ISOMO 41
Baibuli Egamba ki ha Kuterana?
Abantu baingi batiina kubazaaho kuterana. Baitu, Baibuli obwebazaaho okuterana, ekikora omu mulingo ogw’ekitiinisa kandi ogutali gw’okwesereka. Eky’egamba kitugasira. Eki kikuru habwokuba Baibuli eruga hali Yahwe Omuhangi waitu. Nahabweki amanyire ekirukukirayo obukuru haliitwe. N’atugambira ekitusemeriire kukora kumusemeza hamu n’ekiratukonyera kwegondeza omu bwomeezi ebiro n’ebiro.
1. Yahwe arora ata okuterana?
Kuterana kisembo kuruga hali Yahwe. N’agonza kuterana kuleete okusemererwa hagati y’omusaija n’omukazi abaswerangaine. Ekisembo kinu tikigarukira ha kuleetera abaswerangaine kutunga abaana kyonka, baitu kibakonyera kwolekangana okugonza omu mulingo ogw’obuhangwa kandi ogw’okusemererwa. Egi niyo ensonga habwaki Ekigambo kya Ruhanga kigamba ngu: “Osemererwege mukazi wobuto bwawe.” (Enfumo 5:18, 19) Yahwe n’agonza Abakristaayo abaswerangaine besigengana nukwo batasiihana.—Soma Abaheburaniya 13:4.
2. Obusiihani nikyo kiki?
Baibulil n’etugambira ngu “nobubakuba abasihani . . . tibaligwetwa bukama bwa Ruhanga.” (1 Abakolinso 6:9, 10) Abahandiiki ba Baibuli abaahandiikire omu Ruyonani bakakozesa ekigambo por·neiʹa kusoborra obusiihani. Ekigambo eki nikitwarramu (1) okuterana a hagati y’abantu babiri abatali omu buswere, (2) obukuuhya, hamu (3) n’okuterana n’ebisoro. Tusemeza Yahwe kandi kitugasira obu ‘tulekera kimu obusiihani.’—1 Abasesalonika 4:3.
YEGA EBIRUKUKIRAHO
Manya omulingo osobora kwetantara obusiihani hamu n’omulingo orukwija kugasirwa obw’oraikara oli mwecumi omu ngeso.
3. Mwiruke obusiihani
Omusaija omwesigwa arukwetwa Yusufu akangirra omukazi ayagondeze kuterana nauwe. Musome Okubanza 39:1-12, hanyuma mubazeeho ebikaguzo binu:
-
Kiki ekyaletiire Yusufu kwiruka?—Rora orukarra 9.
-
N’otekereza Yusufu akakora encwamu enyakuhikire? Habwaki?
Kasumi kanu, abato nibasobora bata kuhondera ekyokurorraho kya Yusufu bakairuka obusiihani? Mutekeho VIDIYO.
Yahwe n’agonza itwena twange obusiihani. Musome 1 Abakolinso 6:18, hanyuma mubazeeho ebikaguzo binu:
-
Bintu ki ebisobora kuleetera omuntu kugwa omu busiihani?
-
N’osobora ota kwiruka obusiihani?
4. N’osobora kwanga kwohebwa
Kiki ekisobora kutulemesa kwanga ekyohyo eky’okugwa omu busiihani? Mutekeho VIDIYO, hanyuma mubazeeho ekikaguzo ekirukuhonderaho.
-
Omu vidiyo, ow’oruganda obuyakimanyire ngu ebitekerezo bye hamu n’ebikorwa bye bisobora kumuleetera kutaba mwesigwa hali mukazi we, akakora ki?
Obwire obumu, Abakristaayo abesigwa kibagumira kwikaza ebitekerezo byabo biri byecumi. N’osobora ota kwetantara kwikara n’otekerezaaho ebintu ebitasemiire? Musome Abafiripi 4:8, Hanyuma mubazeeho ebikaguzo binu:
-
Bintu ki ebitusemeriire kutekerezaaho?
