TAKGALHTAWAKGA 41
¿Tuku wan Biblia xlakata talakgxtumit?
Lhuwa latamanin ni lichuwinamputunkgo talakgxtumit. Pero akxni xTachuwin Dios lichuwinan talakgxtumit, ni lixkajni lichuwinan chu liwana kinkalitachuwinanan. Tuku Biblia wan xlakata talakgxtumit lu kinkamakgtayayan. Uma ni kaks kinkamalakawaniyan, xlakata wa Jehová tiku matlawinalh Biblia. Wa kinkamalakatsukin chu katsi tuku tlakg tlan kimpalakatakan. Xla kinkamasiyaniyan tuku tayat kilikgalhitkan xlakata namakgapaxuwayaw chu tuku nakinkamakgtayayan nalipaxuwayaw kilatamatkan putum kilhtamaku.
1. ¿Tuku lakpuwan Jehová xlakata talakgxtumit?
Talakgxtumit akgtum xtamaskiwin Jehová. Xla lakaskin pi chatum chixku chu chatum puskat tiku tamakgaxtokgkgonit kalipaxuwakgolh uma tamaskiwin. Talakgxtumit ni kajwatiya tlawa pi akgtum tamakgaxtokgat nakgalhikgo kamanan, wata na tlawa pi xchatiykan nalalimasiyanikgo tapaxkit chu akxtum nalipaxuwakgo uma tamaskiwin. Wa xlakata xTachuwin Dios wan: «Katapaxuwa puskat tiku tatamakgaxtokgti akxni kgawasaku xwanita» (Proverbios 5:18, 19). Jehová lakaskin pi tiku tamakgaxtokgkgonit ni naʼakgskgawikgo tiku tamakgaxtokgkgo. Wa xlakata chatum kstalanina Cristo nikxni xliʼakgskgawit tiku tatamakgaxtokgnit (kalikgalhtawakga Hebreos 13:4).
2. ¿Tuku talakgxtumit nema ni xlitatlawat?
Biblia masiya pi «tiku tlawakgo talakgxtumit nema ni xlitatlawat [...] ni katimakglhtinankgolh xTamapakgsin Dios» (1 Corintios 6:9, 10). Tachuwin xagriego pornéia wa tuku maklakaskinkgolh tiku tsokgwilikgolh Biblia akxni lichuwinankgolh talakgxtumit nema ni xlitatlawat. Uma tachuwin kilhchanima 1) akxni latatalakgxtumi tiku ni tamakgaxtokgkgonit, a 2) tiku tatalakgxtumi xtachixku o xtapuskat chu 3) tiku tatalakgxtumi animales. Akxni lakgmakganaw talakgxtumit nema ni xlitatlawat, makgapaxuwayaw Jehová chu na lhuwa tuku lipaxuwayaw (1 Tesalonicenses 4:3).
TLAKG KALAKPUTSANANIW
Kaʼakxilhwi tuku militlawat xlakata ni natlawaya talakgxtumit nema ni xlitatlawat chu tuku tlan nakitaxtuniyan komo nitu nalixkajwanana.
3. Katsalani talakgxtumit nema ni xlitatlawat
Chatum kgawasa tiku ni xmakgxtakga Dios, xwanikan José, lu liskujli xlakata ni natlawa talakgxtumit nema ni xlitatlawat. Kalikgalhtawakgatit Génesis 39:1-12 chu kalichuwinantit uma:
-
¿Tuku xlakata tsalalh José? (Kaʼakxilhtit versículo 9).
-
¿Lakpuwana pi tlan tuku tlawalh José? ¿Tuku xlakata?
¿Tuku tlan natlawakgo kamanan xlakata nastalanikgo xliʼakxilhtit José chu natsalanikgo talakgxtumit nema ni xlitatlawat? Kaʼakxilhtit VIDEO.
Jehová lakaskin pi putum akinin kalakgmakgaw talakgxtumit nema ni xlitatlawat. Kalikgalhtawakgatit 1 Corintios 6:18 chu kalichuwinantit uma:
-
¿Tuku max xtlawalh pi chatum lataman xtlawalh talakgxtumit nema ni xlitatlawat?
-
¿Tuku militlawat xlakata natsalaniya talakgxtumit nema ni xlitatlawat?
4. Wix tlan namakgatlajaya tuku nitlan matlawiputunkana
¿Tuku max natlawa pi tuwa namakgkatsiyaw nalakgmakganaw talakgxtumit nema ni xlitatlawat? Kaʼakxilhtit VIDEO chu kalichuwinantit uma:
-
Chuna la akxilhwi kvideo, akxni tala akxilhli pi xtalakpuwan chu tuku xtlawama max xtlawalh pi xʼakgskgawilh xpuskat, ¿tuku tlawalh?
Min kilhtamaku, asta kstalaninanin Cristo tiku ni makgxtakgkgo Dios talakaskin naliskujkgo xlakata nalakgmakgankgo nixatlan talakapastakni. ¿Tuku militlawat xlakata nialh nalilakpuwana tuku xmatlawin talakgxtumit nema ni xlitatlawat? Kalikgalhtawakgatit Filipenses 4:8 chu kalichuwinantit uma:
-
¿Tuku talakaskin nalilakpuwanaw?
