DYONDZO 41
Bibele Yi Ri Yini Hi Timhaka Ta Masangu?
Vanhu vo tala swa va tikela ku vulavula hi timhaka ta masangu. Hambiswiritano, loko Bibele yi vulavula hi swa masangu, a yi jikajiki kambe yi endla tano hi ndlela leyi xiximekaka. Leswi yi swi vulaka swa hi pfuna. Sweswo swa twisiseka hikuva Yehovha i Muvumbi wa hina. Kutani wa swi tiva leswi nga swinene eka hina. U hi byela leswi hi faneleke hi swi endla leswaku hi n’wi tsakisa ni leswi nga ta hi pfuna leswaku hi tiphina hi vutomi hilaha ku nga heriki.
1. Yehovha u ri yini hi timhaka ta masangu?
Timhaka ta masangu i nyiko leyi humaka eka Yehovha. U lava leswaku wanuna ni wansati lava tekaneke va tiphina hi yona. Vatekani va kota ku va ni vana hikwalaho ka nyiko leyi ni ku tlhela va kombisana rirhandzu hi ndlela ya ntumbuluko ni leyi tsakisaka. Hi yona mhaka Rito ra Xikwembu ri vulaka leswaku “tsaka hi nsati wa vuntshwa bya wena.” (Swivuriso 5:18, 19) Yehovha u langutele leswaku Vakreste va tshembeka eka lava tekaneke na vona, loko va endla tano a va nge oswi.—Hlaya Vaheveru 13:4.
2. I yini ku tikhoma ku biha hi swa masangu?
Bibele yi hi byela leswaku “lava tikhomaka ku biha hi swa masangu . . . a va nge yi dyi ndzhaka ya Mfumo wa Xikwembu.” (1 Vakorinto 6:9, 10) Vatsari va Bibele lava yi tsaleke hi Xigriki va tirhise rito por·neiʹa ku hlamusela ku tikhoma ku biha hi swa masangu. Rito rero ri katsa (1) vanhu lava endlaka timhaka ta masangu va nga tekananga, a (2) vanhu lava endlaka timhaka ta masangu va ri va rimbewu leri fanaka, (3) ku endla timhaka ta masangu ni xifuwo. Hi tsakisa Yehovha hi tlhela hi tivuyerisa loko hi “papalata ku tikhoma ko biha hi swa masangu.”—1 Vatesalonika 4:3.
ANAKANYISISA
Twana ndlela leyi u nga papalataka ku tikhoma ku biha hi swa masangu ni ndlela leyi u nga vuyeriwaka ha yona loko u tshama u basile emahanyelweni.
3. Balekela ku tikhoma ko biha hi swa masangu
Jaha ro tshembeka leri vuriwaka Yosefa ri arile loko wansati un’wana a lava ku etlela na rona. Hlaya Genesa 39:1-12, ivi mi bula hi swivutiso leswi:
-
I yini lexi endleke Yosefa a baleka?—Vona ndzimana 9.
-
U ehleketa leswaku Yosefa u endle xiboho lexinene? Hikwalaho ka yini u vula tano?
Namuntlha vantshwa va nga n’wi tekelela njhani Yosefa kutani va balekela ku tikhoma ko biha hi swa masangu? Tlanga VHIDIYO.
Yehovha u lava leswaku hinkwerhu hi papalata ku tikhoma ko biha. Hlaya 1 Vakorinto 6:18, ivi mi bula hi swivutiso leswi:
-
I swiyimo swihi leswi nga endlaka munhu a tikhoma ku biha hi swa masangu?
-
U nga ku balekela njhani ku tikhoma ko biha?
4. U nga lwisana ni ndzingo
I yini lexi nga endlaka swi tika ku lwisana ni ndzingo wa ku tikhoma ku biha hi swa masangu? Tlanga VHIDIYO, ivi mi bula hi xivutiso lexi landzelaka.
-
Makwerhu wa le ka vhidiyo leyi, u endle yini loko a xiya leswaku leswi a a swi anakanya ni ku swi endla a swi ta endla a nga tshembeki eka nsati wakwe?
Hambi ku ri Vakreste vo tshembeka mikarhi yin’wana swa va tikela ku anakanya hi swilo leswi baseke. U nga swi papalata njhani ku anakanya hi swilo leswi thyakeke? Hlaya Vafilipiya 4:8, ivi mi bula hi swivutiso leswi:
-
Hi fanele hi ehleketa hi swilo swa njhani?