-
Kusoma Baibuli n’okwikara twine bingi eby’okukora omu kuheereza Yahwe kitukonyera kita kurwanisa ekyohyo eky’okukora ekibi?
5. Endengo za Yahwe zitugasira
Yahwe n’amanya ebirukutugasira. N’atugambira nk’oku tusemeriire kwikara tuli becumi omu ngeso hamu n’omulingo tugasirwa obutukikora. Musome Enfumo 7:7-27 rundi Mutekeho VIDIYO, hanyuma mubazeeho ebikaguzo ebirukuhonderaho.
-
Omusigazi akagwa ata omu nyikara eyamuletiire kwohebwa?—Rora Enfumo 7:8, 9.
-
Kusigikirra ha Enfumo 7:23, 26, obusiihani nibusobora kurugwamu ebizibu eby’amaani. Nitwija kwetantara bizibu ki kakuba twikara tuli becumi omu ngeso?
-
Kuba abecumi omu ngeso nikitukonyera kita kwegondeza omu bwomeezi ebiro n’ebiro?
Abantu abamu batekereza ngu Baibuli eky’eyegesa ha bukuuhya tikyoleka okugonza. Baitu Yahwe Ruhanga ow’okugonza, n’agonza buli omu ayegondeze omu bwomeezi ebiro n’ebiro. Baitu kinu nikitwetaagisa kuhondera endengo ze. Musome 1 Abakolinso 6:9-11, hanyuma mubazeeho ekikaguzo kinu:
-
Kusigikirra ha ndora ya Ruhanga, okw’egomba okw’obukuuhya nukwo kwonka okubi?
Kusobora kusemeza Ruhanga, itwena tusemeriire kukora empindahinduka. Amaani tutekamu gafa busa? Musome Zabuli 19:8, 11, hanyuma mubazeeho ebikaguzo binu:
-
N’otekereza endengo za Yahwe ezirukukwata ha ngeso z’amagezi? Habwaki?
Yahwe akonyiire baingi kuhondera endengo ze ezirukukwata ha ngeso. Naiwe n’asobora kukukonyera
ABANTU ABAMU BAGAMBA: “Omuntu naikirizibwa kuterana n’omuntu ondi wena, ekikuru kakuba baba nibagonzangana.”
-
Iwe n’okitekerezaaho ki?
OYEGERE KI?
Okuterana kiri kisembo kuruga hali Yahwe hagati y’omusaija n’omukazi abali omu buswere.
Kweijukyamu
-
Obusiihani nibutwarramu ki?
-
Kiki ekiratukonyera kwetantara obusiihani?
-
Tugasirwa tuta obutuhondera endengo za Yahwe ezirukukwata ha ngeso?
SERULIIRIZA
Manya ensonga habwaki Ruhanga n’agonza omusaija n’omukazi abarukugonza kwikara hamu kutaaha obuswere.
Manya ensonga habwaki endengo za Baibuli ezirukukwata ha bukuuhya zitarukumanyisa ngu tunobe abakuuhya.
“Obukuuhya Kibi?” (Ekicweka kinu kiri ha mukura)
Manya omulingo ebiragiro bya Ruhanga byona ebirukukwata ha kuterana bitulinda.
“Kukozesa Omunwa Kuzaanisa Ebicweka eby’Ensoni eby’Omuntu Ondi Nakwo Kuterana?” (Ekicweka kinu kiri ha mukura)
Omu kicweka “Bakantwaza omu Mulingo ogw’Ekitiinisa,” rora ekyayekambisize omukuuhya kukora empindahinduka kusobora kusemeza Ruhanga.
“Baibuli Ehindura Obwomeezi” (Watchtower, eya Apuli 1, 2011)
a Engeso zinu ezitarukwikirizibwa nizitwarramu ebikorwa bingi. Ekyokurorraho kuterana hagati y’abantu abatali omu buswere, kukozesa omunwa kuzanisa ebicweka by’ensoni eby’omuntu ondi, kuterana n’omuntu ondi omu kibunu, rundi kukwatakwata ebicweka eby’ensoni eby’omuntu ondi ow’otali nauwe omu buswere.
