala mukulilemeka alimwi abubotu bujanika kwiinda mukucita boobo. Amubale Tusimpi 7:7-27 naa kweebelela VIDIYO, akubandika mibuzyo iitobela.
-
Mbuti mulombwana umwi mbwaakalinjizya mubukkale busunka?—Amubone Tusimpi 7:8, 9.
-
Kweelana alugwalo lwa Tusimpi 7:23, 26, bwaamu bulakonzya kuleta mapenzi manji. Ikuti naa katusalala mukulilemeka, mapenzi nzi ngotukonzya kutantamuka?
-
Mbuti kusalala mukulilemeka mbokukonzya kutugwasya kuyoopona kukabe kutamani?
Bantu bamwi bayeeya kuti ncolyaamba Bbaibbele kujatikizya makani aakoonana kwabantu bajisi zizo zikozyenye tacili kabotu. Pele Jehova, Leza siluyando, uyanda kuti bantu boonse bakapone kukabe kutamani. Kutegwa tweelele, tweelede kupona kweelana azyeelelo zyakwe. Amubale 1 Bakorinto 6:9-11, akubandika mubuzyo ooyu:
-
Kweelana ambwazibona zintu Leza, sena kulombozya koonana amuntu ngomukozyenye limwi zizo nkokulombozya kulikke kutali kabotu?
Kutegwa tumukkomanisye Leza, toonse tweelede kucinca mumbazu zimwi. Sena cilagwasya kucita boobu? Amubale Intembauzyo 19:8, 11, akubandika mibuzyo eeyi:
-
Sena muyeeya kuti zyeelelo zya Jehova zyakulilemeka zili kabotu? Nkaambo nzi?
Jehova wabagwasya banji kupona kweelana azyeelelo zyakwe zyakulilemeka. Andinywe ulakonzya kumugwasya
BAMWI BAAMBA KUTI: “Cili buyo kabotu koonana amuntu uuli woonse kufwumbwa buyo kuti kamuyandana.”
-
Ino nywebo muyeeya buti?
MUBUFWAAFWI
Koonana ncipego kuzwa kuli Jehova kutegwa mulumi amukaintu wakwe kabakkomana.
Ncinzi Ncomwaiya?
-
Ino bwaamu bubikkilizya micito nzi?
-
Ncinzi cikonzya kutugwasya kubutantamuka bwaamu?
-
Ino tugwasyigwa buti ciindi notutobela zyeelelo zya Jehova zyakulilemeka?
AMUZYIBE ZINJI
Amwiiye kaambo Leza ncayanda kuti mwaalumi amukaintu ibayanda kukkala antoomwe ncobeelede kukwatana mumulawo.
Amubone ncolyaamba Bbaibbele kujatikizya koonana kwabantu bajisi zizo zikozyenye ncokutali kusumpula lusalululo.
“Sena Koonana Kwabantu Bajisi Zizo Zikozyenye Nkubi?” (Cibalo caaintaneti)
Amubone milawo ya Leza kujatikizya misyobo yoonse yakoonana ncoitukwabilila.
“Sena Kumyonta Cinswe Caumwi Nkoonana?” (Cibalo caaintaneti)
Mucakuluula cakuti “Bakandeendelezya Cabulemu,” amubone cakakulwaizya muntu umwi iwakali koonana abantu mbakozyenye limwi zizo mbwaakacinca bukkale bwakwe kutegwa akkomanisye Leza.
“Ibbaibbele Lilakonzya Kubacinca Bantu” (Ngazi Yamulindizi, April 1, 2011)
a Koonana ooku ikutali kwamumulawo kubikkilizya micito mbuli kubikka cinswe kumulomo, koonana kwakumatako, alimwi akusobanya cinswe camuntu uumbi.
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