-
¿Lakpuwana pi komo nalikgalhtawakgayaw Biblia chu putum kilhtamaku naskujnaniyaw Jehová nakinkamakgtayayan namakgatlajayaw tuku nitlan? ¿Tuku xlakata?
5. Xlimapakgsin Jehová kinkamakgtayayan
Jehová katsi tuku tlakg tlan kimpalakatakan. Wa xlakata kinkawaniyan tuku kilitlawatkan xlakata ni nalixkajwananaw talakgxtumit nema ni xlitatlawat chu tuku tlan nakinkakitaxtuniyan komo nakgalhakgaxmataw. Kalikgalhtawakgatit Proverbios 7:7-27 chu kaʼakxilhtit VIDEO. Alistalh kalichuwinantit uma:
-
¿Tuku tlawalh uma kgawasa nema matlawilh tuku nitlan? (Kaʼakxilhtit Proverbios 7:8, 9).
-
Chuna la wan Proverbios 7:23, 26, lu nitlan kakitaxtuni tiku tlawakgo talakgxtumit nema ni xlitatlawat. Pero ¿tuku tlan nakinkakitaxtuniyan komo ni nalixkajwananaw talakgxtumit nema ni xlitatlawat?
-
¿Tuku tasikulunalin namakglhtinanaw kkilhtamaku nema aku mima komo ni natlawayaw talakgxtumit nema ni xlitatlawat?
Makgapitsi lakpuwankgo pi ni limasiya tapaxkit tuku wan Biblia xlakata tiku lakgati xtachixku o xtapuskat. Pero Jehová chatum Dios tiku paxkinan chu xla lakaskin pi putum latamanin kalipaxuwakgolh xlatamatkan putum kilhtamaku. Chu xlakata tlan namakglhtinanaw uma tamaskiwin, talakaskin nalilatamayaw xlimapakgsin Dios. Kalikgalhtawakgatit 1 Corintios 6:9-11 chu kalichuwinantit uma:
-
Chuna la likgalhtawakgaw texto, ¿kajwatiya tiku lakgati xtachixku o xtapuskat wa tuku Dios ni lakgati?
Putum akinin wi tuku kililakgpalitkan xlakata tlan namakgapaxuwayaw Dios. ¿Tlan nakitaxtu komo chuna natlawayaw? Kalikgalhtawakgatit Salmo 19:8, 11 chu kalichuwinantit uma:
-
¿Lakpuwana pi Jehová malakatsali tuku kinkaskiniyan xlakata talakgxtumit? ¿Tuku xlakata chuna lakpuwana?
Jehová kamakgtayanit lhuwa latamanin nakgalhakgaxmatkgo xlimapakgsin xlakata talakgxtumit chu na tlan namakgtayayan
MAKGAPITSIN WANKGO: «Ni talakgalhin pi katalakgxtumikgolh chatiy latamanin tiku lapaxki maski ni tamakgaxtokgkgonit».
-
¿Tuku xwanti wix?
TUKU KATSINIW
Talakgxtumit akgtum xtamaskiwin Jehová chu xla lakaskin pi kalipaxuwakgolh chatum chixku chu chatum puskat tiku tamakgaxtokgkgonit.
¿Tuku xkgalhtinanti?
-
¿Tuku kilhchanima talakgxtumit nema ni xlitatlawat?
-
¿Tuku nakinkamakgtayayan ni natlawayaw talakgxtumit nema ni xlitatlawat?
-
¿La litamakgtayayaw akxni kgalhakgaxmataw xlimapakgsin Jehová xlakata talakgxtumit?
TLAKG KAKATSINI
Kaʼakxilhti tuku xlakata Dios lakaskin pi katamakgaxtokgkgolh chatum chixku chu chatum puskat tiku akxtum tawilaputunkgo.
«¿Tuku wan Biblia xlakata tiku akxtum wilakgo pero ni tamakgaxtokgkgonit?» (Artículo xalak jw.org)
Kaʼakxilhti pi tuku wan Biblia xpalakata tiku lakgati xtachixku o xtapuskat ni tlawa pi nakalakgmakgankan o nakalaksakpaxkikan latamanin.
«¿Akgtum talakgalhin tiku lakgati xtachixku o xtapuskat?» (Artículo xalak jw.org)
Kaʼakxilhti la kinkamakgtayayan xtastakyaw Biblia ni natlawayaw talakgxtumit nema ni xlitatlawat.
¿Tuku makgtayalh chatum chixku tiku xkalakgati xtalakchixkuwin nalakgpali xlatamat chu namakgapaxuwa Dios? Kalikgalhtawakga biografía nema wanikan: «Kilimasiyanikgolh kakni».
«Biblia kalakgpalinilh xlatamatkan» (Artículo xla Makatsinina)
a Talakgxtumit nema ni xlitatlawat ni kajwatiya kilhchanima akxni latatalakgxtumikan, wata na makgtanuma niku limaklakaskinkan xkilhni achatum o xtan, o nalaxamani tuku xlichixku o tuku xlipuskat xlakata talakgxtumiputunkgo.
You May Also Like
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