-
Ku hlaya Bibele ni ku tshama hi khomekile hi ku tirhela Yehovha swi nga hi pfuna njhani leswaku hi lwisana ni ndzingo wo dyoha?
5. Milawu ya Yehovha ya hi pfuna
Yehovha wa swi tiva leswi nga swinene eka hina. U hi byela leswi nga hi pfunaka leswaku hi tshama hi basile emahanyelweni ni vuyelo lebyi vaka kona loko hi endla tano. Hlaya Swivuriso 7:7-27 kumbe u tlanga VHIDIYO, ivi mi bula hi swivutiso leswi landzelaka.
-
Jaha leri boxiweke eka Swivuriso, ri tinghenise njhani exiyin’weni lexi ringaka?—Vona Swivuriso 7:8, 9.
-
Hi ku ya hi Swivuriso 7:23, 26, ku tikhoma ku biha hi swa masangu swi nga tisa vuyelo byo vava. Hi nga papalata swiphiqo swihi loko hi tshama hi basile emahanyelweni?
-
Loko hi tikhoma kahle, swi nga hi pfuna njhani leswaku hi tiphina hi vutomi hilaha ku nga heriki?
Vanhu van’wana va ehleketa leswaku leswi Bibele yi swi vulaka hi ku rhandzana ka vanhu va rimbewu leri fanaka a swi kombisi rirhandzu. Kambe Yehovha, Xikwembu lexi nga ni rirhandzu, u lava leswaku un’wana ni un’wana a tiphina hi vutomi hilaha ku nga heriki. Leswaku hi kota ku tiphina hi vutomi lebyi, hi fanele hi hanya hi milawu ya yena. Hlaya 1 Vakorinto 6:9-11, ivi mi bula hi xivutiso lexi:
-
Hi ku ya hi langutelo ra Xikwembu, xana vanhu lava endlaka timhaka ta masangu ni vanhu va rimbewu ro fana ni ra vona hi vona ntsena va dyohaka?
Leswaku hi tsakisa Xikwembu, hinkwerhu hi fanele hi cinca swo karhi eka mahanyelo ya hina. Xana swa boha leswaku hi tikarhata? Hlaya Pisalema 19:8, 11, ivi mi bula hi swivutiso leswi:
-
U ehleketa leswaku milawu ya mahanyelo ya Yehovha ya twala? Hikwalaho ka yini u vula tano?
Yehovha u pfune vo tala leswaku va hanya hi milawu yakwe ya mahanyelo. Na wena a nga ku pfuna
VAN’WANA VA RI: “A swi bihanga loko vanhu vambirhi va endla timhaka ta masangu, ntsena va rhandzana.”
-
Wena u ri yini?
NKATSAKANYO
Timhaka ta masangu i nyiko leyi humaka eka Yehovha leyi nuna ni nsati va faneleke va tiphina ha yona.
Mpfuxeto
-
Ku tikhoma ku biha hi swa masangu swi katsa yini?
-
I yini leswi nga ta hi pfuna ku papalata ku tikhoma ku biha hi swa masangu?
-
Hi vuyeriwa njhani loko hi hanya hi milawu ya Yehovha ya mahanyelo?
KUMA LESWI ENGETELEKEKE
Twana lexi endlaka Xikwembu xi lava leswaku wanuna ni wansati lava lavaka ku tshama swin’we va tekana.
Twana leswaku hikwalaho ka yini hi nga fanelanga hi venga vanhu lava rhandzanaka va ri va rimbewu leri fanaka hambileswi Bibele yi vulaka leswaku swi bihile.
Twana leswaku milawu ya Xikwembu ya mayelana ni timhaka ta masangu yi hi sirhelela njhani.
Eka mhaka ya vutomi leyi nge, “Ti Ndzi Kombise Xichavo,” twana leswi endleke wanuna loyi a a rhandzana ni vavanunakulobye a cinca mahanyelo leswaku a tsakisa Xikwembu.
“Bibele Yi Hundzula Vutomi Bya Vanhu” (Xihondzo xo Rindza, April 1, 2011)
a Swiendlo sweswo leswi nga amukelekiki swi katsa ku endla timhaka ta masangu hi ku kongoma, hi nomu, hi hala ndzhaku ni ku khomakhoma swirho swa rimbewu swa munhu un’wana hi xikongomelo xa ku pfuxa ku navela ka timhaka ta masangu.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
